MARKÜH
Marküh-a yuk Thang Kdo Kkya
1
(Mate 3.1-12; Lükah 3.1-18; Johaan 1.19-28)
1 Pangsiima Sa Booi Jeishüh Khritoa ave thang kdo kkya kei Marküh noh ahin üng sut ei lü kah pyen.
2 Ahlaan nu üng Pangsiima kkhyü shahma ngsiim Hei Shajah noh Sangsiim üng ah yuk ta “Bük ngngaaia, nah seh naak vai lam pyaang kkhaia nah malama keia ngshä kah tüih lo.
3 Mkyaanga ngshä noh akthai kdäma ah pyen ‘Booi Pa-a lo naak vai lam ngpyuun shak ua.’”
4-5 I vei am lo ham asuna ngshä Johaan mkyaanga pou lolü kkhyaange üng “Nah nih mkhyea phäh vuuk deih deih ma u kti lü tui üng patiso khaam ei ua. Asun üng ni Pangsiim noh nah nih mkhye ah nih ning mhlät peet kom” tilü ah jah msuh mtheh. Jüdah-ea hne üng ka kkhyaange naküt, Jeirüh Shalem mlüh üng ka kkhyaange naküt, Johaana veei sit ulü angtea ah nih mkhye phyeh ktie. Asune Johaan noh Jotan mlik tuia patiso ah jah peet.
6 Johaan noh ta sha nghngü kshaaüa mu üng tah shui shak shui sha lü meh vun ngkhääp üng ngsüüp ei lü nglei khing khi jah moa ka khooi tui jah ei ok kti.
7 Johaan noh “Kah hnua keia thea khyaih khoh kti akdäm bok bok lok kti. Ah nih-a kho pha dok hngoh ngmüm lü shuh peet kkhaia kei am ngkäih ngü.
8 Kei noh ta tui üng ni patiso kah ning peet u. Ah nih noh ta Mkhyangsiim üng ni patiso ning peet kkhaie ni” tilü ah pyen.
(Mate 3.13-17; Lükah 3.21-22)
9 Asun k'um üng Booi Jeishüh Kalile hne Nasaret mlüh-a kkhyüh lok kti. Jotan mlik tuia Johaan noh Jeishüh patiso ah peet.
10 Jeishüh tui üng ah luh lo be jah ta kkhaan kho nghmong lolü Mkhyangsiim sun müüma mäia Jeishüh-a k'uma kyum lok kti phi ah hmuh.
11 Kkhaan khoa kkhyüh kthai ta “Amhlä kah sao, kah ning je ei pi pi ni.”
(Mate 4.1-11; Lükah 4.1-13)
12 Patiso ah khaam ei pääng jah ta Mkhyangsiim noh Jeishüh mkyaanga ah seh shak.
13 Jeishüh akkyüh kshe-ea hlonga mkyaang siim siima kho mhnüüp kphyü kip vek kti. Asun k'um üng Shatan yaai pa noh phi lolü Jeishüh hlo hleep kti. Kkhaan kho ngshäe noh phi Jeishüh mshü mseei ktie.
(Mate 4.12-22; Lükah 4.14-15, 5.1-11)
14 I vei am lo Johaan khup üng kyum kti. Asun kona Kalile hnea Jeishüh sit be lü Pangsiima thang kdo kkya ah jah msuh mtheh.
15 Jeishüh noh “I vei am lo Pangsiima upa pe säh lohnüh kti ni. Nah nih mkhyea phäh vuuk hnüh ua. Thang kdo kkya jum ei hnüh ua” tilü ah jah msuh mtheh.
16 Kalile tui li nua peia ah seh hü k'um üng nga kshui ngbe ngna xooi Shimon jah Antere ah jah hmuh. Ngbe ngna xooi sun noh tui li sua ngvaai vooi ei kti xooi.
17 Booi Jeishüh noh “Kei nah läk nih-a. Nga nah nih shuia kba kkhyaang kah nih ning shui shak kkhai ni” tilü ah pyen.
18 Jeishüh noh ah pyen jah ta ah nih ngvaai jah hoih hüt lü ah nih läk.
19 Akthuuk sa ah seh be tü kona ah nih mhlüüia k'uma ngvaai phyüüi ei kti xooi Jakop jah Johaan ah jah hmuh. Jakop jah Johaan sun Sepetea sa ngbe ngna xooi ni.
20 Ah jah hmuh jah ta Jeishüh noh ah jah khü. Mhlüüi üng ah nih pa Sepete jah nghloh ktie jah hoih hüt lü Jeishüh ah nih läk.
(Lükah 4.31-37)
21 Kapanom mlüh k'uma sit ulü Pangsiim ngam püi mhnüüp ah pha jah ta Jeishüh noh Sangsiim ngthei naak kyonga lut lü ah jah mthei lo.
