18
Ah nih nih-e noh käh hjoh pheh laang lü aläa ah nih tä sham vaia Booi Jeishüh noh pum üng msäp lü ah jah mtheh. Booi Jeishüh noh “Mlüh mata si jaang khong mang mat vek kti. Ah nih noh Pangsiim phi am lei shong laang. Kkhyaang phi i a am jah mshui ei. Asuna mlüh-a hmeei nu mat vek kti. Ah nih sun si jaang khong manga veei sit seen-in lü ah nih üng ‘Nah sok sek püi kti kah nääng vaia nah ku eia’ tilü nghui kti. Si jaang khong mang noh käh poh peet laang lü kho vei ve-ei kti. Hnua ta ah pät noh ah pät üng ‘Kei noh Pangsiim käh lei shong lü kkhyaang phi i a am mshui ei hlükyo ngü. Lüphi hina hmeei nu noh nah mshik mshou ei kolaih lü ah ngnääng vaia kah ku ei kkhai ni. Asun kba am ani ta aläa nah kpan ei lolü nah boong kha shak kkhai ni’ tilü ah pyen mjoh” tilü Booi Jeishüh noh ah jah mtheh.
Booi Pa noh “Am pyuun kti si jaang khong manga pyen kshak sun ngngaai shüm ua. Asun kba ani ta Pangsiima xü ksea kkhyaange noh ah veeia mhnüüp mthan mhläi lü ah nih tä sham u ta Pangsiim noh asune ah jah ku ei vai hjou nak kkhai mä. Kah ning jah mtheh kkhai. Pangsiim noh asune angshenga jah ku ei kkhai ni. Lüphi kei Kkhyaang Sa hina kho mdeka kah pha lo be üng ta kkhyaange noh jum ei naak üng nah mtät tu-kom u-mä” tilü ah pyen.
Ah pät noh ah pät üm nalü pyuun ktia ngngaai ei lü kkhyaang kse jah hmu mshit kti akhäk vek ktie. Asune sun Booi Jeishüh noh pum üng msäp lü ah pyen. 10 “Kkhyaang nghngih sun tä sham kkhaia hjok khah im nua kaai vaai kti xooi mjoh. Mat ta Pharishe. Mat be tü ta khoon to k'hlook ni. 11 Pharishe ta ngdüüi lü ‘Pangsiimo, kei ta kkhyaang ksea kba am kah mkhye mshoh-a phäh kah ning je ei ni. Ngui xüi khoh hat am kpaam ei ngü. Ah nih kkhyu phi am ve püi ngü. Hina khoon to k'hlooka kba phi am thoon ngü. 12 Ngkhyün suum mat üng nghngih vei ei kah jeih kti. Kah taak ei naküt üng ka xa üng mat phi kah pek kti ni’ tilü ah päta mong pyen lü tä sham mjoh kti. 13 Khoon to k'hlook ta mkot hlonga ngdüüi lü kkhaan kho da hngoh am jäng mdei ei dat. Ah hmaai müm lü ‘Pangsiimo, nah mpyeen msheei eia. Kah mkhye mshoh kti ni’ tilü tä sham mjoh kti. 14 Kah ning jah mtheh kkhai. Asuna kkhyaang ta Pangsiim üng ng'ye be pääng lü ima sit be kti ni. Pharishe ta asun kba am ni. I a thoon lüni ti ta ah pät noh ah pät mhlün mtaai ei kti Pangsiim noh mhneem kkhai. Ah pät noh ah pät mhneem ei kti ta Pangsiim noh mhlün mtaai kkhai ni” tilü ah jah mtheh.
(Mate 19.13-15; Marküh 10.13-16)
15 Asun kona Booi Jeishüh noh ah nih kkhaana ah kut mtaang lü ah jah tä sham peet vaia Booi Jeishüh-a veei su hnashene ah nih jah lo püi u. Akläke noh asun ah nih hmuh üng asue ah nih jah kshät u. 16 Lüphi Booi Jeishüh noh ta hnashene sun ah veeia jah khü lü “Hnashene kah veeia lo-ushe. Käh jah kshät ua. Hnashena kba ah nih mlung kko vek ktie hin Pangsiima pe üng ngpüi ktie ni. 17 Ngngaai ua, kei kah pyen ma kkhai ni. Kkhyaang mat mat hin noh hnashena kba Pangsiima up vai ah hlü ei üng va Pangsiima pe üng vaang khoh kkhai” tilü ah jah mtheh.
