8
Asun kona Booi Jeishüh sun mlüh ngnam abäng kleh-a sit hü lü Pangsiima pea mong thang kdo kkya kpyaü hü kti. Akläk xalei nghngih phi ah nih üng ngkhyüi ktie. Booi Jeishüh noh am khyaih ei kti ah jah mdo be jah kho yaai ah jah kshät peeta nghnu mie akhäk noh phi läk lok ktie. Asune üng Maka Talen mlüh-a ka Marih ngming nak kti phi ngpüi kti. Ah nih üng ka kho yaai kkhyüh sun Booi Jeishüh noh ah kshät peet ni. Shang phuhlang Herota kkyoong long bük kti angvaai Khüsa-a kkhyu Johanah ni, Shüsha Na jah akse nghnu mi kho hah ngpüi ktie. Ahina nghnu mie noh ah nih külak ngui xüi üng Booi Jeishüh jah akläke sun ah nih jah tu mbei büh ten u ni.
(Mate 13.1-9; Marküh 4.1-9)
Mlüh naküta ka kkhyaange Booi Jeishüh-a veei lo-ulü kkhyaang pä nu ah nih ngkhääm lo u üng Booi Jeishüh noh ahin kba pum msäp lü ah jah mtheh mkhyah. “Msi phuh kti mat msi phuh kkhaia sit kti. Msi ah phuh üng ta msi ui akhäk lama kyayot kti. Asuna msi sun kkhyaange noh leh lang-in ulü kkhae noh ah nih koh ei u. Msi akhäk ta lung kphaka ngphah naak mdeka kyayot kti. Adung sun sot lokyo lüphi ngjaai lü thi-ei be hnaam kti. I lüni ti ta mdek am nung am shah lü tui am yah ei. Msi ui akhäk ta nghling phung hnünea kyayot kti. Nghling phunge sun msi dunge mah mah däm lok ktie. Kona nghling phunge noh ah nih jah khüm-in lo ni. Msi ui akhäk ta mdek kdo üng kyalü do kya hluui paai lolü msi ui sä mat sun sä üng phya mata shot be kti ni” tilü ah pyen. Kona “Ah nghnga khuui noh ngja-she” tilü ah kthai mdäm lü ah jah mtheh.
(Mate 13.10-17; Marküh 4.10-12)
Akläke noh pum msäp naaka mong i ti hlü ati sun Booi Jeishüh üng ah nih kthäh be u. 10 Booi Jeishüh noh “Kkhyaangea phäh ngthup kti Pangsiima pea mong nang nih-e däk üng Pangsiim noh ning jah kshing shak kti. Kkhyaang kse-e ta pum üng msäp lü jah mtheh yah kti. I lüni ti ta bük lü käh ah nih hmuh vai, ngja-ulü käh ah nih kshing vaia phäh ni.
(Mate 13.18-23; Marküh 4.13-20)
11 Pum msäp naaka ti hlü ta hin kba ni. Msi ui ta Pangsiima kkhyü ni. 12 Lama kyak kti msi ui ta Pangsiima kkhyü ngjak kti kkhyaang akhäk sun pyen hlü ni. Lüphi ah nih ngjaak kon su Shatan yaai pa lolü ah nih mlung kkyoong üng ka Pangsiima kkhyü sun ah koh be. Asuna thoon lü ah nih nih-e noh am jum ei u. Kuum kyan naak am yah u. 13 Lung kphaka ngphah naak mdeka kyak kti msi ui ta Pangsiima kkhyü ngjaak naak üng je kyai lü dou daang ktia kkhyaange sun pyen hlü ni. Lüphi ah nih mlung kkyoonga Pangsiima kkhyü sun am phung pya mah lü noong vei sa däk ni ah nih jum ei u. Hlo hleep mkhuh mhlih ah nih shoong lo üng ta nglat ei be ktie. 14 Nghling phung hnünea kyayot kti msi ui ta Pangsiima kkhyü ngjak kti kkhyaang akhäk pyen hlü ni. Lüphi i vei am loham lü ngthiim khoa phäh kking sääi siing, ‘booi ei daaü ngü’ tilü kpoon ei, kho mdek üng shääng ei kti xe xok naake noh Pangsiima kkhyü sun ah nih khüm-in lo ni. Asuna thoon lü Pangsiima kkhyü ah nih xün shak üng am ngthei paai khoh. 15 Mdek kdo üng kyak kti msi ui ta Pangsiima kkhyü sun ngjalü do ktia mlung, pyuun ktia mlung üng ksang nak ktia kkhyaang pyen hlü ni. Ah nih mlung mshaaü ulüta Pangsiima kkhyü sun ah nih xün shak üng ngthei paai lok kti.
