15
(Marküh 7.1-13)
Jeirüh Shalem mlüh üng ka Pharishe-e jah Sangsiim ktheeme akhäk Booi Jeishüh-a veei lok ktie. Ah nih-e noh “Nanga akläke noh i a thoon lü nih pu paea thuum lüüm kkaan ktie ni. Ei hlaana ah nih kut am mthi ei u” ah nih ti u. Booi Jeishüh noh “Nang nih-e noh ta nah nih thuum seena phäh i lü Pangsiima thuum nah nih lüüm kkaan ktie ja. Pangsiim noh ‘Nah nu pa jah lei shonga’ tilü ah mkhyah. ‘Nah nu pa nah jah kshe naak ta aksanga ning hnim yah kkhaie’ tilü phi ah mkhyah. Nang nih-e noh kkhyaang mat noh ‘Nang nu, nang pa, kah ning ku ei naak khoh Pangsiim üng kah peet päih ni. Nang kah ning ku ei naak vai am ve ti’ tilü pyen khoh kti atia nah nih jah msuh mtheh tuhan u. Asun üng ta asuna kkhyaang noh ah nu pa ah lei shong vai am hlü ti. Asun kba nah nih thuum seena phäh Pangsiima kkhyü i a käh kyah lu mong kkhaia nah nih poh ktie. Nang nih-e hin ngpyuun ktia hana nah nih som tuhan ktieo. Shahma ngsiim Hei Shajah-a malam pyen hin nang nih-e üng ngkäk pi pi ve. Ah nih noh ‘Ahina kkhyaange noh ah nih mpyong thak üng nah lei shong ve u. Ah nih mlung üng ta kei am nah kphya na-ngtu u. Ah nih nah hjok khah u hin amdang ni. Ah nih jah msuh mtheh-a thuum hin kkhyaangea su ngngaih ni’ tilü ah yuk hüt sun vek kti” tilü Booi Jeishüh noh ah jah mtheh.
(Marküh 7.14-23)
10 Kona Jeishüh noh kkhyaang päe ah veeia jah khü lü “Ngngaai lü ngja-kya u a. 11 Ah ei noh kkhyaang sun i hok kba phi ah mlung ngnei am sheet shak khoh. Ah mpyong üng lut lok kti noh ni kkhyaang ah sheet shak” tilü ah jah mtheh. 12 Asun üng akläke Booi Jeishüh-a veei lo ulü “Angvaaio, nah kkhyü pyena phäh Pharishe-e ah nih mlung um kti ati sun nah kshing kti bä” tilü ah nih mtheh u. 13 Ah nih noh ta “Kkhaan khoa vek kti kah Pa Pangsiim noh am ah nglina dung naküt sun jah phuk kshak be kkhai. 14 I a käh jah ngngaai u a. Amik müa thoon ulü amik müe sun lam jah mshüüm hlük ktie. Amik mü noh amik mü ah seh püi ta ah nih nghngih khuui kkhyook üng kyak kkhai xooi am ni bä” tilü ah jah mshak be. 15 Peta noh “Ahina pum msäp kah nih ngjaak kya vai ua jah mtheh-a” ah ti. 16 “Tuh vei üng am nah nih ngja-kya ham ktieo” tilü Booi Jeishüh noh ah jah kthäh. 17 “Kkhyaanga ei naküt ah kkhon k'uma lut ma lü ngnoa ah seh ei üng lut lo be kti ati sun am nah nih kshing ktie bä. 18 Lüphi mpyong üng lut lok kti nih kkhyü noh ta mlung k'uma kkhyüh lolü kkhyaang sheet shak kti ni. 19 I hok kba ni ti ta kkhyaanga mlung k'uma kkhyüh am do kti su ngngaih, kkhyaang hnim, kkhyaanga nghnu mi kpa mi ve püi, boh bah naak, mpyuuk ei, hleei hlak, sok sek lut lok ktie ni. 20 Ahine noh kkhyaang jah sheet shak ktie ni. Käh mthih-a kut üng ei ei noh ta kkhyaang sun i hok kba phi am sheet shak khoh” tilü ah jah mtheh.
