13
(Mate 24.1-2; Lükah 21.5-6)
Hjok khah im nua kkhyüh ah nih luh lo be üng akläke üng ka mat noh “Büka, angvaaio, mün kshe pi pia ah nih shaka lung im nu ni” tilü ah pyen. Jeishüh noh ta “Ahin mün kshe pi pia im nu nah hmuh hin ah nih shak naak lung mata kkhaana mat käh ngthoon ti onga sim pyak be päih kkhai ni” tilü ah pyen.
(Mate 24.3-14; Lükah 21.7-19)
Hjok khah im nua nghmuh naak Kshi Dung msuunga Jeishüh ngshut kti. Asun üng Peta, Jakop, Johaan, Antere noh kkhyaanga nghi üng Jeishüh ah nih kthäh u. “Jah mtheh-a. Asun itüh-a thoon lok kkhai ni. Asun athoon lo hnüh vai üng i hok kba ngshing ngte lok kkhai ni” tilü ah nih kthäh u. Jeishüh noh ta ah jah mshak be üng ahin kba ah jah msing ma. “U noh phi ning jah mhleei mhlak lü lam käh ah nih jah hmü shak vaia mseei ei ubä. ‘Kei, Khrito ni’ ti-ulü keia ngming ngming nalü kho hah pou lo-ulü kkhyaange üng lam jah hmü shak kkhaie ni. Ngtuk nah nih ngjaak üng ah nih ngshuna kthai ah nih pyen nah nih ngjaak üng käh sääi ubä. Asun kba thoon yah kuung kkhai ni. Asuna thoon lüphi akpäih naaka ksüüna ta am ni ham. Kkhyaang mjü mat jah mat ngtuk kkhai xooi ni. Kho mdek naküt üng ngkhyü ngshüün kkhai ni. Kho mdek naküt üng kho jo kkhai ni. Asue hin khui kha mpyeen kshe naaka sut ei naake ni. Nang nih-e noh ta shim ei ubä. Kong si ngkhääm naaka phi ning ap kkhaie ni. Sangsiim ngthei naak kyonga phi ning te kkhaie ni. Aso-yah booi khonge jah shang phuhlangea veeia phi nah nih lai yah kkhaie ni. Asuea ma-a phi keia mong nah nih pyen kkhaie ni. 10 Kkhyaang amjü kkümea veei thang kdo kkya kpyaü yah ma kkhai ni. 11 Ning man ulü ah nih ning kshü kset vaia ning ap kkhaie ni. Asun üng ‘I hok kba kah pyen kkhai ni’ tilü pyang ma lü käh anasuum saak ei ubä. Asun bä bä üng nah nih pyen vai Mkhyangsiim noh ning jah shim shak kkhai ni. Nah nih päta pyen am ni. Mkhyangsiima ning jah pyen shak ni. 12 Ah nih jah hnim vaia ngbe ngna mat jah mat ng'ap ei kkhaie ni. Ah nih jah hnim vaia ah nih nu pae noh ah nih sae jah ap kkhaie ni. Ah nih sae noh phi ah nih nu pa jah sok ei ulü ah nih jah hnim vaia jah ap kkhaie ni. 13 Kkhyaange noh keia phäh-a ning sok ei kkhaie ni. Asuna thoon lüphi akpäih naak säpa yeet kti ta Pangsiim noh kuum ei kkhai ni.
