5
Kei noh nah nih kshuunga shaang ngsiim sange ah nih ktha-a kphya naak vai kah pyen hlük kti ni. Kei hin phi nang nih-ea sang püi ni. Khritoa khui kha naak shak shi ngüshe ah jou taai angte lo üng ta kei phi kah ngpüi hnga kkhai ni. Pangsiim noh ah ning jah apa shaanga thoon kti to päe sun akdoa jah shääm ubä. Poh mta-a käh ngngaai lü yü sou naak kuunga mlung üng jah shääm ua. Asun hin Pangsiima mlung hlü ni. Ktha kheen yah naak vai däka nah nih poh ta ngke ei na-phyak kti ni. Pangsiima khuut poh naak hlü kuunga mlung üng poh ua. Pangsiim noh nang nih-e üng ah nih ning jah ape sun käh jah hnep ei ua. Ah ning jah hju tuih vaia do ktia ve ua. To kshääm akdäm bok ah pou lo üng ah nih noh booi lu ngbün ning jah pek kkhai ni. Asuna booi lu ngbüna jou taai naak i tüh-a phi am khyük laang.
Asuna ng'yüia nang nih athoie noh phi pa songea pyen nah nih jah ksang naak vai u. Nah nih bäng noh nah nih mlung mhneem lü mat noh mat nah nih ku ei vai hlü kti. Sangsiim üng ta “Pangsiim noh sam sah ktia kkhyaang am hlü ei. Ah mlung mhneem ktia kkhyaang ta Pangsiima bä naak ah nih üng vek kti ni” tilü ng'yuk kti. Asuna thoon lü nah nih mlung mhneem lü Pangsiima up naak üng ve ua. Asun kba ani ta Pangsiim noh ah tüüma ksüün üng nang nih-e ning jah mhlün mtaai kkhai ni. Nah nih sääi siing kyüh kyook ei naak abäng Pangsiim üng ap ua. Pangsiim noh nang nih-e ning jah mshü mseei kti ni.
Ngseei ngshaang lü ve ua. Mseei lü mtät ua. I lüni ti ta nah nih ye Shatan yaai pa noh hleeng shih-a kba huuk lü jah ven kyet lü thoon kti ni. U kah man ei kkhai ni tilü jah büün kyet kti. Ngkhääng ktia jum ei naak üng ah nah shung khaam ua. Kho mdek luuma Khritjaan be nae noh asun kba khui kha naak khaam ei ktie ni atia nah nih kshing ktie am ni bä. 10 Nang nih-e noh khui kha naak noong vei khaam ei ma u kti lü kona Pangsiim noh nah nih ktha ning jah phya shak lü jum ei naak ning jah ngkhääng shak lü ning jah küm seei shak kkhai ni. Pangsiim noh bä naak amjü kküm jah pe-khoh kti. Khrito üng nglooi ei lü Pangsiima angshääia jou taai üng nah nih ngpüi vaia ning jah khü kti. 11 Pangsiim aksüün tä lü jou hiit mah she. Amen.
12 Kei noh ahina sa ktooi sa hin Shilah-a nah ku ei naak üng kah yuk lo ni. Shilah hin kkhyü shing üng ngkhääng kti Khritjaan be na-a kei noh kah ngngaih ni. Kei noh ahina sa üng ktha kah ning jah pe-hlü kti ni. Ahin hin Pangsiima bä naak aksang ksang ni atia kah shak shi hlü kti. Pangsiima bä naak hin üng angkhäänga ve ua.
13 Nang nih-ea kba Pangsiima jah xü Papu Lung mlüh shaang üng kae noh phi ning jah shüüm ktie ni. Kah sa Marküh noh phi ning jah shüüm ktie. 14 Mat noh mat Khritjaan mhlä kphya naaka ngshing ngte naaka thoon kti uut naak üng nah nih püi dou daang ua. Khrito üng shääng ei kti nah nih bäng üng diim deih naak veshe. Amen.