25
Booi Jeishüh noh “Kah pha lo bea mhnüüp üng Pangsiima upa pe hin ngla mi xa-a thoon ve üng täng kkhai ni. Ngla mi xa sun noh ah nih mei phäih xa lou ei lü sa kla dou daang vaai kkhaia sit ktie. Asun k'um üng mhma ta anghmoonge ni. Mhma be tü ta apum ngyam mah-e ni. Ngla mi anghmoong mhma noh mei phäih lo ei kyo ulüphi ngshääm naaka mei tui am seh ei u. Angyam mah ngla mie noh ta mei phäih phi ngshääm naak mei tui uum phi seh püi ktie. Sa kla käh phalo lan lüta ngääi lü ku ip lok ktie. Mthan nglunga ta ahunata ‘Sa kla phalo hnüh ve. Dou daang kkhaia lo-ua’ tia kthai ta ah nih ngjaak u. Asun üng ngla abänga let lo-ulü ah nih mei phäih jah piit pyaang ktie. Anghmoonge noh angyam mah ngla mie üng ‘Kah nih mei thi-hlü hnüh kti ni. Nah nih ngshääm naak loa mei tui jah pe-ma ua’ tilü ah nih jah nghui naak u. Angyam mah-e noh ta ‘Am ng'yah. Nih bängea phäh am khäk. Sit lü nah nih shum ei vai mei tui kkhyäi ei vaai ua’ ah nih ti be u. 10 Lüphi ngla mi mhma sun mei tui kkhyäi kkhaia ah nih seh k'um üng sa kla phalok kti. Asun üng ta ana-ngshääm kti ngla mi mhma noh dou daang ulü sa kla mah mah salaak pooia lut yüm ktie. Kona xüh shoh-e noh kshoh ah nih khaih-in u. 11 Kho vei sa nghjook lüta ngla mi nghmoonge sun phalo ulü ‘Booi Pao, Booi Pao’ tilü ngpyaang ktie. 12 Sa kla noh ‘Ngngaai ua, kei kah pyen ma kkhai. Nang nih-e am ning jah kshing khoi u ngü’ ah ti. 13 Asuna thoon lü yüng ei lü ve-ua. Kei, Kkhyaang Sa, kah pha lo be vaia ksüün jah mhnüüp sun am kshing u kti.
(Lükah 19.11-27)
14 Kkhaan kho pe hin kdunga sit kti kkhyaang üng täng kti ni. Kdunga ah seh hlaana ah xüh shoh-e sun jah khü lü ah khoh kkhyame sun ah jah ap hüt. 15 Xüh shoh mat üng ngui tangka thoong mhma ah ap, mat üng thoong nghngih ah ap, mat üng thoong mat ah ap. Xüh shoh mat siim mat siim üng ah nih khyaih naak khoh-a kba khoh theem ah jah ap ni. Asun kona im mah pa kdunga sit kti. 16 Ngui tangka thoong mhma yah kti xüh shoh noh ta mhläi püi yü lü kun pan poh lü ah msoon mtaai ei. Asun üng asa to ngui tangka thoong mhma ah yah. 17 Thoong nghngih yah kti xüh shoh noh phi kun pan poh nalü asa to thoong nghngih ah yah shih. 18 Ngui tangka thoong mat yah kti noh ta sit lü ah mah pa-a ngui sun mdek khuui sou lü ah süm-in ni. 19 Kho vei nghjook lolüta xüh shoh kthumea mah pa phalobe lü ngui ah jah ap hüta mong ah jah kthäh. 20 Ngui tangka thoong mhma yah kti xüh shoh noh ta asa to ah yah ngui thoong mhma sun ah lo püi. ‘Kah mah pao, kei üng ngui thoong mhma nah nah ap ni. Asa to thoong mhma yah ngüshe kah ning tha lo ni’ ah ti. 21 Ah mah pa noh ‘Do ve. Nang hin kkhyü shing üng vek kti lü üm naak vaia xüh shoh-a nah thoon kti ni. Kei noh khoh kkhyam alääm ning ap ngüshe kkhyü shing üng nah poh kti. Asuna thoon lü khoh kkhyam kho hah shääm kkhaia kah ning msoon kkhai ni. Loa, nah mah pa-a dä ayüma je kyaia’ ah ti. 22 Thoong nghngih ah ap xüh shoh noh phi ‘Kah mah pao, ngui thoong nghngih nah nah ap ni. Büka, ngui thoong nghngih kah yah peh ni’ ah ti. 23 Ah mah pa noh ‘Do ve. Nang hin kkhyü shing kti lü üm naak vaia xüh shoh-a nah thoon kti ni. Kei noh khoh kkhyam alääm ning ap ngüshe kkhyü shing üng nah poh kti ni. Asuna thoon lü khoh kkhyam kho hah shääm kkhaia kah ning msoon kkhai ni. Loa, nah mah pa-a dä ayüma je kyaia’ ah ti. 24 Kona thoong mat ah ap hüta xüh shoh lolü ‘Kah mah pao, nang hin kkhyaang shim ti pi pi ni. Ajüa nah lou ei hlük kti. Am nah nglin sho xa saang nah aat ei hlü kti ati sun kah kshing ni. 25 Asuna thoon lü ning kyüh ngüshe nah ngui sun mdeka khuuia k'ut lü kah süm ni. Büka, ahin hin nah ngui ni’ tilü ah pyen. 26 Ah mah pa noh ‘Nang hin i a phi am nah suh kyah kti. Nang xüh shoh kdam ni. Ajüa kah lou ei hlük kti, am kah nglin sho xa saang kah aat ei hlük kti ti sun nah kshing mjoh kti bä. 27 Asun kba ani ta kah ning apa ngui sun ngui shääm naak luuma i lü am nah taak vaai ja. Asun kba nah poh-a ta kah pha lo be üng kah ngui hin asa to mah mah kah yah ei be vai shü’ ah ti. 28 Ah mah pa noh xüh shoh kse üng ‘Ngui thoong mat sun la-vaai be lü ngui thoong xa tak kti üng pe-vaai ua’ ah ti. 29 I lüni ti ta ta-ei kti noh yah ei ham kkhai ni. Be bang ktia ta-ei kkhai. Am ta-ei kti noh ta akve sa hngoh phi shum na-ham kkhai ni. 30 I a am suh kyah kti ahina xüh shoh hin kho kpunga khoa mthan naaka kpyaai-in vaai ua. Asua mbooi kyap ha kkhyüüt lü vek kkhai ni” tilü ah pyen.
