7
(Mate 15.1-9)
1 Jeirüh Shalema kkhyüh lok kti Pharishe-e jah Sangsiim ktheeme Jeishüh-a veeia ngkhääm lok ktie.
2 Asun üng am saih kti kut, i ni ti ta thuum seena kba ah nih kut käh mthi lü ei ei ktie akläke akhäk ah nih jah hmuh u.
3 A i ja ni ti ta Jüdah-e abäng jah aktunga Pharishe-e noh ah nih kut am mthi lü ei am ei u. Asun ah nih mthih ei la la am ni. Ah nih pu paea thuum seen mseei lü ah nih läk naak u ni.
4 Joih naaka kkhyüh ah nih lo be üng am ngthi ei lü ei am ei u. Ah nih läk u akse thuum seen kho hah vek ktie. Asue ta abänge jah mthih mkaaü, k'ame jah mthih mkaaü, ke kpäie jah mthih mkaaü-e ni.
5 Pharishe-e jah Sangsiim ktheeme noh Jeishüh üng “Nang ning läk ktie noh pu paea thuum seen läk ulü a i a am vek ktie ni. Akläke ta am saih kti ah nih kut üng a i a ei ei ktie ni” tilü ah nih kthäh u.
6-7 Jeishüh noh ta “Pangsiima kkhyü shahma ngsiim Hei Shajah-a malam pyen üng nang nih lim ma ktie hin nglooi pi pi khü u kti. I hok kba ah pyen hüt ni ti ta ‘Ahina kkhyaange noh ah nih mpyong thak üng nah lei shong ktie ni. Ah nih mlung kko ta keia mlunga am lo u. Kkhyaangea thuum seen Pangsiima kkhyü ah nih jah mthei ua phäh üng ah nih nah hjok khah hin i a phi am kyah ngtu’
8 Pangsiima thuum hoih u kti lü nah nih pu paea thuum seen ta mseei lü nah nih läk tuhan u.
9 Nah nih thuum seen u nah nih läk vaia phäh Pangsiima thuum kpyaai u kti lü ngvaai pi pi khü u kti.
10 ‘Nah nu pa jah lei shonga’ tilü shahma ngsiim Moshei noh Pangsiima kkhyü ah yuk hüt. ‘Nah nu pa nah jah kshe naak ta aksanga ning hnim yah kkhaie ni’ tilü phi Moshei noh ah yuk hüt.
11 Nang nih-e noh ta kkhyaang mat noh ‘Nang nu, nang pa kah ning ku ei naak khoh abäng naküt Pangsiim üng kah peet päih ni. Nang kah ning ku ei naak vai am veti’ tilü pyen khoh kti ni tilü nah nih jah msuh mtheh tuhan u.
12 Kkhyaang mat noh asun kba ah pyen ta ah nu pa ah ku ei vai nah nih ngya ua ni athoon.
13 Asun kba nah nih pu pa-a kkhyüh nah nih thuum seen u üng kkhyaange üng Pangsiima kkhyü nah nih jah mkhyüh shak u ni. Asun bang kho hah pa nah nih poh ktie ni” tilü Jeishüh noh Pharishe-e jah Sangsiim ktheeme üng ah jah mtheh.
(Mate 15.10-20)
14 Asun kona Jeishüh noh kkhyaange ah veeia jah khü lü “Abäng naküt noh nah ngngaai lü ngja-kya ua” tilü ah jah mtheh.
15 “Ah ei üng ah kkhon k'uma lut kti i noh phi kkhyaanga mlung ngnei am sheet shak khoh. Kkhyaanga mlunga kkhyüh lut lok kti noh ta kkhyaang sheet shak kti.
16 Ah nghnga khuui naküt kti noh ngja-kya she.”
17 Booi Jeishüh noh kkhyaange jah ta-hüt lü im k'uma lut kti. Asun üng akläke noh pum msäpa mong ah nih kthäh kkhyah u.
18 Jeishüh noh ah pyen “Nang nih-e noh phi am nah nih ngjaak kya uo. Ahin kba nah nih nghmoong ktieo. Ah ei üng ah kkhon k'uma lut kti noh i noh phi kkhyaanga mlung ngnei am mtuih mleh shak khoh kti hin am nah nih ngjaak kya uo.
