4
(Mate 13.1-9; Lükah 8.4-8)
1 Mlik tui kkong peia Jeishüh noh ah jah mthei be tü. Jeishüh-a veeia kkhyaang pä nu ngkhääm lok ktie. Asuna thoon lü Jeishüh mhlüüi mata kkhaana kaai lü mlik tuia kkhaana mhlüüi üng ngshut kti. Kkhyaang päe naküt ta mlik tuia kkong peia vek ktie.
2 Booi Jeishüh noh pume üng jah msäp msäp lü kho hah pa ah jah msuh mtheh. Ah jah msuh mtheh k'um üng ah pyen ta
3 “Ngngaai ma u a. Msi phuh kti mat msi phuh kkhaia sit kti.
4 Msi ah phuh üng ta msi ui akhäk lama kyayot lü asun kkhae noh lo-ulü ah nih koh ei u.
5 Msi ui akhäk lung kphaka ngphah naak mdeka kkhaana kyayot kti. Asuna mdek am nung, am shah. Msi ui ta akjaanga sot lokyo kti.
6 Kho mhnüüp lolüta msi ui ksot kho nghngi k'hlok noh ah uih. Msi ksot ta apya am vepyei lü ngjaai lolü thi-be kti.
7 Msi ui akhäk ta nghling phung hnünea kyayot kti. Nghling phunge däm lo-ulü msi phung kduui ulü msi am hluui paai.
8 Msi ui akhäk ta mdek kdo üng kyalü do kya lolü hluui paai lolü msi ui sä mat sä üng thum kip, msi ui sä mat sä üng kkhyuk kip, msi ui sä mat sä üng phya mata shot be ktie.
9 Ah nghnga khuui kti noh ngja-kya she” tilü ah pyen.
(Mate 13.10-17; Lükah 8.9-10)
10 Kkhyaang pä nue ah nih seh be kona Jeishüh-a nglooi ei püie jah akläke xalei nghngih noh pum ah msäpea mong Jeishüh ah nih kthäh u.
11 Jeishüh noh ta “Kkhyaangea am kshing khoh Pangsiima pe nang nih-e däk üng Pangsiim noh ning kshing shak ktie ni. Pangsiim noh am jah ngjaak kya shak lü kkhyaang akse-e noh ta i a am kyah kti kkhyüa ni ah nih ngjaak u.
12 Bük ulü, bük ulü am hmu-u. Ngjaak ulü, ngjaak ulü am ngja-kya u. Asuna thoon lü ah nih mlung am nghlai lü ah nih mkhye phi am lät. Asuna kyalü pum msäp kking lü ah nih ngjaak mshi onga kah jah mtheh ni.
(Mate 13.18-23; Lükah 8.11-15)
13 Ahina pum msäp hngoh am nah nih ngjaak kya ta pum msäp naküte i hok kba nah nih ngja-kya kkhaie ni” tilü ah jah kthäh.
14 Booi Jeishüh noh ta “Msi ui kphuh noh msi ah phuh. Asuna msi ta Pangsiima kkhyü ni.
15 Kkhyaang akhäk ta msi uia kyaak naak lam üng täng ktie ni. Ngphuh kti Pangsiima kkhyü kkhyaange noh ngja-ulü kkhyaangea mlung k'uma ngphuh kti Pangsiima kkhyü sun Shatan yaai pa noh angshenga lolü ah jah huh be.
16 Asun kba ni, kkhyaang akhäk ta msi uia kyaak naak lunga ngphah naak mdek üng täng ktie ni. Pangsiima kkhyü sun ah nih ngjaak jah ta je kyai ulü ah nih hlü ei kyo u.
17 Ah nih mlung kkyoonga Pangsiima kkhyü am phung pya mah ktia thoon lü noong vei sa däk ni ah nih jum ei u. Pangsiima kkhyüa phäh üng mpyeen sheet jah mkhuh mhlih ah nih hmuh ah nih shoong jah ta nglat be ktie ni.
18-19 Kkhyaang akhäk ta msi uia kyaak naak nghling phung hnüne üng täng kti ni. Pangsiima kkhyü ah nih ngjaak kyo u. Ngthiim khoa phäh kking sääi siing nak ktie. Booi ei daaü ngü tilü kpoon ei ktie. Im khu hlüpyei ktie. Asune noh Pangsiima kkhyü sun ksih nan ulü Pangsiima kkhyü am hluui paai.
20 Kkhyaang akhäke ta msi uia kyaak naak mdek kdo üng täng ktie ni. Pangsiima kkhyü ngjalü dou daang ulü hluui paai ktie. Kkhyaang akhäk kthum kip, kkhyaang akhäk kkhyuk kip, kkhyaang akhäk phya mat kuunga hluui paai be ktie” tilü Jeishüh noh ah jah msuh mtheh.
