PETA-A SA ANGHNGIH NAAK
Peta noh Asha hnea shaange üng ah kbia sa anghngih naak
1
Kei Shimon Peta hin Booi Jeishüh Khritoa xüh shoh jah ngshäa kah thoon kti. Nih Pangsiim jah kuum kyan kti Booi Jeishüh Khritoa jah peeta pyuun naaka phäh üng keia kba jum ei ktiea veeia sa kah yuk lok kti ni.
Pangsiim jah nih Booi Jeishüh Khrito kshing hmat naak üng bä naak jah diim deih naak nang nih üng be bang lü veshe.
Nih nih-e hin Pangsiima mlung hlüa nih ve soh khoh vaia Pangsiim noh ah hiit üng amjü kküm jah pek kti ni. Pangsiima jou taai jah ah do kya naak üng nih ngpüi vaia nih nih-e jah khü kti ni. Ah nih sun nih kshing naak üng hlü kko naküt kti nih yah ei ktie ni. Asun kba ah nih noh nih nih-e üng hlüng taai däm duh lü phu mah kti kkhyü taam jah pek kti. Asuna kkhyü taama phäh Pangsiima ngsiim ngsaih kti ah ngnei shak üng nih ngpüi ulü kho mdek kpaam ei sim pyak naak üng nih lät ktie ni. Asuna thoon lü nah nih jum ei lo kona do kti ve soh ngnei shak üng nah nih ve vaia mtun ei kkhüt ua. Kona theem ngvaai naak ave vaia mtun ei ua. Kona mlung mbüüp naak, kona non ei naak, kona Pangsiima hlü eia kba ve vai mtun ei ua. Kona Khritjaan be na mseh naak, asun kona mhlä kphya naak nah nih yah vaia mtun ei kkhüt ua. Asuna ngkhoe sun nah nih veeia be bang lü ave ta Pangsiim noh nah nih jum ei naak pung pyah shak lü ning shum ei khoh kkhaie ni. Asun kba ani ta nih Booi Pa Jeishüh Khrito nah nih kshing hin am jü kkhai ni. Lüphi kkhyaang mat mat hin üng asuna ngkho am ave ta ah mik mü lü Pangsiim üng shääng ei kti am hmu kpha khoh. Kona ahlaan üng ah poh khoia ah mkhye naak Pangsiim noh ah mthih peet phi ah mhnih pääng ni.
10 Asuna thoon lü kah be naeo, Pangsiim noh ah ning jah khü naak jah ah ning jah xü naak ngkhääng ngpaang kkhaia sha lü mtun ei ua. Asun kba nah nih thoon ta i am nglat be u kti. 11 Asun üng va jah kuum kyan kti nih Booi Pa Jeishüh Khritoa angshääi pea vaang yah u kti lü asun üng Khrito noh akdo kuunga ning nah dou daang kkhaie ni.
12 Asuna thoon lü ahie hin jah kshing pääng kyo u kti lüphi nah nih dou daana kkhyü ksang sun ngkhääng ktia man kyo u kti lüphi kei noh anghläia kah nih ning shüüm shak be ktie ni. 13 Kho mdeka kah xün ham üng anghläia ning jah shüüm shak lä vaia kah mkhüh nak kti ni. 14 Nih Booi Jeishüh Khrito noh angseeia ah namtheh hüt kuunga kba kah nghngi siim shak hin i vei am loham lü kah seh lo ta hnüh kkhai ni. 15 Asuna thoon lü kah thih kona nang nih-e noh ahina msuh mtheh naak hin nah nih shüüm lä vaia kah khyaih khoh säpa kah mtun ei kkhai ni.
16 Kei nih-e noh nang nih-e üng nih Booi Jeishüh hiit mah ktia ah lo be vai kah ning jah msuh mtheh hin kkhyaange noh ah nih msoma kkhui kkaam am ni. Kah nih mik kuung üng Khritoa jou taai jah ah hiit kah nih hmuk ktie ni. 17 Pa Pangsiim noh Booi Jeishüh üng jou taai jah hlüng taai naak pelü hiit mah kti kthai üng “Ah nih hin kah kphya naak kah sa ni. Ah nih üng kah mkhüh üp kti ni” tilü ah pyen kah nih hmuh ngjaak u ni. 18 Kei nih-e noh Khrito mah mah-a ngsiim ngsaih kti msuunga kah nih ve u üng asuna kthai kkhaan khoa kkhyüh pou lok kti kah nih pät kuung noh kah nih ngjaak u ni.
19 Asuna thoon lü shahma ngsiimea kpyaü hüt malam pyene hin ngseei kti ni. Nang nih-e noh phi asuna malam pyene sun nah nih ksang naak u üng do kkhai ni. I lüni ti ta kho thaai lolü thaih ke nah nih mlung kkyoonga ah vaai lo vei säpa asuna malam pyene sun anghmüp naaka vaai lok kti mei kshooia kba vek kti ni. 20 Sangsiim üng ka malam pyene hin u noh phi ah päta theem naak üng msom lü ah pyen am ni ati sun aktunga shüüm kyet ubä. 21 I lüni ti ta shahma ngsiima malam pyene hin kkhyaanga mlung hlüa thoon lok ktie am ni laang. Ngsiim ngsaih kti kkhyaange noh Mkhyangsiima jah xüh shoh naak üng Pangsiima veeia kkhyüh lok kti kkhyü pyen ktie ni.