1 Shang phuhlang Herota kha üng Jeishüh sun Jüdah hne Pet Leem mlüh-a hmi lok kti. I vei käh hjou ktia aai shi bük thei kti aktheeme nghngi lo pe da kkhyüh Jeirüh Shalem mlüh-a phalok ktie. 2 Asune noh “Jüdah shang phuhlanga thoon lok kkhai hnashen kpa mi sa hmi lok kti ta hoa ni ave” tilü ngthäh ktie. “Kei nih-e noh ah nih-a aai shi nghngi lo da pou lolü kah nih hmuh u ni. Asuna thoon lü ah nih hjok khah kkhaia kah nih lok ktie ni” ah nih ti u. 3 Shang phuhlang Herot noh ahina thang ah ngjaak üng pyang ma lo kkhüt kti. Jeirüh Shalem mlüh üng akve naküt phi asun kba thoon ve päih ktie. 4 Shang phuhlang Herot noh khotu ngsiim kdäme jah Sangsiim ktheeme abäng jah mkhääm lü “Khrito hoa hmi kkhai ni” tilü ah jah kthäh. 5 “Jüdah hne Pet Leem mlüh-a hmi kkhai ni” ah nih ti be u. “Shahma ngsiim noh hin kba ah yuk ni. 6 ‘Jüdah hnea vek kti Pet Leem mlüh-o, nang hin Jüdah hnea ka mlüh-e üng mlüh kdiik mlüh kneem boka am thoon kuung kti. Nanga kkhyüh khong mang kdäm ngtüüi lok kkhai ni. Ah nih noh keia kkhyaang Isare-e sun lam jah mshüüm kkhai ni’ tilü vek kti” tilü khotu ngsiime jah Sangsiim ktheeme noh ah nih pyen u. 7 Asun üng ta nghngi lo da ka aktheeme sun shang phuhlang Herot noh ampyu sa-a ah jah khü. “Nah nih hmuh thaih ke aai shi hin i tüh-a kkhyüh nah nih hmuh u ni” tilü angtea ah jah kthäh. 8 Kona Pet Leem mlüh-a ah jah tüih. “Sit ua. Hnashen sun hmuh onga shui ubä. Nah nih hmuh üng kei phi nah mtheh lobe ua. Kei noh phi sit lü kah hjok khah hlü hnga kti ni” tilü ah jah sük. 9 Asun kba Jeirüh Shalem mlüh-a kkhyüh sit ulü lama thaih ke aai shi sun ah nih hmuh be tü u. Nghngi lo pea nih hmuh aai shi va nik kba ti-ulü asuna aai shi sun ah nih ma-a sit lü hnashena ve naaka kkhaana ngdüüi-in kti. 10 Asuna aai shi hmulo be ulüta xe na-ulü je kyai tong ktie. 11 Im k'uma lut ulüta hnashen kpa mi sa jah ah nu Marih sun ah nih jah hmuh u. Asun üng ah nih mkhuuk üng ngdääng lü hnashen sun hjok khah ktie. Kona ah nih shui voh jah nghmong ulü ah nih lo seh külak ah nih yet u. Ah nih yeta külak ta xüi, Phan Kinseng jah Mürah-a ah nih shui ng'uui kti thinga kpyü ni. 12 Pangsiim noh aktheeme sun ah nih lu ngmang üng jah msääi lü shang phuhlang Herota veei käh ah nih seh be vaia ah jah mtheh. Asuna thoon lü lam kse üng ah nih teng pe da sit be ktie.

13 Asune ah nih seh be kona Joshepa lu ngmang üng Booi Pa-a kkhaan kho ngshä pou lok kti. Asun noh “Ngpyaih xat lü hnashen jah ah nu angshenga Ekip pea jah seh püia. Kei noh kah ning mtheh lo be tü veia asua ve ubä. I lüni ti ta shang phuhlang Herot noh ah hnim vaia hnashen shui hü kkhai ni” tilü ah mtheh. 14 Joshep thou lolü asuna mthan kuung üng hnashen jah ah nu Ekip pea ah jah seh püi. 15 Shang phuhlang Herota thih vei säpa asua vek ktie. Ahlaan nu üng Booi Pa noh shahma ngsiim üng malam ah pyen ta “Kei noh Ekip pea kkhyüh kah sa kah khü be ni” tilü vek kti. Asun kba kuunga Pangsiima pyen küm seei lok kti.

16 Nghngi lo da ka aktheeme noh ah nih lim ma naak u sun shang phuhlang Herot noh kshing lo lüta thüi she lo kkhüt kti. Pet Leem mlüh jah api peia vek kti kum nghngih jah kum nghngih-a kkea ka hnashen kpa mi sa abäng ah nih jah hnim päih vaia ah mkhyah. Nghngi lo da ka aktheemea vei Khritoa hmi naak lo aksüün ah kshing loa kba ah jah hnim shak ni. 17 Shahma ngsiim Jeireh Mih-a malam pyena kba thoon velok kti. 18 “Ramah mlüh-a ngpyaang ngpyet lü ah nih kyah yüna kthai ngjaak ni. Raka-a ngshui kti nghnu mi ah saea phäh kyap ve. Kyap lü kyap lü am ni bäi shak khoh. I lüni ti ta ah sa abänga thipäih ktie ni” tilü vek kti.

19 Shang phuhlang Herot ah thih kona Joshepa lu ngmang üng Booi Pa-a kkhaan kho ngshä pou lobe tü kti. Joshep Ekip pea veham kti. 20 Kkhaan kho ngshä noh “Ngpyaih xat lü hnashen jah ah nu Isare pea jah seh püi bea. Hnashen hnim hlü kti thipääng ve u” tilü ah mtheh. 21 Asun üng Joshep thou lolü hnashen jah ah nu Isare pea ah jah seh püi be. 22 Shang phuhlang Herota sa kpa Akhe Laaüh Jüdah shang phuhlanga thoon kti ati sun Joshep noh ngja-lüta Jüdah hnea ve vaia kyüh ei kti. Ah lu ngmang üng phi Pangsiim noh Jüdah hnea käh ah seh vaia ah msääi. Asun üng Kalile hnea ve-ei vaai kkhaia sit kti. 23 Nasaret mlüh-a vevaai ktie. Hnashena mong shahma ngsiima malam pyen ta “Ah nih sun Nasaret kkhyaanga shui kkhaie” tilü ni. Asuna malam pyena kba küm seei lok kti.