3
(Mate 3.1-12; Marküh 1.1-8; Johaan 1.19-28)
Romah Kesha shang phuhlang Tipe Rüh-a up naak kum xalei mhma ah suum lo üng ta Romah aso-yah booi Pontüh Pilat noh Jüdah hne up kti. Kalile hnea shang phuhlang Herot noh up kti. Itürah hne jah Tarakho Nih hne ta Herot suna na Philipa kut üng vek kti. Lüh Sanah noh Apih Leen hne up kti. Anah jah Khaai Pa sun khotu ngsiim kdäm boka thoon kti xooi. Asun k'um üng mkyaang ksaih-a vek kti Shakarih-a sa kpa Johaan sun Pangsiim noh ah kkhyü kkaam lo püi. Asuna thoon lü Johaan sun Jotan tui khyong naküta sit hü lü “Nah nih mkhyea phäh vuuk be lü patiso khaam ei ua. Asun üng va Pangsiim noh nah nih mkhye ning jah mhlät kkhai” tilü ah kpyaü hü. 4-5 Ahlaan üng shahma ngsiim Hei Shajah-a sa up üng Pangsiima kkhyü ng'yuk kti ta,
“Mkyaanga ngshä noh ‘Booi Pa-a lo naak vai lam pyaang ua. Anakshe kpaih mhngi mto ua. Akhuui kkok naküt jah kbe ua. Msuung kseng naküt jah kpyä ua. Lam koleke jah kdäih ua. Lam kshe nue seh ei na-phyak ktia jah piit pyaang ua. Kkhyaang naküt noh Pangsiima peet kuum kyan naak hmuk kkhai ni’ tilü akthai kdäma ngpyaang hü kti” tilü vek kti.
Kkhyaang pä nu sun Johaana veei patiso khaam ei kkhaia sit ktie. Johaan noh ta “Nang nih-e hin kphyu kphyaai kshou pä üng nah nih täng ktie va nik kba. Pangsiima jah peet vai mtaam üng nah nih lät kkhaiea u noh ah ning jah msääi msing u ja. Aksanga nah nih vuuk sun nah nih ve soh poh mshah üng ngshing ngte shak ua. ‘Apyaham nih mah pook u ni’ tilü käh ngngaai ei ubä. Nah ngngaai ua, kah pyen ma kkhai. Pangsiim noh hina lunge hin jah lou lü Apyahama mjü mshuuia tüüi pyaang khoh kti ni. Thing dunge jah khyuk teeng naak vai thing phung kuunga xäi mshääm pääng ktie. Akdo am ktheih paai nak ktia dung naküt sun khyuteeng-in ulü mei üng shi nghngyaai-in kkhaie ni” tilü ah jah mtheh.
10 Kkhyaang pä sun noh “Asun kba ani ta i kah nih poh vai hlü ham kti ni” tilü ah nih kthäh be u.
11 Asun üng ta Johaan noh “Ksu phyang nghngih ta-ei kti noh am ta-ei ngtu kti üng yet she. Ei ook vai ta-ei kti noh phi kkhyoot ei kti üng phyüüt pa she” tilü ah jah mtheh. 12 Khoon to k'hlook akhäk phi patiso khaam ei kkhaia lok ktie. Ah nih nih-e noh “Angvaaio, kei nih-e ta i hok kba kah nih thoon kkhaie ja” tilü ngthäh ktie. 13 Johaan noh “Aso-yah-a ning hlook shaka kthaka nah nih ka vai mah mah ngui käh hlook ei ua” tilü ah pyen. 14 Ngtuk kpoh-e noh ta “Kei nih-e ta i hok kba kah nih thoon hnga kkhaie ja” tilü ngthäh be tü ktie. Johaan noh “Am nixa kti üng jah mkyüh mphyün shuuk kkhyalü ngui käh jah hut ei ua. Nah nih yah eia kheena thea käh kpaam ei ti ua” ah ti.
15 Kkhyaang naküt noh Khritoa ah pou lo vai mtät ei tong ktie. Asuna thoon lü kkhyaang naküt noh Johaan hin Khritoa thoon to kkhai mä atia ah nih mlunga ngngaai-in lok ktie. 16 Asun üng ta Johaan noh “Kei noh tui üng ni patiso kah nih ning peet u. Lüphi keia kthaka däm duh kti phalok kkhai. Ah nih-a kho pha dok hngoh ngmüm lü shuh peet kkhaia kei am ngkäih ngü. Ah nih noh ta Mkhyangsiim jah mei üng patiso ning jah pek kkhaie ni. 17 Saang leh naak sun li khya kkhaia ah nih noh kphya bi ei kti. Amphyah kse saang sun kpyeeka ta-be lü saang nghi jah saang kpa ta i tüh-a phi käh thik kkhaia mei üng shi-in kkhai ni” tilü ah jah mtheh mkhyah.
