6
(Mate 14.13-21; Marküh 6.30-44; Lükah 9.10-17)
1 Asun kona Booi Jeishüh noh Kalile tui li kkaan lü peh vaai kti. Asuna tui li sun Tipe Rih tui lia phi ah nih shui u.
2 Am khyaih ei ktie ah jah mdo bea mün sam kshe hmu-ulü ta kkhyaang pä nu noh ah nih läk u.
3 Jeishüh msuunga kaai lü akläke mah mah-a ngshut ktie.
4 Asun üng Jüdah mjüea Phyong pooi säh hnüh kti.
5 Booi Jeishüh va-mdei lüta kkhyaang pä nue ah veeia lok ktie ah jah hei hmuh. Philip üng “Asana kkhyaang pä nuea ei vai hoa ka i üng nih kkhyäi kkhaie ni” tilü Booi Jeishüh noh ah kthäh.
6 Philip sun ah saam naaka ah pyen ni. I hok kba ah poh vai sun aksanga ta ah kshin ei pän ni.
7 Philip noh “Kkhyaang ahin käne hin mat siima ei khaam naak vai hngoh phi xün thoong mhma phu bang kkhaai kpeh nih kkhyäi lü i am kkhäk ham” ah ti.
8-9 Akläke üng ka Shimon Peta-a na Antere noh “Hia athoi mat noh kkhaai kpeh beei mhma jah nga kkeih thek nghngih lo püi kti vek kti kyo. Kkhyaang pä nu hin noh i hok kba phi am ngküh shoom u” tilü ah pyen.
10 Jeishüh noh “Kkhyaange hin jah ngshut shak ua” tilü akläke üng ah jah mtheh. Asua mphyo vepyei kti. Kkhyaang abänge ngshut ktie. Asune üng kpa mi thoong mhma bang lok ktie.
11 Jeishüh noh kkhaai kpeh sun dou lü Pangsiim je ei ma lü ngshut ktie üng ah jah yet shak. Nga kkeih sun phi asun kba ah poh be tü. Abäng noh phü onga ah nih ei u.
12 Kkhyaange noh phü ma ulü Booi Jeishüh noh akläke üng “Ak'hleei lo ngphyüt ngshek kti kkhaai kpeh jah akbät nga sun käh kooi kaih kkhaia hooi be ua” ah ti.
13 Kkhyaangea ei kkhaai kpeh beei mhma sun hleei lolü angphyüt ngshek ah nih hooi u üng sä xa lei nghngih be päih kti.
14 Booi Jeishüh noh ah poh mün sam kshe kkhyaange noh ah nih hmuh u üng “Sangsiim üng vek ktia kba kho mdeka pou lok kti shahma ngsiim sun ah nih va nik kba” ah nih ti u.
15 Booi Jeishüh noh ah nih sun kkhyaange noh am ah poh hlü shang phuhlanga ah nih msoon hlü u kshing ei lolüta msuunga ah pät däk kaai be tü kti.
(Mate 14.22-33; Marküh 6.45-52)
16 Kho mü lolüta tui li da akläke jukyak ktie.
17 Kapanom mlüh da seh be vaia mhlüüi üng kaai ulü tui li kkaan ktie. Kho mthan hnüh kyo lüphi ah nih veeia Booi Jeishüh am phaloham.
18 Asun üng kho khi kshe nu phalolü tui ngnook lopyei kti.
19 Akläke noh määng kthum, kphyü bang mhlüüi ah nih pyaih kona Booi Jeishüh tuia kkhaana lok kti ah nih hmuh u. Ah nih sun mhlüüi da säh lolüta ah nih kyüh pyei u.
20 Booi Jeishüh noh “Käh kyüh ei ti ua, kei ni” tilü ah jah mtheh.
21 Mhlüüia kkhaana je kyai lü ah nah dou u lüta ah nih seh naak hlü da ahunata phavaai ktie.
22 Akho ngooi üng Tipe Rih tui li sa yea vehüt ktie kkhyaang päe noh asu käa mhlüüi mat däk vek kti atia ah nih kshing lo be u. Booi Jeishüh sun ah nih läk ktiea dä mhlüüi üng am ah ngpüi vaai jah akläke noh phi Booi Jeishüh sun mhlüüi üng käh kaai püi xa ulü ah nih seh taak u atia ah nih hmat u.
23 Lüphi Tipe Rih mlüh-a kkhyüh lü mhlüüi kse phi lok ktie. Asuna mhlüüie sun, Booi Jeishüh noh Pangsiim je ei lü kkhyaange üng kkhaai kpeh ah jah mbei naaka hlonga vek kti tui li peia phalok ktie.
24 Kkhyaange noh asu käa Booi Jeishüh jah akläke am ah nih ve ti u hmat u lüta asuna mhlüüie üng kaai ulü Kapanom mlüh da Booi Jeishüh shui vaai kkhaia sit ktie.
