5
(Mate 4.18-22; Marküh 1.16-20)
1 Booi Jeishüh sun Kene Sharet tui li peia ah ngdüih um üng kkhyaang pä nu noh Pangsiima kkhyü hmu-ngjahlü ulü ah nih booi-in u.
2 Booi Jeishüh noh kkong peia ah nih jah khun mhlüüi nghngih ah jah hmuh. Mhlüüi mah nga kshuie sun noh mhlüüia kkhyüh kyum lolü ngvaai jah mthi be ktie.
3 Booi Jeishüh sun mhlüüi mata kkhaana kaai kti. Asuna mhlüüi ta Shimona ka ni. Booi Jeishüh noh Shimon üng ah mhlüüi sun kkonga kkhyüh tui lia kkhaana ah hei mtheih sa vaia ah mtheh. Ngshut lü kkhyaange üng Pangsiima kkhyü jah msuuk mtheh kti.
4 Jah msuuk mtheh lopääng lüta Shimon üng “Tui lia thuuk naak da mhlüüi pyaih lü ngvaai vooi ua” tilü ah mtheh.
5 Shimon noh ta “Angvaaio, kei nih-e noh amthan kthaaia ngnoi täh ngvaai kah nih vooi ktie kyo. Nga thek mat phi am yah ei u ngü. Lüphi nang angvaai noh nah pyena phäh-a kah vooi kkhai” ah ti.
6 Ah nih nih-e noh hei vooi ulüta ngvaai phi teek hlük ktia nga kho hah pa ah nih mboh u.
7 Asuna thoon lü mhlüüi kse üng vek kti ah nih püie sun jah ku kkhaia ah nih jah khü u. Asune lo-ulü mhlüüi xooi sun tui üng lut khyäü ktia nga ah nih mtaih u.
8 Shimon Peta noh asun hmulü ta Booi Jeishüh-a kho kuunga ngbok lü “Booi Pao, keia kkhyüh ngheei tua. Kei ta kah mkhye mshoh kti ni” ah ti.
9 I lüni ti ta Shimon jah ah püie sun asun kba onga nga ah nih yah ua phäh mün lok kkhüt ktie.
10 Shimona jah püi Sepetea sa xooi Jakop jah Johaan phi mün tong kti xooi. Booi Jeishüh noh Shimon üng “Käh sääia, tuh-a kkhyüh nga nah nih shuia kba kkhyaang nah nih shui kkhai ni” ah ti.
11 Asune noh ah nih mhlüüie sun kkonga jah mkaai ulü akve naküt hoih päih lü Booi Jeishüh läk ktie.
(Mate 8.1-4; Marküh 1.40-45)
12 Booi Jeishüh sun mlüh mata ah ve k'um üng mneh kshe mneh kti mat ah veeia lok kti. Booi Jeishüh sun ah hmuh üng ta ah ma-a ngbok lü “Booi Pao, nah nah mkhyüh hlü peeta ta kah mneh kshe hin nah nah mkhyüh peet khoh kti ni” tilü ah nghui naak.
13 Booi Jeishüh noh ah kut shäng lü ah nih sun ah hneh. “Nah mneh kshe kah ning mkhyüh hlüpeet kti ni. Nah mneh khyük be she” tilü ah pyen. Ahunata mneh mah-a mneh kshe khyük be lü do be kti.
14 Booi Jeishüh noh “Ahin u üng phi käh mtheh bing bing bä. Khotu ngsiim üng ta nah puum sha mhnüh vaaia. Nah do be ktia thoon lü Mosheia yuk hüt thuuma kba poh mshah-a. Asun kkhyaangea ma-a nah ngshing ngte naaka thoon kkhai ni” tilü akdo kuunga ah mtheh mkhyah.
15 Lüphi Booi Jeishüh-a thang ta ahoa phi nglou ngthang lohü däm däm kti. Asuna thoon lü ah pyen kshak sun ngngaai kkhai jah am ah nih khyaih ei sun ah jah mdo be vaia kkhyaang pä hli kho hah ngkhääm lok ktie.
16 Lüphi Booi Jeishüh sun ampyu sa-a joong lü tä sham vaai kkhaia mkyaanga sit kti.
(Mate 9.1-8; Marküh 2.1-12)
17 Mhnüüp mat üng ta Booi Jeishüh noh ah jah msuh mtheh k'um üng Kalile hnea ka mlüh ngnam naküt ni, Jüdah hne üng kae ni, Jeirüh Shalema kkhyüh lok kti Pharishe-e jah Sangsiim ktheeme noh phi ngshut lü su ngngaai ktie. Kkhyaange jah mdo be kti Pangsiima hiit Booi Jeishüh üng vek kti.
18 Asun üng kkhyaang akhäk noh ah kut kho kthi mat sun kyääp üng ah nih kkoh lo u. Asune noh am khyaih kti sun im k'uma kkot lü Booi Jeishüh-a ma-a ah nih mphään vaai hlü kyo u.
19 Lüphi im kkyoong jah ksha su ngleh ei naak vai käh vek ktia kkhyaange be ktet ktie. Asuna thoon lü kkyoong k'uma am luh püi khoh u. Asun üng ta amkhyuung kka-a ah nih shak im ktih kkhyeh ulü ah kut kho kthi sun kyääp mah mah yüüi khyoh üng kkhyaang päa kshuung Jeishüh-a ma bä bäa ah nih kkhyaak vaai u.