18 Asun kba Johaan noh pyen ning amjü mjü üng kkhyaange sun thang kdo kkya ah jah msuh mtheh.
19 Lüphi shang phuhlang Herot noh ah na-a kkhyu Herotiah ah huh-a phäh jah akse mkhye mshoh kho hah-a phäh-a Johaan noh ah him. 20 Asun üng ta Herot shou shat lobok bok lü Johaan sun khup üng ah khyum.
(Mate 3.13-17; Marküh 1.9-11)
21 Johaan (khup üng ah kyum hlaana) kkhyaang kho hah pa patiso jah pelü Booi Jeishüh phi patiso ah peet. Booi Jeishüh noh ah tä sham lo k'um üng kkhaan kho nghmong lok kti. 22 Mkhyangsiim sun müüma mäia Jeishüh-a k'uma kyum lok kti. Kkhaan khoa kkhyüh lok kti kthai ta “Amhlä kah sao, kah ning je ei pi pi ni” tilü ni.
(Mate 3.1-17)
23 Booi Jeishüh kho kum kthum kip asuum lo üng Pangsiima khuut sut ei lü poh lok kti. Kkhyaanga ngngaih-a ta ah nih sun Joshepa sa kyo. Joshepa pa Heilih. 24 Heilih-a pa Mathat. Mathata pa Levih. Levih-a pa Mekhih. Mekhih-a pa Yang Na. Yang Na-a pa Joshep ni. 25 Joshepa pa ta Matatih. Matatih-a pa Amoh. Amoh-a pa Nahung. Nahunga pa Eshalih. Eshalih-a pa Nakaai ni. 26 Nakaaia pa ta Maat. Maata pa Matatih. Matatih-a pa Seming. Seminga pa Joshep. Joshepa pa Jüdah ni. 27 Jüdah-a pa ta Jonang. Jonanga pa Resa. Resa-a pa Sheruh Pape. Sheruh Papea pa Shelatih. Shelatih-a pa Nerih ni. 28 Nerih-a pa ta Mikhih. Mikhih-a pa Atih. Atih-a pa Kosam. Kosama pa Elah Mathang. Elah Mathanga pa Erah ni. 29 Erah-a pa ta Josheh. Josheh-a pa Eilih Esha. Eilih Esha-a pa Jorim. Jorima pa Mathat. Mathata pa Levih ni. 30 Levih-a pa ta Shimung. Shimunga pa Jüdah. Jüdah-a pa Joshep. Joshepa pa Jonam. Jonama pa Eilih Akhin ni. 31 Eilih Akhina pa ta Melah. Melah-a pa Meh Na. Meh Na-a pa Matatha. Matatha-a pa Nathang. Nathanga pa ta Davit ni. 32 Davita pa ta Jeishe. Jeishea pa Opet. Opeta pa Poah. Poah-a pa Sala Mong. Sala Monga pa Mnaai Sho ni. 33 Mnaai Shoa pa ta Aming Atap. Aming Atapa pa Ataming. Ataminga pa Arani. Arania pa Heron. Herona pa Peret. Pereta pa Jüdah ni. 34 Jüdah-a pa ta Jakop. Jakopa pa Isak. Isaka pa Apyaham. Apyahama pa Terah. Terah-a pa Nakho ni. 35 Nakhoa pa ta Serüh. Serüh-a pa Re Uh. Re Uh-a pa Pelek. Peleka pa Heei Pa. Heei Pa-a pa Shelah ni. 36 Shelah-a pa ta Kaai Nan. Kaai Nana pa Apha Xat. Apha Xata pa Shem. Shema pa Noah. Noah-a pa Lameh ni. 37 Lameta pa ta Metüh Shalah. Metüh Shalah-a pa Enok. Enoka pa Jaret. Jareta pa Maha Lelah. Maha Lelah-a pa Kaai Nan ni. 38 Kaai Nana pa ta Enoh. Enoh-a pa Shet. Sheta pa Atam. Atama pa ta Pangsiim ni.