5
(Lükah 6.20-23)
Booi Jeishüh noh kkhyaang pä nue jah hmulü ta msuunga kaai lü ngshut kti. Akläke phi ah veeia lok ktie. Booi Jeishüh noh sut ei lü ah jah msuh mtheh. “Ah mlung mhneem ktie hin noh ah nih do kya naak ni. Pangsiima upa pe hin ah nih-e üng shääng kti. Puk shek ktie hin noh ah nih do kya naak ni. Pangsiim noh bäi naak jah pek kkhai. Hnip hnooi ktie hin ah nih do kya naak ni. Pangsiima kkhyü taama kba yah ei kkhaie. Pangsiima pyuun naaka kba ve vai hmaaü ei ktie hin ah nih do kya naak ni. Pangsiim noh ah nih mkhüh-a kba jah ku ei kkhai. Kkhyaang jah mpyeen ei kti hin ah nih do kya naak ni. Pangsiim noh phi jah mpyeen ei kkhai. Ah nih mlung ngsiim kti hin ah nih do kya naak ni. Pangsiima mik hmaai hmuyah kkhaie. Mat jah mat jah ng'ye shak be kti hin ah nih do kya naak ni. Pangsiim noh “Kah sa ni” tilü jah shui kkhai. 10 Pangsiima hlü eia ah ve soh poh mshah-a phäh mkhuh mhlih khaam ei ktie hin ah nih do kya naak ni. Pangsiima upa pe hin ah nih üng shääng ei kti. 11 Nang nih-e kah hnu kläka nah nih thoona phäh kkhyaange noh ning jah thang msheet lü mkhuh mhlih lü nah nih mong hleei msom lü ah nih pyen ta nah nih do kya naak ni. 12 Je kyai lü xe na-ua. I lüni ti ta Pangsiim noh nah nih phäh-a kkhaan khoa kheen kdäm ning jah mshääm peet kti ni. Nah nih ve hlaana shahma ngsiime phi ahin kba mkhuh mhlih khaam ei khoi ktie.
(Marküh 9.50; Lükah 14.34-35)
13 Nang nih-e hin kho mdek kkhyaangea phäh msia kba nah nih thoon ktie. Msi hin am atui ti ta tui onga am nih pyaang be thei. Asuna msi hin i a am mong ti tilü lam peia kpyaai-in ulü kkhyaange noh lüüi kaai ei nak kkhaie ni. 14 Nang nih-e hin kho mdek kkhyaang abänga phäh akvaaia nah nih kyak ktie. Msuunga ah nih shak ngnam ta kkhyaang noh hmuk kkhaie ni. 15 U noh phi mei phäih sun khät kphya üng am mük in. Im k'um üng ka kkhyaang abänga phäh vaai kkhaia thenga kkhaana taak yah ni. 16 Asun kba nah nih kvaai phi kkhyaangea phäh vaai yah kkhai. Kkhyaange noh akdo nah nih poh mshah hmu-ushe. Asun üng va kkhaan khoa vek kti Pa Pangsiim mküüi mtou kkhaie.
17 Pangsiim noh Moshei üng ah peeta thuum jah shahma ngsiimea msuh mtheh naak jah not kkhaia kah lok ktia käh ngngaai ubä. Pangsiima thuum küm seei shak kkhaia kah lok kti ni. 18 Ngngaaia, kah pyen ma kkhai. Kkhaan kho jah kho mdek ah nih khyüh veia Pangsiima thuum üng ka akeek sa hngoh not lü am ng'yah. Abäng naküt Pangsiima thuuma kba küm seei yah kkhai ni. 19 Mat mat noh Pangsiima thuum üng ka akdiik bok nishe lüüm kkaan lü asun kba ah jah msuh mtheh ta Pangsiima pea akdiik sa-a thoon kkhai. Lüphi mat mat noh Pangsiima thuuma kba poh mshah lü asun kba ah jah msuh mtheh ta Pangsiima pea ashü sang boka thoon kkhai. 20 Kah ning jah mtheh ma kkhai, Sangsiim ktheeme jah Pharishe-ea kthaka am nah nih ngpyuun u ta Pangsiima pea itüh-a phi am vaang khoh u kti.
21 Ahlaan üng kkhyaang i hokba jah msuuk mtheh kti ati sun nah nih kshing ktie ni. ‘Kkhyaang hnim kti ta mtaam khaam yah kkhai’ tilü vek kti. 22 Lüphi kei noh kah ning jah mtheh kkhai. Ah püi thüi na-naküt kti noh mtaam khaam yah kkhai, Ah püi thang mseh ei naküt kti kong si ngkhääm naaka phayah kkhai. Ah püi üng ‘Nang anghmoong ni. I a phi am kyah kti’ ah ti naak ta i tüh-a phi am thik kti mei noh uui kkhai ni. 23 Khah naak lung päm üng Pangsiim nah khah vai nah piit pyaang k'um üng nah püi noh am ah ning je naak ave nah shüüm loto kkhai. 24 Asuna athoon üng Pangsiim üng nah peet hlü sun khah naak lung päma ma-a ta-hüt lü nah püia veei sit ma kti lü ng'ye püi be ma-a. Kona lobe lü Pangsiim khah bea. 25 Avai shüa, ning kkhya hlük kti mat vek kkhai. Si jaang luum da nah nih seh shoa ah nih sun nah ng'ye püi be vaia mtun eia. Asun kba am ani ta si jaang khonga veei ning kaih kkhai ni. Si jaang khong noh mtät kti ngtuk kpoh-a kut üng ning ap ham kkhai. Asuna ngtuk kpoh noh khup üng ning khyum ham kkhai. 26 Kei kah pyen ma kkhai ni. ‘Mtaam ngui nah msuum veia phe mat sa hngoh käh hlü ti onga nah khyah vei säpa khup üng nah veyah kkhai.’
