14
(Mate 26.1-5; Lükah 22.1-2; Johaan 11.45-53)
Asun üng khotu ngsiim jah Sangsiim ktheeme noh Jeishüh hnim hlü ktie. I hok kba Jeishüh ngnei nalü ampyua ah nih man naak yah vaia mkot shui ktie. Asun üng kkhaai phoom kka kkhaai kpeh ah nih ei naak Phyong pooi apha vai mhnüüp nghngih ni ahlü kti. Pharishe-e jah Sangsiim ktheeme noh “Phyong pooi k'um üng ta Jeishüh am nih man u. Kkhyaang päe noh jah hai ulü jah ngtuun püi kkhaie ni” tilü ngthäh ngkhyah ktie.
(Mate 26.6; Johaan 12.1-8)
Pet Tanih ngnama mneh kshe mneh khoi kti Shimona ima Jeishüh ngkhin ei vaai kti. Jeishüh noh buh ah ei k'um üng aphu küüi pi pi lung mang uum book üng aphu küüi pi pi tui ng'uui, nghnu mi mat noh lo püi lü teep lü Jeishüh-a lu kkhaana ah buih. Akhäke noh ta käh je nalü “A i a aphu küüi pi pi tui ng'uui ahin kba ta ah kpyo kpyaat vai ni. Ahina tui ng'uui joih-a ta she nu pum kthum phu am tan kti yah lü mpyeen shek ktie üng jah peet vai shü” tilü mship mhjop ktie. Asuna nghnu mi phi ah nih msheet ei u. Jeishüh noh ta “Poh ei she. I vai nah nih puk sheet shak ktie ni. Kei üng ah nih-a poh hin do pi pi kti ni. Ampyeen kshe-e ta nah nih hlonga anghläia vek kkhaie ni. Kei ta nah nih hlonga anghläia i am ve ngü. Kah thih kona kah puum sha buui lü kah yook ah nih jah piit pyaang naak vai shü üng tui ng'uui üng ah nah buih ni. Ahina nghnu mi noh ah khyaih khoh säpa ah nah msih mkhäh ni. Ngngaai ua, kei kah pyen ma kkhai ni. Thang kdo kkya ah nih kpyaü naak naküt mdek pelep üng ahina nghnu mi ah nih shüüm naak vaia ah poh mshah hin pyen hü kkhaie ni.”
(Mate 26.14-16; Lükah 22.3-6)
10 Asun kona akläke xalei nghngih üng ka mat, Jüdah Sakarot khotu ngsiim dämea veei sit lü Jeishüh ah ktuun ei vaai. 11 Asun ah nih ngjaak u üng je pyei ktie. Jüdah Sakarot üng ngui ah nih peet vai ah nih ng'aan ei u. Jüdah Sakarot noh phi Jeishüh ah ktuun ei naak vaia mkot shui kti.
(Mate 26.17-25; Lükah 22.7-14, 21-23; Johaan 13.21-30)
12 Kkhaai phoom kka-a kkhaai kpeh ah nih ei naak asük mhnüüp pooi üng ah nih phyong tääm naak lo ah nih shüüm naak vaia to sa khah naak poh khoi ktie. Asun üng akläke noh “Phyong pooi üng to sa nah ei naak vai hoa nah jah pyaang vaai hlü shak kti ja” tilü Jeishüh ah nih kthäh u. 13 “Mlüh k'uma sit nih-a. Asua tui phüüi kti kpa mi mat nah nih hmuk kkhai ni. Asun läk nih bä. 14 Tui kphüüia kaai naak im mah üng ‘Nah läk ktie mah mah Phyong pooi poh lü kah nih ei naak vai u, hona khaan ni’ tilü angvaai noh ah jah kthäh lo shak ni, tilü pyen nih bä. 15 Hlü ko naküt kti ave naak pääng akkhaan thapa akhan mat im mah noh ning jah mhnüh kkhai ni. Pooi nih poh naak vai u, asun pyaang nih bä” tilü jah sük ma lü Jeishüh noh akläk nghngih ah jah tüih. 16 Akläk xooi mlüh-a sit nih lü Jeishüh-a jah mtheh-a kba hmuvaai nih lü Phyong pooi ah nih poh naak vai u ah nih pyaan. 17 Kho kyaak kona mthan lohnüh-a Jeishüh akläke xalei nghngih mah mah lok kti. 18 Ngshut yüm lü ei ah nih ei k'um üng Jeishüh noh “Ngngaai ua, kei kah pyen ma kkhai ni. Kah hlonga ei ei kti nang nih-e üng mat noh kei nah ktuun ei kkhai ni” tilü ah pyen. 19 Puk shelo pyei ulü “Kei ta am ni hngaläk khüng vai no” tilü mata kona mat noh ah nih kthäh u. 20 “Nang nih xalei nghngih üng ka buh kpäi mat üng kah hlonga ei ei kti ni. 21 Sangsiim üng ang'yuk hüta kba, kei Kkhyaang Sa üng thoon yah kkhai shü kyo. Kei Kkhyaang Sa nah ktuun ei kti ta khui kha kshe nu khaam ei yah kkhai ni. Am ah nih sa naak xa-a ta asuna kkhyaanga phäh do bok kkhai shü” tilü Jeishüh noh ah jah mtheh.
