6
(Mate 12.1-8; Marküh 2.23-28)
1 Pangsiim ngam püi mhnüüp üng Booi Jeishüh jah akläke sun kyung saang khoe kkaan lü sit ktie. Ah nih seh shoa akläke noh kyung saang vui dü pah lü mnooi ei lü ah nih ei u.
2 Pharishe-e akhäk noh ta “Nang nih-e noh Pangsiim ngam püi mhnüüp üng Pangsiima thuum lüüm kkaan lü a i a ahin kba nah nih poh ktie ni” tilü ah nih jah kthäh u.
3 Booi Jeishüh noh ta “Ahlaan üng shang phuhlang Davit jah ah püie ei noh ah jah kkhyoot ei üng Davit noh i poh kti ati sun Sangsiim üng nah nih hmukhoi ktie am ni bä.
4 Davit noh Pangsiima jih shung müüp k'uma lut lü Pangsiima kkhaai kpeh ah ei. Asuna kkhaai kpeh sun khotu ngsiime däk noh ni ah nih ei vaia Pangsiima thuum ah ve kyo. Davit noh ta ah püie üng phi ah jah mbei ni.
5 Pangsiim ngam püi mhnüüp üng i hok kba ve vai ati sun kei kkhyaang sa noh kah mkhyah khoh kti ni” tilü ah jah msuh mtheh.
(Mate 12.9-14; Marküh 3.1-6)
6 Pangsiim ngam püi mhnüüp be tü üng Booi Jeishüh noh Sangsiim ngthei naak kyonga lut lü Pangsiima kkhyü ah jah msuh mtheh. Asua ah kkheet kut thik kti kkhyaang mat vek kti.
7 Pangsiim ngam püi mhnüüp üng am mya kti mdo be hlük kkhe ti ulü Booi Jeishüh ah nih kbäü ei naak ah ve vaia Sangsiim ktheeme jah Pharishe-e noh Jeishüh ah nih ling u.
8 Booi Jeishüh noh asunea su ngngaih sun kshing lolü ta “Lolü kkhyaangea ma-a ngdüüi loa” tilü ah pyen. Ah nih sun thou lolü ah nih ma ua ngdüüi kti.
9 Asun üng ta Booi Jeishüh noh ah nih-e üng “Pangsiim ngam püi mhnüüp üng akdo poh vai Pangsiima thuum üng ngkäih ngvaih kti mä. Am ani ta akshe poh vai Pangsiima thuum üng ngkäih ngvaih kti mä. Pangsiim ngam püi mhnüüp üng kkhyaanga shak mphyün phyak kti mä. Am ani ta kkhyaanga shak mthih phyak kti mä” tilü ah jah kthäh.
10 Booi Jeishüh noh kkhyaange sun mang hü lü ah jah büh. Kona ah kut vaang kthi üng “Nah kut shänga” tilü ah mtheh. Ah kut shäng lü do lo be kti.
11 Asune sun thüi shei lopyei ulü Booi Jeishüh i hok kba poh vai atia ah nih seng u.
(Mate 10.1-4; Marküh 3.13-19)
12 Asun üng Booi Jeishüh sun tä sham kkhaia msuung kho da kaai kti. Amthana Pangsiima veei tä sham kti.
13 Kho thaai lolü ta akläke abäng sun ah veeia ah jah khü. Asunea k'um üng ngshäa ah jah msoon vai xalei nghngih ah jah xü.
14 Booi Jeishüh noh ah jah xüe ta Peta-a ah shui be Shimon jah ah na Antere, Jakop jah Johaan, Philip jah Pato Lomüh.
15 Mate jah Tomah, Aphea sa Jakop jah pe ktheem Shimon.
16 Jakopa sa Jüdah jah Booi Jeishüh ktuun ei kkhai Jüdah Sakarot ni.
(Mate 4.23-25)
17 Booi Jeishüh sun läk ktie mah mah msuunga kkhyüh kyalo be ulü doua ngdüüi kti. Ah hlonga akläke kho hah pa vek ktie. Jüdah hne abäng jah Jeirüh Shalem mlüh ni, mpang lai tui peia ka Türah jah Shiton mlüh üng ka ni, kkhyaang pä nue lok ktie. Asune sun Booi Jeishüh-a msuh mtheh su ngngaai kkhai jah am ah nih khyaih ei ah jah mdo be vaia ngkhääm ktie ni.
18 Kho yaaia jah mkhui mkhae phi Booi Jeishüh noh ah jah mdo be.
19 Kkhyaang pä üng ka kkhyaang naküt noh ah nih sun hne hlüpyei ktie. I lüni ti ta ah nih-a kkhyüh hiit sun lolü abäng ah jah mdo bea phäh ni.
