2
(Mate 1.18-25)
Asun k'um üng Romah Kesha shang phuhlang Okuh Tüh noh ah upa kho mdek naküt üng kkhyaang salaang hlook vaia ah mkhyah. Asun aksük ksüka kkhyaang salaang ah hlooka kyak kti. Asun k'um üng Romah aso-yah booi Küüi Rinüh noh Shürih hne up kti. Kkhyaang naküt sun ah nih im hnün kkong ma-a sit hü be ulü kkhyaang salaang üng ah nih ngming jah yuk shak ktie.
Asung üng ta Joshep phi Kalile hne üng ka Nasaret mlüh-a kkhyüh lü Jüdah hnea ka Davita mlüh-a ah nih shui Pet Leem mlüh-a sit kti. I lüni ti ta ah nih sun shang phuhlang Davita koon shaang üng ka ni. Asua Joshep sun ah im püi hlü Marih-a dä salaang üng ah nih vaan vai vek kti. Marih ta puum mah kti. Pet Leem mlüh-a ah nih ve k'um sun üng Marih-a sa vai ksüün hnüh kti. Ah sa ksük sun hmi lolü jih üng ah hloop. Hnashen sun she ei kko üng ah nih taak. I lüni ti ta ah nih ih naak vai im am oong ti lü she ima vema kti xooi.
Asuna khyong sua to kshääme vek ktie. Mthana asaih naaka to sun jah mtät ktie. Asun üng Booi Pa-a kkhaan kho ngshä ah nih ma-a pou lolü Pangsiima jou taaia akvaai sun ah nih kkhaana phalok kti. Kyüh ei lopyei ktie. 10 Kkhaan kho ngshä noh “Käh kyüh ei ua. Kei noh kah ning jah kpyaü loa thang kdo kkya ta kkhyaang naküta phäh je kyai naak pi pi vai ni. 11 Davita mlüh Pet Leema Khritoa thoon kti thoong khyah Booi Pa nah nih phäh-a tuh ngooi hmi lok kti ni. 12 Kei noh nah nih mshing mte naak vai kah ning jah mtheh ma kkhai. Jih üng nghloop ei lü she ei kko üng nghngään kti hnashen sa nah nih hmuvaai kkhaie” tilü ah jah mtheh lo.
13 Ahunata kkhaan kho ngshä pä nu sun pou lo-ulü Pangsiim mküüi mtou ktie.
14 “Ak'hlüng ngtaai naak bok üng vek kti Pangsiim nih mküüi mtou vai u. Hina kho mdeka Pangsiima hlü eia vek ktia kkhyaange diim deih u-she” tilü ng'äi ng'om ktie.
15 Kkhaan kho ngshäe kkhaan khoa ah nih ngjäh be kona to kshääme noh “Pet Leem mlüh-a nih va-sit ma kkhaie ni. Pangsiima jah kshing hmat shaka thoon ve sun nih bük vaai vai u” tilü ngsi ngjaang lok ktie.
16 Ah nih nih-e sun ngpyaih xat yü lü akjaang kuunga sit ulü Marih jah Joshep ni she ei kko üng nghngään kti hnashen ni ah nih jah hmuh vaai u. 17 To kshääme noh hnashen ah nih hmuh üng kkhaan kho ngshäe noh hnashena mong ah nih pyen sun ah nih jah mtheh vaai be. 18 To kshäämea jah mtheh ngja-naküt kti mün sam tong ktie. 19 Marih noh ta ah nih pyen kshake sun ah mlunga ksep kyet lü ngngaai-in lü vek kti. 20 To kshääme noh ta kkhaan kho ngshäea jah mtheh loa kba hmu-ulü Pangsiim mküüi mtou naak üng ng'äi lü sit be ktie.
21 Amhnüüp kkhyeta mhnüüp üng hnashen sun vun moih poh peet ulü Jeishüh-a ah nih shui u. Asuna ngming ta Marih ah mpyaai hlaan kuunga kkhyüh kkhaan kho ngshäa shui hüt ni.
22 Mosheia thuuma kba ngsiim ngsaih naaka ning shoa phäh aksüün ah pha lo üng hnashen sa sun Jeirüh Shalem mlüh-a seh püi nih lü Pangsiim üng ah nih mhnüh vaai. 23 Pangsiima jah peet thuum üng ng'yuk kti ta “Aksük ksüka ah nih sa naaka sa kpa sun Pangsiima van ni” tilü vek kti. 24 Pangsiima thuum üng ng'yuk ktia kba müüm sa puum nghngih lo püi nih lü Pangsiim üng khah naak pek kti xooi.
25 Asun k'um üng Jeirüh Shalem mlüh-a Shimung ngming nak ktia kkhyaang mat vek kti. Ah nih sun pyuun lü Pangsiim phi lei shong mhlä kphya nak kti. Pangsiim noh Isare kkhyaange ah jah kuum kyan vai sun ah namtät kti. Mkhyangsiim ah nih üng vek kti. 26 Shimung noh ah thih hlaana Pangsiima tüih lo Khrito sun hmuhüt ma kkhai atia Mkhyangsiim noh ah kshing ei shak pääng ni. 27 Joshep jah Marih noh thuum seena kba hnashena phäh poh vaia hnashen Jeishüh sun hjok khah im nua ah nih khü lo. Asun üng Mkhyangsiim noh tot hloh lüta Shimung phi hjok khah im nu sua phavaai kti. 28 Shimung noh hnashen sun kpom lü Pangsiim ah mküüi mtou ta 29 “Booi Pao, nah kkhyü taama kba nah poh mshah pääng ni. Nah nah xüh shoh ei kei hin diim ye naak üng sit ei hnüh kong bä. 30 Nang Booi Pa-a jah peet kuum kyan naak sun kah mik üng kah hmuh hnüh ni. 31 Asuna kuum kyan naak kkhyaang mjü naküt noh hmuk kkhai. 32 Kkhyaang mjü kse-ea phäh phi akvaaia thoon lü Pangsiima mong jah kshing hmat shak kkhai. Nah kkhyaang mjü Isare-ea phäh phi nglou ngthang naaka thoon kkhai” tilü ni.
