10
Kah be naeo, kah mjü Isarea phäh tä sham lä ngüshe kuum kyan naak ah nih yah vai u sun kah hlü ko yü sou nak kkhüt kti ni. Ah nih nih-e hin Pangsiima phäh mtun ei kkhüt ktie ati sun kei hin shak shi ni. Lüphi ah nih-e üng theem ngvaai naak am ve. Pangsiim noh kkhyaang sa i hok kba jah ng'ye püi be kti ati sun am kshing u. Asuna phäh ah nih päta lam üng ngpyuun vaia mtun ei ulü Pangsiima peeta ngpyuun naak sun am dou daang u. Thuum hin Khrito üng küm mseei lok kti. Asuna thoon lü jum ei naküt kti Pangsiim üng ng'ye be hnüh ktie.
Moshei noh thuum läka phäh Pangsiim üng ng'ye be vaia mong Sangsiim üng yuk hüt kti ni. “Thuum läk naküt ktie thuuma phäh xüng yah kkhaie” tilü ah pyen. Lüphi jum ei naak üng Pangsiim üng ng'ye naak bea mong hin kba ng'yuk be tü kti. “U kkhaan khoa kaai kkhai ni” tilü käh suum saaka. Asun hin Khrito kho mdeka nih khü be üng atäng ni. “U Mo Pia jukyum kkhai ni” tilü phi käh suum saaka. Asun phi Khrito sun kkhyaang kthiea ve naaka kkhyüh nih laak vaai hlü be üng atäng ni. Jum eia phäh üng ngpyuun naaka mong i ng'yuk kti ni ti ta Pangsiima kkhyü hin nang üng säh kti ni. Nah mpyong üng velü nah mlung k'uma phi vek kti ni. Ahin kei nih-e noh kah nih kpyaü hü hin jum ei naaka mong ni. Booi Jeishüh sun nah mpyong üng “Booi Pa ni” tik kti lü Pangsiim noh ah nih sun thih naaka kkhyüh ah thoh shak be ni tia nah mlung üng nah jum ei ta kuum kyan naak nah yah kti. 10 I lüni ti ta nih mlung üng nih jum eia phäh Pangsiim üng nih ng'ye be kti. Nih mpyong üng nih jum eia mong nih shak shi ta kuum kyan naak nih yah kti ni. 11 Sangsiim üng ng'yuk kti ta “Ah nih jum ei kti ta ah ngke ei naaka am thoon” tilü vek kti. 12 I lüni ti ta Pangsiim noh Jüdah mjü jah Kärih mjü sun am jah mkhoi mhnga. Pangsiim hin ah nih bänga Booi Pa ni. Ah nih nghui nak kti naküt sun ah bä naak küm seei ktia jah pek kti. 13 Sangsiim üng ang'yuka kba “Pangsiima ngming khü lü hjok khah kti naküt kuum kyan naak yah kkhaie” tilü vek kti.
14 Lüphi kkhyaange noh am ah nih jum ei lo u ta ah ngming sun i hok kba khü khoh kkhaie ja. Thang kdo kkya am ah nih ngjaak u ta i hok kba jum ei lokhoh kkhaie ja. Ah nih veeia thang kdo kya kpyaü vaai kti am ave ta i hok kba ngja-khoh kkhaie ja. 15 Thang kdo kkya kpyaü kkhai jah tüüi kti am ave ta i hok kba sit lü kpyaü vaai khoh kkhaie ja. Sangsiim üng yuk ktia kba “Diim deih naak jah pek kti thang kdo kkya kpyaü ktiea pha lo hin je kyai na-phyak kti” tilü vek kti. 16 Lüphi kkhyaang naküt noh thang kdo kkya dou daang ktie am ni. Shahma ngsiim Hei Shajah noh “Booi Pao, u noh kah nih pyen jah ksang nak ktie ni” tilü pyen khoi kti. 17 Asun kba ani ta kkhyaange noh thang kdo kkya ngja-ma ulü va jum ei lok kkhaie. Thang kdo kkya ta Khritoa mong pyen ni.
18 Asuna thoon lüphi kkhyaange noh thang kdo kkya am ngjak ktie mä tilü kah ngthäh hlük kti. Ngjak ktie kyo ni. Sangsiim üng ang'yuka kba “Ah nih kthai u sun kho mdek abäng üng pha-hü kti ni. Ah nih kkhyü mpyong kho mdek akphyut säpa ngpyaü hü ktie ni” tilü vek kti.
19 Kei noh “Isare kkhyaange noh am ngja-kya ktie mä” tilü kah ngthäh hlübe tü kti. Mosheia malam pyen hin kba vek kti. “Kkhyaang mjü ksang am nik ktiea phäh nah nih ngkeei ngku vai ua kah poh kkhai ni. Nghmoong kti kkhyaang mjüea phäh nah nih mlung kah ning jah shou shak kkhai ni” tilü ah pyen.
20 Kona shahma ngsiim Hei Shajah noh malam pyen ah pyen dat ta “Kei am nah shui hjap ktie noh nah hmuk ktie. Keia mong am ngthäh ngkhyah ktie üng kah pät kah ngshing ngte kti ni” ah ti.
21 Lüphi Isare mjüea mong Pangsiim noh ah pyen ta “Keia ti pyen am nah ksang na-hlük ktie jah nah kpet mjak ktie sun jah dou daang hlü ngüshe amhnüüp mata kah kut kah jah shäng peet kyo ni.”