20
1 Pangsiima pe hin ngbom ktheih ngvoong mah pa üng täng kti ni. Ngvoong mah sun kho thai shoa sit ngooi lü nghloh nghnih ktie sun ngvoong k'uma khuut poh kkhaia ah jah xüh ei.
2 Mhnüüp mat ktha kheen sun ngui tangka mat vaia ä ulü ah ngvoonga khüüi khoom kkhaia ah jah tüih.
3 Kho pyaanga sit be tü lü u noh phi am ah jah mhloh mhnih ngnam kshuunga ve-ei ktie ah jah hmuh vaai.
4 Ngbom ktheih ngvoong mah pa noh “Nang nih-e phi kah ngbom ngvoonga khuut poh vaai ua. Looi ngkäih ktia kah ning jah pek kkhai ni” ah ti.
5 Asun üng ta sit ktie. Ngbom ktheih ngvoong mah pa sun mhnüüp ngshunga phi, im kngam shoong ei ksüüna phi, ngnam kshuunga sit be tü lü ah hmuh-a kkhyaange sun asun kba ah jah xüh be tü.
6 Ngsheng shoon ei ksüüna sit be tü lü ah nih poh vai am vek ktie sun ah jah hmuh be tü ham. Ngvoong mah pa noh ah nih nih-e üng “I phi käh poh lü amhnüüp mata amdanga i lü ahi käa ta nah nih ve-ei ktie ni” tilü ah jah kthäh.
7 Ah nih-e noh “U noh phi am jah xüh ei lü va” ah nih ti be u. Ngvoong mah pa noh “Nang nih-e phi sit lü kah ngbom ngvoonga khuut poh vaai ua” ah ti.
8 Kho mü lolüta ngvoong mah pa noh nghloh nghnih ktie jah pä khong kti üng “Nghloh nghnih ktie jah khü kti lü ah nih ktha kheen jah pea. Akpäih naaka kah jah xüh eie üng aksüka ah nih kheen jah pe ma-a. Aksüka kah jah xüh ei mae sän akpäih naaka jah pea” ah ti.
9 Ngvoong mah pa noh “Ngsheng shoon ei ksüüna ah jah mhloh mhnih-e sun lo-ulü mat siim siim ngui tangka yah ei ktie”
10 Asun üng ta ngvoong mah pa noh aksüka ah jah nghloh shak mae sun lo-ulü ngui tangka mat käh tan ktia yah ei vaia ngngaai ktie. Lüphi ah nih nih-e noh phi ngui tangka mat siim ni ah nih yah ei u.
11 Asun üng ta ah nih ktha kheen ah nih dou ei lo sun üng ngvoong mah pa am je na-u.
12 Ah nih nih-e noh “Akpäih naak ah jah xüh eie noh ta naji mat ni khuut ah nih poh u. Nih nih-e ta kho k'hlok nu ngnoi ngsai lü amhnüüpa khuut nih poh ktie ni. Ngvoong mah noh ta alang langa ah jah peet va ni kba” ah nih ti u.
13 Ngvoong mah pa noh ah nih nih-e üng ka mat üng “Kah püio, kah ngtuui ngten kti am ni. Mhnüüp mat nah nih ktha kheen sun ngui tangka mat kah ning jah peet vaia nih ngthäh ktie am ni bä.
14 Nah nih ktha kheen seh püi lü sit be hnüh ua. Akpäih naaka kah jah xüh eie sun phi nang nih-e üng atänga ah nih ktha kheen jah peet vai kah hlü ei ni.
15 Kah päta ngui sun kah mlung ktüüma kah poh khoh am ni bä. Hina kkhyaangea kkhaana kah the phya-a phäh nah nih ngkeei ngku ktieo” tilü ah pyen.
16 Asuna ng'yüia akpäih naaka vaang ktie hin aksüka thoon be kkhaie ni. Aksüka vaang ma ktie hin hnu mshääia thoon ve kkhaie ni” tilü ah jah mtheh.
(Marküh 10.32-34; Lükah 18.31-34)
17 Jeirüh Shalem mlüh-a ah nih seh shoa akläk xalei nghngih ah veeia ah jah khü.
18 Booi Jeishüh noh “Ngngaai ua, Jeirüh Shalem mlüh-a nih sit hnüh kkhaie ni. Asua kei, Kkhyaang Sa khotu ngsiim kdäme jah Sangsiim ktheemea kut k'uma kah pha vaia nah ktuun kkhaie. Ah nih-e noh ‘Ah nih hin thi ngkäih kti ni’ tilü mkhyah kkhaie.
