22
(Mate 26.1-5; Marküh 14.1-2; Johaan 11.45-53)
Asun üng kkhaai phoom kka kkhaai kpeh ah nih ei naak phyong pooi säh hnüh kti. Khotu ngsiim kdäme jah Sangsiim ktheeme noh Booi Jeishüh sun i hok kba hnim khoh vai atia mkot shui ktie. I a thoon lüni ti ta ah nih nih-e noh kkhyaang pä jah kyüh ktie.
(Mate 26.14-16; Marküh 14.10-11)
Asun üng akläk xalei nghngih üng ka Sakarot ngming nak kti Jüdah üng Shatan yaai pa vaang kti. Asun üng ta joong lü khotu ngsiim kdäme jah hjok khah im nu mtät kti ngtuk kpoh-ea khonga veei lai lü Booi Jeishüh i hok kba ktuun ei vai atia ah jah kthäh kkhyah. Asune ta je kyai tong ulü ah nih üng ngui peet vaia ah nih ng'aan ei u. Jüdah noh kkhyaang pä am ah nih ve üng Booi Jeishüh sun asunea kuta ah jah mhjuum vaia amkot ah shui vaia ah jah ä.
(Mate 26.17-25; Marküh 14.12-21; Johaan 13.21-30)
Kona kkhaai phoom kka kkhaai kpeh ei naaka mhnüüp phalok kti. Asuna mhnüüp sun üng Ekip pea kkhyüh ah nih phyong tääm naak lo sun ah nih shüüm naak be vaia to sa khah na-khoi ktie. Booi Jeishüh noh Peta jah Johaan üng “Sit lü Phyong pooia nih ei vai u piit pyaang vaai nih-a” tilü ah jah xüh. Asun xooi noh “Hoa nah jah pyaan vaai hlüshak kti ja” tilü ah nih kthäh. 10 Booi Jeishüh noh “Ngngaai nih-a, mlüh k'uma nah nih vaan üng tui phüüi kti kpa mi mat nah nih hmuk kkhai ni. Läk lü ah kaai naaka ima sit nih bä. 11 Asuna im mah üng ‘Nah läk ktie mah mah Phyong pooi poh lü kah nih ei naak vai u akhan hoa vek kti ati sun angvaai noh ah jah kthäh lo shak ni’ tilü pyen nih bä. 12 Hlü ko kti naküt ave naak pääng akkhaan thapa akhan mat im mah pa noh ning jah mhnüh kkhai ni. Pooi nih poh naak vai u asua pyaang nih bä” tilü akläk xooi ah jah tüih. 13 Akläk xooi sun sit nih lü Booi Jeishüh-a jah mtheh-a kba hmuvaai lü Phyong pooi ah nih poh naak vai u ah nih pyaan.
(Mate 26.26-30; Marküh 14.22-26; 1.Korine 11.23-25)
14 Aksüün lo üng ta Booi Jeishüh jah ngshäe sun ei kkhaia ngvai lü ngshut ktie. 15 Booi Jeishüh noh “Kei noh khui kha kshe nu kah khaam ei hlaana Phyong pooia nang nih-e üng ayüma aksanga kah ei hlük kti ni. 16 Kah ning jah mtheh ma kkhai. Pangsiima upa pe üng Phyong pooia küm seei hlaana kei noh am ei o-ti ngü” tilü ah pyen.
17 Asun üng Booi Jeishüh noh ngbom tui phäih nu sun bilü akläke üng “Hina phäih hin lou ei ua. Nah nih bäng noh o-ua. 18 Kah ning jah mtheh ma kkhai. Tuh-a kkhyüh lü Pangsiim noh ah upa pe ah pyaan pääng vei säpa kei noh ngbom tui am o-ti ngü” tilü ah pyen. 19 Kona Booi Jeishüh noh kkhaai phoom kka kkhaai kpeh lou lü Pangsiim ah je ei. Kkhaai kpeh sun kphyüt lü akläke üng ah jah peet. Asune üng “Ahin nang nih-ea phäh khah naaka thoon kti kah puum sha ni. Kei nah nih nah shüüm naak vaia ei ua” tilü ah pyen. 20 Asuna kba ah nih ei kona ngbom tui phäih nu sun lou lü asune üng “Hina ngbom tui hin Pangsiim jah nang nih-ea be khüt akthaai vaia kah mshooi kah thi ni.
