10
(Mate 19.1-12; Lükah 16.18)
1 Jeishüh Kapanom mlüh-a kkhyüh Jüdah hnea sit lü Jotan mlik tui saye da sit kti. Ah veeia kkhyaang pä nue ngkhääm lobe tü ktie. Asue üng ah jah msuh mtheh khoi kuunga kba Jeishüh noh ah jah msuh mtheh be tü.
2 Pharishe-e Jeishüh-a veei lo-ulü “Kpa mi mat noh ah kkhyu ah hoih vai hin Pangsiima thuum üng ngkäih kti mä” tilü ah nih saam naaka ah nih kthäh kkhyah tuhan u.
3 “Shahma ngsiim Moshei noh i hok kba ah pyen hüt ja” tilü Jeishüh noh ah jah kthäh be.
4 “Kkhyaang mat noh ah kkhyu ah ngkhya naak sa yuk lü ah kkhyu ah hoih ksang vaia Moshei noh ah ä” tilü ah nih pyen be u.
5 Jeishüh noh ta “Nah nih mlung kka ngngaih kka-a phäh üng Moshei noh asuna thuum yuk hüt lü ah ä ni.
6 Pangsiim noh aksük shääia ah jah mhnün mseng lo üng kpa mi mat jah nghnu mi mat nghngi siim ah jah mhnün.
7-8 Asuna thoon lü kpa mi mat hin noh ah nu pa ah jah kphya naaka thea ah kkhyu kphya na-bok lü ve ei püi she. Ngkhyu ngla xooi sun ah nih mti sha ngso lok kti xooi ni. Ngkhyu ngla xooi hin noh mata mlung, mlung na-lo kti xooi ni. Asuna thoon lü Pangsiima hmuh-a kkhyaang nghngih am ni ti. Kkhyaang mata kba thoon lok kti xooi ni.
9 Pangsiima jah mkhääp kkhyaang noh käh jah mkhya she” tilü ah jah msuh mtheh.
10 Im k'uma akläke noh ngkhyu ngla ngkya-a mong ah nih kthäh kkhyah be tü.
11 “Ah kkhyu hoih lü akse kkhyu na-be ktia kpa mi naküt hin bäü hma kti ni.
12 Ah khong pa hoih lü akse khong pa na-be ktia nghnu mi naküt phi bäü hma kti ni” tilü Jeishüh noh ah jah mtheh.
(Mate 19.13-15; Lükah 18.15-17)
13 Asun kona Jeishüh noh hnashenea kkhaana ah kut mtaang lü ah jah tä sham peet vaia Jeishüh-a veei hnashene ah nih jah lo püi u. Akläke noh ta asuna kkhyaange ah nih jah kshät u.
14 Jeishüh noh ta asun ah jah hmuh üng thüi lok kti. “Hnashene kah veeia lo-ushe. Käh jah kshät ua. Hnashena kba ah nih mlung mhneem ktie hin Pangsiima pea ngpüi ktie ni.
15 Ngngaai ua, kei kah pyen ma kkhai ni. Kkhyaang mat mat hin noh hnashena kba Pangsiima up vai ah hlü ei üng va Pangsiima pea vaang khoh kkhai ni” tilü ah jah mtheh.
16 Asun üng Jeishüh noh hnashene jah kpom lü ah nih lu kkhaana ah kut mtaang lü do kya naak ah nih yah vaia ah jah tä sham peet.
(Mate 19.16-30; Lükah 18.18-30)
17 Jeirüh Shalem mlüh da Jeishüh ah joon hlü hnüh üng kkhyaang mat Jeishüh-a veei dong lolü Jeishüh-a ma-a ah mkhuuk lu üng ngdääng lü lei shong lü “Angvaaio, nang akdo ni. Angshääia xün naak kah yah vaaia i kah poh kkhai ni” tilü ah kthäh.
18 Jeishüh noh ta “‘Nang akdo ni’ tilü a i a nah nah shui kti ni. U a kkhyaang phi am do. Pangsiim däk ni ah do.
19 Pangsiima thuum nah kshing ni. Kkhyaang käh hnim vai, ah nih kkhyu käh ve püi vai, käh mpyuuk ei vai, hleei hlak lü käh shak shi vai, kkhyaang käh ei ook vai, nah nu pa nah jah lei shong vai” tilü Jeishüh noh ah pyen.