(Mate 26.26-30; Lükah 22.14-20; 1.Korine 11.23-25)
22 Ah nih ei k'um üng kkhaai phoom kka-a kkhaai kpeh lou lü Pangsiim ah je ei. Kkhaai kpeh kphyüt lü jah pelü “Ei ua, ahin kah puum sha ni” tilü ah pyen. 23 Jeishüh noh ta ngbom tui phäih phi kkot lü Pangsiim je ei ma lü ah jah peet. Abäng noh ah nih ook u. 24 “Ahin Pangsiima be khüt kthaai üng shääng ei kti kah thi ni. Kkhyaangea phäh-a ngshooi kti kah thi ni. 25 Ngngaai ua, kei kah pyen ma kkhai ni. Ahina kah shak üng ta ngbom tui am o-yah ti ngü. Mhnüüp mat üng ta Pangsiima pea ngbom tui kthaai kah o-be kkhai ni” tilü Jeishüh noh ah pyen. 26 Mküüi mtou naak ng'äi msuuk ma ulü Kshi Dung msuung da sit ktie.
(Mate 26.31-35; Lükah 22.31-34; Johaan 13.36-38)
27 “Pangsiim noh ‘Kei noh to kshääm kah tuk kkhai ni. Asun üng toe ngpyeeng päih kkhaie ni’ tilü Sangsiim üng ng'yuk hüt kti ni. Asun kba nah nih nah hoih päih kkhaie ni” tilü Jeishüh noh ah pyen. 28 “Thi-ma lü kah xün be kona Kalile hne da nah nih ma-a kah nah sit kkhai ni” tilü Jeishüh noh ah jah mtheh. 29 Peta noh ta “Abäng noh ning hoih u lüphi kei noh ta am ning hoih ngü” tilü ah pyen. 30 Jeishüh noh ta “Ngngaai ua, kei kah pyen ma kkhai ni. Tuh mthan bä bä hin üng aai nghlüüi nghngih vei ah khoon hlaana ‘Ah nih am kshing ngü’ tilü kthum vei nah pyen kkhai ni” tilü ah mtheh. 31 Peta noh “Nah hlonga thi-yah vai ngü she phi ‘Ah nih am kshing ngü’ ta am ti shoom ngü” tilü ah ngkyaang jäk jäk lü ngtek kti. Akläke naküt noh asun kba ah nih pyen u.
