3
(Marküh 1.1-8; Lükah 3.1-18; Johaan 1.19-28)
Asun k'um üng Patiso Johaan noh Jüdah mkyaanga sut ei lü Pangsiima kkhyü kpyaü hü kti. Ah nih noh “Nah mkhye üng vuuk be hnüh-a. Pangsiima up naak phalo hlühnüh kti ni” tilü ah pyen. Shahma ngsiim Hei Shajah-a malam pyen üng Patiso Johaana mong ng'yuk kti ta “Mkyaanga kkhyaang mata ngpyaana kthai ta ‘Booi Pa-a lo naak vai lam pyaang ua. Anakshe kpaih mhngi mto ua’ tilü ngpyaang kti.” Johaan ta sha nghngü kshaaüa mu üng ah nih tah shui shak shui shalü meh vun ngsüüp üng ngkhääp ei lü moa ka khooi tui jah nglei khing khi ei ok kti. Jeirüh Shalem mlüh üng ka, Jüdah hne abäng üng ka, Jotan mlik tui koon üng ka abäng Johaana veeia lok ktie. Ah nih mkhye phyeh ulü Johaan noh Jotan mlik tui üng patiso ah jah peet. Pharishe jah Satüke kho hah patiso khaam ei kkhaia ah nih lo u sun Johaan noh jah hmuh lolüta “Nang nih-e kphyu kphyaai kshou pä üng nah nih täng ktie va nik kba. Pangsiima jah peet mtaam üng nah nih lät kkhaiea u noh ah ning jah mtheh ja. Aksanga nah nih vuuk sun nah nih ve soh üng ngshing ngte shak ua. ‘Apyaham hin kah nih mah pook ni’ tilü nah nih pyen naak üng am ng'yung khoh u kti. Ngngaai ua. Kei kah pyen ma kkhai. Pangsiim noh ahina lunge jah lou lü Apyahama mjü mshuuia tüüi pyaang khoh kti ni. 10 Thing dunge jah khyuk teeng naak vai thing phung kuunga xäi mshääm pääng ktie. Akdo am ngtheih paai nak ktia thing dung sun khyu teeng-in lü mei üng shi nghngyaai-in kkhaie ni. 11 Nah nih vuuk naak be angte naaka kei noh tui üng patiso kah ning jah pek kti ni. Lüphi kah hnua lok kti noh ta Mkhyangsiim jah mei üng patiso jah pek kkhai. Ah nih hin keia kthaka däm duh bok kti. Ah nih-a kho phadok hngoh bi loh peet kkhaia am looi ngkäih ngü. 12 Saang leh naak sun li khya kkhaia ah nih noh kphya bi ei kti. Amsiim kse saang sun kkheia talü saang nghi jah saang kpa ta i tüh-a phi am thik ktia mei üng shi-in kkhai ni” tilü ah jah mtheh.
(Marküh 1.9-11; Lükah 3.21-22)
13 Asuna ksüün üng Booi Jeishüh patiso khaam ei kkhaia Johaana veei Jotan mlik tuia sit kti. 14 Johaan noh mkhyoh lü “Kei noh nanga veei patiso khaam ei vai ni kah hlü ei. I lü kah veeia nah lok kti ni” ah ti. 15 Lüphi Booi Jeishüh noh “Ahin kba thoon she. Pangsiima mkhyah-a kba poh vaia looi ngkäih kti ni” tilü ah pyen. Asun üng ta Johaan noh “Ääi” ah ti. 16 Booi Jeishüh patiso khaam ei pääng lü tui üng ah luh lo be jah ta kkhaan kho nghmong lok kti. Mkhyangsiim sun müüma mäia Jeishüh-a k'uma kyum lok kti ah hmuh. 17 Kkhaan khoa kkhyüh lok kti kthai ta “Amhlä kah sao, kah ning je ei pi pi ni” tilü ni.