25 Kkhyaang päe noh tui li sa yea Booi Jeishüh ah nih hmuh u üng “Angvaaio, i tüh üng ahi ye nah pek lok kti ja” tilü ah nih kthäh u.
26 Booi Jeishüh noh “Ngngaai ua, kei kah pyen ma kkhai ni. Nang nih-e hin noh ngshing ngte naak hin i a ngkho kah poh atia am kshing u kti. Nah nih ei mphye teet ua phäh-a nah nih nah shui hü ktie ni.
27 Sim pyak be kkhai ei ooka phäh käh mtun ei ua. Angshääia xün naaka thoon kti ei ook nah nih yah vai ua poh mshah ei ua. Asuna ei ook sun kei, Kkhyaang Sa noh kah nih ning pek kkhaie ni. I lüni ti ta Pa Pangsiim noh ah hiita angshing ngte naak ah nah peet pän ni” ah ti.
28 Asun üng kkhyaange noh “Pangsiima hlü ei vaia i kah nih poh kkhaie ja” tilü ngthäh ktie.
29 Booi Jeishüh noh “Pangsiima hlü ei ta ah tüih lo sun jum ei naak ni” ah ti.
30 Kkhyaang päe noh “Kei nih-e noh kah ning jum vai mik nghmuh-a i a mün sam kshe nah jah mhnüh kkhai ni. I a ngshing ngte naak nah poh kkhai ni.
31 Mkyaanga kah nih pu pae noh Manah ah nih tia kkhaai kpeh ei khoi ktie. ‘Ah nih noh kkhaan khoa kkhyüh lü ei vai kkhaai kpeh jah pek kti ni’ tia Sangsiim üng vek kti” tilü ah nih pyen u.
32 Booi Jeishüh noh “Ngngaai ua, kei kah pyen ma kkhai ni. Moshei noh kkhaan khoa ka kkhaai kpeh ah ning peet u am ni. Kkhaan khoa kkhyüh lü kkhaai kpeh ksang ning pek kti ta kah Pa ni.
33 I lüni ti ta Pangsiima jah peeta kkhaai kpeh ta kkhaan khoa kkhyüh lolü kho mdeka nghngi siime jah xün shak kti” tilü Booi Jeishüh noh ah pyen.
34 “Booi Pao! Asuna kkhaai kpeh sun kei nih-e üng anghläia jah pea” tilü kkhyaange noh ah nih nghui naak u.
35 Booi Jeishüh noh “Kah pät hin xün naaka kkhaai kpeh ni. Kah veeia lolü nah jum ei kti ta am kkhyoot ei be ti ngtu.
36 Lüphi nang nih-e noh kei nah hmumah mah u kti lü am nah jum u kti ati sun kah pyen pääng ni.
37 Kah Pa Pangsiim noh ah nah apa kkhyaang naküt kah veeia lok ktie. Kah veeia lok ktie sun am jah kshät be shoom ngü.
38 I a thoon lüni ti ta kei hin kah päta hlü eia poh mshah kkhai kah lok kti am ni. Kei nah tüüi lok kti Pa Pangsiima hlü eia bi lou kkhaia kkhaan khoa kkhyüh lü kah kyum lok kti ni.
39 Kei nah tüüi lok kti Pa Pangsiima hlü ei ta ah nah apa kkhyaange mat phi am jah mkhyüh ngü. Akpäih naaka mhnüüp üng kah jah mthoh be vai ni.
40 Kah Pa Pangsiima hlü ei ta ah Sa hin hmu-ulü ah nih jum ei naküt ktie shak ngshääi ah nih yah vai ni. Asuna kkhyaange sun akpäih naaka mhnüüp üng kah jah thoh shak be kkhai ni” ah ti.
41 Booi Jeishüh noh “Kei hin kkhaan khoa ka kkhaai kpeh ni” ah tia phäh-a Jüdah kkhyaange mship mhjop lü pyen ei ktie.
42 Kkhyaange noh “Ahina kkhyaang hin Joshepa sa Jeishüh am ni bä. Ah nu jah pa phi nih jah hmat u ni. Asun üng ah pät noh ah pät ‘Kei hin kkhaan khoa kkhyüh lü kah kyum lok kti ni’ tilü i vai pyen hü laang kti ni” tilü ah nih pyen u.
43 Booi Jeishüh noh “Mship mhjop lü käh nah pyen ei ua.
44 Kei nah tüüi lok kti Pa Pangsiim noh lam ah mshüüma kkhyaang ni kah veeia ah pha lo kom. Kei noh asuna kkhyaang sun akpäih naaka mhnüüp üng kah thoh shak be kkhai ni.
45 Shahma ngsiimea malam pyen üng ‘Pangsiim noh kkhyaang naküt msuh mtheh kkhai ni’ tilü vek kti. Pa Pangsiima kkhyü ngjalü ksang nak kti naküt kah veeia lok ktie.