(Mate 24.15-28; Lükah 21.20-24)
14 Shahma ngsiim Daneil noh Sangsiim üng ah yuk hüta kba mtuih mleh she kti akkyüh kshe am ah ve naak ngkäih-a ah ve nah nih hmuh üng ta Sangsiim bük kti noh shim ei ua. Jüdah hne üng ka msuung da sen ei ubä. 15 Asun üng ksha-a vek kti noh im k'uma i käh va lou ei ti ubä. 16 Loua khüüi kti noh phi ksoonga jih käh lah ei vaai be ti ubä. 17 Asuna mhnüüp üng ayünga am vek ktie jah sa na hmi üng sih tu ktie hin mpyeen ei she pi pi ktie ni. 18 Asun kho kshik sho üng käh angbüh vaia tä sham ubä. 19 Asuna mhnüüp üng kkhyaange noh khui kha naak hmu pi pi kkhaie ni. Asük shääia Pangsiim noh kho mdek ah mhnüna kkhyüh asun kba khui kha naak am thoon khoi ham. Malama itüh-a phi am thoon ti. 20 Asuna khui kha naaka ksüün Pangsiim noh am ah mtoi shak ta u phi am lät kkhaia thoon lü ah jah xü kse-ea phäh-a Pangsiim noh asuna ksüün mtoi shak kkhai ni. 21 Asuna ksüün üng mat noh ‘Ahia ni Khrito ah ve’, mat noh ‘Asa-a ni Khrito ah ve’ tilü ah nih ning mtheh üng käh jum ei ubä. 22 Khritoa hana ngsom ktie jah shahma ngsiima hana ngsom ktie pou lo-ulü ngshing ngte naak jah mün sam kshe poh tuhan kkhaie ni. Ah nih khyaih khoh-a ta Pangsiima jah xü kse-e hngoh lam jah hmü shak kkhaie kyo. 23 Asuna thoon lü mseei ei ksang ubä. Kah ning jah mtheh päih pääng u ni.
(Mate 24.29-31; Lükah 21.25-28)
24 Asuna khui kha kshea kona jiin mü lok kkhai ni. Mah khya am vaai lo ti. 25 Kkhaana kkhyüh aai shi kyalok kkhaie ni. Kkhaan kho ngshüün lolü khye shoh lok kkhai ni. 26 Asun kona kei, Kkhyaang Sa kah hiit jah jou taai mah mah kho ngmei üng kah lo nah hmuk kkhaie ni. 27 Kho mdeka kphyut säp jah kho mdek luum abäng üng ka kah jah xü kse-e jah mkhääm kkhaia kkhaan kho ngshäe kei, Kkhyaang Sa noh kah jah tüüi hü kkhai ni.
(Mate 24.32-35; Lükah 21.29-33)
28 Kthei dung mseei ei na-ua. Angbaane üng angpyü sa jah ah hnah hlip sa ah luh lo nah nih hmuh üng ta kho khye lo hnüh kkhai ni tilü nah nih shim ei ktie ni. 29 Asun kba asue ah nih thoon ve lo nah nih hmuh u üng ta akpäih naaka ksüün säh hnüh kti ni. 30 Ngngaai ua, kei kah pyen ma kkhai ni. Ahie naküt ah nih thoon lo hlaana ahibang kkhyaange hin am thi-be kkhaie ni. 31 Kkhaan kho jah kho mdek khyük nih lüphi kah kkhyü am theih laang.
(Mate 24.36-44)
32 Asun kba athoon naak vaia mhnüüp jah aksüün sun u a kkhyaang noh phi am kshing u, kkhaan kho ngshäe noh phi am kshing u. Pangsiima nah sa noh phi am kshing ngü. Pangsiim däk noh ni ah kshin kom. 33 Asuna ksüün itüh-a apha lo vai am kshing u kti lü mseei lü mtät ua. 34 Asun i üng täng kti ni ti ta khyük vaai hjou kkhaia punga sit kti kkhyaang mat üng täng kti ni. Ah ima ah xüh shoh-e mat shi mat shi üng ah nih poh mshah vai mta ah jah peet hüt. Mat üng ta im mtäh hüt shak lü joong kti. 35 Im mah mthana lo be kkhaia la, aai khoona lobe kkhaia la am kshing u. 36 Nang nih-e phi pung ksita xüh shoh-e üng nah nih täng ktie ni. Asuna thoon lü ahunata kah pha lobe balaak ta nah nih ngshut ip käh kah nih ning hmuh lo vaia nah mtät ubä. 37 Tuh-a kah ning üng mtheh u hin abäng naküta phäh-a phi thoon kti ni, ‘Nah mtät ubä!’”