17
(Mate 18.6-7, 21-22; Marküh 9.42)
Booi Jeishüh noh akläke üng “Mkhye mshoh vaia hlo hleep naak velo ye kkhai. Lüphi jah mkhye mshoh shak kti kkhyaanga phäh khui kha naaka thoon kkhai ni. Hnashena kba kei nah jum ei kti mat mat mkhye shak ktia kkhyaanga phäh ah nghngü üng lung kdäm nu häi lü tui li nua kpyaai in ta do bok kkhai. I a thoon lüni ti ta Pangsiim noh asuna kkhyaang üng ah peet vai mtaam sun asuna kthaka kshe hleen bok kti ni. Käh nah mkhye yot vaia mseei eia. Nah püi noh ah mkhye mshoh ta hima. Ah vuuk be ta ah mkhye mhläta. Nah püi noh kho mhnüüp mat üng kkhyüh vei ning bäü hma nalü phi ah nih noh nglat lobe lü ‘Kah vuuk hnüh kti ni’ ah ti ta ah mkhye mhläta.”
Ngshäe noh Booi Pa üng “Kah nih ning jum ei thei lo bok vai ua jah ku eia” tilü ah nih pyen u. Booi Jeishüh noh “An ne msi ui teh nah nih jum ei naak ave ta nang nih-e noh hina thing dung nu hin üng ‘Apya mah-a nghlook lok kti lü mpang lai tuia phung pya na-vaaia’ nah nih ti ta asun kba thoon ksang kkhai ni.
Avai shüa nang nih-e hin üng mata veei lai kthon kti am ani üng to shääm kti xüh shoh mat vek kkhai. Xüh shoh sun ah khüüi naaka kkhyüh ah pha lo be üng ah mah pa noh ‘Ngshut loa. Buh phi ei loa’ tilü pyen laang kkhai mä. Asun kba am ni. Ah nih noh ‘Kah mü ei vai shoong tika. Tui phi nghlok lü kah ei vai shook tika. Kah ei kona ta nang phi nah ei khoh kti ni’ tilü pyen kkhai va am ni bä. Xüh shoh noh ah mah pa-a pyena kba ah poh-a phäh ah mah pa sun noh ‘Nah bä ni’ tilü i am pyen. 10 Asun kba ni. Nang nih-e noh phi kah nih ning xüh naküt nah nih poh pääng üng ta ‘Kei nih-e hin i a am kyah kti xüh shoh ni. Kah nih poh mta kuung ni kah nih poh mshah u’ atia nah nih ngngaih ei vaia do kti” tilü ah jah mtheh.
11 Booi Jeishüh sun Jeirüh Shalem mlüh-a kdung ah seh üng Shama Rih hne jah Kalile hnea kkeh-a sit yah kti. 12 Ngnam mata ah vaan vaai hlü hnüh üng mneh kshe mneh kti kkhyaang xa noh athuuk naaka kkhyüh Booi Jeishüh sun ah nih hmuh u. 13 Asune noh “Booi Pa Jeishüh-o, jah mpyeen ei tua” tilü ngpyaang pyei ktie. 14 Booi Jeishüh noh jah hmulüta asune üng “Sit lü nah nih puum sha khotu ngsiim üng mhnüh vaai ua” tilü ah jah hei mtheh. Khotu ngsiima veei ah nih seh lama ah nih bäng do be päih ktie. 15 Asune üng ka mat noh ah do be sun sat na-lo lüta nglat lobe lü akthai kdäma Pangsiim ah mküüi mtou. 16 Booi Jeishüh-a veei ah pha lo be üng ah kho pha kuunga ngbok lü ah je ei. Asuna kkhyaang ta Shama Rih mjü ni. 17 Asun üng Booi Jeishüh noh “Kkhyaang xa kah mdo be va am ni shü. Nah püie kko ta hoa lai ktie ja. 18 Ahina kkhyaang mjü kse mata thea Pangsiim mküüi mtou kkhaia u phi am nglat lobe ktie ve-mä” tilü ah kthäh. 19 Booi Jeishüh noh Shama Rih kkhyaang mjü mat üng “Ngdüüi lolü sit hnüh-a. Nah jum eia phäh nah do be kti ni” tilü ah mtheh.
