23
(Mate 27.1-2, 11-14; Marküh 15.1-5; Johaan 18.28-38)
1 Asun üng ta ngkhääm lok kti abäng noh ngdüüi lo-ulü Booi Jeishüh sun Pilat Booia veei ah nih seh u.
2 Asua ah nih pha üng asune noh “Hina kkhyaang hin Isare kkhyaang mjü abäng lam jah hmü shak kti. Kesha shang phuhlang üng akhoon käh peet vaia jah ngya kti. Ah pät sun Khrito shang phuhlanga ngshui ei lü kah nih hmuh ngjaak u ni” tilü ah nih kbäü ei u.
3 Pilat booi noh “Nang hin Jüdah-ea shang phuhlang mä” tilü ah kthäh. Booi Jeishüh noh “Nah pyena kba ni” ah ti be.
4 Asun üng Pilat booi noh khotu ngsiim kdäme jah kkhyaang päe üng “Ahina kkhyaang ah mkhye am hmu-ngü” tilü ah pyen.
5 Lüphi asune noh Pilat booi üng “Ahin noh kkhyaange jah mhläk lü Kalile hnea kkhyüh Jüdah hne abäng ni hina Jeirüh Shalem mlüh säpa ni, ah nih üng-phou vaia jah msuuk mtheh hü kti” tilü akshehleena ah nih tot hloh u.
6 Pilat booi noh asun ah ngjaak üng “Ah nih hin Kalile pa mä” tilü ah jah kthäh.
7 Booi Jeishüh sun Herota up Kalile hne üng ka atia Pilat booi noh kshing lolü Herota veei ah jah seh shak. I lüni ti ta ah pät Herot sun asun k'um üng Jeirüh Shalem mlüh-a vek kti.
8 Herot ta Booi Jeishüh ah hmuh üng je kyai tong kti. I a thoon lüni ti ta Booi Jeishüh ah hmuh naak hlü hjou hnüh kti. Booi Jeishüh-a mong kho hah ngjalü ah poh mshah ngshing ngte naak sun hmuh vai atia hmaaü ei kti.
9 Asuna phäh Herot noh Booi Jeishüh sun amjü mjüa kho hah pa ah kthäh kyo. Booi Jeishüh noh ta i phi am pyen be.
10 Khotu ngsiim kdäme jah Sangsiim ktheeme sun ah nih hlonga ngdüüi ulü Booi Jeishüh sun akshe hleena ah nih kbäü ei u.
11 Herot jah ah ngtuk kpoh-e noh Booi Jeishüh sun hmu mshit lü ah nih yaih yün ei u. Kona Booi Jeishüh sun alik lik jaaü jaaü jih sun mshui lü Pilat booia veei ah nih seh be u.
12 Asuna mhnüüpa kkhyüh Herot jah Pilat booi sun nglooi ei lok kti xooi. Ahlaan üng ta ah nih püi am hmuhlü ni.
(Mate 27.15-26; Marküh 15.6-15; Johaan 18.39-19.16)
13 Asun üng Pilat booi noh khotu ngsiim kdäme, khong mange jah kkhyaang päe ah jah ngkhääm shak.
14 Asun kona Pilat booi noh asune üng “Ahin kah veeia lo püi u kti lü ‘Ah nih noh kkhyaange lam jah hmü shak kti’ tilü nang nih-e noh nah nih kbäü ei kyo u. Kei noh nah nih ma-a kah kshü kset sän üng phi nah nih pyena kba kbäü ei naak vai i phi ah nih üng am hmulaang ngü.
15 Herot noh phi ah nih-a mkhye naak am hmu. Asuna thoon lü kah veeia nah nih lo püi be tü u. Ngngaai ua, ah nih noh thih naak ngkäih-a ah mkhye i phi am ve.