27 Pangsiima thuum üng ‘Kkhyaanga nghnu mi kpa mi käh ve püi vai’ ng'yuk kti ati sun nah nih kshing ktie. 28 Kei noh ta kah ning jah mtheh kkhai. ‘Mat mat noh nghnu mi sun ve püi naak hlüa mlung üng ah büh ta ah mlung k'uma ah nih üng bäü hma pääng kti ni’ 29 Nah mik kkheet noh ah ning mkhye shak ta kkoih lü kpyaai-ina. Nah puum sha abänga Mulai pea nah pha-a kthaka nah puum yo mat mat nah shum naak ta do bok kti ni. 30 Nah kut kkheet noh ah ning mkhye shak ta kkyük lü kpyaai-ina. Nah puum sha abänga Mulai pea nah pha-a kthaka nah puum yo mat mat nah shum naak ta do bok kti.
(Mate 19.9; Marküh 10.11-12; Lükah 16.18)
31 Mosheia thuum üng ng'yuk kti ta ‘Kkhyaang mat noh ah kkhyu angkya hlü püi ta angkya naak püia sa yuk she’ ah ti. 32 Kei noh kah ning jah mtheh kkhai, kkhyaang mata nghnu mi hin kpa mi kse käh ve püi xa lü ah hoih ta ah sun noh ah nghnu mi bäü hma shak kti ni. I a thoon lüni ti ta ah kpa mi üng ngkyalü kpa mi kse üng ah ve ei be ta asuna nghnu mi boh bah ktia kyak kti. Ah nih kkhyu na-be kti kpa mi phi bäü hma kti ni.
33 Pangsiima thuum üng ng'yuk kti ta ‘Kkhyü taam käh kpyak yah vai. Booi Pa üng nah ng'yün ngsea kba nah poh yah kkhai’ ati sun nah kshing kti ni. 34 Kei noh kah ning jah mtheh kkhai, kkhyü nah nih taam üng käh nah ng'yün ngse bing bing vai. Kkhaan kho pyen lü käh ng'yün ngsea. I lüni ti ta kkhaan kho hin Pangsiima Booi ngoh naak ni. 35 Kho mdek pyen lü käh ng'yün ngsea. I lüni ti ta kho mdek hin Pangsiima kho mtaan naak ni. Jeirüh Shalem mlüh pyen lü käh ng'yün ngsea. I lüni ti ta Jeirüh Shalem mlüh hin shang phuhlang kdäm boka mlüh ni. 36 Nah päta lu pyen lü käh ng'yün ngsea. I lüni ti ta nah lu sham thek mat hngoh phi le onga book onga am poh khoh kti. 37 ‘Ä’ am ani üng ‘Am ni’ tilü pyena. Asuna thea mshap lü nah pyen ta Shatan yaai pa noh ah ning ti shaka kyak kti.
(Lükah 6.29-30)
38 Mosheia thuum üng ng'yuk kti ta ‘Kkhyaang mat noh ah püi ah mik lut-in lok ktia ah pun ta ah mik lut lobe ktia mtaam khaam yah kkhaia vek kti. Mat noh ah püia ha hop-in ktia ah pun ta ah ha hop lobe ktia mtaam khaam yah kkhaia vek kti’ tia nah nih kshing ktie ni. 39 Lüphi kei noh kah ning jah mtheh kkhai. ‘Mat mat noh ah ning jah bäü hma naak ta käh thung ei be ua. Mat mat noh nah ngbeeng kkheet ah ning kbeih ta kshong da phi ning kbei peh she. 40 Mat mat noh nah aang ki lou ei hlülü si jaang luuma ah ning khü ta nah shui ngvaih phi peet-in shih-a. 41 Mat mat noh määng mat phüih phüüi kkhaia ah ning nääng kyan naak ta määng nghngih phüih-in peeta. 42 Mat mat noh nah veeia i mä ah ning tong ei ta pe-ina. Nah veeia pu-hlü kti üng phi käh mkhyoh-a.’
(Lükah 6.27-28, 32-36)
43 Pangsiima thuum üng ‘Nah püi nah kphya naak vai jah nah ye nah ksok ei vai’ vek kti ati nah kshing kti ni. 44 Kei noh ta ‘Nah nih ye kphya na-ua. Ning mkhuh mhlih kti üng Pangsiim noh bä naak ah peet vaia tä sham ua.’ 45 Asun üng va kkhaan khoa vek kti nah Pa Pangsiima sa-a ning shui kkhaie. I lüni ti ta kkhyaang kshe jah kkhyaang kdoa kkhaana kho nghngi shou shak kti ni. Akdo poh kti jah akshe poh ktia phäh kho aak shak kti ni. 46 Ning jah kphya nak kti däk nah nih kphya naak be ta i hokba Pangsiim noh kheen ning jah pek kkhai ni. Khoon to k'hlooke hngoh noh phi ahin kba ta mlung nak ktie ni. 47 Nah püi däk nah dou daan ta i a phi am suh kyah. Pangsiim am kshing kti hngoh noh phi ahin kba su ta poh mshah ktie ni. 48 Kkhaan khoa vek kti nah Pa Pangsiima ah küm seeia kba nah küm seei yah kkhai.