(Mate 24.23-28, 37-41)
20 Pharishe-e noh Booi Jeishüh üng “Pangsiima upa pe i tüh-a thoon lok kkhai ja” tilü ah nih kthäh kkhyah u. Booi Jeishüh noh ta “Pangsiima upa pe hin mik üng hmuh yah-a ngshing ngte naake üng thoon lok kkhai am ni. 21 Kkhyaange noh ‘Bük ua, ahi kä hin Pangsiima pe ni’ tik kkhaie. Akhäk noh ta ‘Asa kä san Pangsiima pe ni’ tik kkhaie kyo. Lüphi Pangsiima pe hin nah nih kshuunga thoon lopääng kti ni” tilü ah pyen.
22 Booi Jeishüh noh akläke üng “Kei Kkhyaang Sa kah hiit jah kah jou taai üng mhnüüp mata phäh hngoh kah lo be ma vaia nah nih hmaaü ei ua ksüün velok kkhai ni. Lüphi kei am loham ngü. 23 Kkhyaange noh nang nih-e üng ‘Bük ua, ahi käa Pangsiima sa kpa phalo be kti’ tik kkhaie. Akhäk noh ta ‘Asa käa Pangsiima sa kpa phalo be kti ni’ tik kkhaie kyo. Lüphi käh sit hü ubä. Käh jah läk laang ubä. 24 Khoa mlaih lo üng abänga ah vaai lo kshet-ina kba kei kkhyaang sa kah pha lo be üng thoon kkhai ni. 25 Lüphi asun kba athoon hlaana kei noh khui kha kshe nu khaam ei yah ngüshe tuh kha üng ka kkhyaange noh phi nah not kkhaie ni. 26 Noah-a kha üng kkhyaangea thoon vea kba kei, Kkhyaang Sa kah pha lo be vai üng phi thoon vek kkhaie ni. 27 Kkhyaange sun ah nih ei ook hlü mjü kküm ei o-lü ve ei ktie. Ah nih kkhyu phi la-ei ktie. Ah nih sa nghnu phi jah pe-ei lü ngngaih k'hnipa ve-ei ktie. Lüphi asuuma mhnüüp üng ta ahunata Noah sun mhlüüi kdäm nua k'uma lut ei kti. Kdüi tui däm lolü kkhyaange ta sim pyak päih ktie. 28 Asun kba kuunga Loot ngming nak kti kkhyaang mata kha üng phi kkhyaange thoon ktie. Ei o-lü, jooi lü, kkhyäi lü, lai poh im shalü ngngaih k'hnipa ve-ei ktie. 29 Lüphi asuuma mhnüüp üng Loot sun Sotom mlüh-a kkhyüh ah joon be jah ta mei jah kaat kkhaan khoa kkhyüh kyalo lü kkhyaange sim pyak päih ktie. 30 Kei Kkhyaang Sa-a pha lo bea mhnüüp üng phi asun kba thoon kkhai ni.
31 Asuna mhnüüp üng ta ksha-a vek kti noh ah külak lou ei vaai kkhaia im k'uma käh lut be ti she. Asun kba ni lou phyou vaai kti phi ima käh sit be ti she. 32 Loota kkhyua thoon ve sän ngngaai ua. 33 Ah päta shak yung ei hlük kti noh ah shak shum nak kkhai ni. Ah shak shum nak kti noh ta aksanga ah shak yung ei kti ni. 34 Kah ning jah mtheh kkhai. Asuna mthan üng ta ih phak mat üng kkhyaang nghngih ip kti üng mat sun ngjäk-in vaai lü mat ta ve-ei hüt kkhai ni. 35 Kshum shu ei kti nghnu mi nghngih üng mat ngjäk-in vaai lü mat ta ve-ei hüt kkhai. 36 Lou poh kti kpa mi xooi üng mat ngjäk-in vaai lü mat ta ve-ei hüt kkhai ni” tilü ah jah msuh mtheh. 37 Asun üng ah nih nih-e noh “Booi Pao, asun hoa thoon lok kkhai ni” tilü ah nih kthäh u. Booi Jeishüh noh “Akthi kkyua ve naaka laang tah ngkhääm lok kkhaie ni” ah ti be.