15
(Mate 18.12-14)
1 Khoon to k'hlooke jah Pangsiima thuuma kba am vek kti kkhyaang kho hah pa sun Booi Jeishüh-a pyen sun ngja-hlü pyei ulü ah veeia lok ktie.
2 Pharishe-e jah Sangsiim ktheeme noh ta “Aana kkhyaang hin Pangsiima thuuma kba am vek ktie jah dou daang lü buh jah ei püi kti va nik kba” tilü mship hjop ktie.
3 Asun üng ta Booi Jeishüh noh ahin kba pum üng msäp lü ah pyen.
4 “Nang nih-e üng mat mat noh to phya mat ta-ei kkhai. To mat sun ah khyüh ta ah nih noh puum kko kip kän üng kko sun mkyaanga jah ta-hüt kkhai, am ni bä. Akkhyük to mat sun hmube onga shui kkhai ni.
5 To mat sun ah hmuh be üng je kyai tong lü ah ngkyaang üng mtaih lü ah lo püi be.
6 Ima ah pha lo be üng ah püi poe jah ah im senge jah khü lü ‘Nih je kyai yüm vai u. Hina to khyük kti kyo. Kah hmuh be ni’ tilü pyen kkhai.
7 Kei kah ning jah mtheh ma kkhai. Asun kba ni ‘Vuuk be vai am hlü. Kah pyuun kti ni’ tilü ngngaai ktia kkhyaang kko kip kän üng kkoa kthaka ah mkhyea phäh vuuk be kti mkhye mshoh kti mata phäh-a kkhaan khoa je kyai bok kkhaie.
8 Nghnu mi mat noh ngui ksang nglung xa tak kkhai. Asune üng ka ngui ksang mat ah khyüh ta nghnu mi sun noh mei phäih mdääi lü im abäng pheih khoih lü mtun ei kshi lü ah hmuh be vei shui kkhai, am ni bä.
9 Ngui ksang sun ah hmuh be üng ah püi poe jah ah im senge jah khü lü ‘Nih je kyai yüm vai u. Hina ngui ksang mat khyük kti kyo. Kah hmuh be ni’ tilü pyen kkhai.
10 Kei kah ning jah mtheh ma kkhai. Asun kba ni ah mkhyea phäh vuuk be kti mkhye mshoh kti mata phäh-a Pangsiima kkhaan kho ngshäe phi je kyai kkhaie ni” tilü ah jah mtheh.
11 Booi Jeishüh noh “Kkhyaang mat sun ah sa kpa nghngih ve mjoh kti.
12 Akdiik noh ta ah pa üng ‘Paai longo, ngooia kah bi vai khoh kkhyam sun tuh-a nah peyüa’ tilü ah tong. Asun üng ta ah nih pa noh ah khoh naküt sun ah sa xooi üng ah nih shääng naak kän siima ah jah pa.
13 I vei nu am loham akdiik noh ta ah yah lo khoh hat naküt sun seh lü thuuk pyei kti pe mata kdunga sit kti. Pooi poh thak thak lü ah looi püie ah jah ei ook püi kolaih jah boh bah kti nghnu mi ah jah ve püia phäh üng ah ngui xüi ah pyok shak naak päih.
14 Ah ngui naküt ah päih lo üng asuna pea kho jo tui shelok kti. Asun üng ta ah nih sun kkhyoot ei lok kti.
15 Asuna pe üng ka kkhyaang mat shuun jiin lü asuna kkhyaang noh vok ah jah msah shak.
16 Vokea ei hngoh phi ei hlüpyei kyo kti. U noh i laang phi am mbei mjoh u.
17 Asun üng ngshüüm lobe lü ‘Kah pa-a ima xüh shoh kho hah vek kti. Ah nih ei k'hleei phi vek ktia ei ktie. Kei ta ahia nah kkhyoot ei tong lü kah thi-lo hlühnüh kti ni.
18 Ahina kkhyüh joong lü kah pa-a veei sit be ngüshe kah pa üng “Paai longo, kei hin Pangsiima hmaai ma-a ni nah hmaai ma-a ni kah mkhye mshoh kti.
19 Nah nah sa-a nah nah ngngaih vaia phi am looi ngkäih ti ngü. Xüh shoh-a nah ta-kom kti” tilü kah pyen kkhai’ tilü ah pät noh ah ngngaih ei lo mjoh.
20 Asun üng joong be lü ah pa-a veei phabe kti. Akthuuk nua ah ve ham üng ah pa noh hmulü ah mpyeen ei pyei. Ah pa noh dong lü ah sa sun kpang lü ah uut mjoh.
21 Ah sa noh ‘Paai longo, kei hin Pangsiima hmaai ma-a ni nah hmaai ma-a ni kah mkhye mshoh kti. Nah nah sa-a nah nah ngngaih vaia phi am looi ngkäih ngü’ tilü ah pyen.
22 Lüphi ah pa noh xüh shoh-e üng ‘Shui shak akdo bok angshenga lo püi lü mhjih ua. Kut ksüp phi ksüüp peet ua. Kho dok phi ngsum shak ua.
23 Akpyan boka msah ei she sa sän hnim lü shoong booi ua. Ei o-lü nih je kyai ei kkhüt vai u.
24 I lüni ti ta kah sa hin thik ktia mäi kyo. Tuh ta xüng be hnüh kti ni. Ah nih hin khyük kyo kti. Tuh ta hmuh be hnüh ni’ tilü ah pyen. Asun üng pooi poh lü ve mjoh ktie.
25 Asun üng ah sa kpa akdäm ta laia khüüi khoom vaai kti. Lobe lü im hlong ah pha lo be üng ksing tum moong kkhek ng'äi ng'om lü ngtuui nglaam ktie ah jah ngjaak lo.
26 Ah nih noh xüh shoh mat khü lü ‘I a joong poh ktie ni’ tilü ah kthäh.
27 Xüh shoh noh ‘Nah na na lobe kti ni. Ah nih sun phyong tääm mya shat lü nah pa noh ah hmuh bea phäh akpyan boka msah ei she sa sän ah jah hnim shak ni’ tilü ah mtheh be mjoh.
28 Ah sa kpa kdäm ta thüi tong lü ima am kaai hlübe laang. Ah pa noh kkong ma-a kyum lolü ah sa sun jah je kyai püi kkhaia ah nghui naak mjoh.
29 Lüphi ah sa kpa kdäm sun noh ah pa üng ‘Ngngaai ma shüma, kei noh nang paaia phäh-a kho kum kho vei khuut kah poh kti. Nah ti tia aläa khuut kah poh kti. Nah ti tia aläa kah vek kti ni. Lüphi kah nglooi ei püie mah mah pooi kah nih poh ei naak vai ua nang paai noh me sa puum mat hngoh phi am khyah khoi ham kti.
30 Tuh-a ta nah sa mjoh lai lobe kti. Ah nih noh boh bah kti nghnu mi jah ve hü püi lü nah khoh hat pyok shak na-päih kti. Nang paai noh ta akpyan boka msah ei she sa hngoh nah hnim peet ham ktoih ta’ tilü ah pyen mjoh.
31 Ah pa noh ‘Kah sao, kah hlonga aläa nah vek kti ni. Kah khoh hat naküt phi nah ka päih ni.
32 Nah na na ta thik ktia mäi kyo. Tuh ta xüng be hnüh kti ni. Khyük kyo kti va. Tuh ta hmuh be hnüh ni. Asuna thoon lü pooi poh lü je je kyai kyaia vephyak kti ni’ tilü ah pyen be mjoh” tilü Booi Jeishüh noh ah jah mtheh.