9
(Mate 17.1-13; Lükah 9.28-36)
1 “Ngngaai ua, kei kah pyen ma kkhai ni. Ahiit mah-a Pangsiima pe phalo hnüh kkhai ni. Ahin üng vek kti akhäke hin asun ah nih hmuh veeia xüng ham kkhaie ni” tilü Jeishüh noh ah jah mtheh.
2 Mhnüüp kkhyuk anghjook kona Jeishüh noh Peta mat, Jakop mat, Johaan mat jah ngkhah püi lü msuung k'hlüng nua ah nih päte sit ktie. Asua ah nih hmuh-a Jeishüh-a lup jou taai ktia nghlaai lok kti.
3 Jeishüh-a shui shak lik lik lok kti. Abook lik lika velok kti. Kho mdek üng ka u noh phi asun kba book onga am mshop khoh.
4 Asua Eilijah jah Moshei noong vei pou lonih lü Jeishüh ah nih shi hlo püi.
5 Asun üng ta Peta noh Jeishüh üng “Angvaaio, ahia ve-ei na-phyak kti ni. Nang angvaaia ve naak vai mat, Eilijah-a ve naak vai mat, Mosheia ve naak vai mat hjaam kthum kei nih-e üng jah pha shaka” tilü ah pyen.
6 Akläke kyüh ei tong ulü i ah nih pyen vai am kshing ti ulü Peta noh ah lu sing lü asun kba ah pyen ni.
7 Kho ngmei noh ah jah khüm-in lo. Kho ngmeia kkhyüh Pangsiima pyen ta “Ahin kah mhlä kphya naak kah sa kpa ni. Ah nih-a pyen ksang na-ua.”
8 Asun üng ta ah nih hnu ma-a ahunata mdei mang hü ktie. U phi am hmuti u. Jeishüh däk ni ah nih hlonga ah ve.
9 Msuunga kkhyüh ah nih kyum lo be shoa Booi Jeishüh noh “Kei, Kkhyaang Sa thi-ma lü kah xün be säpa ahin nah nih hmuh u hin, u üng phi käh mtheh bing bing u bä” tilü ah jah mtheh.
10 Jeishüh-a pyena kba ah nih thuh u. “Thi-ma lü xün be kti ta i a joong ni” tilü ngthäh ngkhyah ktie.
11 “‘Aksüka Eilijah hma loyah kkhai ni’ Sangsiim ktheeme noh ah nih pyen hin sang kti mä” tilü akläke noh Jeishüh ah nih kthäk u.
12 “Ää, sang beh kti. Abäng naküt pyaang be kkhaia Eilijah aksanga aksüka lok kti ni. Kei, Kkhyaang Sa-a mong ta mkhuh mhlih kho hah pa khaam ei yah kkhai. Ah nih noh nah hoih kkhaie ni, tilü Sangsiim üng ng'yuk hüt kti.
13 Ngngaai ua, kei kah pyen ma kkhai ni. Eilijah ta lopääng kti ni. Sangsiim üng ah nih-a mong ang'yuka kba kkhyaange noh Eilijah ah nih mkhuh mhlih pääng u” tilü Jeishüh noh akläke üng ah jah mtheh.
(Mate 17.14-21; Lükah 9.37-43)
14 Asun kona akve hüt akläkea veei ah nih pha be üng akläkea veei kkhyaang pä nue ngkhääm lo-ulü akläke jah Sangsiim ktheeme song seng ktie ah nih jah hmuh vaai u.
15 Kkhyaang päe noh Jeishüh ah nih hmuh u üng ah nih mün naak tong u. Jeishüh-a veei dong ulü je lü ah nih dou vaai u.
16 “I nah nih song seng-in nak ktie ni” tilü Jeishüh noh ta ah jah kthäh.
17-18 Kkhyaang pä üng ka mat noh ta “Angvaaio, nah veeia kah sa kpa mi sa kah lo püi. Käh ngthu ei thei ktia kho yaai noh ah vaan naak ni. Kho yaai noh ah kkät ei tä lü ah kyuk tong shak. Kah sa ta ah msi mpoon noot lü ah ha kkyeet lü hit saai ei lopäih kti ni. Asuna kho yaai mshot kkhaia nang ning läk ktie kah jah nghui naak kyo. Am khyaih khoh u” tilü Jeishüh üng ah mtheh be.
19 Jeishüh noh ta “Nang nih kkhyaange hin noh Pangsiim am nah nih üm naak u ni. I vei pi pi nah nih hlonga veyüm lü i vei pi pi kah nih ning msuh mtheh vai ni. I vei pi pi kah nih ning suun ei vai ni. Hnashen kah veeia lo püi ua” tilü ah jah mtheh.
20 Jeishüh-a veei kpa mi sa ah nih seh püi u. Kho yaai noh Jeishüh ah hmuh jah ta kpa mi sa sun kkät ei lü ah kthün ngak ngak. Kpa mi sa kyutong lü ngto ngtat hü lü ah msi mpoon phi ah noot.
21 Jeishüh noh hnashena pa üng “Itüh-a kkhyüh ahin kba thoon kti ni” tilü ah kthäh. “Adiik sa-a kkhyüh ahin kba thoon kti ni.
22 Thih kkhaia anghläia mei üng phi ah luh shak, anghläia tui üng phi ah ngsum shak. Asuna thoon lü nah khyaih khoh ta jah mpyeen ei lü jah ku eia” tilü ah pyen be.
23 Booi Jeishüh noh ta “‘Nah khyaih khoh ta -’ tilü a i a nah pyen kti ni. Nah üm nak kti kkhyaanga phäh abäng khyaih khoh kti ni” tilü ah mtheh.
