4
(Mate 4.1-11; Marküh 1.12-13)
1 Booi Jeishüh sun Jotan mlik tuia kkhyüh ah lo be üng Mkhyangsiim üng be baang lü Mkhyangsiim noh mkyaanga ah seh shak.
2 Asua Shatan yaai pa noh Booi Jeishüh sun kho mhnüüp kphyü kip ah hlo hleep. Asun k'um üng Booi Jeishüh noh ei jeih kti. Kho mhnüüp kphyü kip asuum kona kkhyoot ei lok kti.
3 Asun üng Shatan yaai pa noh “Nang hin Pangsiima ning sa ksanga nah thoon ta hina lung hin kkhaai kpeh-a thoon lok kkhaia pyen tua” tilü ah mtheh.
4 Asun üng Booi Jeishüh noh “Sangsiim üng ng'yuk kti ta ‘Kkhyaanga xün naak vaia ei ook hin aktung bok am ni’ tilü vek kti ni” ah ti be.
5 Asun üng ta Shatan yaai pa noh Booi Jeishüh sun msuunga khü lü noong vei kshük sa üng hina kho mdek üng vek kti teng pe naküt ah jah mhnüh.
6 Shatan yaai pa noh “Hina teng pe-e jah up naaka hiit jah jou taai kah ning pek kkhai. Asun keia kut üng vek kti ni. Kah peet hlü ta a u üng phi kah pe-khoh kti ni.
7 Nang noh nah nah hjok khah ta ahine abäng hin nanga mkha kkea veyah kkhai ni” tilü ah hlo hleep.
8 Booi Jeishüh noh ta “Sangsiim üng ng'yuk kti ta ‘Nah Booi Pa Pangsiim däk va nah lei shong hjok khah yah kkhai’ tilü vek kti ni” tilü ah mshak be.
9 Kona Shatan yaai pa noh Booi Jeishüh sun Jeirüh Shalem mlüh-a lai püi lü hjok khah im nua ahlüng naak bok boka ah ngdüih shak. Shatan yaai pa noh “Nang hin Pangsiima ning sa ksanga nah thoon ta aana kkhyüh lü juk ksou-ina.
10 I lüni ti ta Sangsiim üng ng'yuk kti ta ‘Pangsiim noh kkhaan kho ngshäe üng nang ah nih ning mseei kyet vai ua ah jah sük ni’ tilü vek kti.
11 Ng'yuk be tü kti ta ‘Nah kho lung üng käh nah mshuk mhleem ei vaia kkhaan kho ngshäe noh ah nih kut üng ning jäk shoon kkhaie ni’ tilü vek kti” ah ti be tü.
12 Lüphi Booi Jeishüh noh ta “Sangsiim üng hin kba phi ng'yuk kti ni ‘Nang noh nah Booi Pa Pangsiim käh nah saam xap vai’ tilü vek kti” ah ti be.
13 Shatan yaai pa noh asun kba amjü mjüa hlo hleep lokyo kshit lü noong vei ah ngheei taak.
(Mate 4.12-17; Marküh 1.14-15)
14 Booi Jeishüh sun Mkhyangsiima hiit üng Kalile hnea lobe kti. Booi Jeishüh-a thang sun ye li kkha shanga phi nglou ngthang hü päih kti.
15 Ah nih noh Sangsiim ngthei naak kyongea Pangsiima kkhyü be jah msuuk mtheh lü kkhyaang naküt noh ah nih mküüi ei lo u.
(Mate 13.53-58; Marküh 6.1-6)
16 Kona Booi Jeishüh sun ah diik üng ah ve naak khoi Nasaret mlüh-a phavaai be kti. Pangsiim ngam püi mhnüüp üng ah thuuma kba Sangsiim ngthei naak kyonga sit kti. Sangsiim kkhe kkhaia ngdüüi lok kti.
17 Ah nih nih-e noh shahma ngsiim Hei Shajah-a yuk sa ktoom ah nih peet u. Asuna sa ktoom sun kphyang shoxat lü hin kba vek kti ah hmuh.
18 “Booi Pa-a Mkhyangsiim kei üng velok kti. I lüni ti ta ampyeen kshe-ea veei thang kdo kkya kpyaü kkhaia Pangsiim noh nah msoon khü. Khup üng kyum ktie üng ‘Nang nih-e nah nih lät hnüh ktie ni’ tilü kpyaü kkhaia Pangsiim noh kei ah nah tüih lo ni. Ah mik müe ah nih mika vaai lo be vai jah ah nih jah hnep eie jah mhlät mhlang be kkhaia kah lok kti ni.
19 Pangsiim noh ah kkhyaange ah jah bäh hlah naaka ksüün phalok kti sun kei noh kah kpyaü hü yah kkhai ni” tilü ah kkheh lo.
20 Pääng lolü ta Booi Jeishüh noh sa ktoom sun ktoom lü khuut jah kpüi kti üng pe-be lü ngshut kti. Sangsiim ngthei naak kyonga akve naküt noh ah nih sun ah nih mik phi käh mkhyüp lü ah nih büh-in u.
21 Booi Jeishüh noh “Sangsiim üng malam pyen hin tuh-a nah nih hmuh ngjaaka kba kuunga thoon velo hnüh kti ni” ah ti.
22 Kkhyaang abäng noh ah nih sun mküüi ei ulü ngngaai ei phyak ktia ah kkhyü kkaama phäh mün tong ktie. Asune sun noh “Ah nih hin Joshepa sa va am nik kti bä” tilü ngsi ngjaang ktie.