22 Jeishüh-a jah mthei sun Sangsiim ktheemea jah mthei üng am lang lang. Ahiit mah-a ah jah mtheia thoon lü mün sam tong pi pi ktie.
23 Asun k'um üng kho yaaia ngsum naak kkhyaang mat Sangsiim ngthei naak kyong sua ahunata lai lok kti.
24 “Nasaret mlüh-a ka Jeishüh-o, kah ning püi am ni. Kah veeia i nah ti lok kti ni. Nah hnim kkhaia nah lok kti mä. Nang u atia kah ning kshing kti ni. Pangsiima veeia ka nang angsiim ngsaih ni” tilü kho yaai noh ah ngpyaan shak.
25 Jeishüh noh ta “Käh sik sik lü ahina kkhyaanga kkhyüh shota” tilü pyen lü ah kshät.
26 Kho yaai noh kkhyaang sun ngthüng ktia kät shak lü vu ngpyaang pyei lü kkhyaang üng shot kti.
27 Abäng mün sam ulü “Ahin a i ni, ah nih-a jah mthei hin akthaai ni. Hiit mah lü kho yaaie ah pyena kba veyah ktie ni” tilü mat jah mat ngshi ngkhok ktie.
28 Kalile hne jah ye li khashang naküta Jeishüh-a ave sun angshenga nglou ngthang lok kti.
(Mate 8.14-17; Lükah 4.38-41)
29 Asun üng ta Booi Jeishüh Sangsiim ngthei naak kyong üng kyum lolü Jakop jah Johaan mah mah Shimon jah Anterea ima lut vaai ktie.
30 Shimona mah pai mhnat ei lü am thou lo. Asun Jeishüh üng ah nih ngsheng mtheh naak u.
31 Booi Jeishüh noh Shimona mah pai ah mpyeen ei. Va-sit lü ah kut man lü ah mthoh jah ah mhnat ei khyük be kti. Asun üng Shimona mah pai noh ah jah kkhin naak.
32 Mülam kho kyaak hnüh-a ah jah mhnat eie jah kho yaaie noh jah vaan naak kho hah pa Jeishüh-a veei ah nih jah lo püi u.
33 Mlüh üng ka naküt mkot phi be ktia ngkhääm ktie.
34 Amjü mjüa am khyaih ktiea am ah khyaih ah jah mkhyüh peet be. Kho yaaia ngsum naak kkhyaange üng ka kho yaaie phi ah jah kshät. Kho yaaie noh ta Booi Jeishüh u atia ah nih kshing u. Asuna thoon lü Jeishüh noh am jah shi hlo shak.
35 Aai khoon pama Jeishüh thou lolü kkhyaanga nghi naaka sit lü Pangsiima veei tä sham kti.
36-37 Shimon jah ah püie noh ta Jeishüh shui ulü ah nih hmuh jah “Kkhyaang naküt noh ning shui ktie ni” tilü ah nih mtheh u.
38 Jeishüh noh ta “Ye li khashanga nih sit vai u. Asua phi Pangsiima kkhyü kah pyen kkhai ni. Asun vaia mlüh-a kkhyüh kah lok kti ni” tilü ah jah mtheh.
39 Kalile hne naküta sit hü lü Sangsiim ngthei naak kyongea jah msuuk mtheh hü lü kho yaaie phi jah kshät kti.
(Mate 8.1-4; Lükah 5.12-16)
40 Mneh kshe mneh kti mat Jeishüh-a veei lolü ah mkhuuk lu üng ngdääng lü lei shong lü “Nah nah mkhyüh hlü peeta ta kah mneh kshe hin nah nah mkhyüh peet khoh kti ni” tilü ah nghui naak.
41 Jeishüh noh mpyeen ei lotong lü ah kut hei shäng lü hne lü “Nah mneh kshe kah ning mkhyüh hlü peet kti ni. Nah mneh khyük be she” tilü ah pyen.
42 Jeishüh noh ah pyen jah ta mneh mah-a mneh kshe khyük be lü mneh mah do be kti.
43-44 “Ahin u üng phi kkhyü nglung mat phi käh mtheh bing bing bä. Khotu ngsiim üng ta nah puum sha mhnüh vaaia. Nah do be ktia thoon lüta shahma ngsiim Mosheia yuk hüt thuuma kba poh msha-a. Asun kkhyaangea ma-a nah ngshing ngte naak vai ni” tilü Jeishüh noh akdo kuunga msing ma thip thip lü aksea ah tuih.
45 Ah mneh khyük be kti noh ta Jeishüh-a ve naaka kkhyüh sit lü ah do bea mong kkhyaang naküt üng jah mtheh hü lüta thang ngpyaü hü päih lü Booi Jeishüh sun mlüh-ea kkhyaangea hmuh-a am vaang hü khoh ti. Mlüh thea anghi naaka vehü yah kti. Mlüh üng kae ngnam üng kae naküt Jeishüh-a veei lok ktie.