(Mate 19.16-30; Marküh 10.17-31)
18 Booi ei kti khong mang mat sun Booi Jeishüh-a veei lolü “Angvaaio, nang akdo ni. Angshääia xün naak kah yah vaia i kah poh kkhai ni” tilü ah kthäh. 19 Booi Jeishüh noh ta “‘Nang akdo ni’ tilü ta a i a nah nah shui kti ni. U a kkhyaang phi am do. Pangsiim däk ni ah do. 20 Pangsiima thuum nah kshing kti ni. Ah nih kkhyu käh ve püi vai. Kkhyaang käh hnim vai. Käh mpyuuk ei vai. Hleei hlak lü käh shak shi vai. Nah nu pa nah jah lei shong vai” tilü Booi Jeishüh noh ah pyen. 21 Asuna khong mang noh ta “Angvaaio, asuna Pangsiima thuum naküt kah diika kkhyüh kah läk lam päih ni” tilü ah pyen be. 22 Booi Jeishüh noh asun ah ngjaak üng ah nih üng “Mat ta hlü ham khü. Nah taak ei naküt jooi vaai päih lü nah yah-a ngui naküt ampyeen kshe-e üng jah yeta. Asun üng va kkhaan khoa nah do kya kkhai. Asun kona lolü kei nah läka” tilü ah pyen. 23 Lüphi asuna khong mang noh asun ah ngjaak üng hmaai shelü puk shelo pyei kti. I a thoon lüni ti ta asuna kkhyaang booi ei pyei kti.
24 Booi Jeishüh noh ah nih sun bük ma lü “Booi ei ktie hin Pangsiima pea ah nih vaan vai khak pi pi kkhai ni. 25 Sha nghngü kshaaü sän mpyüm khuui üng ah luh vai am alooia kba booi ei ktia kkhyaang phi Pangsiima pea ah vaan vai am looi bok” tilü ah jah mtheh. 26 Kkhyaange noh asun kba ah pyen ah nih ngjaak üng “Asun kba ani ta u noh ta kuum kyan naak yah kkhai ni” tilü ah nih kthäh u. 27 Booi Jeishüh noh ta “Kkhyaang noh ah pät noh ah pät am kuum kyan khoh. Pangsiim noh ta kuum kyan khoh kti. Pangsiim noh ta abäng naküt khyaih khoh kti ni” tilü ah pyen. 28 Peta noh “Ngngaaia, kah nih taak ei naküt hoih lü kah nih ning läk u ni” ah ti. 29-30 Booi Jeishüh noh ah nih üng “Ngngaaia, kei kah pyen ma kkhai. Kkhyaang mat noh Pangsiima pea phäh-a ah im, ah kkhyu, ah hnuun püi kphyaai be, ah nu pa, ah sa na ah jah hoih ta ah nih noh hina kho mdeka ah ve k'um üng asun kän kän kho hah-a yah ei be kkhai ni. Hnua phi angshääia xün naak yah kkhai.”
(Mate 20.17-19; Marküh 10.32-34)
31 Booi Jeishüh noh akläk xalei nghngih ah veeia jah khü lü ah nih nih-e üng “Ngngaai ua, Jeirüh Shalem mlüh-a nih sit hnüh kkhaie. Shahma ngsiime noh kei Kkhyaang Sa-a mong malam pyen ah nih nah yuka kba abänga thoon lok kkhai ni. 32 Ah nih nih-e noh kei sun Pangsiim am kshing kti kkhyaang mjü kse-ea kuta nah ap kkhaie. Nah yaih ei kkhaie. Nah hnep ei lü nah msheet ei kkhaie. Ah nih msi üng nah mshoh kkhaie ni. 33 Ah nih nih-e noh yüüi ngkhep üng nah kpaai ulü nah hnim kkhaie. Amhnüüp kthuma mhnüüp üng kah thou be kkhai ni” tilü ah pyen.
34 Lüphi akläke noh i a ngkho atia am dang yah ngtu u. Booi Jeishüh-a pyen sun ah nih phäh-a ngthup lü ah jah msuh mtheh am ngja-kya u.
(Mate 20.29-34; Marküh 10.46-52)
35 Booi Jeishüh noh Jeirih Kho mlüh-a phavaai hlühnüh kti. Asua ah mik mü mat noh lam peia ngshut lü anghläia ngui jah tong ei kti. 36 Kkhyaang pä nu noh ah nih khe lo u ngjalü ta “I a thoon lok ktie ja” tilü ah jah kthäh. 37 Kkhyaange noh “Nasaret mlüh-a ka Jeishüh lok kti ni” ah nih ti be u. 38 Ah mik mü noh “Jeishüh-o, Davita tu kpao, nah mpyeen eia” tilü ngpyaang ngpyet-in kti. 39 Ah hlonga vek ktie noh “Käh sik sika” tilü ah nih ngya u. Lüphi “Davita tu kpao, nah mpyeen eia” tilü ngpyaang lodäm däm kti. 40 Booi Jeishüh noh ngdüüi ma lü ah jah khü shak. Ah mik mü ah pha lo üng Booi Jeishüh noh hin kba ah pyen. 41 “I kah ning poh peet vai nah hlü ei kti ni” tilü ah kthäh. Ah mik mü noh ta “Booi Pao, kah mik hin vaai shak bea” tilü ah nghui naak. 42 Booi Jeishüh noh “Nah mik vaai be she. Nah jum eia phäh nah do be kti ni” tilü ah pyen. 43 Asun üng ahunata ah mik vaai be lü Booi Jeishüh sun ah läk yü. Ah nih noh Pangsiim mküüi mtou kti. Asun hmu naküt kti noh phi Pangsiim ah nih je ei u.