4
Khrito noh puum sha mshoh mhleei ei khaam kti. Asuna thoon lü nang nih-e phi asun kba khui kha khaam ei kkhaia ah nah su ngngaai ei lü nah nih na-ngshääm ei yah kkhaie ni. I a thoon lüni ti ta puum sha mshou mhleei ei kti noh mkhye naak am poh ti. Tuh-a kkhyüh lü kho mdeka nah nih xün ham üng kho mdek kkhyaangea kpaam ei naak käh läk ti lü Pangsiima hlü eia nah nih ve yah kkhaie ni. Ahlaan üng Pangsiim am kshing ktiea kba nah nih ve khoi khäk hnüh kti ni. Nang nih-e hin bäü hma lü am do kti kpaam ei lü mpyüi mhmah lü ei o kolaih lü ju kuunga luum lü Pangsiima thuum lüüm kkaan lü mhnama lup hjok khah lü nah nih vekhoi ktie ni. Tuh-a ta nang nih-e hin Pangsiim am kshing ktiea bäü hma mkhye mshoh naak üng am nah nih ngpüi tia phäh ah nih-e mün sam tong ktie ni. Asuna thoon lü ning jah thang msheet ktie. Lüphi xüng ham ktie jah thipääng ktie jah si jaang kkhai Booi Pa-a ma-a ngseet ei be yah kkhaie ni. Asuna thoon lü Pangsiim noh akthia ah ngngaih-a kkhyaangea veeia thang kdo kkya jah mtheh shak kti. Pangsiim noh kkhyaang naküt mtaam ah peeta kba ah nih nih-e phi ah nih puum sha üng mtaam jah pe-kyo kti. Lüphi Pangsiima xüna kba Mkhyangsiim üng xün naak ah nih yah vaia phäh ni.
Akpäih naaka ksüün säh lohnüh kti ni. Nah nih tä sham khoh vai ua am do kti nah nih mlung kko mbüüp ua, angthiima ve-ua. Aktung bok ta aksang ksanga nah nih püi kphya na-ua. I lüni ti ta nih püi nih kphya naaka phäh üng nih püia mkhye nih non ei khoh kti ni. Käh mshi laang lü mat noh mat kkhin nghleei na-ua. 10 Pangsiim noh nang nih-e mat siim mat siim khyaih naak khoh ning jah pek kti ni. Asun sun nah nih püi poa do kya naak vaia shum ei ua. Pangsiima bä naak mjü kküm akdoa jah shääm kyet ubä. 11 Kkhyü kpyaü ktia kkhyaang noh Pangsiima kkhyü däk pyen yah kkhai. Kkhyaange jah kpüi kpak kti noh ta Pangsiim noh ah peeta ngjung ktha üng poh yah kkhai ni. Asun üng va kkhyaange noh amjü kküma phäh Booi Jeishüh Khrito üng Pangsiim mküüi mtou khoh kkhaie. Ah nih sun aksüün tä lü jou taai mah lü hiit mah kkhai ni. Amen.
12 Kah kphya naak looi püieo, tuh-a mkhuh mhlih naak kshe hleen nah nih khaam eia phäh käh mün ua. Ahin hin nah nih jum ei saam naak ni. Thoon ve-ei khoi kuung kti ni. 13 Khritoa khui kha naak üng nah nih ngpüi ktiea thoon lü je kyai ua. Asun üng va Khritoa jou taai angshing ngte lo üng phi nah nih je kyai xe xok na-be kkhaie ni. 14 Khrito üng nah nih shääng ei ktiea thoon lü kkhyaange noh ah nih ning thang msheet üng nah nih phäh-a do kya naaka thoon kti ni. I lüni ti ta Pangsiima jou taai mah kti Mkhyangsiim nang nih-ea veei vek kti ni. 15 Nang nih-e üng kkhyaang k'hnim, mpyuk ei, kkhyaang klääng, ngnei mah ktia thoon lü mtaam ah nih peeta kkhyaanga u phi käh thoon laang she. 16 Lüphi nang nih-e üng mat mat Khritjaana ah thoona phäh mtaam ah khaam ei ta ah ngke ei vai am hlü. Khritoa ngming üng kkhyaange noh “Khritjaan” tilü ah nih ning shui u ta Pangsiim mküüi ei ua. 17 Si jaang naaka mhnüüp phalo ngshaai hnüh kkhai ni. Pangsiim üng shääng ei ktia kkhyaange aksük dä däa si jaang naak khaam ei kkhaie ni. Si jaang naak nih nih-e üng ah sut ei ta Pangsiima thang kdo kkya am ksang nak ktie ta mtaam üng am lät khoh ti u. 18 Sangsiim üng ta “Pyuun kti hngoh noh phi kuum kyan naak ah yah vai am jä. Asun kba ani ta Pangsiim am lei shong lü mkhye mshoh kti ta i hok kba thoon kkhai ni” tilü vek kti ni.
19 Asuna thoon lü Pangsiima hlü eia kba khui kha khaam ei kti noh akdo poh she. Ah nih mhnün mseng kti Pangsiim sun mlung kkyoong naküt üng üm na-she. I lüni ti ta Pangsiim noh ta ah kkhyü taama kba poh kti ni.