10
(Marküh 3.13-19; Lükah 6.12-16)
1 Booi Jeishüh noh akläk xalei nghngih jah khü lü kho yaai kshät naak jah am khyaih kti abäng mdo naak bea hiit ah jah peet.
2 Booi Jeishüh noh ah hlonga vek kkhai ah jah xü ngshäea ngming ta aksüka Peta-a ah nih shui Shimon jah Antere, Sepetea sa xooi Jakop jah ah na Johaan.
3 Philip, Pato Lomüh, Tomah, khoon to k'hlook khoi Mate, Aphea sa Jakop jah Tatüh.
4 Ah pea phäh mtun ei khoi kkhüt kti Shimon, Jeishüh ktuun ei kkhai Jüdah Sakarote ni.
(Marküh 6.7-13; Lükah 9.1-6)
5 Booi Jeishüh noh akläk xalei nghngih üng “Kkhyaang mjü kse-ea khyonga käh sit ubä. Shama Rih-ea mlüh jah ah nih pi ngnama phi käh sit hü ubä.
6 Khyük kti toe üng täng kti Isare kkhyaanga veei bä bäa nah nih seh vai.
7 ‘Pangsiima up naak phalo hnüh kti’ tilü ah nih nih-ea veei kpyaü vaai ua.
8 Am khyaih kti jah mya shak be ua. Thipääng kti jah mthou be ua. Mneh kshe mneh ktie jah mdo be ua. Kho yaai jah kshät ua. Nang nih-e noh ngui xüi käh pexa lü Pangsiima hiit nah nih yah ei ktie ni. Asuna thoon lü ngui xüi käh dou xa bä lü kkhyaange jah ku ei ua.
9 Ngui xüi am ani üng xün nah nih ääi khi üng käh seh ei ua.
10 Nah nih kdung seh naaka hnu äp käh seh ei ua. Ksu phyang mat däk jih ei vaai ua. Nghngih seh ei vai am hlü. Kho dok ngshääm naak käh seh ei ubä. Kshong khe mat däk seh ei ubä. Khuut poh kti noh ta hlü ko kti sun yah ei kkhai ni.
11 Ngnam mat nah nih pha vaai üng ning jah dou daang hlük kti ave ta asuna ngnama kkhyüh nah nih seh vei säpa asuna ima ve ubä.
12 Mat mata ima nah nih kaai vaai üng ‘Diim deih naak nang nih üng veshe’ tilü nah nih pyen vai.
13 Asuna im mah noh ah ning jah dou daan ta nah nih pyena diim deih naak ah nih-e üng phak kkhai ni. Am ah ning jah dou daan ta asuna diim deih naak nah nih veeia nglat lobe kkhai ni.
14 Am ning jah dou daang hlük kti jah nah nih pyen am ning jah ksang na-hlük ktia im am ani üng ngnama athoon üng asuna kkhyüh shot lü nah nih kho pha üng kop kti mput kkhok hüt ubä.
15 Ngngaai ua, kah pyen ma kkhai. Pangsiima ah si jaang naaka mhnüüp üng Sotom jah Komo Rah mlüh-a ka kkhyaange kthaka jah mpyeen ei she bok ham kkhai ni” tilü ah jah mtheh.
(Marküh 13.9-13; Lükah 21.12-17)
16 Ngngaai ua, mhnge-ea kshuunga to sae jah hläh-ina kba nang nih-e kah ning jah hläh ni. Asuna thoon lü kphyu kphyaaia kba nah nih ngyam ave vai hlü kti. Lüphi müüma kba hnip hnooi ua.
17 Mseei ua, kkhyaange noh ning jah man lü si jaang naak luuma anäänga ning seh püi kkhaie. Sangsiim ngthei naak kyonga phi ning te kpaai kkhaie ni.
18 Kei nah nih nah läka phäh aso-yah booie jah shang phuhlangea ma-a ning khü lü ning jah kshü kset kkhaie. Asun üng ah nih nih-ea ma jah amjü kse-ea ma-a keia mong nah nih shak shi yah kkhaie.
19 Ah nih nih-e noh ah nih ning jah kshü kset üng ‘I hok kba kah pyen kkhai, i hok kba ng'yung ei vai’ tilü käh sääi bä. Asuna ksüün k'um bä bä üng Pangsiim noh nah pyen vai sun ning kshing shak kkhai.
20 I lüni ti ta nah pät noh nah su ngngaih nah pyen am ni. Nah Pa Pangsiima Mkhyangsiim noh ah ning pyen shaka kkhyü nah pyen ni.
21 Ngbe ngnae mat noh mat ah nih püi ah nih hnim vaia ap kkhaie. Nu pa noh phi ah nih sae jah ap kkhaie ni. Hnashene noh phi ah nih nu pa kpet mjak lü ah nih hnim vaia jah ap kkhaie ni.
