4
1 Kah be naeo, ning jah kphya nak kkhüt lü kah ning jah hmuhlük kti. Nang nih-e hin kah je kyai naak jah Booi lu ngbüna nah nih thoon ktie ni. Asuna thoon lü Khrito jum ei naak üng ngkhääng ktia ve-ubä.
2 Nang nih Ejo Tijah jah Sün Tike hin Booi Jeishüh üng ngsi ngna-a kba ngkhot ngsheng lü nah nih ve vaia kah ning jah nghui nak kti ni.
3 Nang noh phi keia hlonga kkhyü shing üng khuut poh kti aana nghnu mi xooi hin jah ku ei bä. I lüni ti ta ah nih nih hin thang kdo kkya angpyaü hü vaia keia hlonga ngnü lü khuut poh kti xooi ni. Asun k'um üng Kalemen jah kah khuut poh püie phi ngpüi ktie. Ah nih ngming phi Pangsiima shak sa up üng ng'yuk kti.
4 Nang nih-e hin Booi Pa üng nglooi ei lü anghläia je kyai lü ve-ei ubä. “Je kyai ubä” tilü hleh lü kah pyen be tü ni.
5 Kkhyaang abänga kkhaana hnip hnooi ktia mlung kkyoong ta-ubä. Booi Pa lohlü be hnüh kti ni.
6 I üng phi käh pyang ma laang ubä. Hlü ko kti naküt nghui naak jah je ei naak üng tä sham lü Pangsiim üng mtheh ubä.
7 Asun kba nah nih poh ta kkhyaanga kshing hmat üng käh kpha khoh-a Pangsiima diim deih naak nah nih yah ei kkhaie. Asuna diim deih naak üng mlung üp kko om naak yah ei u kti lü Booi Jeishüh Khrito mah mah nah nih nglooi ei kkhaie ni.
8 Kah be naeo, akpäih naaka kah pyen hlü ta do ktia ngkho, mküüi ei phya ktia ngkho, sang kti, hlüng taai kti, pyuun kti, ngsiim kti, kphya na-phyak kti, lei shong phya ktia ngkhoe sun jah su ngngaai lü nah nih mlung üng ksep kyet ubä.
9 Kei noh kah ning jah msuh mtheh jah nah nih su ngngaih dou daana kba, kah veeia nah nih hmuh ngjaaka kba ve soh ubä. Asun kba nah nih ve ta diim deih naak jah pek kti Pangsiim nah nih hlonga vek kkhai ni.
10 Booi Pa üng kah je kyai pi pi kti ni. I a thoon lüni ti ta tuh-a ng'yet üng nah nih nah kphya naak nah nih ngshing ngte shak be tü ua phäh ni. Nang nih-e noh anghläia ngui üng nah nih nah ku ei hlük ktie atia kah kshing ni. Asuna thoon lüphi kho vei am nah pe-khoh u kti.
11 Nang nih-e noh am nah nih nah kbi lo ham sän üng am lüm ei ngüshe kah pyen hlü am ni. A ia ve ngüshe phi kah mkhüh-a hnip naak khoh vai kah ngsuuk ei pääng kti ni.
12 Am lüm ei ngüshe phi kah vekhoh kti. Hleei hlook ei lü phi kah vekhoh kti. I a ve ngüshe phi phü ngüshe phi nah kkhyoot ei lüphi i hok kba kah mkhüh hnip khoh kkhai atia Pangsiim noh nah mdan pääng kti. Ahoa phi a i a ksüün üng phi kah vekhoh kti.
13 Khritoa nah peeta hiit üng a i phi khyaih naak khoh-a ktha kei üng vek kti.
14 Lüphi kah khui kha naaka kshuunga nah nih nah ku ei u hin do pi pi kti ni.
15 Kei hin Make Tonih-a kkhyüh thang kdo kkya kpyaü kkhaia kah ngpyaih xata kkhyüh nah ku ei kti hin nang nih-ea shaang däk ni atia nah nih pät Philipih mlüh-a ka be nae noh angtea nah nih hmat ktie ni. Nang nih-e noh va ngui nah nih nah kbi ktie. Nah nih veeia ni kei noh ngui kah dou.
16 Teshah Lonih mlüh-a kah ve k'um üng kah hlü ko ei ave üng nang nih-e noh va ahun thak käh dan ktia nah nih nah kbi lok ktie.
17 Kei noh nah nih nah yet yah ei hlü ngüshe am ni. Lüphi nah nih poh mshah-a phäh üng Pangsiim noh akheen ah ning jah peet vai kah hlü ei ni.
18 Tuh-a ta Epa Pyotih üng nah nih lo shak yah ei ngüshe kei üng hlü ktia kthaka phi hleei ei ktia vek kti ni. Nah nih nah kbi lo hin Pangsiima phäh ng'uui lü Pangsiim noh xe nalü ah dou hlüa khah naaka phi thoon kti ni.
19 Asuna thoon lü kah Pangsiim noh jou taai mah kti ah khoh kkhyam üng ka hlü ko naküt kti sun Booi Jeishüh Khrito üng ning jah pek kkhai.
20 Nih Pa Pangsiim anghläia jou taai mah she. Amen.
21 Booi Jeishüh Khrito üng shääng lü Pangsiim jum ei kti abäng kah ning jah shüüm ktie ati sun jah mtheh ua. Kah hlonga vek kti be nae noh phi ning shüüm ktie ni.
22 Pangsiim jum ei kti abäng noh ning shüüm ktie. Aktung boka ta Kesha shang phuhlanga booi ima jum ei ktie noh ning shüüm ktie.
23 Booi Jeishüh Khritoa bä naak nang nih üng veshe. Amen.