19 I a kyalü ni ti ta kkhyaanga ei ah mlung k'uma i am lut. Kkhyaanga kkhon nua lut ma lü ngno seh eia thoon be kti” ah ti. Asun kba ah pyen üng Jeishüh noh “Ei vai naküt hin ei vai do kti” ah tihlü.
20 “Kkhyaanga mlunga kkhyüh lut lok kti noh ta kkhyaang sheet shak kti.
21-22 I hok kba ni ti ta kkhyaanga mlung k'uma kkhyüh-a am do kti su ngngaih, ngla shui, mpyuuk ei, kkhyaang hnim, ah nih kkhyu ah nih khong pa ve püi naak, hnaih ei, ngnei kshe, ngtuui ngten shan ja, püi kkeei ei, boih beih, sam sah, lääng lah lut lok ktie ni.
23 Ahin am do kti naküte hin kkhyaanga mlunga kkhyüh lut lo ulü kkhyaang jah sheet shak ktie ni” tilü Jeishüh noh ah jah msuh mtheh.
(Mate 15.21-28)
24 Asua kkhyüh Jeishüh ngpyaih xat lü Türah jah Shiton mlüh da sit kti. Im mata kaai kti. Asun ua kkhyaang noh phi ah shim vai am hlü ei. Asuna kyalü phi Jeishüh am ngsüm khoh.
25 Nghnu mi nu mat ta Jeishüh ngjalü Jeishüh-a veei akjaanga lolü Jeishüh ma-a ah mkhuuk lu üng ngdääng lü ah mkhät. Asuna nghnu mi nu hin kho yaaia vaan naak ah sa nghnu mi sa hnashen vek kti.
26 Asuna nghnu mi Kärih kkhyaang mjü ni. Shüroh Phonih khyonga hmi kti. Ah sa üng ka kho yaai ah kshät peet vaia asuna nghnu mi noh Jeishüh ah nghui naak.
27 Jeishüh noh ta nghnu mi nu üng “Hnashene noh aksüka ei ma u-she. Hnashena ei hlü lou lü ui sae üng jah kpyaai peet ta i am looi ngkäih” tilü ah pyen.
28 Nghnu mi noh ta “Ää, Booi Pao, nikyo lüphi hnashenea ei k'hleei im ksia kyalok kti sun ui sae hngoh noh ko ei ktie ni” tilü ah pyen be.
29 Jeishüh noh ta nghnu mi nu üng “Ahin kba nah üm nalü nah pyena phäh üng nah ima hnip hnipa nah sit bea. Nah sa üng ka kho yaai shot pääng kti ni” tilü ah mtheh.
30 Nghnu mi noh ima ah pha be üng hnashen ih naak üng nghngään kti hmu vaai lü kho yaaia shot be pääng ah kshing lo.
31 Kona Jeishüh Türah khyonga kkhyüh nglat lobe lü Shiton mlüh kkaan lü Kalile tui li da sit lü Teka Polih khyong phi ah kkaan.
32 Ah nghnga pang kti angkyaaia am shi hlo thei kti kkhyaang mat kkhyaang akhäke noh Jeishüh-a veei lo püi ulü asuna kkhyaanga kkhaana Jeishüh noh ah kut ah mtaan vaia ah nih nghui naak u.
33 Jeishüh noh kkhyaang päa kkhyüh ah nghnga kpang ah pät däk sun seh püi ma lü ah nghnga kpanga nghnga xooia k'uma Jeishüh noh ah kut mjung ah jah ktuun. Angkyaaia am shi hlo thei ktia mlei Jeishüh noh ah msi mshoh lü ah hneh.
34 Kkhaan kho da Jeishüh mang lü “Ä!” ti-ma lü ah nghnga kpang üng “Ephata” tilü ah pyen. Ah pyen hlü ta “Nglang she.”
35 Ah nghnga nglang be kti. Ah mlei ngtep thei be lü akdoa shi hlo be kti.
36 “Ahin u üng phi käh mtheh bing bing u bä” tilü Jeishüh noh ah jah ngya kyo. Jah ngya däm däm asuna mong sun ah nih ktha lou lou ei ulü ah nih pyen hü nak nak u.
37 Kkhyaange mün ulü mün ktie. “Jeishüh noh abäng naküt do be ktia poh kti. Ah nghnga kpang hngoh phi Jeishüh noh nglang shak be kti. Am shi hlo thei kti hngoh phi shi hlo thei shak be kti” tilü ah nih pyen u.