6
1 Mat mat mpyeen ei lü nah ku ei üng ah nih ning hmuh-a kkhyaanga ma-a käh poh-a. Asun kba am ani üng kkhaan khoa vek kti Pa Pangsiim noh kheen ning pek kkhai am ni.
2 Asuna kyalü yet nah peet üng kkhyaangea ma-a käh kpyaüa. Ngpyuun ktia hana som ktie noh Sangsiim ngthei naak kyong jah mlüh k'um, lama asun kba poh ktie. I lüni ti ta kkhyaanga mküüi mkhyah ei vai hlü ei ktie. Ngngaai ua, kei kah pyen ma kkhai. ‘Asune noh ah nih kheen yah ei pääng ktie ni.’
3 Nang nih-e noh ta mpyeen sek ktie nah nih jah yet üng nah looi püi bok noh phi käh ah kshing vaia yeta.
4 Yet nah nih peet üng ampyua pe ua. U noh phi am ah hmuh laang sun nah Pa Pangsiim noh hmulü kheen ning pek kkhai.
(Lükah 11.2-4)
5 Nah tä sham üng ngpyuun ktiea hana som ktiea kba käh poh bä. Asune noh kkhyaang abäng noh ah nih jah hmuh yah vaia Sangsiim ngthei naak kyong jah mlüh k'um lama ngdüüi ulü tä sham hlük ktie. Ngngaai ua, kei kah pyen ma kkhai. Asune noh ah nih kheen yah ei pääng ktie ni.
6 Nang ta nah tä sham üng im k'uma lut lü kshoh khaai lü ampyua nah Pa Pangsiima veei tä shama. U noh phi am ah hmuh laang sun nah Pa Pangsiim noh hmulü kheen ning pek kkhai ni.
7 Nah tä sham üng am nah ti hlü bä kkhyü nglunge siim hleh hleh lü pyen lü käh tä shama. Pangsiim am kshing kti amjü kse-e noh asun kba pyen lü tä sham ktie ni. Kkhyü nglung kho hah jah kho vei pyen ta Pangsiim noh jah ksang nak kkhaia ah nih ngngaih u.
8 Asune käh jah hju tuih hlüa. Nah nih tä sham hlaana i hlü ko kti tia nah Pa Pangsiim noh ah kshing pääng ni.
9 Hin kba tä shama. ‘Kkhaan khoa vek kti Pa Pangsiimo, nah ngming jou taai mah she.
10 Nah upa pe phalo she, kkhaan khoa nah hlü ei ah nih poh-a kba kho mdeka phi poh u-she.
11 Amhnüüp tä lü ei ook vai jah pea.
12 Kah nih kkhaana mkhye kti kah nih mhläta kba kah nih mkhye naak phi jah mhlät bä.
13 Mkhye vaia hlo hleep naak käh jah khaam ei shak bä. Shatan yaai pa-a ma-a jah shung khaama.’
14 Nah nih kkhaana bäü ktia mkhye nah nih mhlät ta kkhaan khoa vek kti nah nih Pa Pangsiim noh phi nah nih mkhye ning jah mhlät kkhai.
15 Lüphi nah nih püia mkhye mshoh naak am nah nih mhlät ta kkhaan khoa vek kti nah nih Pa Pangsiim noh phi nah nih mkhye mshoh am ning jah mhlät laang kuung.
16 Ei nah nih jeih u üng ngpyuun ktia hana som ktiea kba eia kkhyoot ei tonga mäi nah nih mik hmaai käh ta-ua. Ah nih nih-e sun ei ah nih jeih üng kkhyaang naküt noh ah nih jah hmuh vaia khui kha khaam ktia mik hmaai üng sit hü ktie ni. Ngngaai ua, kei kah pyen ma kkhai. Ah nih-e noh ta ah nih kheen yah ei pääng ktie.
17 Nang nih-e noh ta ei nah nih jeih u üng lu hmaai ei ua.
18 Asun üng va nah nih ei jeih sun kkhyaange noh käh kshing khoh kkhaie. Kkhyaang noh am ah hmuh yah sun nah Pa Pangsiim noh kshing kkhai. U noh phi am ah hmuh yah sun nah Pa Pangsiim noh hmuhlü kheen ning pek kkhai.
