28
(Marküh 16.1-10; Lükah 24.1-12; Johaan 20.1-10)
1 Pangsiim ngam püi mhnüüp kona ngkhyün suum üng aksük ngooi lam nua ta Marih Maka Talen jah akse Marih noh msüm hnün lung khuui sun bük vaai kti xooi.
2 Ahunata ta ngkhyü ngshüün-in lok kti. Booi Pa-a kkhaan kho ngshä kkhaan khoa kkhyüh kyum lolü lung khuui mkota ka lung nu sun nghmoong ma lü asuna kkhaana ngshut kti.
3 Kkhaan kho ngshäa joong pan sun khoa mlaih-a mäi üng täng kti. Ah shui shak phi abook lik lika vek kti.
4 Lung khuui mtät ktie phi sääi sat tong lü let let thak üng akthia kba hit saai ei ktie.
5 Kkhaan kho ngshä noh nghnu mi xooi üng “Käh kyüh ei nih-a. Baan lam ktung üng ah nih hnima Jeishüh sun bük kkhaia nah nih lo sun kah kshing ni.
6 Jeishüh ahia am veti. Ah pyen khoia kba thou be pääng kti ni. Lut lo nih-a. Ah nih mphään naak hin bük lo tu nih-a.
7 Kona akjaanga sit lü akläke üng Jeishüh thih naaka kkhyüh thou be pääng ve. Nah nih ma ua Kalile hne da anasit kkhai ni. Asua ah nih sun nah nih hmuk kkhaie tilü jah mtheh vaai ni. Kah pyen hin shüüm kyet nibä” tilü ah jah mtheh.
8 Asun üng ta nghnu mi xooi sun lung khuuia kkhyüh akjaanga lut lobe nih lü akläke üng jah mtheh vaai kkhaia dong kti xooi. Nghnu mi xooi kyüh ei kyo nilüphi je kyai ei kkhüt kti xooi.
9 Ahunata Jeishüh üng ngkhyum ktie. “Diim deih naak nang nih üng veshe” ah ti. Nghnu mi xooi sun Jeishüh-a veei lo nih lü ah kho man lü ah nih hjok khah.
10 Asun üng Jeishüh noh “Käh kyüh ei nih bä. Sit lü Kalile hne da ah nih seh vaia kah nae üng jah mtheh vaai nih-a. Asua ah nih-e noh nah hmuk kkhaie ni” ah ti.
11 Nghnu mi xooi lam üng ah nih seh k'um üng lung khuui mtät ktie mlüh k'uma sit ulü athoon ve naküt khotu ngsiim kdäm üng ah nih jah mtheh vaai u.
12 Khotu ngsiim kdäme jah Jüdah khong mange ngkhääm lo ulü ngyam ah nih loh u.
13 Kona mtät ktie sun üng ngui kho hah pelü “Hin kba nah nih pyen vai u. ‘Mthana kah nih ih k'um üng akläke noh ah yook mpyulo ulü ah nih seh püi u ni’ tilü nah nih pyen vai u ni.
14 Pilat booi noh asun kba ah ngjaak ta kei nih-e noh ah mkhüh hnip ktia kah nih poh kkhaie ni. Nang nih-e käh ah ning jah kbäü ei vaia kah nih pyen kkhaie ni” tilü ah nih jah mtheh u.
15 Asun üng mtät ktie noh ngui dou ei ulü khotu ngsiim kdäme noh ah nih jah mtheh-a kba ah nih pyen u. Asuna thoon lü tuh vei säpa ahina mong Jüdah-ea kshuunga kpyaü hü hü ktie.
(Marküh 16.14-18; Lükah 24.36-49; Johaan 20.19-23; Ngshäe 1.6-8)
16 Kona akläke xalei mat sun Booi Jeishüh-a pyena kba Kalile hne kho msuunga sit ktie.
17 Booi Jeishüh ah nih hmuh lo u üng ah nih hjok khah u. Akhäk ta ah nih mlung up lat ktie.
18 Asun üng Booi Jeishüh ah nih veeia lolü “Kkhaan kho jah kho mdek abäng naküt üng Pangsiim noh ah nah hiit mah shak bok ni.
19 Asuna thoon lü sit hü ua, kkhyaang mjü naküt keia akläka jah thoon shak lü thang kdo kkya kpyaü hü ua. Pangsiima ngming üng, ah sa kpa-a ngming üng, Mkhyangsiima ngming üng patiso jah pe-ua.
20 Kah ning jah mkhyah kkhyü naküt ah nih ksang naak vaia jah msuuk mtheh ua. Ngngaai ua, aksüüna kpäih vei kuung säpa anghläia nah nih hlonga kah vek kkhai ni” ah ti.