16 Asuna thoon lü jah kpaai shak ngüshe kah hläh vai ni” tilü ah pyen.
17 Pilat booi noh Phyong pooi üng khup kkyum mat siim ah hläh vaia thuum vek kti.
18 Lüphi kkhyaang abäng sun noh “Mkhyüh vai ni. Mkhyüh vai ni. Pana Pa bä bä hläta” tilü ngpyaang pyei ktie.
19 Pana Pa ta mlüh k'uma jah üng-phou püi lü kkhyaang k'hnima thoon lü khup üng ah nih khyum u.
20 Pilat booi noh ta Booi Jeishüh sun mhlät hlülü kkhyaange sun ah jah ngsi ngjaang püi be tü.
21 Lüphi kkhyaange ta “Baan lam ktung üng thih shaka, thih shaka” tilü ngpyaang lodäm däm ktie.
22 Pilat booi noh akthum naaka asune üng “I lüni, ah nih noh akshe kkha i poh kti ni. Thih naak ngkäih-a ah mkhye i phi am hmu-ngü. Asuna thoon lü jah kpaai shak ngüshe kah hläh vai ni” tilü ah pyen be tü.
23 Lüphi kkhyaange noh ah nih mkhüh ktüüma kba athoon lo vai kuunga Booi Jeishüh sun baan lam ktung üng hnim vaia ngpyaang ngpyet pyei ktie. Akpäih naaka ta ah nih ngpyaana kthaai sun ngnääng lok kti.
24 Asun üng Pilat Booi noh ah nih hlü eia kba ah mkhyah.
25 Kkhyaangea tonga kba jah üng-phou püi lü kkhyaang ah hnima phäh khup üng kyum kti ta ah hläh. Booi Jeishüh ta ah nih mkhüh ktüüma kba ah nih poh vaia ah jah ap.
(Mate 27.32-44; Marküh 15.21-32; Johaan 19.17-27)
26 Ngtuk kpoh-e noh Booi Jeishüh sun mlüh kho kpunga ah nih seh püi u. Laia kkhyüh lobe kti Shüreneh teng pea ka Shimon ngming nak kti sun ah nih ngkhyum püi u. Ah nih sun man ulü Booi Jeishüh-a baan lam ktung kkoh shak ulü Booi Jeishüh ah nih läk shak u.
27 Kkhyaang pä nu noh ah nih läk u. Nghnu mi akhäk ta puk shetong lü kyap kyap lü sit ktie.
28 Lüphi Booi Jeishüh sun asune da mang lü ah nih nih-e üng “Jeirüh Shalem mlüh üng ka nghnu mieo, keia phäh käh kyap ua. Nah nih päte jah nah nih sa na-a phäh ta kyap phyak ksang kti ni.
29 I lüni ti ta ah nih nih-e noh ‘Sing kti nghnu mie, am sa na khoi kti nghnu mie, sih am tu khoi kti nghnu miea phäh do kya naaka kyak kti’ tilü pyen naak vaia ksüün phalo hnüh kkhai.
30 Asun üng ta kkhyaange noh msuunge üng ‘Kah nih kkhaana sim lo-ua. Jah khüm-in lo-ua’ tilü pyen kkhaie.
31 Thing dung ahlip mah nua ave ham üng ahin kba ah nih poh u ta adung ang'yong lo üng ta i a poh kkhaie ni” tilü ah pyen.
32 Kkhyaange noh kkhyaang klääng nghngih xooi phi Booi Jeishüh mah mah jah hnim vaia ah nih jah seh püi.
33 Kolah Kotah msuunga ah nih shuia hnün ah nih pha u üng Booi Jeishüh sun baan lam ktung üng khop lü ah nih hneen. Kkhyaang klääng xooi phi Booi Jeishüh-a ksong da mat kkheet da mat baan lam ktung üng ah nih jah hneen.
34 Booi Jeishüh noh “Kah Pao, ah nih nih-ea mkhye jah mhläta. I a ngkho poh ktie atia am hmat ei u” tilü tä sham kti. Booi Jeishüh-a shui shak u noh i yah ei hlük kkhe atia sung keek ngjuuk ma ulü ah nih ng'yet ei u.
35 Kkhyaang pä nu sun noh ngdüüi-in lü tou ktie. Khong mange noh ta Booi Jeishüh sun yaih ei lü “Ahin noh kkhyaange jah kuum kyan kti. Ah nih hin Pangsiima msoon Khritoa ah thoon ksang ta ah pät noh ah pät phi kuum kyan ei she” tilü ah nih pyen ei u.
36 Ngtuk kpoh-e noh Booi Jeishüh yaih ei lü ngbom tui kthuui kkha nu sun ah ook vai ah nih lo peet u.
37 Ngtuk kpoh-e noh phi “Nang hin Jüdah-ea shang phuhlanga nah thoon ksang ta nah pät noh nah pät kuum kyan eia” ah nih ti u.