(Lükah 12.33-34)
19 Ahina kho mdek kkhaana nah päta phäh ngui xüi külak käh msun mshep ei ubä. Ahina ngui xüi külak sun mthi eek noh shuk lü mkhya noh soon lü mpyu ei noh phi mpyuh ei kkhai ni.
20 Asuna ksah-a kkhaan khoa nah nih phäh-a külak msun ei ua. Asun üng ta mthi eek jah mkhya noh phi am ksim kpyak khoh. Mpyuk ei noh phi am mpyu ei khoh.
21 I lüni ti ta nah nih msun ngui kkhaan khoa ve üng nah nih mlung phi asua vek kkhai.
(Lükah 11.34-36)
22 Nah nih mik hin nah nih puum sha-a mei phäih kvaai ni. Nah nih mik angshung ta nah nih puum sha phi akvaai üng vek kkhai.
23 Lüphi nah nih mik am angshung ta nah nih puum sha phi anghmüp naaka vek kti ni. Nanga akvaai anghmüp-in lo ta anghmüp naak ta i hlooka kyüh shek kkhai ni.
(Lükah 16.13, 12.22-31)
24 Mah pa nghngih-a xüh shoh-a u phi am thoon khoh. Mah pa mat thi-nalü mat ta kphya nak kkhai ni. Mat ta lei shong lü mat sun mdih mshuui kkhai. Asun kba nang phi Pangsiima xüh shoh jah ngui xüia xüh shoh-a am thoon khoh kti.
25 Asuna thoon lü kah ning jah mtheh kkhai. ‘I kah ei ok kkhai’ tilü käh pyang ma ubä. ‘I kah shui shak kkhai’ tilü phi käh ng'äh ngkhyah u bä. Ahina kho mdeka nah xün naak hin ei ooka kthaka aktung bok ni. Nah puum sha hin shui shaka kthaka küüi bok kti ni.
26 Kkhaana joong hü kti kkhae jah bük ua. Ah nih-e noh msi ui am sho u. Aktheih paai phi am aat ei u. Saang phi kkheia am ta-ei u. Lüphi kkhaan khoa vek kti nah nih Pa Pangsiim noh asune ah jah mbei ni. Nang nih-e ta kkhaea kthaka nah nih küüi bok ktie.
27 Sääi siing lü u noh phi ah shak sun mhnüüp mat sa hngoh am mtheih ei khoh.
28 Nah shui shaka phäh i lü nah sääi siing kti ni. Moa lut lok kti paai paai dung sän bük ua. Phai phi am bi. Jih phi am tak ei.
29 Lüphi kah ning jah mtheh kkhai. Booi maang kkhüt kti shang phuhlang Sholoh Mong hngoh noh ah nih-ea kba jou taai ktia am shui shakhoh.
30 Tuh ngooi paai lü kho ngooi thuum be kti moa ka paai paai dung sun asun kba ah jah mshui mshak ta Pangsiim noh nang sun ahina kthaka do ktia ning mshui mshak kkhai ni. I lü ahin kba nah nih jum ei naak ngseek kti ni.
31 Asuna thoon lü ‘I kah ei kkhai, i kah ok kkhai, i kah shui shak kkhai’ tilü käh pyang ma ua. Pangsiim am kshing ktie noh ahina phäh däk ni ah nih mtun ei u.
32 Nang üng ahine abäng hlü kti ati sun kkhaan khoa vek kti nah Pa Pangsiim noh kshing kti ni.
33 Pangsiima pe jah Pangsiim hlü ei ngpyuun naaka phäh aksük ksüka mtun ei ua. Asun kba ani üng asune Pangsiim noh ning pek kkhaie.
34 Kho ngooia phäh käh sääi ua. Kho ngooia phi Pangsiim noh ning bük teng kkhai. Tuh ngooi nah sääi naak hin tuh ngooia phäh khäk kti ni.