21 Asuna kyalüphi ngngaai ua. Kei nah ktuun ei kkhai noh kah kuta hlonga ah kut üng kkhaai kpeh lou ei kti ni. 22 Kei Kkhyaang Sa üng Pangsiima mkhüh-a kba thoon lok kkhai ni. Lüphi kei nah ktuun ei ktia phäh khui kha kshe nu shoong naaka thoon kkhai ni.” 23 Asun üng akläke noh “U noh ktuun ei laang kkhai ni” tilü mat jah mat ngthäh ngkhyah ktie.
24 Kona akläke noh akdäm boka u ngngaih vai ati sun ngthäh ngkhyah ngdäh ngkaih nak ktie. 25 Asun üng ta Booi Jeishüh noh “Aksea pe üng ka shang phuhlange noh ta ah nih jah upe sun ah nih jah nghnge ei naak u. Ah nih khonge sun asunea bä naak jah poh peet ktia ngshui ei khoi ktie. 26 Nang nih-e ta asun kba käh thoon ubä. Nang nih-e üng akdäm boka thoon hlük kti ta akdiik boka kba thoon she. Pä khonga thoon hlük kti ta xüh shoh-a thoon she. 27 Ngshut lü buh ei kti im mah däm bok kkhai mä. Buh an shoh peet kti xüh shoh däm bok kkhai mä. Ngshut lü buh ei kti im mah va däm bok kti am ni bä. Lüphi kei hin nah nih hlonga xüh shoh-a kba kah vek kti ni.
28 Kshe kkha kah shoong üng phi nang nih-e va nah nih vemhläi ktie. 29 Kah Pa Pangsiim noh kei sun shang phuhlanga ah nah msoona kba kei noh phi nang nih-e sun jah up kkhai shang phuhlanga kah nih ning msoon u ni. 30 Nang nih-e hin kah upa pea buh pooia nah nih ng'ei ng'o-yah kkhaie ni. Booi ngoh naak üng phi ngshut u kti lü Isare kkhyaang mjü xalei nghngih sun nah nih jah si jaang yah kkhaie ni” tilü ah pyen.
(Mate 26.31-35; Marküh 14.27-31; Johaan 13.36-38)
31 Booi Jeishüh noh “Shimono, Shimono, nah ngngaaia. Saang aleh kse kthün be üng ka-a kba Shatan yaai pa noh ning jah poh hlük kti ni. 32 Lüphi nah jum ei naak käh ah pyak vaia kah tä sham kti. Nang hin kei üng nah nglooi ei lo be kona nah püiea jum ei naak nah jah ngkhääng shak kkhai ni” tilü ah pyen. 33 Peta noh ta “Booi Pao, kei ta nah hlonga khup üng kyum kkhaia ni nah hlonga thih khaam ei kkhaia kah ngpong pääng kti” tilü ah ng'aan ei. 34 Booi Jeishüh noh ta “Petao, kei kah ning mtheh kkhai. Tuh-a mthan aai am khoong ham lü ‘Ah nih am hmat laang ngü’ tilü kthum vei kuung nah ngsiim kkhai ni” tilü ah namtheh ei.