19 Asune noh Pangsiim am kshing kti kkhyaangea kuta nah ap kkhaie. Nah yaih ei kkhaie. Yüüi ngkhep üng nah kpaai ulü baan lam ktung üng nah hneen ulü nah hnim kkhaie. Amhnüüp kthuma mhnüüp üng kah thou be kkhai ni” tilü ah jah mtheh.
(Marküh 10.35-45)
20 Sepetea sa xooi sun ah nih nu noh Jeishüh-a veei jah lo püi lü ah mkhuuk üng ngdääng lü “Bä naak jah pea” tilü ah nghui naak.
21 Booi Jeishüh noh “I nah hlü ei kti ni” tilü ah kthäh. Ah nih nu noh “Kah sa xooi hin nang Booi Pa-a nah upa pea nah ksong lama mat nah kkheet lama mat jah ngshut shaka” ah ti.
22 Jeishüh noh “I nah nih tong atia am kshing u kti. Kah khui kha-a kba nah nih khui kha dat kti mä. Kah khaam eia mkhuh mhlih nah nih khaam ei dat kti mä” tilü ah jah kthäh. “Kah nih khyaih khoh kkhai ni” tilü ah nih mshak be.
23 Booi Jeishüh noh “Kah khui kha-a kba nah nih khui kha dat ksang kkhai kyo ni. Kah khaam ei mkhuh mhlih nah nih khaam ei khoh ksang kkhai kyo ni. Asuna thoon lüphi kah ksong lama mat, kah kkheet lama mat nah nih ngshut vaia ta am ning jah poh peet khoh ngü. Asuna ngshut naak ta kah Pa Pangsiim noh ah jah pyaan peeta kkhyaangea phäh ni.”
24 Akläke xa noh asun sun ah nih ngjaak lo üng be na xooi sun ah nih jah thüi ei lo u.
25 Jeishüh noh akläke ah veeia jah khü ma lü “Pangsiim am kshing kti kkhyaang mjü kse-ea pea jah up ktie noh ta ah nih jah upe sun ah nih jah nghnge ei naak u. Aso-yah booie noh jah aang ulü ah nih jah xüh shoh ei u sun nah nih kshing ktie ni.
26 Nang nih-e ta asun kba käh thoon ubä. Nang nih-e üng ta akdäma thoon hlük kti ta nah nih xüh shoh-a thoon she.
27 Nang nih-e üng ashü sanga thoon hlük kti ta nah nih bängea mpya-a thoon yah kkhai.
28 Kei Kkhyaang Sa phi kkhyaange jah xüh shoh ei kkhaia kah lok kti am ni. Kkhyaangea xüh shoh ei vaia kah lok kti ni. Kkhyaang naküt kah jah shuh naak be vaia kah shak jah pelü kah thi-yah kkhai ni” ah ti.
(Marküh 10.46-52; Lükah 18.35-43)
29 Booi Jeishüh jah akläke Jeirih Kho mlüh-a kkhyüh ah nih seh be tü u üng kkhyaang pä nu noh ah nih jah läk u.
30 Lam peia ngshut kti ah mik mü xooi noh asuna lam üng Booi Jeishüh ah lo sun ah nih ngjaak. Ahunata “Booi Pao, Davita tu kpao, jah mpyeen eia” tilü ngpyaang ngpyet-in kti xooi.
31 Kkhyaang pä nu noh ta “Käh sik sik nia” tilü ah nih jah ngya u. Lüphi asun xooi noh “Booi Pao! Davita tu kpao! Jah mpyeen eia!” tilü ngpyaang lodäm däm kti xooi.
32 Jeishüh noh ngdüüi ma lü ah jah khü shak. “I kah ning jah poh peet vai nah nih hlü ei kti ja” tilü ah jah kthäh.
33 Amik mü xooi noh “Booi Pao, kah nih mik jah vaai shak bea” tilü ah nih nghui naak.
34 Booi Jeishüh noh jah mpyeen ei lü ah nih mik ah jah hneh. Ahunata ah nih mik vaai lobelü Jeishüh ah nih läk.