3
(Mate 12.9-14; Lükah 6.6-11)
1 Sangsiim ngthei naak kyonga Jeishüh lut vaai be tü kti. Asua ah kut vaang kthi kkhyaang mat vek kti.
2 Pangsiim ngam püi mhnüüp üng am mya kti mdo be hlük kkhe ti-ulü Jeishüh ah nih kbäü ei naak ave vaia Jeishüh kkhyaange noh ah nih ling u.
3 Jeishüh noh ta ah kut vaang kthi üng “Ngdüüi lolü kkhyaang pä ma-a loa” tilü ah pyen.
4 Jeishüh noh kkhyaange üng “Pangsiim ngam püi mhnüüp üng akdo poh vai Pangsiima thuum üng ngkäih ngvaih kti mä. Am ani ta akshe poh Pangsiima thuum üng ngkäih ngvaih kti mä. Pangsiim ngam püi mhnüüp üng kkhyaanga shak mphyün phyak kti mä. Am ani ta kkhyaanga shak mthih phyak kti mä” tilü ah jah kthäh. Kkhyaange ta thüi ulü am sik sik u.
5 Jeishüh noh kkhyaange da ah mik thia mang hü lü ah jah büh. Pyen am ngjak ktie asuna kkhyaangea phäh-a Jeishüh puk shek kti. Jeishüh noh ah kut vaang kthi üng “Nah kut shänga” tilü ah mtheh. Ah kut shäng lü do be kti.
6 Pharishe-e ta angshenga kyum lobe ulü Jeishüh i hok kba hnim vai ati sun akjaanga shang phuhlang Herota püiea dä ah nih seng u.
7-8 Jeishüh jah akläke Kalile tui lia peia sit ktie. Kalile hne üng kae, Jüdah hne üng kae, Ituh Me hne üng kae, Jotan mlik tui yea kae, Jeirüh Shalem mlüh üng kae, Tirüh mlüh üng kae, Shiton mlüh üng kae noh Jeishüh-a poh mshah naküt ngja-ulü kkhyaang pä nu Jeishüh-a veei lok ktie.
9 Jeishüh noh akläke üng “Kah hlonga mhlüüi mat ta-lo ua. Kkhyaang nung kolaih ve u. Nah ship nan lok kkhaie ni” tilü ah jah mtheh.
10 A i a ni ti ta Jeishüh noh am mya kti kho hah pa jah mdo be lüta am mya kti naküt noh ah nih püi phi neet kpyaai lü Jeishüh hne kkhaia lok ktie.
11 Kho yaaiea vaan naake noh Jeishüh ah nih hmuh tä lü ah ma-a ngbok ulü “Nang hin Pangsiima ning sa ni” tilü ngpyaang ktie.
12 Jeishüh noh “Ahina mong u üng käh mtheh bing bing u bä” tilü ah jah mtheh.
(Mate 10.1-4; Lükah 6.12-16)
13 Asun kona Jeishüh msuunga ve naaka sit lü ah khü hlü sun ah veeia jah khü lü ah khü Jeishüh-a veei sit ktie.
14-15 Jeishüh noh ah hlonga vek kkhaia ngshäe xalei nghngih ah jah xü. Pangsiima kkhyü phi kpyaü hü kkhaia ah jah tüih hü. Kho yaaie jah mshot naak hiit phi ah jah peet.
16-17 Ah jah xüa ngminge ta - Jeishüh noh Peta-a ah shui Shimon, Sepetea sa Jakop jah Jakopa na Johaan - asun xooi Jeishüh noh Panekea ah jah shui. Ah pyen hlü ta ngkyeeka sa xooi ni.
18-19 Antere, Philip, Patolo Mong, Mate, Tomah, Aphea sa Jakop, Tatüh, ah pea phäh mtun ei khoi kkhüt kti Shimon, Jeishüh ktuun ei kkhai Jüdah Sakarote ni.
(Mate 12.22-33; Lükah 11.14-23, 12.10)
20 Kona Jeishüh ima sit be kti. Jeishüh jah akläke noh buh hngoh käh ei khang ktiea kkhyaange noh ah nih jah ngvoon-in u.
21 Asun ah ima ka ah püie noh ngja-ulüta Jeishüh khü be kkhaia sit ktie. A i a ti ta ah püie noh “Jeishüh ah lu kkhyook am mdo ti” tilü ah nih mkhyah u.
22 Jeirüh Shalem mlüh üng ka lok kti Sangsiim ktheeme noh “Bese Bu kho yaai noh Jeishüh ah vaan naak ni. Asuna Shatan yaai pa-a hiit üng kho yaaie phi ah jah mshot ni” tilü ah nih pyen u.
23-24 Jeishüh noh ta ah veeia kkhyaange jah khü ma lü pum üng msäp lü ah jah mtheh. “Shatan yaai pa ah pät noh ah pät i hok kba kshät kkhai ni. Teng pe mat hin käh ngkhot ngsheng lü angkhoi ngkhya ta teng pe am ve khoh.
25 Kkyoong long mat hin käh ngkhot ngsheng lü angkhoi ngkhya ta kkyoong long am ve khoh.
26 Shatan yaai pa hin ah pät noh ah pät sok ei lü ah hiit angkhoi ngpa ta Shatan yaai pa käh ve khoh lü sim pyak kkhai ni.
27 Shohlai kkhyaang sun yüüi üng aksüka khun ma lü am ani ta u a kkhyaang noh phi shohlaia ima lut lü ah külak am mpyuuk ei khoh. Shohlai sun khun ma bä lü va ah külak mpyu ei khoh vai.
28 Ngngaai ua, kei kah pyen ma kkhai ni. Kkhyaange noh Pangsiim ah nih thang msheet naküt phi ah nih mkhye naküt phi Pangsiim noh jah mhlät peet kkhai ni.
29 Mkhyangsiim thang msheet ktia kkhyaang noh ta ah mkhye anghläia ah ve ei püi ni” tilü Jeishüh noh ah jah msuh mtheh.
30 “Jeishüh kho yaai noh ah vaan naak ni” tilü ah nih pyen ua thoon lü asun kba Jeishüh noh ah pyen ni.
(Mate 12.46-50; Lükah 8.19-21)
31 Jeishüh-a nu jah ah nae lo-ulü kho kpunga düüi ulü Jeishüh ah nih jah khü shak u.
32 Jeishüh sun ngvoong lü kkhyaang kho hah pa ngshut ktie. Jeishüh üng “Angvaaio, nah nu jah nah nae noh ning hmuhlü ulü kho kpunga ning mtät ktie ni” tilü ah nih mtheh u.
33 Jeishüh noh ta “Keia nu u ni, keia nae ue ni” tilü ah jah kthäh.
34 Jeishüh noh ngvoong lü ngshut ktie da mang hü lü jah bük lü “Hine hin kah nuea kba ni. Hine hin kah naea kba ni.
35 Pangsiima hlü eia ve naküt kti hin keia nae, keia sie, keia nue ni” tilü ah pyen.