38 “Ahin Jüdah-ea shang phuhlang ni” tilü sa yuk ulü baan lam ktunga Booi Jeishüh-a lu kkhaana ah nih kdap u.
39 Baan lam ktung üng Booi Jeishüh-a hlonga ah nih hneen kkhyaang klääng mat noh phi Booi Jeishüh sun thang mseh lü “Nang hin Khrito va am ni bä. Nah pät noh nah pät ni, kei nih xooi ni, nih bänge jah kuum kyan tua na.”
40 Kkhyaang klääng mat be tü noh ta “Nang hin noh Pangsiim am nah kyüh kkhe ve-mä. Nih bängea thih khaam ei hin alang lang kyo ni.
41 Nih nih xooi ta thuum üng vek ktia kba nih khaam ei yah kti. I lüni ti ta nih mkhye üng ngnüüm kti mtaam ah nih jah peet u ni. Ah nih ta i phi ah mkhye mshoh am ve” tilü ah püi sun ah him.
42 Kona asun noh Booi Jeishüh üng “Booi Pao, nah upa pe nah pha be üng ta nah shüüm bä” ah ti.
43 Booi Jeishüh noh ta “Ngngaaia, kei kah pyen kkhai. Tuh ngooi hi nang hin kah hlonga angshääia xün naak ngvoonga nah vek kkhai” tilü ah pyen.
(Mate 27.45-56; Marküh 15.33-41; Johaan 19.28-30)
44 Mhnüüp ngshuunga kkhyüh im kngam shoon ei ksüün säpa teng pe abäng üng kho nghmüp-in lok kti.
45 I lüni ti ta kho mika kvaai khyük kti. Hjok khah im nua k'uma angsiim ngsaih naak bok hnüna ma-a ah nih kda jih sun alua kkhyüh lü apyaai säpa mte nghngih-a ngkhyeh-in lok kti.
46 Asun üng Booi Jeishüh noh “Kah Pao, kah shak nah kut üng kah ning ap kti ni” tilü ah ngpyaan shoa ah shak päih kti.
47 Asun üng Romah ngtuk kpoh pä khong noh asun kba athoon ve sun hmulüta Pangsiim mküüi mtou lü ah nih noh “Aksanga ta ahina kkhyaang ah mkhye am velaang” tilü ah pyen.
48 Jah tou kkhaia ngkhääm lok kti kkhyaang pä hlie noh asun kba athoon ve sun ah nih hmuh üng ah nih hmaai jah müm-in ulü sit be ktie.
49 Booi Jeishüh-a püi po abäng jah Kalile hnea kkhyüh ah nih läk lok kti nghnu mie noh athuuk naak sa-a kkhyüh lü ngdüüi-in lü asun kba athoon ve sun ah nih hmuh u.
(Mate 27.57-61; Marküh 15.42-47; Johaan 10.38-42)
50 Arih Matea mlüh-a ka Joshep ngming nak kti kkhyaang mat vek kti. Ah nih sun akdämea kong si üng ngpüi lü Pangsiim lei shong kti kkhyaang kdo ni.
51 Kong si noh Booi Jeishüh hnim vaia ah nih seng kyam üng phi ah nih noh am jah tääng püi. Pangsiima upa pe vai sun hmaaü ei lü vek kti.
52 Ah nih noh ta Pilat booia veei sit lü Booi Jeishüh-a yook ah tong vaai.
53 Kona Booi Jeishüh-a yook sun baan lam ktunga kkhyüh lou be lü ngbu jih nu üng ah hloop. Kona u phi käh ah nih mkhyüh naak ham msüm hnün lung khuuia Booi Jeishüh-a yook sun ah xon vaai.
54 Asuna mhnüüp sun Phyong pooia phäh ah nih ngpyaih xat naaka mhnüüpa thoon lü kho kyaak kona ta Pangsiim ngam püi mhnüüp phalok kti.
55 Booi Jeishüh läk lok kti Kalile hne üng ka nghnu mie noh phi lung khuui su bük vaai ulü Booi Jeishüh-a yook i hok kba ah nih taak sun ah nih hmuh u.
56 Kona ima sit be ulü Booi Jeishüh-a yook üng ah nih hlu vaia ang'uui piit pyaang ktie. Pangsiima thuuma kba Pangsiim ngam püi mhnüüp üng ngam ktie.