(Mate 5.1-12)
20 Booi Jeishüh noh akläke sun jah bük lü “Tuh hi nang nih-e üng mpyeen shek ktia kkhyaangeo, ahin nang nih-ea phäh do kya naak ni. Pangsiima upa pe nang nih üng shääng kti ni.
21 Tuh hi ah ning jah kkhyoot eia kkhyaangeo, ahin nang nih-ea phäh do kya naak ni. Pangsiim noh hlü naküt kti ning jah pe-lok kkhaie ni. Tuh hi kyap yün ktia kkhyaangeo, ahin nang nih-ea phäh do kya naak ni. Je kyai lü nah nih yaih yün ei be kkhaie ni.
22 Kei, Kkhyaang Sa nah nih nah läka phäh kkhyaange noh ah nih ning thi naak u ta, ah nih ning not u ta, ah nih ning kshe naak u ta, nah nih ning hmaai sheet u ta ahin nang nih-ea phäh do kya naak ni.
23 Asun üng ta je kyai ua. Xe nalü ngtuui nglaam u. I lüni ti ta Pangsiim noh kkhaan khoa ah ning jah peet vaia kheen däm duh kti ni. Kkhyaange noh nang nih-e ah nih ning poh hüa kba nah nih pu pae noh phi shahma ngsiime jah poh hü khoi ktie ni.
24 Tuh hi booi maang ei ktia kkhyaangeo, ahin nang nih-ea phäh-a khui kha naaka thoon kkhai ni. I lüni ti ta tuh-a nah nih xün shak üng abäng nah nih yah ei pääng ktie.
25 Tuh hi aphüa ei ok ktia kkhyaangeo, ahin nang nih-ea phäh khui kha naaka thoon kkhai ni. I lüni ti ta ngooia ning jah kkhyoot ei be kkhaie ni. Tuh hi ahlü büa yaih yün ei ktia kkhyaangeo, ahin nang nih-ea phäh khui kha naaka thoon be kkhai ni. I lüni ti ta ngooia nah nih puk she kyap yün be kkhaie.
26 Tuh hi abänga mküüi mkhyah eia kkhyaangeo, ahin nang nih-ea phäh khui kha naaka thoon be kkhai ni. Asun kba ni nah nih pu pae noh phi shahma ngsiima ngsom ktie sun jah mküüi mkhyah ei khoi ktie.
(Mate 5.38-48, 7.12)
27 Nah su ngngaai hlük ktia mlung vek ktieo, kei kah pyen ma kkhai. Nah nih ye jah kphya na-ua. Am ning hmuhlük ktie üng ado vai jah poh peet ua.
28 Ning jah kshe nak ktie üng Pangsiim noh do kya naak ah jah peet vaia tä sham ua. Ning hnep ei ktiea phäh jah tä sham peet ua.
29 Mat mat noh nah ngbeeng vaang ah ning kbeih ta vaang da ka phi mhlat peet be tü ma bä. Nah pyang k'oh ning hut kti noh nah phyang ngpam phi ah loh ei hlü ham ta käh ngya bä.
30 Ning tong ei lo naküt kti üng pea. Nah ka seh ei kti üng käh tong ei be bä.
31 Kkhyaange noh ah nih ning poh peet vai nah nih hlü eia kba kkhyaange üng jah poh peet ua.
32 Ning kphya nak ktie däk nah nih jah kphya naak be ta i hok kba Pangsiim noh kheen ning jah pek kkhai ni. Pangsiim am kshing ktia kkhyaange hngoh noh phi jah mhlä kphya nak kti ta mhlä kphya na-be ktie ni.
33 Ning bük teng be kkhaie däk üng ado vai nah nih jah poh peet ta i hok kba Pangsiim noh kheen ning jah pek kkhai ni. Pangsiim am kshing ktie noh phi asun kba poh ktie ni.
34 Ning jah thung be khoh kkhaia nah nih ngngaih-a kkhyaang däk üng nah nih jah kpu ta i hok kba Pangsiim noh kheen ning jah pek kkhai ni. Pangsiim am kshing ktie noh phi ah püi po üng kpu mhnih ulü akküma yah ei be ktie ni.
