2
Asuna thoon lü ngtuui ngten naak hoih ua. Lim ma naak, akdoa hana ngsom naak, ngkeei ngku naak, sok sek naaka ngkho käh poh ti ubä. Akthaaia hmi lok kti hnashen ah nua sih tui ah kkhyoot eia kba Pangsiima kkhyü noh ning jah kkhyoot ei she. Asun kba Pangsiima kkhyü nah nih ngjaak hlü ta däm lo u kti lü kuum kyan naak üng nah nih küm seei khoh kkhaie. Sangsiim üng ng'yuk kti ta “Pangsiima do kya naak nah nih kshing lok ktie ni” tilü ni.
Xüng kti lunga thoon kti Booi Pa-a veeia lo-ua. Kkhyaange noh i a am kyah ktia ngngaai lü ah nih ton u. Pangsiim noh ta ah nih sun xü lü phu mah kkhüt ktia ah ngngaih ni. Nang nih-e phi xüng kti lunge ni. Asuna thoon lü Pangsiim noh Mkhyangsiim üng shääng ei kti hjok khah im nua nang nih-e ning jah shum ei lü shong shak kti ni. Asuna hjok khah im nua k'uma Pangsiima khotu ngsiima thoon lü khuut nah nih poh kkhaie ni. Nang nih-e hin noh Booi Jeishüh Khrito üng Pangsiima hlü eia kba ngsiim ngsaih kti khah naak üng nah nih khah vaia phäh ni. I lüni ti ta Sangsiim üng vek kti ta “Ngngaai ua, Shion mlüh-a kah xüa lung kah nglin ni. Asuna lung sun aphu küüi lü im ngkhääng shak kkhai aktung bok lung ni. Ah nih sun üm nak kti ta am hmaai she yah” tilü vek kti. Nang nih jum ei ktiea phäh Khrito hin phu mah kti lunga kba ni. Lüphi am jum ei ktiea phäh ta Sangsiim üng hin kba ng'yuk kti ni. “Im shak ktie noh shum ei naak vai am ve tilü ah nih nota lung sän im ngkhääng loshak kti aktung bok lunga thoon lok kti” tilü vek kti. Kona “Asuna lunga phäh kkhyaange ngshuk ei ulü ngpä kkhaie ni” tilü phi Sangsiim üng veham kti ni. I lüni ti ta Pangsiima kkhyü am ah nih ksang naaka phäh ngshuk ei kkhaie ni. Asun sun Pangsiim noh anakshing ei lü ah mkhüh naak ni.
Nang nih-e ta Pangsiima xüa kkhyaang mjüe, shang phuhlange jah khotu ngsiime ni. Pangsiima ngsiim ngsaih kti pea kae, Pangsiima van kkhyaange ni. Pangsiima mün sam kshe kpyaü hü kkhaia nang nih-e ning jah xü lü ah ning jah khü ni. Ah nih noh anghmüp naaka kkhyüh ning jah kshet lü ah jou taai naak akvaai naaka ah ning jah taak ni. 10 Ahlaan üng Pangsiima kkhyaang am nikyo u kti lüphi tuh-a ta ah kkhyaang mjüa nah nih thoon lohnüh ktie ni. Ahlaan üng Pangsiim noh ah ning jah mpyeen ei naak am yah ei u kti lüphi tuh-a ta nah nih yah ei lok ktie ni.
11 Kah kphya naak kah püieo, nang nih-e hin kho kpyonga kba ngpyong hü hü lü kho mdeka nah nih vek ktie ni. Asuna thoon lü kho mdek üng shääng ei kti kpaam eie jah mphen ua tilü kah ning jah nghui na-hlük kti ni. Asuna kpaam eie noh Mkhyangsiima jah up ning mlung kko ngshun püi kti ni. 12 Pangsiim am kshing ktiea kshuunga nah nih ve soh poh mshah do kkhüt yah kkhai ni. Asun üng va ah ning jah kbäü ei lo hlü balaak üng do ktia nah nih ve soh poh mshah hmu-ulü Booi Jeishüh ah lo bea mhnüüp üng Pangsiim mküüi ei kkhaie.
13-14 Aso-yah booie naküt Booi Pa-a hlü eia jah lei shong lü jah ksang na-ua. Kesha shang phuhlang kdäm phi nishe ah nih noh ah jah msoona booi khonge phi nishe jah ksang na-ua. Asuna booi khonge sun mkhye ktie mtaam jah pelü akdo poh kti jah mküüi ei kkhaia Kesha shang phuhlang kdäm noh ah jah tüih lo ni. 15 Nang nih-e akdoa nah nih ve soh poh mshah naak üng kkhyü ksang am kshing lü nghmoong ktiea mpyong nah nih jah kbüüp vai Pangsiim noh hlü ei kti ni. 16 Kkhyaang kläta kba ve ua. Asuna thoon lüphi nah nih lät naak sun mkhye poh naaka mkota käh shum ei ua. Pangsiima xüh shoa kba ngkäih ktia ve ua. 17 Kkhyaang naküt jah lei shong ua. Khritjaan be nae jah kphya na-ua. Pangsiim sun kyüh lü lei shong ua. Kesha shang phuhlang kdäm phi ksang na-ua.
18 Mpyaeo, nah nih mah pa lei shong lü ah ti tia ve ua. Nah nih mah pa sun ah mlung do lüphi hnip hnooi lüphi ning jah mken ei lüphi ksang na-ua. 19 Nang nih-e hin Pangsiima hlü eia nah nih vea phäh üng am mkhye xa u kti lü khui kha nah nih khaam ei ta Pangsiim noh do kya naak ning jah pek kkhai ni. 20 Nah nih mkhyea phäh nah nih mah pa noh ah ning jah te üng nah nih suun ei ta sam sah naak vai i am ve. Lüphi akdo poh mah mah u kti lü mkhuh mhlih nah nih khaam u üng mlung mshaaü lü nah nih ve ta Pangsiim noh hlü ei kti ni. 21 Asun kba nah nih ve vaia Pangsiim noh ning jah xü lü ning jah khü kti ni. I lüni ti ta Khrito phi nah nih phäh-a mkhuh mhlih khaam lü nah nih hju vaia lam ning jah mhnüh kti ni. Nang nih-e noh ah nih-a kho leh nah nih läk vai hlü kti ni. 22 Booi Jeishüh noh i tüh üng phi mkhye am poh khoi, hleei phi am pyen laang. 23 Kkhyaange noh ah nih thang mseh ei üng phi am jah thung ei be. Khui kha ah khaam ei üng phi jah thung ei be vaia am jah mkyüh. Pyuun kti si jaang khonga thoon kti Pangsiim üm nak kti ni. 24 Ah pät kuung noh baan lam ktunga ah mti sha kuung üng nih nih-ea mkhyea phäh mtaam khaam kti ni. Asuna thoon lü nih nih-e hin mkhye üng ngkya lü Pangsiima hlü eia pyuun naak üng nih ve yah kkhaie ni. Ah nih-a mneh noh jah mya shak be kti. 25 I lüni ti ta nang nih-e hin toa kba lam nah nih hmü khoi ktie. Tuh-a ta nah nih mlung kko ngnei shak kthaai ning jah mshü mseei kti to kshääma veei nah nih nglat be ktie ni.