17
(Marküh 9.2-13; Lükah 9.28-36)
Mhnüüp kkhyuk kona Booi Jeishüh noh Peta, Jakop, Jakopa na Johaan jah seh püi lü msuung k'hlüng nua kkhaana kaai ktie. Asua ah nih hmuh-a Booi Jeishüh-a lup nghlai lok kti. Ah mik hmaai sun kho nghngi kshoua kba vaai lok kti. Ah shui shak phi abook lik nua jaaü jaaü ei kti. Asun üng Moshei jah Eilijah pou lo nilü Booi Jeishüh ah nih ngsi ngjaang lo püi sun akläke noh ah nih jah hmuh. Peta noh Booi Jeishüh üng “Booi Pao, ahia ve ei na-phya kti ni. Nah hlü ei ta nanga ve naak vai mat, Mosheia ve naak vai mat, Eilijah-a ve naak vai mat, hjaam kthum kah nih pha kkhai shü” ah ti. Peta noh ah pyen k'um üng lik lik ei kti kho ngmei nu noh ah jah hloop-in lo. Kho ngmeia kkhyüh kthai ta “Ahin kah mhlä kphya naak kah sa kpa ni. Ah nih üng kah mkhüh hnip kti. Ah nih-a pyen ksang na-ua” tilü lok kti. Akläke noh asun ah nih ngjaak jah ta kyüh ei lo tong ulü mdeka ngbok ktie. Lüphi Booi Jeishüh ah nih veeia lolü ah jah hneh lo. “Thou ua, käh kyüh ei ua” ah ti. Ngkyääk lolü bük ulüta Booi Jeishüh däk ni ah nih hmuh ti u. Msuunga kkhyüh ah nih kyum lo be shoa Booi Jeishüh noh “Kei Kkhyaang Sa thih naak üng kah thoh be vei säpa ahin nah nih hmuh u hin u üng phi käh mtheh bing bing ubä” tilü ah jah mtheh. 10 Akläke noh “Shahma ngsiim Eilijah loma kkhai ni tilü Sangsiim ktheeme noh i lü jah msuuk mtheh ktie ja” tilü Booi Jeishüh ah nih kthäh u. 11 Booi Jeishüh noh “Ä, sang beh kti. Abäng naküt pyaang be kkhaia Eilijah aksüka lok kti ni. 12 Kah ning jah mtheh kkhai. Eilijah lopääng kti. Lüphi ah nih-e noh ah nih sun am kshing u. Ah nih tüüma kba ah nih sun ah nih poh mshah ni. Asuna ng'yüia kei, Kkhyaang Sa phi nah mkhuh mhlih kkhaie ni” tilü ah jah mtheh. 13 Asun üng ta Jeishüh noh Patiso Johaana mong ah pyen ni atia akläke noh ah nih ngjaak lo kya u.
(Marküh 9.14-29; Lükah 9.37-43)
14 Booi Jeishüh jah akläke kthum kkhyaang pä nua ve naaka ah nih pha lo üng kkhyaang mat Booi Jeishüh-a ve naaka lolü ah mkhuuk üng ngdääng lok kti. 15 “Angvaaio, kah sa hin mpyeen eia. Kah sa ksiin noh poh lü khui kha ei tong kti ni. Aläa mei üng phi lut lü tui üng phi lut kti ni. 16 Nanga akläkea veei lo püi kyo ngüshe phi am mya shak be khoh u” tilü ah nghui naak. 17 Booi Jeishüh noh “Nang nih-a kkhyaange hin noh Pangsiim am nah nih üm nak ktie ni. Nah nih su ngngaih hin khye kti. Nah nih hlonga velü i vei pi pi kah ning jah suun ei vai ni. Hnashen kpa mi sa kah veeia lo püi ua” tilü ah jah mtheh. 18 Booi Jeishüh noh kho yaai ah mshot. Kho yaai ah mshot jah ta kpa mi sa mya-in lobe kti. 19 Akläke noh ah nih pät ah nih ve üng “Kho yaai i lü am kah nih kshät khoh ni” tilü Booi Jeishüh ah nih kthäh u. 20 Booi Jeishüh noh “Nang nih-ea jum ei naak angseeka phäh ni. Ngngaai ua, kei kah pyen ma kkhai. An ne msi ui teh nah nih jum ei naak ave ta ahina kho msuung üng ‘Ahia kkhyüh sa sa ngpyot-ina’ nah nih ti-khoh ktie. Asun üng aksanga ngpyot kkhai. Nang nih-ea phäh am thoon khoh kkhai i phi am ve. 21 Nikyo lüphi ahi bang kho yaai sun tä sham naak jah ei jeih naak üng va mshot khoh vai” ah ti. 22 Kalile hnea Booi Jeishüh jah akläke ayüma ah nih ve k'um üng Booi Jeishüh noh “Kei, Kkhyaang Sa hin kkhyaangea kut k'uma nah ap kkhaie. 23 Ah nih-e noh nah hnim kkhaie. Ah nih nah hnim kona amhnüüp kthum üng Pangsiim noh nah mthou be kkhai” tilü ah jah namtheh. Asun üng akläke puk shelo tong ktie.
24 Booi Jeishüh jah akläke Kapanom mlüh-a phalok ktie. Kona hjok khah im nua phäh khoon to k'hlook Peta-a veei lolü “Nanga angvaai noh hjok khah im nua phäh khoon to ta pe-laang ktio” tilü ah kthäh. (Isare kkhyaang naküt noh kho kum tä lü mhnüüp mat ktha kheen bang vai hjok khah im nua phäh peet yah vaia thuum vek kti) 25 Peta noh “Pek kti ni” tilü ah mshak be. Peta im k'uma ah luh lo be üng Booi Jeishüh noh aksüka ah ngthuh ei püi. “Shimono, kho mdek shang phuhlange noh u ea veeia khoon to hlook ktie ni. Ah nih päta kkhyaang mjüea veeia mä, am ani ta kkhyaang kse-ea veeia mä ah nih hlook u. I hok kba ni nah ngngaih” tilü ah kthäh. 26 Peta noh “Kkhyaang kse-ea veei ni” tilü ah pyen be. Asun üng Jeishüh noh Peta üng “Asuna athoon üng ah nih päta kkhyaang mjü noh khoon to peet vai am hlü. 27 Lüphi ah nih mlunga shou naak vai poh vai am hlü. Asuna thoon lü tui li peia sit kti lü nah mkaih kpyaai bä. Aksüka nah yah nga-a mpyong phyan bä. Ngui tangka nah hmuk kkhai. Asuna ngui tangka sun lou kti lü keia khoon to jah nah päta khoon toa phäh jah pevaaia” tilü ah mtheh.