33 Shimung noh hnashena mong ah pyen loea phäh Joshep jah Marih mün kti xooi. 34 Shimung noh hnashen jah ah nu jah ah pa phi Pangsiim noh bä naak ah jah peet vaia tä sham kti. Kona hnashena nu Marih üng ahin kba malam pyen ah mtheh. “Ngngaai ma-a, Pangsiim noh ahina hnashen üng Isare kkhyaang kho hah jah ksim kpyak lü kkhyaang kho hah jah kuum kyan kkhai. Pangsiim noh hnashen sun Isare kkhyaange üng ah nih-a ngshing ngte naaka ah taak. Lüphi kho hah pa noh ah nih sun kpet lü not kkhaie. 35 Asuna phäh nah mlung puum hin ksim kshaaü nu üng shun kshet-ina mäia nah suun ei yah kkhai. Ah nih-a phäh kkhyaangea mlung kkyoong ngnei shak pou lok kkhai” tilü ni.
36 Anna ngming nak kti shahma ngsiima thoon kti nghnu mi nu mat vek kti. Ah nih sun Ashe mjü üng ka Phanu Lah-a sa ni. Ah khong pa mah kona ah kpa mi mah mah kum kkhyüh ve nih lü ah kpa mi sun thik kti. Tuh ta ah nih sun nu kpüi nu ni. 37 Asuna hmeei nu sun tuh ta kho kum kkhyet kip jah kphyü lohnüh kti. Ah nih sun hjok khah ima vekyet lü amhnüüp mthan nghläia Pangsiim hjok khah lü ei jeih tä sham kti. 38 Joshep jah Marih noh hnashen Jeishüh sun hjok khah im nua k'uma ah nih ve püi k'um üng nghnu mi nu Anna sun lai vaai kti. Ah nih noh Pangsiim ah je ei. Pangsiim noh Jeirüh Shalem mlüh ah kuum kyan vai sun mtät-in ktia kkhyaang naküt üng hnashena mong malam pyen ah jah mtheh.
39 Joshep jah Marih noh Pangsiima thuuma kba abänga poh päih ma lü Kalile hne ah nih mlüh Nasareta sit be ktie. 40 Hnashen sun däm lolü ktha mah lok kti. Ah pum ngyam phi velok kti. Pangsiima bä naak ah nih üng vek kti.
41 Ah nu pa xooi sun akum tä lü Phyong pooia Jeirüh Shalem mlüh-a sit sit kti xooi. 42 Jeishüh sun kum xalei nghngih ah suum lo üng ah nu jah pa noh ah nih seh thuuma kba ah nih kdung be tü üng ta Jeishüh phi ah nih khü. 43 Phyong pooi phyooi lüta ah nu jah pa sun Kalile hne da sit be kti xooi. Jeishüh ta Jeirüh Shalem mlüh-a ve-ei hüt kti. Ah nu jah pa noh asun am hmat ngtu ni. 44 Kalile da su sit be kti kkhyaang pä üng ngpüi ktia ah nih shui. Amhnüüp nghmüa sit ma ulü ah nih koon shaang jah ah nih püi poea veei ah nih sun ah nih hjam lo hü. 45 Am hmu ngtu nih lüta Jeirüh Shalem mlüh da nglat be lü shui vaai kti xooi. 46 Amhnüüp kthum üng Jeishüh sun hjok khah im nua ah nih hmuh vaai. Ah nih sun Sangsiim ktheemea hlonga ngshut lü ah nih jah msuh mtheh-e ngngaai lü jah kthäh kkhyah be kti. 47 Jeishüh-a ngjaak kya thei jah ah pyen be sun ngja-naküt kti mün tong ktie. 48 Joshep jah Marih noh ah nih sun ah nih hmuh lo üng mün kti xooi. Ah nu noh “Kah sao, ahin kba ta nah thoon kti ni. Nah pa-a dä sääi tong lü kah nih ning shui hü ta” tilü ah pyen.
49 Jeishüh noh ta “I vai kei ta nah nih nah hjam hü laang ni. Kah Pa Pangsiima ima kah veyah kkhai atia am nah nih hmat ktio” tilü ah pyen be. 50 Lüphi Joshep jah Marih noh ah pyen hlü sun am ngja-kya ngtu ni.
51 Kona Jeishüh sun ah nih hlonga Nasaret mlüh-a sit be lü ah nih ti tia vek kti. Asun bange abäng sun ah nua mlung üng ngsep kyet kti. 52 Jeishüh sun däm däm lolü ah pum ngyam phi taai taai lok kti. Pangsiim jah kkhyaangea ma-a hmaai mah lok kti.