23
(Marküh 12.38-39; Lükah 11.43, 46, 20.45-46)
Kona Booi Jeishüh noh kkhyaang pä nu jah akläke üng “Sangsiim ktheeme jah Pharishe-e noh Mosheia thuum ah nih jah mthei naak khoh aana vek kti. Asuna thoon lü nang nih-e noh ah nih pyen nah nih jah ksang naak vai hlü kti. Ah nih-ea ning jah mtheh-a kba nah nih poh yah kkhaie. Lüphi ah nih poh mshah-a kba ta käh poh ubä. I lüni ti ta ah nih-e hin noh kkhyaange ah nih jah msuh mtheh-a kba ah nih päte noh am poh u. Phüüi shek kti phüih k'yüh nu sun kkhyaange üng jah phüih shak ktie. Ah nih päte noh ta kkhyaangea phüih jah ku ei vaia ah nih mjung mat hngoh üng am jäk hlü u. Ah nih poh mshah naküt hin kkhyaange noh jah hmu-ulü ah nih jah mün naak vaia phäh ni. Sangsiim ah nih yuk naak meh vun ktoom üng ah nih baan ktak ksüüp na-ulü ah nih mse yü phi ah nih ksüüp naak u sun i teh lok kti atia bük ua. Ah nih jih ngvaih-a pyaai sun akshaaü nua ah nih poh mshah naak üng Pangsiim i hok kba lei shong ktie ti sun kkhyaange üng jah kshing hlüshak ktie. Pooi ima booia ei naak üng ei hlük ktoih ktie. Sangsiim ngthei naak kyonga akdo boka ngshut naak üng ngshut hlü ktie. Ngnam kshuunga ah nih seh hü üng kkhyaange noh ‘Angvaaio!’ tilü ah nih jah khü vai hlü ei pi pi ktie. Nang nih-ea phäh ta jah mthei kti mat däk ni ave. Nang nih-e hin nang nih be na päih ni. Asuna thoon lü nang nih-e ta kkhyaange noh ‘Jah mthei ktio’ tia ah nih ning shui hlü ta jah ngya ubä. Ahina kho mdeka nah pa am nik ksang kti üng ta a u üng phi ‘Kah Pa ni’ käh ti bä. I a thoon lüni ti ta nang nih-ea Pa mat däk ni ah ve. Ah nih hin kkhaan khoa vek kti. 10 Kkhyaange noh ‘Jah mthei ktio’ tilü ah ning jah khü hlü u ta jah ngya ua. I a thoon lüni ti ta nang nih ning jah mthei kti mat däk ni ah ve. Asun hin kei, Khrito ni. 11 Nang nih-e üng akdäm boka thoon kti hin abänga nah nih xüh shoh eia thoon yah kkhai. 12 Ah pät noh ah pät mdäm mduh ei kti ta Pangsiim noh akneema thoon shak kkhai. Ah pät noh ah pät mhneem kti ta Pangsiim noh däm duh shak kkhai.