(Marküh 4.21-25)
16 Kkhyaang noh mei phäih mdääi lü sä üng am mük. Im kkea phi am ta. Im k'uma lut lok ktie noh akvaai ah nih hmuh vaia khum khäh k'hlüng üng ni ah taak kom. 17 Ngthuh ngvih naküt ktie hin mhnüüp mat üng ta pou lok kkhaie ni. Ua am kshing naküt hin phi ngshing ngte lok kkhai ni. 18 Ah nghnga khuui naküt kti noh nah nih nghnga mkeeng lü ngngaai ua. Pangsiima kkhyü mseei lü ngngaai lü ksang nak ktia kkhyaang üng Pangsiim noh sha lü pe-bok kkhai. Pangsiima kkhyü mseei lü am su ngngaai ktia kkhyaang ta Pangsiima pea mong ah hmuh ngjaak khoi api sa hngoh phi Pangsiim noh mkhyüh peet be kkhai ni” tilü ah jah mtheh.
(Mate 12.46-50; Marküh 3.31-35)
19 Booi Jeishüh-a nu jah ah nae sun ah veeia lok ktie. Lüphi kkhyaang nung pyei ulü Booi Jeishüh-a veei su am phavaai khoh u. 20 Kkhyaange noh Booi Jeishüh üng “Angvaaio, nah nu jah nah nae noh ning hmuhlü ulü kho kpunga ning mtät ktie ni” ah nih mtheh u. 21 Asun üng Booi Jeishüh noh ta “Pangsiima kkhyü su ngngaai lü ksang nak ktia kkhyaang naküt kah nu jah kah nae ni” tilü ah jah mshak be.
22 Mhnüüp mat üng ta Booi Jeishüh jah akläke sun mhlüüia kkhaana kaai ktie. Booi Jeishüh noh “Tui li saye da nih pek vai u” tilü ah jah mtheh. Asun üng ta va-joong ktie. 23 Mhlüüi üng ah nih peh k'um üng Booi Jeishüh sun ip-in lok kti. Asun üng tui li kkhaan su kho khi kshe nu noh jah pok ei lü mhlüüi sun tui be ei lok kti. Tui üng ah nih ngsum vai u ü shepyei kti. 24 Akläke noh Booi Jeishüh ah nih mthoh vaai u. “Angvaaio, nih ngsum hnüh ve u” ah nih ti u. Booi Jeishüh sun thou lolü kho khi kshe üng “Hüp be hnüh-a” tilü tui ngkhup üng phi “Kyeem be hnüh-a” tilü ah jah him. Asun üng ta kho khi kshe hüp lobe lü tui li phi ve ei na-lo phya-pyei kti.
25 Kona Booi Jeishüh noh “A i a am nah nih nah üm nak ktie ja” tilü ah jah kthäh. Akläke sun kyüh ei lü mün sam tong ktie. Mat jah mat üng “Ahin ta i a kkhyaang pi pi vai ni. Kho khi kshe jah tui ngkhup hngoh noh phi ah nih ksang naak ta” tilü mship mhjop ktie.