20 Booi Jeishüh noh ah nih üm naak u sun jah hmulüta ah kut kho kthi üng “Kah püio, nah mkhye kah ning mhlät hnüh ni” tilü ah pyen.
21 Sangsiim ktheeme jah Pharishe-e noh “Ahina kkhyaang ta u ni. Ah mtham hmuh-a ngthu ei lü Pangsiim thang msheet kti ni. U noh mkhye am mhlät khoh. Pangsiim däk am ni bä” tilü ah nih mlung kkyoonga ah nih ngngaih u.
22 Asun kba ah nih su ngngaih sun Booi Jeishüh noh ah kshing lo jah ta “Nah nih mlunga ahin kba a i a nah nih su ngngaai ktie ni” tilü ah jah kthäh.
23 Ah nih-e üng “‘Nah mkhye kah ning mhlät hnüh ni’ tilü mpyong thak üng pyen vai mä alooi. Asun kba am ani üng ‘Ngdüüi lolü sit hnüh-a’ tilü pyen vai mä alooi.
24 Lüphi kei, Kkhyaang Sa noh ngthiim khoa phi mkhye mshoh-e kah hläh naak kah hiit ave sun tuh kah nih ning mhnüh kkhaie ni” tilü ah jah mtheh. Kona ah kut kho kthi üng “Nang üng phi kah ning mtheh. Ngdüüia, nah kyääp kkot lü nah ima sit bea” tilü ah pyen.
25 Asun üng ta ah kut kho kthi sun kkhyaang abänga hmuh-a ngdüüi lok kshet lü ah kyääp kkot lü Pangsiim mküüi mtou lü ima sit be kti.
26 Kkhyaang abäng mün sam tong ulü Pangsiim sun mküüi mtou ktie. “A i nu vai ni. Tuh ngooia kba ta ahun phi am hmukhoi ham ngü” tilü ngsi ngjaang ktie.
(Mate 9.9-13; Marküh 2.13-17)
27 Asun kona Booi Jeishüh sun kpunga ah seh üng khoon to hlook naak luuma ngshut kti Levih ngming nak kti khoon to k'hlook ah hmuh. Levih sun üng “Nah läka” tilü ah pyen.
28 Ah nih noh abäng hoih hüt lü ngdüüi lolü Booi Jeishüh ah läk.
29 Kona Levih noh ah ima Jeishüh-a phäh pooi poh kti. Khoon to k'hlooke jah Pangsiima thuuma kba am vek kti kho hah pa sun Booi Jeishüh jah akläkea hlonga ngvai lü buh ei yüm ktie.
30 Asun üng Pharishe-e jah Sangsiim ktheeme noh ta “I a thoon lü nang nih-e noh khoon to k'hlooke jah Pangsiima thuuma kba am vek ktie mah mah buh nah nih ei dat ktie ni” tilü akläke sun ah nih jah msheet ei u.
31 Asun üng ta Booi Jeishüh noh “Khyaih ktiea phäh shei shala am hlü. Am khyaih ktiea phäh shei shala hlü kti ni.
32 Ah nih pät noh ah nih pät ngbüh bok ktia ngngaai ei ktie jah khü kkhaia kah lok kti am ni. Ah nih pät noh phi ah nih mkhye shim ei ktie ah nih vuuk lo be vaia kah lok kti ni” tilü ah jah mtheh.
(Mate 9.14-17; Marküh 2.18-22)
33 Kkhyaang akhäk noh Booi Jeishüh üng “Patiso Johaana akläke noh käh ngkhya pyei ktia ei jeih lü tä sham ktie. Pharishe-ea akläke phi asun kba thoon ktie. Nanga akläke ta ei o-ei kbak u” tilü ah nih pyen ei u.
34 Booi Jeishüh noh ta “Akläke noh ayüma kah nih ve k'um üng ei am jeih thei u. Kei hin sa kla üng täng ngüshe akläke ta sa laak pooia lok kti kkhine üng täng ktie ni. Ayüma kah nih ve k'um üng pooi poh lü kah nih ei kkhaie ni.
35 Akläke mah mah kah ngkya lo ksüün phalok kkhai. Asun üng akläke noh ei jeih hnga kkhaie ni” tilü ah pyen.
36 Booi Jeishüh noh pum üng msäp lü ah jah mtheh ta “Shui shak kthaai moih-a mte üng shui shak kpyoon kteek u noh phi am bu khoi. Avai shüa asun kba poh ta shui shak kthaai alapa kteek-ina thoon lolü shui shak akthaai mte jah akphyüm sun phi am nglooi ni.
37 Meh vun üng pyaan uum kphyüm üng ngbom tui shü u noh phi am thaan khoi. Avai shüa nih thaan ta ngbom tui shü phu lolü uum sun ak kkhai ni. Ngbom tui phi nghuk ngxän päih lü uum sun phi pyak kkhai.
38 Ngbom tui shü ta meh vun üng pyaan uum kthaai üng thaan yah vai.
39 Ngbom tui kphyüm o-pääng kti noh ngbom tui shü am o-hlü ti. ‘Ngbom tui kphyüm o-phyabok kti’ tik kkhai ni.