35 Kona Booi Jeishüh noh akläke üng “Kei noh ngui im, ääi khi, kho pha dok kka-a kah ning jah tüih üng ahlü vek kti mä” tilü ah jah kthäh. Asune noh “I phi ahlü naak am ve” ah nih ti be u. 36 Booi Jeishüh noh “Tuh ta ngui im, ääi khi, ta-ei kti noh seh ei she. Ksim kshaaü am ta-ei kti noh ah jih shui jooi lü ksim kshaaü kkhyäi ei she. 37 Kah ning jah mtheh kkhai. Sangsiim üng ng'yuk kti ta ‘Ah nih nih-e noh kkhyaang kshea ah nih ngngaih u’ tilü vek kti. Asuna malam pyena kba kei üng thoon loyah kkhai. I a thoon lüni ti ta malam pyen sun keia mong ni. Asun kba kuunga thoon velo hnüh kkhai ni.” 38 Akläke noh “Booi Pao, bük tua. Hia ksim kshaaü nghngih vek kti ni” ah nih ti. Booi Jeishüh noh “Khäk kkhai” tilü ah pyen be.
(Mate 26.36-46; Marküh 14.32-42)
39 Booi Jeishüh sun mlüh kho kpunga sit lü ah seh thuuma Kshi Dung msuunga kaai kti. Akläke noh phi ah nih läk u. 40 Ah seh naak läa hnün phalü akläke üng “Hlo hleep naak da käh nah nih ngpüi vaia tä sham ei ubä” tilü ah jah mtheh. 41 Kona akläkea veeia kkhyüh she yüüi mat bang sit lü ah mkhuuk üng ngdääng lü tä sham kti. 42 Ah nih noh “Kah Pao, nah hlü eia athoon ta ahina khui kha kshe hin nah mtheih mhnoon peeta. Lüphi keia hlü eia kba käh nik ktia nanga mkhüh-a kba thoon she” ah ti. 43 Asun üng kkhaan khoa ka kkhaan kho ngshä pou lolü Booi Jeishüh sun ktha ah peet. 44 Booi Jeishüh noh ng'ääi ng'vyeeng lolü ashü kyüa tä sham kti. Ah mphu tui sun thi kbeka kba thoon lolü mdeka ngshooi kti. 45 Booi Jeishüh sun tä sham lopääng lüta thou lolü akläkea veei phalo be lü asune sun puk shetong ulü ana-ip-in ktie ah jah hmuh lo. 46 Booi Jeishüh noh “I lü nah nih ip ei khoh ktie ni. Thou ua, hlo hleep naak da käh nah nih ngpüi vaia tä sham ua” tilü ah pyen.
(Mate 26.47-56; Marküh 14.43-50; Johaan 18.3-11)
47 Booi Jeishüh noh asun kba ah pyen k'um üng kkhyaang pä phalok ktie. Jüdah ngming nak kti akläke üng ka mat noh asune sun lam jah mshüüm lok kti. Jüdah sun noh Booi Jeishüh-a veei sit lü ah nih sun ah uut. 48 Booi Jeishüh noh ta “Jüdah-o, nah nah uut naak üng kei Kkhyaang Sa nah nah ktuun ei hlük ktio” tilü ah pyen. 49 Booi Jeishüh-a hlonga vek kti akläke noh i hok kba thoon lok kkhai ati sun kshing ei lo-ulüta ah nih üng “Booi Pao, ksim kshaaü üng kah nih jah sap vai u mä” tilü ah nih kthäh u. 50 Akläk mat noh khotu ngsiim kdäm boka mpya mat sun sap lüta asuna ah kkheet nghnga kooi kya-in lok kti. 51 Asun üng ta Booi Jeishüh noh “Khäk she” ah ti. Booi Jeishüh noh mpya suna nghnga kooi sun hne lü ah mdo be. 52 Booi Jeishüh noh ah nih man kkhai lok kti khotu ngsiim kdäme, hjok khah im nu mtät kti ngtuk kpoh-ea khonge jah akdäme üng “Ksim kshaaü jah kkot ei lü mäk määng jah ksüng ei lü mpyuk ei man kkhaia kba lolü nah nih nah man lok kkhe-e ve-mä. 53 Hjok khah im nua k'uma amhnüüp tä nah nih hlonga kah ve sän üng am nah man kbak u kti. Lüphi tuh hin nang nih-ea phäh-a ni Shatan yaai pa-a up naak vaia ni Pangsiima mkhyah-a ksüüna kyak kti.”
