1 Asun kona Jüdah-ea hjok khah im nu pooia Jeishüh sun Jeirüh Shalem mlüh-a sit kti. 2 Jeirüh Shalem mlüh ngvoong mkote üng “To mkot” ah nih ti u mat vek kti. Asuna mkota hlonga Hepye läka “Pet Tesa” ah nih ti u tui kan mat vek kti. Asuna tui kan pei su hjaam mhma vek kti. 3 Asuna hjaamea k'uma am shi khyaih kti kho hah ngko nghngään pyei ktie. Ah mik mü, ah kho kshe, ah kut kho kthie phi vek ktie. Asune noh tui angthün lo vai mtät ei ktie. 4 I lüni ti ta ayü üng Pangsiima kkhaan kho ngshä noh tui kan su kyum lolü tui ah ngthün shak ni. Tuia ngthün üng vaang vaai ma ktia kkhyaang ta i a mäi am shi khyaih lüphi do be kti. 5 Asua kho kum thum kip jah kkhyet vei am khyaih ei lok kti kkhyaang mat vek kti. 6 Booi Jeishüh noh asuna kkhyaang nghngään-in kti sun ah hmuh üng ahi vei kuung am ah khyaih ei lo sun ah kshing. “Nah mya ei hlü be kti mä” tilü ah kthäh. 7 Am khyaih ei kti noh “Angvaaio, tuia ngthün üng tuia k'uma nah ktuun kkhai am ve ngtu. Tuia ngthün tä lü tui k'uma luh vai kah mtun ei um üng kkhyaang kse-e hma thak thak ktie ni” ah ti. 8 Jeishüh noh “Ngdüüia, nah ih naak kkot lü sita” tilü ah mtheh. 9 Asuna kkhyaang sun ahunata do be lü ah ih naak hooi lü sut ei lü sit kti. Asun kba athoon vea mhnüüp sun Pangsiim ngam püi mhnüüp ni. 10 Jüdah khong mange noh khyaih be kti üng “Tuh ngooi Pangsiim ngam püi mhnüüp ni. Jüdah thuuma ta tuh ngooi ih naak käh seh hü vai” tilü ah nih him u. 11 Ah nih noh “Kei nah do be shak kti noh ta ‘Nah ih naak kkot lü sita’ ah ti ni” tilü ah pyen be. 12 Jüdah khong mange noh ta “Asun kba ning xüh kti ta u ni” tilü ah nih kthäh u. 13 Lüphi do be kti noh asun kba xüh kti u ni atia am hmat. Jeishüh sun asua vek kti kkhyaang pä nua kshuunga lut lüta am nghmuh ti. 14 Hnua Booi Jeishüh noh do be kti kkhyaang sun hjok khah im nua hmuvaai lüta “Nah ngngaai ma-a. Tuh ta nah do be hnüh kti. Hnua käh nah mkhye ti vaia mseei ei bä. Asun kba am nah mseei ei ta ahina kthaka akshe nah khaam ei yah kkhai ni” tilü ah pyen. 15 Ah nih sun sit lü “Kei nah mdo be kti ta Jeishüh ni” tilü Jüdah khong mangea veei ah jah mtheh vaai. 16 Booi Jeishüh noh ngam püi mhnüüp üng asun kba ah poh-a phäh-a Jüdah khong mange noh ah nih mkhuh mhlih hlü u. 17 Booi Jeishüh noh ta “Kah Pa noh anghläia khuut bi ktia thoon lü kei noh phi kah bi yah kkhai ni” ah ti be. 18 Asun kba ah pyena phäh-a Jüdah khong mange noh ah nih hnim vai ua sha lü ah nih seng kyam u. Ah nih noh ngam püi mhnüüpa thuum ah mkhyea thea Pangsiim sun ah päta pa-a hana ah pyen ni. Asun kba ah pyena phäh-a ah pät noh ah pät sun Pangsiim üng ngshuui ngsäp ei kti ni.