(Marküh 7.24-30)
21 Asuna kkhyüh Türah jah Shiton mlüh hne da sit kti. 22 Asuna pi peia ka Khanaan mjü nghnu mi mat Booi Jeishüh-a veei lok kti. “Booi Pao, Davita tu kpao, nah mpyeen eia. Kah sa nghnu hin kho yaai noh vaan nalü ah mkhuh mhlih tong ni” tilü ngpyaang pyei kti. 23 Booi Jeishüh noh ta i phi am pyen be. Asun üng akläke ah veeia lo-ulü “Angvaaio, ahina nghnu mi hin mshot bea. Jah läk lolü ngpyaang kolaih ve” tilü ah nih nghui naak u. 24 Asun üng “Isare mjü üng ka khyük kti toea phäh däka ni Pangsiim noh ah nah tüih lo” ah ti be. 25 Nghnu mi nu ta lolü Jeishüh-a ma-a ah mkhuuk lu üng ngdääng kti. “Booi Pao, nah ku eia” tilü ah nghui naak. 26 Booi Jeishüh noh “Hnashenea ei hlü lou lü uie üng jah kpyaai-in peet ta i am looi ngkäih” ah ti be. 27 Nghnu mi nu noh “Ä, Booi Pao, ni kyo lüphi ah mah pa-a ei k'hleei kyalok kti sun uie noh ta ko ei ham ktie ni” tilü ah pyen be. 28 Asun üng Booi Jeishüh noh nghnu mi üng “Nah jum ei naak däm duh ve. Nah nah nghui naaka kba thoon pääng kti ni” tilü ah mtheh. Asuna ksüün kuung kuung üng ah sa nghnu do-in lobe kti.
(Marküh 8.1-10)
29 Asuna hnea kkhyüh Booi Jeishüh sit lü Kalile tui li pei juun lü sit kti. Kona msuunga kaai kti. 30 Kkhyaang pä nue ah veeia lok ktie. Akho kthi, amik mü, sek saai kti, am shi hlo thei ktie jah amjü hnga-a am shi khyaih kti kho hah jah lo püi ulü Booi Jeishüh-a kho ma-a ah nih jah taak lo u. Ah nih noh abänge ah jah mdo be päih. 31 Anghmoe ah nih shi hlo lo be, sek saai ktie ah nih do lo be. Akho kthie ah nih seh hü be, amik müe ah nih mik avaai lobe sun kkhyaange noh hmu-ulü mün sam tong ktie. Asun üng Isare kkhyaangea Pangsiim ah nih mküüi mtou u. 32 Jeishüh noh akläke jah khü ma lü “Ahia kkhyaange kah jah mpyeen ei ni. Kah hlonga mhnüüp kthum ve hnüh ktie. Ah nih ei vai i phi am ve ti. Ei noh jah kkhyoot ei ei ktia ah nih ima kah jah tüih be ta lama hit saai pah kkhaie ni” tilü ah jah mtheh. 33 Akläke noh “Ahina mkyaang ksaih-a ahi kän kkhyaang päe jah mbei khoh vaia i hok kba ei ook yah khoh vai ja” tilü ah nih pyen be u. 34 Asun üng Jeishüh noh “Nah nih veeia kkhaai kpeh i kän vek kti ja” tilü ah jah kthäh. Akläke noh “Beei kkhyüh jah nga api sa vek kti” ah nih ti u. 35 Kkhyaang pä mdeka kkhaana ah nih ngshut vaia Jeishüh noh ah jah mtheh. 36 Jeishüh noh kkhaai kpeh beei kkhyüh jah nga api sa sun dou lü Pangsiim ah je ei. Kkhaai kpeh kphyüt lü nga keek lü akläke üng ah jah peet. Akläke noh kkhyaange üng ah nih jah yet u. 37 Kkhyaang abäng noh ei lü phü ktie. Kona ngphyüt ngshek kti ak'hleei lo akläke noh hoih ulü sä ah bea kkhyüh ah nih yah u. 38 Ei kti kpa mi kking thoong kphyü lok ktie. Nghnu mi hnashen phi ngpüi ktie. 39 Kona Jeishüh noh kkhyaange jah tüüi be ma lü, mhlüüi üng kaai lü Maka Tan hne da sit kti.