(Mate 26.57-58, 69-75; Marküh 14.53-54, 66-72; Johaan 18.12-18, 25-27)
54 Asun üng Booi Jeishüh sun asune noh man ulü khotu ngsiim kdäm boka ima ah nih seh püi u. Peta noh ta jah mhjook sa lü ah jah läk. 55 Ah nih nih-e noh khotu ngsiim kdäm boka ngvoong k'uma mei tik lü ngshut lü mei oom ktie. Peta phi ah nih hlonga ngshut kti. 56 Asun kba ngshut kti Peta sun mpya nghnu mi sa mat noh mei kvaai üng hmulü angtea bük lü ah nih nih-e üng “Hina kkhyaang phi Jeishüh-a püi ni” ah ti. 57 Lüphi Peta ta “Am ni. Nghnu mio, asäna kkhyaang am hmat laang ngü” tilü ngsiim kti. 58 I vei am loham lü kpa mi mat noh Peta sun ah hmuh üng “Nang phi Jeishüh-a pä üng ka ni” ah ti. Lüphi Peta ta “Kkhyaango, ah nah püi am ni” tilü ngsiim be tü kti. 59 Kona naji mat bang ahjou lo üng kkhyaang mat be tü noh “Ahin aksanga Jeishüh-a püi ni. I lüni ti ta ah nih phi Kalile hne üng ka ni” tilü ah pyen. 60 Lüphi Peta ta “Kkhyaango, nah pyen hin am hmat laang ngü” tilü ah ngsiim be tü k'um sun üng aai nghlüi ta khoong-in lok kti.
61 Asun üng ta Booi Pa noh va-mdei lü Peta ah büh. Booi Pa noh “Petao, kei kah ning mtheh kkhai. Tuh-a mthan aai am khoong ham lü ‘Ah nih am hmat laang ngü’ tilü kthum vei kuung nah ngsiim kkhai ni” tilü ah namtheh ei sun asun üng ta Peta noh ah shüüm lo be. 62 Kho kpunga sit lü kyap vaai tong kti.
(Mate 26.67-68; Marküh 14.65)
63 Booi Jeishüh sun mtät kti ngtuk kpoh-e noh ah nih yaih yün te kpaai ei u. 64 Booi Jeishüh-a mik hmaai sun khüm lü te ulü “U noh ning te kti ja. Shahma shüma” tilü ah nih kthäh tuhan u. 65 Ah nih thang mseh ei naak ua amjü mjüa ah nih pyen shak ei u.
(Mate 26.59-66; Marküh 14.55-64; Johaan 18.19-24)
66 Kho thaai lolü ta akdäme, khotu ngsiim kdäme jah Sangsiim ktheemea kong si ngkhääm ktie. Kona Booi Jeishüh sun asuna kong sia ah nih seh püi u. 67 Asune noh “Nang Khrito mjoh mä. Jah mtheh-a” ah nih ti u. Booi Jeishüh noh ta “Pyen ngüshe phi i am nah jum u kti. 68 Kei noh ning jah kthäh ngüshe phi i am nah mshak u kti. 69 Lüphi i vei am lo hiit mah kti Pangsiima kkheet lama kei Kkhyaang Sa kah ngshut kkhai ni” tilü ah pyen. 70 Asun üng ta ah nih bäng noh “Asun kba ani ta nang hin Pangsiima sa kpa mä” tilü ah nih kthäh u. Booi Jeishüh noh “Nah nih pyen ua kba ni” tilü ah pyen be. 71 Asune noh “Shak shi kkhai am hlü ti. Nih päte kuung noh ah nih sun Pangsiima sa-a ah ngshui sun nih ngjaak u ni” tilü ah nih pyen u.