(Marküh 12.40; Lükah 11.39-51, 20.47)
13 Pangsiim lei shong ktia hana ngsom kti Sangsiim ktheeme jah Pharishe-eo, nang nih-ea phäh khui kha naaka thoon kkhai. I a thoon lüni ti ta Pangsiima pea lut hlük kti kkhyaangea phäh kshoh nah nih khaai-in ktie ni. Nah nih päte am nah nih luh hlü sun käh khäk shak ham lü luh kkhaia mtun ei ktie hngoh phi nah nih jah ngya ni. 14 Pangsiim lei shong ktia hana som kti Sangsiim ktheeme jah Pharishe-eo, nang nih-ea phäh khui kha naak thoon kkhai ni. I a thoon lüni ti ta mhmeei nuea im lou khoh hat naküt jah mhleei lü nah nih jah loh ei peet. Käh apou vaia msih naaka kho vei pa nah nih tä sham tuhan ktie. Asuna phäh Pangsiim noh kshe hleen bok ktia mtaam ning jah pek kkhaie ni. 15 Pangsiim lei shong ktia hana som kti Sangsiim ktheeme jah Pharishe-eo, nang nih-ea phäh khui kha naaka thoon kkhai. Amjü kse üng ka sa hngoh Jüdah-ea jum ei naak üng ah vaan lo vaia mpang lai tui lam jah kkong lam üng nah nih sit hü ktie kyo. Lüphi kkhyaang mat nah nih jum ei naak üng ah vaan lo ta nah nih päte kthaka Mulai pea phak kkhaia looi ngkäih kti ni. I lüni tita nah nih jah msuh mtheh naak üng nah nih jah mkhye mshoh shak bok kti. 16 Amik mü lü kkhyaange üng lam jah mshüüm hlük ktieo, nang nih-ea phäh khui kha naaka thoon kkhai. Nang nih-e noh ‘Mat mat noh hjok khah im nua ngming üng ng'yün ngse lü kkhyü ah taam ta i am lai. Lüphi mat mat noh hjok khah im nu üng ka xüi üng ng'yün ngse lü kkhyü ah taam ta ah kkhyü taam kuunga kba poh yah kkhai ni’ tilü nah nih jah msuuk mtheh ktie ni. 17 Amik mü kti anghmoongeo, xüi mä aktung bok athoon khü, am ani ta xüi sun ngsiim ngsaih shak kti hjok khah im nu mä aktung bok khü. 18 Nang nih-e noh ‘Mat mat noh khah naak lung päm üng ng'yün ngse lü kkhyü ah taam ta am lai. Lüphi khah naak lung päma kkhaana ka khah naak kkhyüng üng ng'yün ngse lü kkhyü ah taam ta ah kkhyü taam kuunga kba poh yah kkhai’ tilü nah nih jah mtheh u. 19 Amik müeo, khah naak kkhyüng mä adäm duh bok ve, khah naak kkhyüng sun ngsiim ngsaih shak kti khah naak lung päm mä ah däm duh bok ve. 20 Kkhyaang mat noh khah naak lung päm üng ah ng'yün se ta khah naak lung päma kkhaana ka khah naak kkhyüng phi ngpüi kti am ni bä. 21 Kkhyaang mat noh hjok khah im nu ah ng'yün ngse ta hjok khah im nu jah hjok khah im nua k'uma vek kti Pangsiim üng ng'yün ngse kti ni. 22 Kkhyaang mat noh kkhaan kho üng ah ng'yün ngse ta Pangsiima Booi ngoh naak jah Booi ngoh naaka kkhaana ngshut kti üng ng'yün ngse kti ni. 23 Pangsiim lei shong ktia hana som kti Sangsiim ktheeme jah Pharishe-eo, nang nih-ea phäh khui kha naaka thoon kkhai ni. Khyüm khyo, yaai nu, kdüng yüt, lung khui naküt hngoh nang nih-e noh Pangsiim üng xa üng ka mat nah nih pek ktie ni. Lüphi Pangsiima thuum aktung boke ta am jah läk lam u kti. Kkhyaange alooi ngkäih-a am jah si jaang u kti. Mpyeen ei naak jah kkhyü shing nang nih-e üng am ve. Ahin kba Pangsiima thuum aktunge sun nah nih jah läk vai u hlü kti ni. Aktung bok am nik kti phi nah nih läk yah vai u. 24 Nang nih ah mik müe noh kkhyaang lam nah nih jah mshüüm hlü ktie ni. Nah nih ooka tui üng kpi ngsum kti lou kyo u kti lüphi she