22 Nang nih-e hin keia kläka nah nih thoona phäh kkhyaang naküt noh ning thi nak kkhaie. Lüphi akpäih naak säpa jum ei naak üng ngkhääng kti ta Pangsiim noh kuum kyan kkhai.
23 Mlüh mata ah ning jah mkhuh mhlih ta mlüh mata sen be tü ua. Ngngaai ua, kei kah pyen ma kkhai. Isare pe mlüh naküt üng thang kdo kkya am nah nih kpyaü hü päih ham u üng kei Kkhyaang Sa kah phalobe kkhai ni.
24 Akläk hin ah nih mthei mthang ktia kthaka däm duh kti am ni.
25 Mpya mat hin ah mah pa-a kthaka däm duh kti am ni. Asuna thoon lü akläk hin ah nih mthei ktia kba ah thoon lo ta mpya phi ah mah pa-a kba ah thoon lo ta ah mkhüh hnip she. Ah nih-e noh im mah pa sun üng Bese Bu kho yaai ah nih shui ta ah kkyoong üng kae ta asuna kthaka she xuk ktia jah shui kkhaie ni.
(Lükah 12.2-7)
26 Ah nih-e käh jah kyüh-a. I lüni ti ta ngthuh ngvih naküt ktie hin pou lok kkhaie ni. U a am kshing naküt phi ngte lok kkhai ni.
27 Kei noh anghmüp naaka kah ning jah mtheh sun kho mhnüüpa kvaai üng pyen ua. Kei noh ampyu sa-a kah ning jah mtheh sun im ksha-a kpyaü hü ua.
28 Kkhyaanga puum sha hnim khoh kyo lüphi ngmüi mkhya am ksim kpyak khoh kti sun käh kyüh ua. Puum sha phi ngmüi mkhya phi Mulai pea kkhyalü ksim kpyak khoh kti Pangsiim sun kyüh ua.
29 Khi khik sa puum nghngih sun phe mata ah nih joih u ni. Lüphi asuna khi khik puum mat sa phi Pa Pangsiim noh am ah tääng ta msea am kyalo khoh.
30 Nang nih-e phi nah nih lu üng ka lu sham abäng Pangsiim noh ah kkheh päih ni.
31 Käh kyüh ei ua. Khi khik kho hah pa-a kthaka Pangsiim noh aphu kküüi boka ning jah ngngaai kti ni.
32 ‘Kei hin Jeishüh üng kah shääng ei kti ni’ tilü kkhyaangea ma-a pyen kti naküta mong sun kei noh phi ‘Ah nih hin kei üng shääng ei kti ni’ tilü kkhaan khoa vek kti Pa Pangsiima ma-a kah pyen kkhai ni.
33 Lüphi ‘Kei hin Jeishüh üng am shääng ei ngü’ tilü kkhyaangea ma-a pyen kti naküta mong sun ‘Kei noh phi ah nih hin kei üng am shääng ei laang’ tilü Pangsiima ma-a kah pyen kkhai ni.
(Lükah 12.51-53, 14.26-27)
34 Hina kho mdeka diim deih naak vai kah lok ktia käh ngngaai ubä. Ksim kshaaü lo kkhaia kah lok kti ni.
35 Keia lo naak hin ah sa ngpyang noh ah pa ah kpet mjak vaia, ah sa nghnu noh ah nu ah kpet mjak vaia, ah na noh ah si ah kpet mjak naak vaia thoon kti ni.
36 Kkhyaang mata phäh kkyüh kshe bok ktia ye ta ah kkyoong üng ka ni.
37 Ah nu pa keia kthaka ah mhlä kphya naak ta keia akläka thoon kkhaia am looi ngkäih. Keia kthaka ah sa na mhlä kphya nak kti phi keia akläka thoon kkhaia am looi ngkäih.
38 Keia hnu nah läk kkhai ta keia khui kha-a kba phi khui kha vaia am ngshääm kti, kah thih-a kba ah thih-in vai phi am ngshääm kti ta keia akläka thoon kkhaia am looi ngkäih.
39 Ah shak am shum na-hlü lü ah pät noh ah pät yung ei kti ta ah shak shum nak kkhai. Keia phäh ah shak shum nak kti noh ta aksanga ah shak yung ei kti ni.
40 Nang nih-e ning jah dou daang ktie hin kei nah dou daang ktie üng atäng ni. Kei nah dou daang kti hin kei nah tüüi lok kti dou daang kti üng atäng ni.
41 Pangsiima shahma ngsiima ah thoona phäh mat mat noh ah dou daan ta shahma ngsiima kheen yah ei kkhai ni. Ngpyuun ktia ah thoona phäh mat mat noh asun ah dou daan ta ngpyuun ktia kheen yah ei kkhai ni.
42 Ngngaai ua, kei kah pyen ma kkhai. Keia akläke üng kah hmaaia phäh akdiik shääi shääi üng tui phäih mat tu kti noh ta a u noh phi kheen yah kkhai” tilü ah jah msuh mtheh.