(Lükah 8.16-18)
21 Jeishüh noh “Mat mat noh mei phäih lo lü sä üng am mük. Im kkea phi am ta. Im kkyoong abäng üng vaai kkhaia khum khäh k'hlüng üng ni ah taak.
22 Ngthuh ngvih naküt ktie hin mhnüüp mat üng ta pou lok kkhaie ni. U a am kshing naküt hin phi ngshing ngte lok kkhai ni.
23 Ah nghnga khuui naküt kti noh nah nih nghnga mkeeng lü ngngaai ua.
24 Nah nih ngjaak mseei lü ngngaai ubä. Pangsiima kkhyü nah ngjaaka kba aksanga poh-a. Nah poh däm däm ta Pangsiima kkhyü nah ngja-lokya däm däm kkhai ni.
25 Ah ngjaaka kba poh kti üng Pangsiim noh ngjaak kya shak däm däm kkhai ni. Ngja-mah mah lü api sa däk poh ktia kkhyaanga ngjaak kya ta Pangsiim noh lou ei be kkhai ni” ah ti.
26-27 Booi Jeishüh noh ah pyen be tü. “Pangsiima pe hin i üng täng kti ni ti ta kkhyaang mat noh lou ma-a msi ui phuh lü mthana ip lü ngooi lama thou lolü mhnüüpa khüüi khoom lü vek kti. Msi ui ta sot lolü däm lok kti. Kkhyaang noh ta i hok kba sot lok kti, däm lok kti ati sun am kshing.
28 Lou ma-a mdek üng ahlüa hluui paai ei lok kti. Aksüka tooi lok kti. Kona vui lok kti. Kona ah vui üng ngthei lok kti.
29 Ah hmin lo jah ta aah ksüüna kkhyaang noh vin kooi üng ah aah.
(Mate 13.31-32, 34; Lükah 13.18-19)
30 Pangsiima pe hin i üng mshuui msäp khoh vai ni. I a pum üng msäp lü pyen vai ni.
31 Pangsiima pe hin Isarea an ne ui mat üng täng kti ni. An ne ui hin loua am phuh ham üng kho mdeka kkaana msi ui naküt üng akdiik bok ni.
32 Msi ui phuh lü adäm lo kona ta kum mat üng ahun däm lolü thi-be ktia dung naküte üng akdäm boka thoon lok kti. An ne dunga nghjaap üng kkhae noh ah nih ngbu ah nih tuk ei naak khoh säpa an ne dunga ngbaan däm lok kti” ah ti.
33 Kkhyaange noh ah nih ngjaak kya vai säpa Jeishüh noh asun kba pum kho hah pae üng msäp lü Pangsiima kkhyü ah jah msuh mtheh.
34 Booi Jeishüh noh kkhyaange üng ta pum üng msäp lü ni ah jah msuh mtheh. Akläke däk Jeishüh-a hlonga ah nih ve üng ta Jeishüh noh akläke üng pume sun abäng angshing ngte kuunga jah msuuk mtheh be kti.
(Mate 8.23-27; Lükah 8.22-25)
35 Müa kho kyaak lama ta Jeishüh noh “Kalile tui li saye da nih sit vai u” tilü akläke üng ah jah mtheh.
36 Kkhyaang päe sun jah ta-hüt ulü akläke noh Jeishüh sun mhlüüi üng ah nih seh püi u. Asuna mhlüüia kkhaan su Jeishüh ah nangshut ei pääng kti ni. Akse-ea mhlüüie phi ah nih hlonga sit ktie.
37 Kho khi kshe nu khi lolü tui vai ngkhyo lolüta mhlüüia k'uma tui vaang lü tui sun mhlüüi üng tään tääna kaai lok kti.
38 Mhlüüia hnu da lu khum üng ngkhum ei lü Jeishüh ta ip kti. Akläke noh Jeishüh mthou ulü “Angvaaio, nih ngsum hnüh ve u. Am nah jah mseh nak ktio” tilü ah nih pyen u.
39 Booi Jeishüh thou lolü kho khi kshe üng “Hüp be hnüh-a” tilü him ma lü tui üng phi “Kyeem be lü do be hnüh-a” tilü ah him. Asun üng ta kho khi kshe phi hüp lobe lü tui li phi ve-ei na-lo phya-pyei kti.
40 Jeishüh noh akläke üng “A i a nah nih kyüh ei kti ni. Am nah nih jah üm nak ktie mä” tilü ah jah kthäh.
41 Asun üng “E!” ti-ulü mün sam tong ulü ah nih püi mat jah mat üng “Ahin ta i a kkhyaang pi pi vai ni. Kho khi jah tui li hngoh noh ah nih ksang naak ta” tilü mship mhjop ktie.