20 Asuna kkhyaang noh ta “Angvaaio, kah diika kkhyüh asuna Pangsiima kkhyü naküt kah läk päih pääng ni” tilü ah pyen.
21 Jeishüh noh ta asuna kkhyaang bük-in lü ah mhlä kphya naak lo. Jeishüh noh “Mata hlü ham khü. Nah taak ei naküt jooi vaai päih lü nah yah-a ngui naküt ampyeen kshe-e üng jah yeta. Asun üng va kkhaan khoa nah khoh kkhyam vai vek kkhai. Asun kona lolü kei nah läka” tilü ah pyen.
22 Asun kba Jeishüh noh ah pyen üng asuna kkhyaang hmaai shelü puk shelü shot kti. I a thoon lüni ti ta asuna kkhyaang booi ei pyei kti.
23 Jeishüh noh ta mang hü lü “Booi ei ktie hin Pangsiima pea ah nih vaan vai khak pi pi veo” tilü akläke üng ah jah mtheh.
24 Akläke ta Jeishüh-a pyena phäh üng mün sam ktie ni. Jeishüh noh ta “Kah püieo, Pangsiima pea vaan vai khak pi pi kti ni bä.
25 Sha nghngü kshaaü mpyüm khuui üng ah luh vai am ah looia kba booi ei kti kkhyaang phi Pangsiima pea ah vaan vai am looi bok” tilü ah jah mtheh be tü.
26 Akläke noh ta mün sam tong ulü “Asun kba ani ta u noh ta kuum kyan naak yah kkhai ni” tilü ah nih kthäh u.
27 Booi Jeishüh noh jah bük lü “Kkhyaang noh ah pät noh ah pät am kuum kyan khoh. Pangsiim noh ta kuum kyan khoh kti. Pangsiim noh abäng naküt khyaih khoh kti ni” tilü ah pyen.
28 Peta noh “Ngngaaia, kah nih taak ei naküt hoih hüt päih lü kah nih ning läk u ni” tilü ah pyen.
29-30 Jeishüh noh “Ngngaai ua, kei kah pyen ma kkhai ni. Kkhyaang mat hin noh keia phäh-a, thang kdo kkya-a phäh-a, ah im, ah lou, ah hnuun püi kphyaai be, ah nu pa, ah sa na ah jah hoih ta asuna kkhyaang noh ahina kho mdek tuh-a ksüün üng ah im phya mat, ah lou phya mat, ah hnuun püi kphyaai be phya mat ah nu pa phya mat, ah sa na phya mata jah yah ei be kkhai ni. Asun k'um üng mkhuh mhlih phi khaam ei yah kkhai ni. Ah malam ngooi khoa phäh phi angshääia xün naak yah kkhai ni.
31 Ah k'hma ma hnu ulü ah k'hnu hma be ktie” tilü Jeishüh noh ah pyen.
(Mate 20.17-19; Lükah 18.31-34)
32 Jeirüh Shalem mlüh-a ah seh üng lama Booi Jeishüh ah nih ma-a hma ei lü sit kti. Asun üng ta akläke ta mün sam ktie. Ah nih hlonga sit kti kkhyaange phi kyüh ei ktie. Jeishüh noh akläke xalei nghngih ah veeia jah khü be tü ma lü kkhyaange noh ah nih i hok kba poh kkhaie ati sun ah jah mtheh.
33 “Ngngaai ua Jeirüh Shalema nih sit ktie. Kei, Kkhyaang Sa hin khotu ngsiim kdäme jah Sangsiim ktheemea kut k'uma nah ap kkhai ni. ‘Ah nih hin thi ngkäih kti ni’ tia mkhyah kkhaie. Pangsiim am kshing kti kkhyaange üng khotu ngsiim kdäme jah Sangsiim ktheeme noh nah ap kkhaie ni.
34 Asuna aksea pea ka kkhyaange noh phi nah yaih ei kkhaie ni. Nah mshoh ei kkhaie ni. Nah te ulü nah hnim kkhaie ni. Asun kona amhnüüp kthum üng kah xüng be kkhai ni” tilü ah pyen.
