10
1 Kona Booi Jeishüh noh akläk kkhyüh kip jah khü lü nghngih siima jah mtoih lü ah jah tüih. Ah päta seh naak hü pah vai mlüh ngnam naküta sit kkhaia asune ah jah xüh ni.
2 Booi Jeishüh noh “Saang k'hmin nu aah vai vepyei kti. Lüphi aat kkhai kkhyaang ngseek kti ni. Asuna thoon lü saang aat kkhai kkhyaang kho hah lou mah pa noh ah jah xüh vaia tä sham ua.
3 Sit hnüh ua. Ngngaai ua. To sae mhnge-ea kshuunga hläh-a kba nang nih-e kah nih ning tüih u ni.
4 Ngui im, hnu äp, kho dok käh seh ei xa ubä. Lama nah nih hmuh-a kkhyaang üng ak'hjoua käh shi hlo püi ubä.
5 Nang nih-e im mat mata nah nih kaai vaai jah ‘Pangsiim noh ahina im kkyoong üng diim deih naak peshe’ tilü tä sham ma ubä.
6 Asuna im kkyoonga diim deih naak hlü ei kti ah ve ta nah nih tä shama kba diim deih naak ah nih üng vekyet kkhai. Asun kba hlü ei kti am ah ve ta Pangsiima diim deih naak sun asuna kkhyaanga ksah-a nah nih veeia pha lobe kkhai ni.
7 Nah nih kaai naak ma ima ve mhläi ubä. Ah nih ning mbei mbook ei o-ua. I lüni ti ta akkhüüi noh kheen ah yah vaia looi ngkäih kti ni. Kaai naak ma ima kkhyüh im ksea käh ngpyot hü hü ubä.
8 Mlüh mata vaang u kti lü ning dou daang ktiea ning mbei mbook naküt ei o ubä.
9 Asuna mlüh-a am khyaih ei ktie jah mdo be ubä. Ah nih nih-e üng ‘Pangsiima upa pe nang nih üng säh lohnüh kti’ tilü jah mtheh ubä.
10 Lüphi mlüh mat mata vaang vaai u kti lü am ah nih ning dou daan u ta ngnam kshuunga hin kba pyen ubä.
11 ‘Nah nih mlüh üng ka kah nih kho üng kop kti mput kah nih kkhok hüt u ni. Asun nah nih mkhyea shak shia thoon kkhai. Lüphi Pangsiima pe nang nih üng säh lokyo kti sun kah nih ning mtheh hlük ktie va’ tilü ni.
12 Kah pyen ma kkhai. Pangsiim noh ah mkhyah mtaang loa mhnüüp üng ta asuna mlüh sun Sotom mlüh-a kthaka phi mtaam pe-bok kkhai.
(Mate 11.20-24)
13 Khora Sing mlüh mah-eo, khui kha kshe nah nih shoong ei kkhaie ni. Pet Shai Ta mlüh mah-eo, khui kha kshe nah nih shoong ei kkhaie ni. I lüni ti ta nang nih-e üng kah nih poh mshah hüt u mün sam kshe ngshing ngte naake sän kei noh Türah jah Shiton mlüh-a kah poh vai shüa athoon ta ah nih nih-e ahlaan üng ba vuuk be vai u-shü. Ah nih mkhye-ea phäh ah nih puk sheet bea ngshing ngte naaka kphih jih shui shalü kuuk üng ba ngshut vai u-shü.
14 Lüphi Pangsiim noh ah mkhyah mtaanga mhnüüp üng ta Türah jah Shiton mlüh-a kthaka phi kshe hleen ktia mtaam ning pek kkhaie ni.
15 Kapanom mlüh mah-eo, kkhaan kho säpa Pangsiim noh ning mhlün mtaai kkhaiea nah nih ngngaih u mä. Am ni. Mo Pi khoa nah nih lai kkhaie” tilü ah pyen.
16 Booi Jeishüh noh akläke üng “Mat mat noh nang nih-ea pyen ah ksang naak ta kei ah nah ksang naak üng täng kti ni. Mat mat noh nang nih ah nih ning kpet ta kei ah nah kpet üng täng kti. Kei nah kpet kti ta nah tüih lok kti Pangsiim phi ah kpet üng täng kti ni” tilü ah jah mtheh.
17 Akläk kkhyüh kip sun je kyai xe xok na-pyei lü phalo be ktie. Asune noh “Booi Pao, nanga hmaaia phäh-a kho yaaie hngoh noh phi kah nih pyen jah ksang nak ktie ni” tilü ah nih mtheh mkhyah lo be u.
18 Booi Jeishüh noh “Kkhaan khoa mlaih-a kba Shatan yaai pa-a kyaak lo kah hmuh ni.
19 Ngngaai ua, kphyu kphyaai kshou jah mti kshouea kkhaana ngleh ei u kti lü am leem shou yah u kti. Ye-ea phun kam abäng nääng naaka hiit phi kei noh kah nih ning peet u ni. I noh phi nang nih-e sun am ning mshou mhleei ei shak khoh u.
20 Lüphi kho yaai noh nah nih pyen ah nih ning ksang naak ua phäh käh xe na-tong ubä. Kkhaan kho pe salaang üng nah nih ngming ah ngpüia phäh-a je kyai bok ua” tilü ah jah mtheh.
(Mate 11.25-27, 13.16-17)
21 Asuna ksüün üng Mkhyangsiim noh Booi Jeishüh üng je kyai xe xok na-shak lü “Kah Pao, kkhaan kho jah kho mdeka Booi Pao, kah ning je ei ni. I lüni ti ta nang Pa Pangsiima mkhüh ktüüm sun angvaaie jah aktheeme noh käh ah nih kshing vaia nah thuh ni. Lüphi hnashena kba am theem ktie üng ta nah jah ngshing ngte shak ni. Ä, kah Pao, ahin nanga hlü eia kba thoon kti ni” tilü tä sham kti.
