22
(Lükah 14.15-24)
1 Booi Jeishüh noh pum msäp mat ah jah mtheh be tü.
2 “Pangsiima pe hin ah sa kpa üng salaak pooi poh hlüpeet kti shang phuhlang üng täng kti ni.
3 Ah jah laak ei päängea veei ah xüh shoh-e jah tüüi lü ‘Pooi sut ei vai, lo hnüh ua’ tilü ah jah pyen vaai shak. Lüphi ah jah laak eie sun am lohlü ngtu u.
4 Asun üng shang phuhlang noh ah xüh shoh akse jah tüüi be tü lü ah jah khü vaai shak be tü. ‘Buh pooi kah jah pyaan pääng ni. Kah she-e jah ah kpyan kbit sa-a jah hnim lü abäng ngpääng hnüh ve. Keia salaak pooia lohnüh ua’ tilü ah jah khü vaai shak be tü.
5 Lüphi ah jah laak ei noh ah xüh shoh-ea pyen sun am jah suh lih ei u. Mat ta loua khüüi kkhaia sit kti. Mat ta kun pan poh vaai kkhaia sit kti.
6 Akhäk noh ta shang phuhlanga xüh shoh-e sun jah man lü ah nih jah te u. Ah nih jah hnim u.
7 Asun üng ta shang phuhlang thüi shei lo kkhüt kti. Ah ngtuk kpoh-e jah tüüi lü ah xüh shoh-e jah hnim ktie sun jah hnim shak be lü, ah nih mlüh phi mei üng ah jah shi-in shak.
8 Kona ah xüh shoh-e üng ‘Salaak buh pooi pyaan pän kyo ni. Lüphi kah jah laak eie ei lok kkhaia am looi ngkäih u.
9 Asuna thoon lü ngnam k'uma sit ua. Nah nih hmuh naküt kah salaak buh pooia ei lok kkhaia jah khü ei vaai ua’ tilü ah jah tüih.
10 Ah xüh shoh-e noh ngnam kshuunga sit lü ah nih hmuh naküt kkhyaang kdo kkhyaang kshe ah nih jah mkhääm lo u. Asun üng ta salaak buh pooi sun kkhine üng be lok kti.
11 Shang phuhlang noh kkhine jah bük kkhaia buh pooia lok kti. Asun üng salaak pooi üng am looi ngkäih ktia shui shak shui shak kti mat ah hmuh.
12 Shang phuhlang noh ‘Kah püio, salaak pooi üng looi ngkäih ktia shui shak am nah shui shak kti ta i hok kba ahia nah lut lok kti ni’ tilü ah kthäh. Asuna kkhyaang noh i phi am ti.
13 Kona shang phuhlang noh ah xüh shoh-e üng ‘Ahina kkhyaang ah kut kho jah khit lü kho kpunga khoa mthan naaka kpyaai-in vai ua. Asua mbooi kyap lü ah ha kkhyüüt ei she’ tilü ah jah mtheh.
14 I lüni ti ta Pangsiim noh ah pea ah jah laak ei ta kho hah pa kyo. Ah jah xü ta api sa ni” tilü Booi Jeishüh noh ah pyen.
(Marküh 12.13-17; Lükah 20.20-26)
15 Kona Pharishe-e sit ulü Booi Jeishüh noh i mä ah pyen mkhye velü ah nih man naak vaia mkot shui ktie.
16 Pharishe-ea akläke jah shang phuhlang Herota akläke Booi Jeishüh-a veei ah nih jah tüih yüm u. “Angvaaio, anghläia aksang nah pyen kti ati sun kah nih kshing ktie ni. Pangsiima thuuma kba aksanga nah jah mthei kti ni. Kkhyaanga hmaai am bük kti. I a thoon lüni ti ta kkhyaang am mkhoi mkhya kti.
17 Kesha shang phuhlang üng khoon to ngui peet vai Pangsiima thuum üng ngkäk kti mä. I a nah ngngaih sun jah mtheh-a” ah nih ti tuhan u.
18 Booi Jeishüh noh ta ah nih lim ma sun jah kshing ei lü ah nih-e üng “Pangsiima thuuma kba poh hlü ktia hana som ktieo, i lü nah nih nah saam hlü ktie ni.
19 Khoon to peet vaia ngui tangka mat nah mhnüh lo ua” tilü ah jah mtheh. Ngui tangka mat ah nih lo püi u.
20 Asun üng “Ahin üng ka hin ua lup ni, ua ngming ni” tilü ah jah kthäh.
21 Asune noh “Kesha shang phuhlang ni” ah nih ti u. Asun üng Booi Jeishüh noh “Kesha shang phuhlang üng shääng ei kti ta Kesha shang phuhlang üng pe-ua. Pangsiim üng shääng ei kti ta Pangsiim üng pe-ua” tilü ah pyen be.