35 Asun kba käh nik ktia nang nih-e noh ta nah nih ye jah kphya na-ubä. Nah nih yah ei be vai käh ngngaai hmulü ado vai poh mshah lü jah kpu mhnih ua. Asun kba ani ta Pangsiim noh ah ning jah peet vaia kheen kho hah pa ni. Ak'hlüng ngtaai bok Pangsiima sa na-a ning shui kkhaie. I lüni ti ta am jah je ei be thei ktie jah ah nih päta phäh däk nghnga nak ktie üng phi Pangsiima bä naak vek kti.
36 Nah nih Pa Pangsiim noh kkhyaange ah jah mpyeen eia kba nang nih-e noh phi jah mpyeen msheei ei ua.
(Mate 7.1-5)
37 Kkhyaange käh jah si jaang ubä. Asun üng ni Pangsiim noh nang nih-e am ah nih ning si jaang kom u. ‘Ah nih noh mkhye kti’ tilü käh mkhyah ua. Asun üng ni Pangsiim noh nang nih-e üng mkhye kti atia am ning jah mkhyah u. Kkhyaangea mkhye mhlät ua. Asun üng Pangsiim noh nah nih mkhye ning jah mhlät kkhai.
38 Kkhyaange üng jah pemsho ua. Asun üng Pangsiim noh nang nih-e üng phi ning jah pemsho be kkhai ni. Akdoa nüng lü kshon tet tet lü kkhyun ham lü hleei hlook ei ktia Pangsiim noh ning jah pek kkhai. Nang nih-e noh kkhyaange üng nah nih jah nün peeta kba Pangsiim noh ning jah nün peet be kkhai” tilü ah jah mtheh.
39 Kona Booi Jeishüh noh asune üng pum üng msäp lü ah jah msuh mtheh ta “Ah mik mü hin noh ah mik mü ah püi sho kaih khoh kkhai mä. Ah nih nghngih-a khuui kkok üng kyak kkhai xooi va am ni bä.
40 Akläk hin ah nih mthei ktia kthaka am däm duh khoh. Lüphi abänga ah ngthei päih kona ta ah nih mthei kti üng täng lok kkhai.
41 I hok kba thoon lü nang nih-e noh nah nih püia mik beng ta hmu-u kti lü nah nih mik üng vek kti thing mthu ta am nah nih hmuh ei u ni.
42 I hok kba thoon lü nah püi üng ‘Kah püio, nah mik beng hin ning loh peet vang ngü’ tilü nah nih pyen ktie ni. Nah pät hin noh ta nah mik üng vek kti thing mthu am nah hmuh ei ni. Kkhyaang kdoa hana nah som kti ni. Aksüka nah mik üng vek kti thing mthu hin lou be ma-a. Asun üng va nah mik vaai lolü nah püia mik beng phi nah loh peet be khoh kkhai.
(Mate 7.16-20, 12.33-35)
43 Amjü kdo thing dung noh am she aai ktia ktheih am ktheih na-khoi. Asuna tänga amjü am do ktia thing dung noh phi do ktia ktheih am ktheih na-khoi.
44 Aktheih büh naak üng i a mäi thing dung atia nih kshing kti. Kthei ktheih sän nghling dunga am nih kphyüt ei khoi. Ngbom ktheih phi nghling kpyüüma am nih kphyüt ei khoi.
45 Kkhyaang kdo noh ah mlung kkyoonga do kya kti msun mshep lü akdo shum ei be kti. Kkhyaang kshe noh ta ah mlung kkyoonga akshe kkhyu msun mshep lü am do kti sun shum ei be kti. I lüni ti ta nih mlunga vek kti ni nih mpyonga ah luh lo.
(Mate 7.24-27)
46 Nang nih-e noh i lü kei üng ‘Booi Pao, Booi Pao!’ tilü nah nih nah khü ktie ni. Kah pyena kba ta am poh mshah vesoh kba u kti.
47 Kah veeia lolü kah pyen kshak su ngngaai lü nah ksang nak ktia kkhyaang naküt sun i üng täng kti atia kah ning jah mtheh ma kkhai.
48 Asuna kkhyaang sun im ah shak üng ktung khuui akthuuk nua sou lü doua mdeka säm naaka im shak kti üng täng kti. Tui long sun däm lolü im sun kkhung pyei kyo lüphi asuna im am nük nük laang. I lüni ti ta asuna im angkhäänga ah shak ei ni.
49 Kah veeia lolü kah pyen kshak su ngngaai lü am nah ksang nak ktia kkhyaang naküt ta ktung khuui aksäh sa-a sou lü mdeka hoop naaka im shak kti üng täng kti. Tui long noh asuna im ah kkhung pyei jah ahunata kyulü yah ei vai käh ve ngtu ktia sim pyak päih kti ni” tilü ah jah msuh mtheh.