31 Booi Jeishüh noh “Kei Kkhyaang Sa jou taai mah lü ngsiim ngsaih kti kkhaan kho ngshä abänge mah mah kah kyum lo be üng ta jou taai mah kti kah booi ngoh naak üng kah ngshut kkhai ni. 32 Kkhyaang mjü kse-e abäng kah hmaai ma-a kah jah ngkhääm shak kkhai ni. To kshääm noh to jah me-e ah jah mkhoi mkhya-a kba kei noh phi amjü kse-e mat siim mat siim üng kah jah mkhoi mkhya kkhai ni. 33 Toe kah kkheet lam da kah jah tak kkhai. Me-e kah ksong lam da kah jah tak kkhai. 34 Kona shang phuhlang noh ah kkheet lam da ah jah taak kkhyaange üng ‘Nang nih-e üng kah Pa Pangsiim noh do kya naak ah ning jah peet ni. Lo ua, kah Pa Pangsiim noh kho mdek ah mhnün mseng hlaana kkhyüh nah nih phäh-a ah piit pyaanga pea vaang lü ka na-hnüh ua. 35 I lüni ti ta buh noh ah nah sooi üng ei nah nih nah mbei ktie. Tui üng kah kät üng tui nah nih nah tu ktie. Kdung ksita kah thoon üng nah nih nah kkhin nak ktie. 36 Shui shak kka-a kah ve üng shui shak nah nih nah pek ktie. Ah nah mhnat ei üng nah nih nah mshü mseei ktie. Khupa k'uma kah ve üng nah nih nah bük teng lok ktie’ tilü ah pyen kkhai. 37 Asun üng Pangsiima kkhyü ksang nak kti kkhyaange noh ‘Booi Pao, i tüh üng ei noh ning sooi ei lü ei kah nih ning mbei ktie ja. I tüh üng tui noh ning kkhyoot ei lü tui kah nih ning tu ktie ja. 38 I tüh üng kdung ksita thoon kti lü kah nih ning kkhin nak ktie ja. I tüh üng nang Booi Pa shui shak kka-a vek kti lü shui shak kah nih ning pek ktie ja. 39 Booi Pao, i tüh üng ning mhnat ei lü i tüh üng khupa k'uma vek kti lü kah nih ning bük teng lok ktie ni’ tilü pyen kkhaie. 40 Shang phuhlang noh ta ‘Ngngaai ua, kei kah pyen ma kkhai. U noh phi am ah jah suh lih ei kah nae üng ahin kba nah nih jah poh mshah tä lü kei üng nah nih nah poh mshah peet üng atäng ni’ tilü jah mtheh kkhai. 41 Kona ah ksong lam da kae üng ‘Nang nih-e hin Pangsiima ning jah yün se-e ni. Kah veeia kkhyüh shot ua. Pangsiim noh Shatan yaai pa jah ah ngshäea phäh-a ah piit pyaana i tüh-a phi käh thik kti mei k'uma nah nih phak kkhaie kuung kuung ni. 42 I lüni ti ta ei kah sooi ei üng ei am nah mbei u kti. Tui üng kah kät üng tui am nah tu u kti. 43 Kdunga kah seh üng am nah kkhin na-u kti. Shui kpum shak kkoa kah ve üng shui shak am nah pe-u kti. Ah nah mhnat ei üng, khupa k'uma kah ve üng am nah bük teng lo u kti’ tilü pyen kkhai. 44 Ah nih-e noh ‘Booi Pao, nang ei nah sooi, tui üng nah kät, kdunga nah seh, ah ning mhnat ei, shui shak kka-a nah ve, khupa k'uma nah ve sun i tüh üng ning hmu-u ngüshe am kah nih ning ku ei ni’ tilü kthäh kkhaie. 45 Asun üng ah nih noh ‘Ngngaai ua, kei kah pyen ma kkhai. U noh phi am ah jah suh lih ei kah nae am nah nih jah ku ei u hin kei am nah nih nah ku ei u üng atäng ni’ tilü jah mshak be kkhai. 46 Asune shot ulü Pangsiim noh angshääia mtaam ah jah peet naaka sit kkhaie. Pangsiima kkhyü ksang nak ktie ta angshääia xün naaka phak kkhaie ni” ah ti.