mse pa nah nih mjo-in ktie ni. 25 Pangsiim lei shong ktia hana som kti Sangsiim ktheeme jah Pharishe-eo, nah nih kpäi kbe jah phäih ta akho kpunga aksaih-a nah nih jah mthih u. Lüphi ak'uma ta kpaam ei naak jah ngkeei ngku naak üng be ei ktie ni. 26 Ah mik mü kti Sangsiim ktheeme jah Pharishe-eo, nah nih kpäi kbe-e jah phäih sun ak'um da jah msiim msaih ma ua. Asun üng ta kho kpung da phi ngsiim ngsaih lok kkhai ni. 27 Pangsiim lei shong ktia hana som kti Sangsiim ktheeme jah Pharishe-eo, nah nih phäh-a khui kha naaka thoon kkhai ni. Nang nih-e hin bük ei phyak ktia lung üng ngvoong lü ah nih piit pyaan msüm hnün üng nah nih täng ktie ni. Lüphi msüm hnüna k'uma ta yook kthu jah angsiim ngsaih kti naküt üng be kti ni. 28 Asun kba ni, kkhyaange noh nah nih kho kpung joong pan sun ah ning jah büh ta Pangsiima kkhyü ksang nak ktie üng täng kti ni tia ngngaai kkhaie. Lüphi nah nih mlung ngnei ta akdo pa-a hana som u kti lü nah nih shili shan tak ktie ni. 29 Pangsiim lei shong ktia hana som kti Sangsiim ktheeme jah Pharishe-eo, nah nih khui kha naaka thoon kkhai ni. Shahma ngsiimea msüm hnüna lung nu akdoa nah nih jah nglin peet ktie. Mosheia thuum läk ktiea phäh ah nih msüm hnün bük ei phyak ktia nah nih jah piit pyaang peet ktie ni. 30 Nang nih-e noh ‘Kah nih pu paea kha üng kah nih ve ua ta shahma ngsiime ah nih jah hnim üng kei nih ta i am ngpüi bing bing u ngü’ tilü nah nih pyen pyen ktie. 31 Asun hin shahma ngsiim jah hnim ktiea kkhyüh nah nih tui kyum lok ktie ati sun nah nih päta mong nah nih shak shi ei naak ni. 32 Asuna thoon lü nah nih pu paea poh khoi sun ngpääng onga poh hnüh ua. 33 Kphyu kphyaai ha shik mah-eo, kphyu kphyaai ha shika sa naeo! Nang nih-e hin Mulai pea ning jah kpha lü Pangsiim noh mtaam ning jah pek kkhai. Mulai pe mtaama kkhyüh am lät laang shoom u kti. 34 Asuna thoon lü kei noh nah nih veeia kah jah tüih lo shahma ngsiime, angvaai aktheeme, Pangsiima kkhyü jah mthei ktie akhäk sun nah nih jah hnim kkhaie. Akhäk baan lam ktung üng nah nih jah hneen kkhaie. Akhäk Sangsiim ngthei naak kyonga nah nih jah kpaai kkhaie. Akhäk ta mlüh mata kkhyüh mlüh mata nah nih jah ktäm hü kkhaie ni. 35 Asuna thoon lü Apel ah hnima kkhyüh khah naak lung päm jah angsiim ngsaih boka hnüna kkeh-a Pera Küüia sa shahma ngsiim Sakha Rih säpa Pangsiima jah xü ngsiim ngsaih kti kkhyaange ah nih jah hnima phäh Pangsiim noh nang nih-e üng mtaam ning jah pek kkhai. 36 Ngngaai ua, kei kah pyen ma kkhai. Tuh-a kha üng ka kkhyaange üng asun kba mtaam jah pek kkhai” ah ti.
(Lükah 13.34-35)
37 Booi Jeishüh noh “Jeirüh Shalem mlüh pi ngnam mah-eo, shahma ngsiim nah nih jah hnim thak thak ktie. Pangsiim noh nah nih veeia ah jah tüih lo ngshäe lung üng nah nih jah khoong tong u ni. Aai nu noh aai sae ah ngphya kkea ah jah vopa kba nang nih Jeirüh Shalem kkhyaang sae phi kah ning jah vop hlü ktie kyo. Lüphi kah veeia am lohlü u kti. 38 Nah nih mlüh jah hjok khah im nu sim pyak lü u phi vek kkhai am ni. 39 Kah ning jah mtheh kkhai. Nang nih-e noh ‘Booi Pa ngming üng lok kti hin do kya naak vek kti ni’ tilü nah nih pyena mhnüüp vei säpa kei am nah hmuti u kti” tilü ah pyen.