23 Booi Jeishüh noh “Nang nih-e noh kei üng ‘Nang shei shala nah pät noh nah pät mdo ei be tua. Kapanom mlüh-a nah poh mshah kah nih ngjaak u ni. Asun kba su nah ngtüüi im kkong ma hia phi poh tua’ tilü nah nih nah mtheh hlük kkhaie shü kyo ni.
24 Ngngaai ua, kei kah pyen ma kkhai ni. Ahona shahma ngsiim phi ah tui khyong koon shaang noh am ksang na-be thuum.
25 Lüphi aksanga ta kei kah pyen hlükyo kti. Shahma ngsiim Eilijah-a kha üng kum kthum jah khya kkhyuk kho am a-lü kho jo tui shek kkhüt kti. Asun sun üng Isare teng pea hmeei nu kho hah vekyo ktie va.
26 Pangsiim noh Eilijah sun Shiton hne Shareh Phat mlüh-a ka hmeei nu mata veei däk ni ah tüih.
27 Shahma ngsiim Eilisha-a kha üng Isare teng pea mneh kshe mneh kti kho hah vek ktie kyo va. Lüphi Shürih hnea ka Neih Mang ngming nak kti däk ni Pangsiim noh Eilisha üng ah mdo be” tilü ah jah mtheh mkhyah.
28 Asun kba ah pyen ah nih ngjaak lo u üng Sangsiim ngthei naak kyonga vek kti kkhyaang naküt sun thüi lopyei ktie.
29 Ngdüüi lokshet ulü Booi Jeishüh sun mlüh pei da ah nih kaih u. Ngnam ah nih shak naak u msuunga mshüüia seh püi lü mlooi kkhyook nua ah nih buh kkhyaak hlü u.
30 Lüphi ah nih sun kkhyaang pä nua kshuunga lut lü ta am nghmuh ti. Kona akse da sit kti.
(Marküh 1.21-28)
31 Asun üng Booi Jeishüh sun Kalile hne Kapanom mlüh-a sit kti. Pangsiim ngam püi mhnüüp üng Sangsiim ngthei naak kyonga jah msuuk mtheh kti.
32 Ah nih noh Mkhyangsiima hiit üng ah jah msuh mtheh-a phäh kkhyaange mün ktie.
33 Sangsiim ngthei naak kyong su kho yaaia vaan naak kkhyaang mat vek kti.
34 Asuna kkhyaang sun “Eei! Nasaret mlüh-a ka Jeishüh-o, kah ning püi am ni. Jah hnim kkhaia nah lok ktio. Nang u atia kah ning kshing kti ni. Pangsiima veeia ka nang angsiim ngsaih ni” tilü kho yaai noh ah ngpyaan ngpyet-in shak.
35 Booi Jeishüh noh ta “Käh sik sik lü ahina kkhyaanga kkhyüh shota” tilü ah kshät. Kho yaai noh ah nih sun kkhyaang kshuunga mkhyuk ton-in lü käh mshou mhleei ei shak lü ah shot taak.
36 Kkhyaange sun ah nih bänga mün ulü “I a kkhyü pyen kti ni. Ah nih noh kho yaai sun ah hiit jah ah ngjung ktha üng jah kshät lü kkhyaang üng shot ktie ta” tilü mat jah mat ngthäh ngkhyah ktie.
37 Booi Jeishüh-a thang sun ye li kkha shang naküt üng phi nglou ngthang hü kti.
(Mate 8.14-17; Marküh 1.29-34)
38 Booi Jeishüh sun Sangsiim ngthei naak kyonga kkhyüh kyum lolü Shimona ima lut vaai kti. Shimona mah pai am khyaih ei lü mhnat ei tong kti. Ah nih nih-e noh am khyaih kti sun ah ku ei vaia ah nih nghui naak u.
39 Booi Jeishüh noh nghnu mi nua peia ngdüüi lü “Mhnat ei khyük she” tilü ah mkhyah. Asun üng mhnat ei khyük be lü Shimona mah pai sun thou lo shoxat lü jah kkhin nghleei nak kti.
40 Mülam kho kyaak shoa kkhyaange noh amjü mjüa am khyaih ei kti ah nih püi poe sun Booi Jeishüh-a veei ah nih jah lo seh püi u. Booi Jeishüh noh am khyaih ei kti naküt üng ah kut mtaang lü ah jah mdo be.
41 Kho yaaia vaan naak kkhyaang kho hah-a kkhyüh kho yaaie sun shot ktie. Asun üng “Nang hin Pangsiima ning sa ni” tilü ngpyaang pyei ktie. Lüphi Booi Jeishüh noh jah him lü am jah shi hlo shak ngtu. I lüni ti ta ah nih sun Khrito atia kho yaaie noh kshing ktie ni.
(Marküh 1.35-39)
42 Booi Jeishüh sun aai khoona joong lü kkhyaanga nghi naaka sit kti. Kkhyaange noh ah nih sun ah nih hjam hü u. Shui hmu-ulü ta käh ah jah seh taak vaia ah nih nghui naak kyo u.
43 Booi Jeishüh noh ta “Mlüh kse-ea phi Pangsiima pea mong thang kdo kkya kah kpyaü yah ma kkhai. Asuna phäh Pangsiim noh ah nah tüih lo ni” tilü ah pyen.
44 Asun üng Jüdah hne abäng üng sit hü lü Sangsiim ngthei naak kyongea jah msuuk mtheh kti.