(Mate 20.20-28)
35 Sepetea sa xooi Jakop jah Johaan Booi Jeishüh-a veei lo nih lü “Angvaaio, kah nih tä shama kba kah nih hlü ei jah poh peeta” tilü ah nih pyen.
36 Jeishüh noh ta “I kah nih ning poh peet vai nah nih hlü ei kti ni” tilü ah jah kthäh.
37 “Nah up naaka nah ksong lama mat, nah kkheet lama mat jah ngshut shaka” tilü ah nih pyen.
38 Jeishüh noh ta “I nah nih tä sham am kshing nih kti. Kah khui kha-a kba nah nih khui kha dat kti mä. Kah khaam ei mkhuh mhlih nah nih khaam ei khoh hnga kkhai mä” tilü ah pyen.
39-40 “Kah nih khyaih khoh kkhai ni” tilü ah nih pyen. Jeishüh noh ta “Kah khui kha-a kba nah nih khui kha dat ksang kkhai kyo ni. Kah khaam ei mkhuh mhlih nah nih khaam ei khoh beh kkhai kyo ni. Asuna thoon lü phi kah ksong lama mat, kah kkheet lama mat nah nih ngshut vaia ta am ning poh peet khoh nih ngü. Asuna ngshut naak ta Pangsiim noh ah jah pyaan peet pääng ni” tilü ah jah mtheh.
41 Akläke xa noh Jakop jah Johaana pyen sun ah nih ngjaak u üng am hlü ei lo u.
42 Jeishüh noh ta akläke ah veeia jah khü ma lü “Aksea pea jah up ktie noh ta ah nih jah upe sun ah nih jah nghne ei naak u. Akdäme sun noh jah aang ulü ah nih jah xüh shoh ei u.
43 Nang nih-e ta asun kba käh thoon ubä. Nang nih-e üng ta akdäma thoon lo hlü kti hin ah nih xüh shoh eia phi thoon yah she.
44 Nang nih-e üng akdäm boka thoon hlü kti hin abängea mpya-a phi thoon yah kkhai.
45 Kei, Kkhyaang Sa phi kkhyaange jah xüh shoh ei kkhaia kah lok kti am ni. Kkhyaangea xüh shoh ei vaia kah lok kti ni. Kkhyaange kah jah shuh naak bea kah shak jah pelü kah thi-yah kkhai ni” ah ti.
(Mate 20.29-34; Lükah 18.35-43)
46 Jeishüh jah akläke jah kkhyaang pä nue Jeirih Kho mlüh-a pha lok ktie. Jeirih Kho mlüh-a kkhyüh ah nih joon be üng Timüh-a sa Patimüh lam peia ngshut kti. Patimüh sun ah mik mü lü anghläia jah tong ei kti.
47 Nasaret mlüh-a ka Jeishüh vek kti tilü ah ngjaak yah ta “Davita tu kpa Jeishüh-o, kei nah mpyeen eia” tilü ngpyaang kti.
48 “Käh sik sika” tilü kkhyaange noh ngya mah mah u lü “Davita tu kpao, kei nah mpyeen eia” tilü ngpyaang lodäm däm kti.
49 Jeishüh noh ngdüüi ma lü “Khü ua” tilü ah pyen. Kkhyaange noh ta ah mik mü khü ulü “Je kyai hnüh-a, Jeishüh noh ning khü ve. Thou loa” tilü ah nih mtheh u.
50 Ah jih ngvaih phi shuut lü thou lo kshet lü Jeishüh-a veei lok kti.
51 Jeishüh noh ta ah mik mü üng “I kah ning poh peet vai nah hlü ei kti ja” tilü ah kthäh. Ah mik mü noh ta “Jah mthei ktio, kah mik nah vaai shak bea” tilü ah nghui naak.
52 Jeishüh noh ta “Nah seh naak hlüa sit ei hnüh-a. Nah jum eia phäh üng nah do be hnüh kti ni” tilü ah pyen. Asun üng ahunata ah mik vaai be lü Booi Jeishüh ah läk.