(Mate 8.28-34; Marküh 5.1-20)
26 Asun üng ah nih nih-e sun Kera Shene khyong da pek ktie. Asuna khyong sun Kalile hnea dä ahmaai nghmuh-a tui li sayea vek kti. 27 Booi Jeishüh sun kkonga ah kyum jah ta asuna pi pei mlüh üng ka kkhyaang mat Booi Jeishüh-a veei ngkhyum lok kti. Asuna kkhyaang sun kho yaai noh ah nih vaan naak u hjou pyei hnüh kti. Ah nih noh shui shak phi am shui sha. Ima phi am ve. Lung khuui msüm hnüna vek kti. 28 Ah nih noh Booi Jeishüh ah hmuh jah ta ngpyaang pyei lü ah ma-a ngbok kti. “Ak'hlüng ngtaai bok Pangsiima Sa Jeishüh-o, kah ning püi am ni. Kei nah mshou ei ktia käh nah poh bä. Kah ning nghui nak kti ni” tilü akthai kdäma ah pyen. 29 I a thoon lüni ti ta Booi Jeishüh noh “Nang kho yaai ahina kkhyaang üng shota” tilü ah pyen pääng ni. Kho yaai noh asuna kkhyaang sun kho vei ah kphyo ni. Ah püie noh ah nih sun mthi yüüi üng ah kut kho yai lü ah nih mtäh mtäh u. Lüphi ah nih noh mthi yüüi sun jah kshat bät in thak thak lü kho yaai noh mkyaanga ah seh seh shak. 30 Booi Jeishüh noh “Nang ngming u ni” tilü ah kthäh. Kho yaai noh “Kah ngming Pä Kho Hah-e ni” ah ti be. I lüni ti ta ah nih vaan nak kti kho yaai sun pä kho hah-e ni. 31 Kho yaaie sun “Kei nih-e Mo Pia kah nih seh be vaia käh mkhyah bä” tilü nghui ngpha ktie. 32 Asu su vok pä nue msuung kpema ngshui ei ktie. Kho yaaie noh “Vokea k'uma kah nih vaan vaia jah khyah-a” tilü ah nih nghui naak u. Booi Jeishüh noh ah jah khyah.
33 Asun üng kho yaaie ta kkhyaang üng shot ulü voke üng vaang ktie. Asun üng ta kdang nu üng voke dong ulü tui lia kyalü ngsum päih ktie.
34 Asun kba athoon lo sun vok kshääme noh ah nih hmuh üng sen ulü mlüh k'um jah mlüh pi peia athoon ve sun ah nih pyen hü u. 35 Asun üng ta kkhyaange noh athoon ve sun bük kkhaia lohü ktie. Booi Jeishüh-a veei ah nih pha lo üng kho yaai pä kho hah-e noh ah nih vaan naak khoi kkhyaang sun ngthiim be lü Booi Jeishüh-a kho kuunga shui shak phi shui shak ktia ngshut kti ah nih hmuh vaai u üng kyüh ei lopyei ktie. 36 Kho yaaia vaan naak khoi kkhyaang jah vok i hok kba ah nih thoon ve hmuk ktie noh kkhyaange üng ah nih jah mtheh be u. 37 Asun üng ta Kera Shene khyong jah api pei üng ka kkhyaang naküt kyüh ei pyei ulü Booi Jeishüh sun ah nih nih-a kkhyüh ah shot vaia ah nih nghui naak. Asun üng Booi Jeishüh sun mhlüüi üng kaai lü sit be kti.
38 Lüphi kho yaaiea shot taak noh Booi Jeishüh ah läk vaia ah nghui naak kyo. Booi Jeishüh noh ah mhlat be. 39 Booi Jeishüh noh ta “Ima sit be lü Pangsiim noh i kän ah ning poh peet ati sun jah mtheh vaaia” tilü ah xüh. Asuna kkhyaang sun sit be lü Booi Jeishüh noh i kän ah poh peet ati sun mlüh naküta ah kpyaü hü.