22 Asun üng Booi Jeishüh noh kkhyaange üng “Kah Pa Pangsiim noh akve naküt abäng kah kut k'um üng ah nah ap ni. Kei ah nah sa kpa hin ah pät Pangsiim däk noh ni ah nah hmat. Akse-e noh am nah kshing u. Pa Pangsiim sun u atia phi kei ah nah sa kpa däk noh ni kah kshing. Kona kei ah nah sa kpa noh Pangsiim kshing kkhaia kah xü noh ni ah hmat yah kom” ah ti.
23 Kona akläke da nglat be tü lü “Tuh-a nah nih hmuh-e hin hmuk ktia kkhyaange üng Pangsiim noh do kya naak ah jah peet ni.
24 Ngngaai ua, kei kah pyen ma kkhai ni. Nang nih-ea hmuh-e hin shahma ngsiime jah shang phuhlange kho hah pa noh hmuhlü kyo ulü phi am hmu-yah hüt u. Nang nih-ea ngjaake hin ngja-hlü pyei kyo ulü phi am ngja-hüt u” tilü ah pyen.
25 Sangsiim ktheem mat Booi Jeishüh saam kkhaia ngdüüi lolü “Angvaaio, angshääia xün naak yah vaia i kah poh kkhai ni” tilü ah kthäh.
26 Booi Jeishüh noh “Pangsiima jah peet thuum üng i hok kba ng'yuk kti ni. Asun üng i nah nih hmuk ktie ja” tilü ah jah kthäh.
27 Ah nih noh “‘Nah Booi Pa Pangsiim nah mlung ksang üng, nah ngnei shak üng, nah su ngngaih naküt üng, nah ngjung ktha naküt üng kphya na-a. Nah pät noh nah pät nah kphya naaka kba nah püi po phi kphya na-a’ tilü vek kti” ah ti.
28 Booi Jeishüh noh “Nah pyen sang kti ni. Asun kba nah thoon hlok poh mshah ta angshääia xün naak nah yah kkhai” tilü ah pyen be.
29 Asuna Sangsiim ktheem noh ta ah ngxun ei naaka Booi Jeishüh üng “Keia püi po ta u mjoh ni” tilü ah kthäh.
30 Booi Jeishüh noh “Kkhyaang mat sun Jeirüh Shalem mlüh-a kkhyüh Jeirih Kho mlüh-a kdunga sit mjoh kti. Asun üng kkhyaang kläänge noh ah nih sun man lü ah shui shak shuut ei lü ah külak phi hut ei lü ah nih te u. Kona ah thih hlü hnüh üng ah nih seh taak mjoh u.
31 Asun k'um üng khotu ngsiim mat sun asuna lam üng kdung vaai kti. Lüphi khui kha kti sun ah hmuh üng leng-in lü ah seh taak mjoh.
32 Asun kba kuunga Levih kkhyaang mat asu käa phavaai lü khui kha kti sun ah hmuh üng ah nih noh phi leng-in lü ah seh taak be tü mjoh.
33 Lüphi Shama Rih kkhyaang mat ah kdung seh üng khui kha ktia veei su phavaai lü ah nih sun hmulolü ah mpyeen ei lo pyei.
34 Ah mneh mnange sun ngbom tui üng mthi mkaaü lü kshi tui üng mtuui lü jih üng ah hloop peet. Kona ah ngshe la-a kkhaana mtäü lü salaapa seh püi lü ah büh ten mjoh.
35 Akho ngooi üng ta salaap mah pa sun üng mhnüüp nghngih ktha kheen vai pelü ‘Ah nih hin akdoa bük teng ma kom kti. Ahina kthaka ngui apäih-a athoon üng phi kah pha lo be üng kah ning pe-be kkhai ni’ tilü ah pyen mjoh” tilü Booi Jeishüh noh pum ah jah mtheh.
36 Asun üng Booi Jeishüh noh “Asuna kkhyaang kthum sun üng ahona kkhyaang ja kkhyaang kläänga kut üng khui kha ktia püi poa athoon kom. Nang noh ta i hok kba nah ngngaai ktia ja” tilü ah kthäh.
37 Asuna Sangsiim ktheem noh “Khui kha kti mpyeen msheei ei ktia kkhyaang sun ah püi ni” tilü ah mshak be. Booi Jeishüh noh Sangsiim ktheem üng “Asun kba ani ta asuna kba thoon kom kti” tilü ah mtheh.
38 Booi Jeishüh jah akläke ah nih kdung seh üng ngnam mata vaang ktie. Asuna ngnam su Matah ngming nak kti nghnu mi mat noh ah ima ah nih kaai vai ua ah jah khü.
39 Matah sun Marih ngming nak kti ah na mat vek kti. Marih noh ta Booi Pa-a kho kuunga ngshut kyet lü ah jah msuh mtheh sun su ngngaai kti.
40 Matah ta kkhinea phäh jah mbei mbook vai khüüi khoon nak kti. Asun üng Booi Jeishüh-a veei sit lü “Booi Pao, kah na noh kkhin ei ook vai khüüi khoom am nah kpüi laang kti hin nah hmuh kyo mä. Marih noh ah nah ku ei vaia mtheh tua” tilü ah pyen.
41 Lüphi Booi Jeishüh noh “Matah-o, Matah-o, amjü mjüa phäh nah ng'äh ngkhyah pyang ma kti ni.
42 Aktung bok mat däk ni ah ve. Marih noh ta akdo bok vai xü ei kti ni. Asun sun u noh phi ah nih-a kkhyüh am lou ei yah” tilü ah mtheh be.