46 U noh phi Pa Pangsiim am hmuh khoi. Pangsiima kkhyüh lok kti kei däk noh ni Pa Pangsiim kah hmuh khoi.
47 Ngngaai ua, kei kah pyen ma kkhai ni. Kei nah jum ei kti noh shak ngshääi yah kti.
48 Kei hin xün naak jah pek kti kkhaai kpeh ni.
49 Nah nih pu pae noh mkyaanga Manah-a ah nih shui u kkhaai kpeh ei kyo ulüphi thik ktie.
50 Lüphi kkhaan khoa kkhyüh lok kti kkhaai kpeh sun i a mäi ni ti ta, ei naküt kti thih naak üng lät kti.
51 Kei hin kkhaan khoa kkhyüh lok kti xün naak kkhaai kpeh ni. Ahina kkhaai kpeh ei kti naküt angshääia xüng kkhai. Kho mdek kkhyaangea xün naak vai kah jah peeta kkhaai kpeh ta kah mti sha ni” tilü ah pyen.
52 Asun üng Jüdah-e noh “Ahin noh ah sha jah mbei khoh kkhai mä” tilü yaih ei lü ngthäh ngkhyah ktie.
53 Booi Jeishüh noh “Ngngaai ua, kei kah pyen ma kkhai ni. Kkhyaang Sa-a sha jah thi am ei ok kti noh xün naak ksang am yah.
54 Kah sha jah kah thi ei ok kti naküt noh shak ngshääi yah kti. Asuna kkhyaang sun akpäih naaka mhnüüp üng kah thoh shak be kkhai ni.
55 Keia sha hin sang ktia ei ni. Keia thi hin sang ktia ook ni.
56 Kah mti sha jah kah thi ei ok kti, kah nglooi ei püi kkhai. Ah nih phi kei üng nglooi ei kkhai.
57 Xün naak Booi, Pa Pangsiim noh ah nah tüih lo ni. Ah nih noh kei ah nah xün shaka kba kei nah ei ok kti naküt xün naak kah pek kkhai ni.
58-59 Asun hin kkhaan khoa kkhyüh lok kti kkhaai kpeh ni. Nah nih pu pae noh ah nih ei khoi u kkhaai kpeh-a mäi am ni. Ah nih nih-e sun hnua ta thik ktie ni. Asuna kkhaai kpeh ei kti naküt angshääia xüng kkhai” tilü Booi Jeishüh noh Kapanom mlüh Sangsiim ngthei naak kyonga ah jah msuh mtheh.
60 Ah nih läk lok ktie kho hah noh asun ah nih ngjaak u üng “Asuna kkhyü am ngja-phya. U a nghnga üng phi am va vaang” tilü ah nih pyen u.
61 Akläke noh phi käh je ulü ah nih mship mhjop u sun Booi Jeishüh noh ah kshing ei. Asun üng ta “Ahina kkhyüa phäh käh jum ei khoh ti onga nah nih mlung nak ktie mä.
62 Asun üng Kkhyaang Sa hin ah ngdüi yünga ah kaai be nah nih hmuh u ta i hok kba nah nih ngngaai kkhaie ni.
63 Pangsiima ngmüi mkhya noh ni xün naak ah jah peet khoh. Kkhyaanga su ngngaih poh mshah noh i phi am khyaih khoh. Kah nih ning mtheh ua kkhyü hin üng Pangsiima ngmüi mkhya jah xün naak kah ning pek ktie ni.
64 Lüphi nang nih-e üng akhäk noh am jum hlü u kti. Booi Jeishüh noh ah nih am jum ei ktie jah ktuun ei kkhai sun aksüka kkhyüh ah jah nahmat ei pääng ni.
65 Asuna thoon lü ‘Pa Pangsiima msoon am nik kti ta u phi kah veeia am lo khoh’ tilü kah ning mtheh khoi u ni” tilü Booi Jeishüh noh ah jah msuh mtheh.
66 Asun kba ah pyena phäh-a akläke kho hah ah nih üng am ngkhyüi hlü ti ulü nglat be ktie.
67 Asuna thoon lü akläke xalei nghngih üng “Nang nih-e phi nah nih nglat hlü be ktie mä” tilü Booi Jeishüh noh ah jah kthäh.
68 Shimon Peta noh “Booi Pao, ua veeia seh vai ni. Nang Booi Pa noh va shak ngshääi jah pek kti kkhyü nah pyen kti.
69 Nang Booi Pa hin Pangsiima Sa Khritoa nah thoon kti ati sun jum lü kah nih ning kshing lo u ni” ah ti.
70 Booi Jeishüh noh “Nang nih xalei nghngih hin kah nih ning xü u am ni bä. Lüphi nang nih-e üng yaai pa mat vek kti ni” ah ti.
71 Ah nih noh Shimon Sakarota sa Jüdah-a mong pyen kti. I lüni ti ta Jüdah sun akläke xalei nghngih üng ngpüi kyo lüphi hnua Booi Jeishüh ah ktuun ei.