(Mate 9.18-26; Marküh 5.21-43)
40 Booi Jeishüh sun tui li saye da ah va-peh be üng ta kkhyaang pä noh ah namtät ulü je je kyai kyaia ah nih dou u. 41 Asun üng Sangsiim ngthei naak kyong up kti Jaih Rüh ngming nak kti sun Booi Jeishüh-a veei lok kti. Booi Jeishüh-a kho kuunga ngbok lü ah ima ah läk vaia ah nghui naak. 42 I lüni ti ta kum xalei nghngih lohnüh kti mat sa däk ah sa nghnu sun thi-lo hlühnüh kti. Booi Jeishüh sun Jaih Rüh-a hlong ah seh üng kkhyaang pä nue noh ah nih booi-in u.
43 Pä k'um sun üng kum xalei nghngih kuung ah thi siim siima ah puum üng ka ngshooi kti nghnu mi mat ngpüi kti. Ah külak ngui xüi naküt phi shei shala kheena päih kti. Lüphi ah nih sun u noh phi am mdo be khoh. 44 Asuna nghnu mi noh Booi Jeishüh-a hnu da lolü ah shui shaka pyaai ah hneh. Ahunata ah thi ngshooi kti sun hüp be kti.
45 Booi Jeishüh noh “U noh kei nah hne kti ni” tilü ngthäh kti. Kkhyaang abäng noh “Kei ta am ni” ah nih ti u. Asun üng Peta noh ta “Angvaaio, kkhyaang pä nue noh ning booi-in ulü ah nih ning hneh pyei u va nik kba” tilü ah pyen be. 46 Booi Jeishüh noh ta “Am ni. Mat mat noh nah hne bä bä kti ni. Keia kkhyüh kah hiita luh lo kah kshing ei ni” tilü ah jah mtheh. 47 Nghnu mi noh athoon ve sun thuh lü am ng'yah ti kkhai atia hmulo lüta ngthüng ngak ngak üng Booi Jeishüh-a veei lolü ah kho kuunga ngbok kti. Kona i lü Booi Jeishüh ah hneh jah i hok kba ah do lo be ngsheng sun kkhyaang pä ma-a ah pyen lo. 48 Booi Jeishüh noh “Kah sa nghnuo, nah nah jum eia phäh üng nah do be kti ni. Amlung diima sit be hnüh-a” tilü ah pyen.
49 Booi Jeishüh ah shi hlo k'um üng Sangsiim ngthei naak kyong up ktia ima ka kkhyaang mat lai lok kti. Asun noh kyong k'up üng “Nah sa nghnu thipääng kti ni. Angvaai amdanga käh seh hü hlüshak tonga” tilü ah mtheh. 50 Booi Jeishüh noh asun ah ngjaak üng ta kyong up üng “Käh sääia. Aksanga kei nah üm na-a. Nah sa do be kkhai ni” ah ti be.
51 Booi Jeishüh sun ima ah pha vaai üng Peta, Jakop, Johaan jah hnashena nu pae däk im k'uma jah khü lü akse-e ta am jah luh shak. 52 Kkhyaang abäng ng'ääi ngvyeeng pyei lü kyap ktie. Booi Jeishüh noh ta “Käh kyap ua. Hnashen thik kti am ni. Ip kti ni” ah ti. 53 Asun üng kkhyaange noh Booi Jeishüh ah nih yaih ei u. Hnashen sun thipääng ksang kti atia ah nih kshing ei u.
54 Booi Jeishüh noh nghnu mi sa-a kut man lü “Hnasheno, thou loa” ah ti. 55 Nghnu mi sa sun ngxü lobe lü ahunata thou lok kti. Booi Jeishüh noh “Nghnu mi sa üng ah ei vai pe-ua” tilü ah jah mtheh. 56 Ah nu jah pa mün sam tong kti xooi. Lüphi Booi Jeishüh noh “Ahina mong u üng phi käh mtheh bing bing ubä” tilü ah jah mtheh.