(Mate 26.36-46; Lükah 22.39-46)
32 Ket Shemani ngvoonga ah nih shuia sit ktie. Asua Jeishüh noh ta akläke üng “Kah tä sham pääng veia ngshut ua” tilü ah jah mtheh. 33 Jeishüh noh Peta, Jakop, Johaan ah veeia ah jah khü. Asu su ah nih ma-a puk shelok kti. Ng'ääi ngvyeeng lok kti. 34 Jeishüh noh ta “Thi-khyäu säpa kah puk shek kti ni. Ahia anave lü käh ip lü nah mtät ubä” tilü ah jah mtheh. 35 Jeishüh ta va-sit sa lü kyutong lü “Athoon khoh-a ta ahina khui kha kshe käh nah shoong shaka. 36 Kah paai longo, abäng naküt nah khyaih khoh kti ni. Ahina khui kha kshe nah mtheih mhnoon peeta. Asuna thoon lü phi keia hlü eia kba ta käh thoon lü nanga hlü eia thoon she” tilü ah tä sham. 37 Jeishüh noh ta pha lobe lü ana-ip ktie ah jah hmuh vaai. Jeishüh noh Peta ngming nak kti Shimon üng “Shimono, nah ip ei ksang kkheve bä. Buh nghmin hngoh käh ip lü am nah ve khoh kti mä. 38 Hlo hleep naak da käh nah nih ngpüi vaia käh ip lü tä sham ei ubä. Nah nih mlunga ta akdo nah nih poh hlü kyo ktie. Nah nih ktha noh am khyaih khoh” tilü ah jah mtheh. 39 Jeishüh va-sit sa betü lü aksüka kba tä sham be tü kti. 40 Jeishüh phalobe tü lü anangshut ip ktie ah jah hmuh vaai be tü. Ah nih mik ku pyei lü i hok kba ah nih mshak be vai u noh phi am kshing u. 41 Jeishüh akthum naaka sit betü lü “Nah nih ip ham ktie mä. Nah nih ngxü ham ktie mä. Abäng ngpääng hnüh kti ni. Mkhye ktiea kut k'uma kei, Kkhyaang Sa-a pha naak ksüün lo hnüh ksang ve. 42 Thou ua, nih sit vai u. Nah ap kti phalo hnüh ve. Bük ua” tilü ah pyen.
(Mate 26.47-56; Lükah 22.47-53; Johaan 18.3-12)
43 Jeishüh noh asun kba ah pyen k'um üng akläke xalei nghngih üng ka mat, Jüdah Sakarot ahunata lai lok kti. Khotu ngsiim kdäme jah Sangsiim ktheeme jah khong mangea jah tüih lo kkhyaang päe noh ksim kshaaü jah ksüng ei ulü mäk määng jah kkot ei ulü Jüdah Sakarot ah nih läk lo pyei u. 44 Jeishüh ap kti noh ah nih nglai ei naak vai u ah jah mtheh. “Mat uut lü kah beh na-lo kkhai ni. Asuna kkhyaang bä bä man lü ngvoong lü seh püi ubä” tilü ah jah mtheh. 45 Jüdah Sakarot ah pha lo yah ta Jeishüh-a veei akjaanga nglään lü “Angvaaio!” tilü Jeishüh-a ngbeeng uut lü ah beh naak tuhan. 46 Ah nih kshe man naak hnüh u. 47 Ah hlonga ngdüüi kti noh ta ah ksim kshaaü kaih kshet lü khotu ngsiim kdäm boka mpya mata nghnga kooi ta ah shah kkhyaak-in kyo. 48 Jeishüh noh ta “Ksim kshaaü jah kkot ei lü mäk määng jah ksüng ei lü mpyuk ei man kkhaia kba lolü nah nih nah man lok kkhe-e bä. 49 Nah nih hlonga vengü she hjok khah im nua k'uma amhnüüp tä lü kah nih ning jah msuh mtheh kti ni. Asua am nah man kbak u kti. Asuna thoon lüphi Sangsiima pyena kba thoon yah kkhai ni” tilü ah pyen. 50 Akläke noh ta sen päih lü abäng noh ah nih hoih-in u. 51 Athoi mat noh ta Jeishüh ah läk. Asun noh i phi am shui sha vaai kse. Jih nglep mat däk ni ah ngvaih ei vaai. Ah jih üng ah nih man hlü kyo u. 52 Ah jih phi ve-ei hüt ktia akpuma sen-in kti.
