1 Kah kphya naak looi püieo, ahin hin nah nih veeia kah yuk lo sa anghngih naak ni. Sa ah nih nghngih üng phi ahina ngkhoe ning jah shüüm shak lü ngsiim ngsaih ktia nah nih ngnei shak naak vaia ning jah mhläk phak vai kah mtun ei kti ni. 2 Asun üng ahlaan üng ngsiim ngsaih kti shahma ngsiimea pyen jah nah nih ngshäea veeia kkhyüh nah nih ngjaak kuum kyan kti nih Booi Pa msuh mtheh hin kah ning jah shüüm hlü shak kti ni. 3 Aktung bok ta akpäih naaka kha üng am do kti kpaam ei naak läk kti pou lok kkhaie ni atia nah nih kshing yah kuung kuung kkhaie ni. Ah nih nih-e noh ning jah yaih yün ei kkhaie ni. 4 Ah nih nih-e sun noh “Booi Jeishüh noh ‘Kah lobe kkhai ni’ tilü kkhyü taam kti am ni mä. Tuh-a ta hoa vek kti ni. Nih pu pae thi pääng ktie ni. Lüphi Pangsiim noh kho mdek ah mhnün msenga kkhyüh i phi am ngthu nghlai, alang lang ei va nik kba” tilü ning jah yaih yün ei kkhaie ni. 5 Ahlaan nu üng Pangsiim noh ah pyen ksaak üng kkhaan kho ah mhnün mseng ni. Kho mdek phi mpang lai tuia kkhyüh Pangsiim noh ah phyü mkhya lo ni. Ahi bange hin ah nih nih-e noh käh su ngngaai hlü lü ah nih hoih-in u ni. 6 Ahlaan üng ana vek ktie jah ah nih mlüh ngname phi Pangsiim noh mlik tui phu shak lü jah ksim kpyak lü ah jah mkhyüh pääng ni. 7 Pangsiima kkhyü kuung üng tuh-a vek kti kho mdek jah kkhaan kho hin Pangsiim noh si jaang naaka mhnüüp üng mei üng ah mkhyüh vaia ah taak ham ni. Asuna mhnüüp üng Pangsiim noh ah nih am kshing hlük ktie jah si jaang lü jah sim pyak shak kkhai ni.

8 Kah looi püieo, “Pangsiima phäh-a mhnüüp mat däk hin kho kum thoong mata mäi, kho kum thoong mat phi mhnüüp mata mäi ni” ti hin nah nih shüüm vai u. 9 Kkhyaang akhäke noh ta Pangsiim noh ah kkhyü taama kba ah poh vai sü soon ktia ngngaai ktie ni. Asun kba am ni laang. Pangsiim noh nah nih phäh-a ah mlung mshaaü kti ni. Ah nih noh u phi am sim pyak hlü shak, kkhyaang abäng ah nih mkhyea kkhyüh ah nih vuuk be vaia mkhüh nak kti ni.

10 Lüphi Booi Pa-a si jaang naak mhnüüp mpyuk ei ah lai loa kba u noh phi am ah kshinga ksüün üng phalok kkhai ni. Kona kkhaan kho lo phi, lon lon ei ktia ng'yüng lü sim pyak khyük leih kkhai ni. Aai shi mah khya phi mei noh jah uui kkhai. Kho mdek jah kho mdek kkhaana ve naküt ktie phi thäü thäüa mei noh jah uui lü kkyük leih kkhaie ni. 11 Akve naküt asun kba pyo pyak lok kkhaie thoon lü nih nih-e hin i hok kba nih ve soh poh mshah ta looi ngkäih kkhai ni. Pangsiim nih lei shong lü ah nih-a hlü eia ngsiim ngsaih ktia shak üng ve vaia do kti ni. 12 Booi Pa ah kyum lo be vaia mhnüüp sun yüng lü, ah lo be lan vaia nih mtun ei kom u. Asuna mhnüüp üng kkhaan kho lo mei noh uui lü khyük kkhai. Aai shi mah khyae phi mei üng ngkhyo lü sim pyak kkhaie ni. 13 Lüphi Pangsiim noh kkhaan kho kthaai jah kho mdek kthaai jah piit pyaan peet kkhaia kkhyü taam kti ni. Asua pyuun naak be bang kkhai. Asuna kkhaan kho kthaai jah kho mdek kthaai sun nih ääp ei lü nih yüng ei ktie.

14 Asuna thoon lü, kah looi püieo, Booi Pa-a lo naak be vai mhnüüp mtäh shoa ah ma-a kbäü ei naak käh vek ktia mtuih sheet naak üng nah nih ngsiim vaia Pangsiim üng nah nih ng'ye vaia mtun ei ua. 15 Pangsiima mlung mshaaü hin nang nih-e noh kuum kyan naak nah nih yah naak vaia mkota ngngaai u bä. Kah nih kphya naak kah nih na Polüh noh phi Pangsiim noh ah nih üng ah peeta theem ngvaai naak üng ahin kba kuunga ah yuk ni. 16 Asuna ngkhoe sun sa ah yuk naküt üng ah pyen ni. Lüphi ah sa yuka k'uma ka akhäk dang yah vai khak ktie ni. Asuna thoon lü am theem ngvaai kti jah jum ei naak am ngkhääng ktia kkhyaange noh asuna kkhyüe sun ngngaai mkhye ktie ni. Aksea Sangsiim sa upe üng phi kkhyaange noh asun kba poh ulü ah nih sim pyak naaka thoon kti ni.

17 Kah kphya naak kah looi püieo, asuna thoon lü kei noh tuh-a kkhyüh kah ning jah namsing msääi kti ni. Pangsiima thuum am läk hlü ktia kkhyaange khye ktia msuh mtheh naak üng nang nih-e noh lam käh nah nih hmü vaia nah nih jum ei naak käh sim pyak kkhaia mseei ubä. 18 Nang nih-e noh ta jah kuum kyan kti nih Booi Pa Jeishüh Khrito sha lü nah nih kshing lo vaia, ah nih-a bä naak nah nih yah ei lo bok bok vaia mtun ei ua. Booi Jeishüh Khrito tuh-a phi angshääia phi hlüng taai däm duh she. Amen.