24 Hnashena pa noh ta “Kah ning üm nak kti. Kah ning üm naak am akhäk naak üng nah ku eia” tilü ahunata ngpyaang kti.
25 Kkhyaang pä nue dong lo-ulü ngkhääm lok ktie. Jeishüh noh ah jah hmuh üng kho yaai üng “Käh shi hlo shak kti, ah nghnga pang shak kti kho yaaio, nang kah ning mtheh. Ah nih üng shota. Itüh-a phi käh vaan na-ti bä” tilü ah him.
26 Ngpyaang ma lü ngthün ngak ngak shak pyei lü kho yaai shot kti. Hnashen ta yooka mäi lok kti. Asuna thoon lü “Thik kti ni” ah nih ti u.
27 Jeishüh noh hnashena kut man lü kaih lüta hnashen thou lok kti.
28 Booi Jeishüh jah akläke im k'uma ah nih luh kona “A i a kho yaai am kah nih mshot khyaih u ni” tilü ah nih pät däke ah nih ve üng akläke noh Jeishüh ah nih kthäh u.
29 “Pangsiima veei tä sham üng va ahi bang kho yaai mshot khoh vai” tilü Jeishüh noh ah jah mtheh be.
(Mate 17.22-23; Lükah 9.43-45)
30 Asun üng ta asua kkhyüh Kalile hne kkaan lü sit ktie. Ah nih seh sun kkhyaange noh ah nih jah kshin vai Jeishüh noh am hlü ei.
31 Ah nih noh “Kei, Kkhyaang Sa hin kkhyaangea kut k'uma nah ap kkhaie ni. Nah hnim kkhaie ni. Ah nih nah hnim kona amhnüüp kthum üng kah xüng be kkhai ni” tilü akläke ah jah msuh mtheh.
32 Akläke noh ta Jeishüh-a pyen sun am ngja-kya kyo u. U noh phi am kthäh dat u.
(Mate 18.1-5; Lükah 9.46-48)
33 Kapanom mlüh-a ah nih pha kona ima ta “Lama nih lo sho u säa i nah nih si jaang ei lopah ktie ja” tilü Jeishüh noh akläke ah jah kthäh.
34 Lama ah nih seh shoa “Nih nih-e üng akdäm bok u ni” tilü ngdäh ngkaih ktiea thoon lü asun üng u noh phi msik am ti u.
35 Jeishüh ta ngshut lü akläke xalei nghngih jah khü ma lü “Akdäm boka thoon hlü ktia mat mat akdiik boka thoon yah kkhai. Abängea xüh shoh eia phi thoon yah she” tilü ah jah msuh mtheh.
36 Asun üng ta hnashen mat akläkea nglunga khü ma lü ah kpom.
37 “Keia hmaaia phäh üng ahi bang hnashen hin mat mat noh ah dou daan ta kei ah nah dou daan üng alang lang ni. Kei däk ah nah dou daan am ni. Kei nah tüih lok kti ah dou daan ni” tilü akläke ah jah mtheh.
(Lükah 9.49-50)
38 “Angvaaio, nah ngming shum ei lü kho yaaie jah kshät kti mat kah nih hmuh u. Nih nih-e üng am ngpüi ei ktia thoon lü kah nih ngya u ni” tilü Johaan noh Jeishüh üng ah mtheh.
39 Booi Jeishüh noh ta “Asuna kkhyaang käh ngya ua. Keia ngming shum ei lü mün sam kshe poh kti mat mat hin noh aklooia kei am nah pyen ei” tilü ah jah mtheh.
40 “Nih nih-e am jah kpet kti mat mat hin, nih nih-e da ngtung kti ni.
41 Ngngaai ua, kei kah pyen ma kkhai ni. Khrito nah nih läk ktie ni tilü tui sa ning tu ktie ah u noh phi kheen yah kkhai ni.
(Mate 18.6-9; Lükah 17.1-2)
42 Hnashena kba kei nah üm nak kti mat mat mkhye shak ktia kkhyaang ta Pangsiim noh mtaam nu pek kkhai ni. Ah nghngü üng lung däm nu häi lü tui li nua kpyaai-ina thea Pangsiima peet mtaam khaam ei ktia kkhyaang hin kshe hleen bok kkhai ni.
43 Nah kut vaang noh ah nih mkhye shak ta kkyük-ina. Mulai pea nah kut nghngih üng nah pha-a kthaka nah kut vaang däk üng Pangsiima pea phalü angshääia xün naak nah yah do bok kti ni.
44 Mulai pea pha ktie itüh-a phi am thik kti mkyüüt noh ah jah ei. Itüh-a phi am thik kti mei noh ah jah uih.
45 Nah kho vaang noh ah nih mkhye shak ta kkyük-ina. Mulai pea nah kho nghngih üng nah pha-a kthaka nah kho vaang däk üng Pangsiima pea phalü angshääia xün naak nah yah do bok kti ni.
46 Mulai pea pha ktie itüh-a phi am thik kti mkyüüt noh ah jah ei. Itüh-a phi am thik kti mei noh ah jah uih.
47 Nah mik vaang noh ah ning mkhye shak ta kkoih-ina. Nah mik nghngih üng Mulai pea nah pha-a kthaka nah mik vaang däk üng Pangsiima pea nah pha ta do bok kti ni.
48 Mulai pea pha ktie itüh-a phi am thik kti mkyüüt noh ah jah ei. Itüh-a phi am thik kti mei noh ah jah uih.
49 Ei ook naküt msi üng ksoa kba kkhyaang naküt phi Pangsiim noh mei üng kso kkhai ni.
50 Msi ta do kyo kti. Msi hin msia am atui ti ta u noh phi tui onga am pyaang be khoh. Msia nah nih tui vai hlü kti. Mat jah mat ngkhot ngsheng lü nah nih ve vai hlü kti.