22 Asun ah nih ngjaak u üng mün sam tong lü sit be ktie.
(Marküh 12.18-27; Lükah 20.27-40)
23 Asuna mhnüüp üng Satüke-e Jeishüh-a veei lok ktie. Satüke-e noh thih kona xün be am ve ti tia jum ei ktie.
24 Asune noh “Angvaaio, ‘Mata be be hin noh sa na käh khyüi sho ham lü ah kkhyu thih tak kkhai. Ah nih noh ah be bea mshuui käh dut kkhaia ah hmeei nu shääm be lü ah be bea phäh-a hnashen phi khyüi sho nishe’ tilü Moshei noh Sangsiim üng ah yuk hüt ni.
25 Kah nih ngnama be na kkhyüh vekhoi mjoh ktie. Ah nih be kdäm noh ah kkhyu lalü sa na käh khyüi sho ham lü ah kkhyu ah thih taak. Ah kkhyu sun ah na-a shääm vaia ah taak hüt.
26 Anghngih, kthum naak ngbe ngnae sun phi asun kba kuunga thipäih ktie. Asun kba ngbe ngna kkhyüh abäng noh asuna nghnu mi kkhyu nalü hnashen käh khyüi sho xa lü thipäih ktie.
27 Hnua ta nghnu mi sun phi thik kti.
28 Asun kba ani ta thih naaka kkhyüh xün be üng asuna nghnu mi ua kkhyua thoon kkhai ni. Kho mdeka ta ngbe ngna kkhyüh abänga kkhyua thoon kti ta” tilü ah nih kthäh tuhan u.
29 Booi Jeishüh noh ta “Nah nih su ngngaih u hin khye kti ni. I a thoon lüni ti ta nang nih-e hin noh Sangsiim am kshing u kti. Pangsiima hiit phi am hmat u kti.
30 Thipääng ktie Pangsiim noh ah jah mthoh bea ksüün üng kkhyaange am ngkhyu ngla ti u. Ah nih sa phi am jah pe ei kti u. Kkhaan kho ngshäea kba ve soh kkhaie ni.
31 Lüphi thih naaka kkhyüh thoh bea mong Pangsiima pyen sun am nah nih kshing ktie mä.
32 Pangsiim noh ‘Kei hin Apyahama Pangsiim, Isaka Pangsiim, Jakopa Pangsiim ni’ tilü ah ngming shui ei kti. Pangsiim hin akthiea Pangsiim am ni. Xüng ktiea Pangsiim ni” tilü ah jah mtheh be.
33 Kkhyaang pä nu noh asun ah nih ngjaak üng Jeishüh-a msuh mtheh naaka phäh mün sam ktie.
(Marküh 12.28-34; Lükah 10.25-28)
34 Satüke-e noh i phi käh tibe thei ktiea Booi Jeishüh noh ah jah pyen püi sun Pharishe-e noh ngja-ulü ta ngkhääm lok ktie.
35 Ah nih-e üng ka Sangsiim ktheem mat Booi Jeishüh saam kkhaia ah veeia lok kti.
36 “Pangsiima thuum naküt hin üng aktung bok ta i ni” tilü ah kthäh.
37 Booi Jeishüh noh “‘Nah Booi Pa Pangsiim nah mlung ksang üng, nah ngnei shak, nah su ngngaih naküt üng kphya na-a.’
38 Ahin aksük jah aktung boka thuuma thoon kti.
39 Aktung bok anghngih naak ta ahin üng atäng ni. ‘Nah pät noh nah pät nah kphya naaka kba nah püi po phi kphya na-a’ tilü vek kti.
40 Mosheia thuum abäng jah shahma ngsiimea msuh mtheh naküt hin asuna thuum nghngih üng ngphun ei ktie ni” ah ti.
(Marküh 12.35-37; Lükah 20.41-44)
41-42 Pharishe-e ah nih ngkhääm um üng Booi Jeishüh noh “Khritoa mong i a nah nih ngngaai ktie ni. U a kkhyüh tui kyum lok kti ni” tilü ah jah kthäh. “Davita kkhyüh tui kyum lok kti ni” tilü ah nih mshak be u.
43 Booi Jeishüh noh “Asuna athoon üng Mkhyangsiim noh Davit üng Khrito sun ‘Kah Booi Pa ni’ ah ti shak ta i hok kba vai ja.
44 Shang phuhlang Davit noh ‘Pangsiim Booi Pa noh kah Booi Pa üng “Nah kho pha kkea nah ye-e kah jah taak veia kah kkheet lama ngshut ei ma-a” tilü ah pyen ni.’
45 Asun kba ani ta Davit noh Khrito üng ‘Kah Booi Pa’ am ti shü. Asuna athoon üng Khrito hin Davita tu kpa-a i hok kba thoon khoh kkhai ni” tilü ah pyen.
46 U noh phi mkhap mat sa phi am pyen be khoh u. Asuna mhnüüpa kkhyüh u noh phi i phi Booi Jeishüh üng am kthäh dat kti u.