(Mate 26.57-68; Lükah 22.54-55, 63-71; Johaan 18.13-14, 19-24)
53 Khotu ngsiim kdäm boka veei Jeishüh ah nih khü lo u. Asua khotu ngsiim abänge, khong mange jah Sangsiim ktheeme Jeishüh kshü kset tuhan kkhaia ngkhääm ktie. 54 Peta noh ta Jeishüh üng kkeh na sa ktia ngkya sa lü khotu ngsiim kdäm boka ngvoong säpa ah läk. Asua Peta khotu ngsiim kdäm bok mtät kti jah hjok khah im nu mtät kti ngtuk kpoh-a hlonga ngshut lü mei oom ei kti. 55 Asun üng khotu ngsiim kdäme jah kong si üng ka naküt noh Jeishüh ah nih hnim naak khoh vai ua Jeishüh kbäü ei ktie ah nih jah mkhääm tuhan u. Ah pyen ngshing ngte kti am hmu-u. 56 Jeishüh mshuum ei lü ah nih hleei pyen lü shak shi tuhan ktie ta kho hah pae ni. Mat jah mata ah nih shak shi u am ngshuui ngshäp ngtu. 57 Akhäke noh ta ngdüüi lo-ulü ah nih hleei pyen lü shak shi lü Jeishüh ah nih mshuum ei u. 58 “Ah pyen nih ngjaak u ni. ‘Kkhyaanga shak ahina hjok khah im nu kah phyek kkhai ni. Kkhyaanga shak käh nik ktia hjok khah im nu kthaai, mhnüüp kthum üng kah sha-be kkhai ni’ ah ti” tilü shak shi tuhan ktie. 59 Asun hngoh üng ah nih shak shi u am ngshuui ngsäp ham ngtu. 60 Khotu ngsiim kdäm bok noh ta ah nih ngshuunga ngdüüi lok shet lü “Nah mpyong khuui kti am ni bä, pyen bea. Hie noh ning mshuum ei lü ah nih shak shi u hin i hok kba ja” tilü Jeishüh akthäh. 61 Jeishüh noh ta msik msot phi am ti. Am mshak be. Khotu ngsiim kdäm bok noh “Nang Khrito laang mä. Mküüi mtou ngkäih Pangsiima ning sa mä” tilü akthäh be tü. 62 Jeishüh noh ta “Kei Khrito beh ni. Pangsiima kkheet lama kei, Kkhyaang Sa kah ngshut nah nih nah hmuk kkhaie ni. Kho mei üng kah lo phi nah nih nah hmuk kkhaie ni” tilü ah pyen. 63 Khotu ngsiim kdäm bok noh ah jih phi kteek-in lü “Shak shi am nih hlü ei ti u. 64 Pangsiim häih leh lü Pangsiim thang msheet kti tia nah nih ngjak ktie ni. I hok kba nah nih mkhyah u ni” tilü ah pyen. “Thi ngkäih kti ni” tilü ah nih mkhyah päih u. 65 Akhäke noh ta Jeishüh ah nih mshoh ei u. Ah mik hmaai khüm lü te ulü “U noh ning te kti ni, pyen a” tilü ah nih kthäh tuhan u. Jeishüh mtät ktie noh phi ah nih pün kbeih u.
(Mate 26.69-75; Lükah 22.56-62; Johaan 18.15-18, 25-27)
66 Peta ngvoong k'uma kkong ma-a ah ve üng khotu ngsiim kdäm boka xüh ei nghnu mi mat lok kti. 67 Mei oom ei kti Peta sun nghnu mi sun noh hmulü bük-in tüp tüp lü “Nasaret mlüh-a ka Jeishüh-a ning püi ni” tilü ah pyen. 68 “I joong nah pyen kti ni. Am kshing ngü, am ngjak kya ngü” tilü Peta ngsiim kti. Peta ngvoong mkot da va-sit kti. 69 Xüh ei mat noh Peta sun hmuh betü lü “Ahina kkhyaang hin Jeishüh-a püie üng ka ni” tilü jah tou ei ktie üng ah jah mtheh be tü. 70 Peta ta ngsiim betü kti. I vei sa am lo jah tou ei ktie üng ka mat noh Peta üng “Nang hin Jeishüh-a püie üng ka kuung kuung ni. Nang Kalile hne üng ka ni” tilü ah pyen be tü. 71 Peta noh ta “Nah pyena kkhyaang, nah man ei lü am kshing ngü. Jah mhnün kti noh phi kshing kti ni” tilü mpui kkei phi ng'yün lü ngsiim betü kti. 72 Peta ah ngsiim pääng bäi bäi jah aai nghlüüi amhngih naak khoong kti. “Aai nghlüüi nghngih vei am khoong ham ‘Ah nih am kshing ngü’ tilü kthum vei pyen lü nah ngsiim kkhai ni” tilü Jeishüh-a mtheh khoi, Peta noh ah shüüm lo be hnüh. Peta jih üng ngkhui ei lü kyap kti.