19 Booi Jeishüh noh “Ngngaai ua, kei kah pyen ma kkhai ni. Ah sa kpa noh ah päta tia i phi am poh ei khoh. Ah pa-a poh sun hmulü ah nih noh phi asun kba siim ni ah poh mshah. Ah pa-a khuut bia kba ah sa kpa noh phi bi lou kti. 20 Pa mah noh ah sa kpa mhlä kphya nalü ah poh mshah naküt sun ah mhnüh mtheh päih. Ah pa noh ah nih üng ahina kthaka däm duh kti ah poh vai khuut mhnüh mtheh kkhai. Nah nih bänga nah nih mün sam tong kkhaie ni. 21 Pa Pangsiim noh thipääng ktie sun ah jah xün shak bea kba ah sa kpa noh phi ah hlü eia kkhyaang sun ah xün shak be ni. 22 Ah pät Pa Pangsiim noh u phi am si jaang. Kkhyaang abäng sun ah sa kpa noh ah si jaang vaia ah ap ni. 23 I a thoon lüni ti ta Pa Pangsiim lei shong naküt ktie noh ah sa kpa sun phi lei shong yah kkhaie ni. Ah sa kpa am lei shong ktie ta ah sa kpa tüih lok kti Pa Pangsiim sun am lei shong u. 24 Ngngaai ua, kei kah pyen ma kkhai ni. Kah pyen kshak ngngaai naküt ktia kkhyaang, nah tüüi lok kti Pangsiim jum ei ktia kkhyaang noh shak ngshääi yah kti ni. Asuna kkhyaang noh si jaang naak am khaam ei ti. Thih naak üng lät pän lü angshääia xün naaka vaang kti. 25 Ngngaai ua, kei kah pyen ma kkhai ni. Thipääng ktie sun noh Pangsiima sa-a ngkhü kthai ngjak kkhaie. Ngja-naküt kti xüng be kkhai. Asuna ksüün sun phalok kkhai ni. Aksanga ta phalopääng kti ni. 26 Pa Pangsiim noh kkhyaangea xün naak ah jah peeta kba, ah Sa kpa üng phi xün naak jah peet khoh-a hiit ah yah shak ni. 27 Ah sa kpa sun Kkhyaang Sa-a thoon lü si jaang naak khoh hiit phi ah peet. 28 Ahina phäh-a käh mün ua. Thipääng ktie abäng noh ah sa kpa-a khü kthai ah nih ngjaak ua ksüün pha lok kkhai ni. 29 Thipääng ktie sun ah nih mkhyüh naaka kkhyüh abäng thou lobe kkhaie. Akdoa vehüt khoi ktie sun angshääia xün naak üng thou lobe kkhaie ni. Mkhye mshoh hüt ktie ta thou lobe ulü ah nih mkhye-ea phäh khui kha yah kkhaie ni.

30 Kei hin kah päta hlü eia i phi am poh nääng khoh ngü. Kah Pa Pangsiim noh ah nah mhnüh mtheh-a kba ni kah poh mshah. Kah si jaang naküt ngpyuun kti ni. I lüni ti ta kah tia i phi am poh ngü. Nah tüüi lok ktia tia kah bi kti ni. 31 Kah päta mong kah pyen ta kah shak shi am ngtaang khoh. 32 Lüphi keia mong shak shi kti mat veham kti. Asuna shak shi sun sang kti atia kah kshing ni. 33 Nang nih-e hin noh patiso Johaana veei keia mong nah nih jah kthäh vaai shak u. Ah nih noh kah mong ah pyen sun aksang ni. 34 Kah mong sun kkhyaang noh ah shak shi vai am hlü kyo. Thoong khyah naak nah nih yah vai ua ahin kba kah pyen ni. 35 Johaan hin mei phäih üng täng kti. Mei kdääi üng akvaai jah pek kti. Nang nih-e hin asuna akvaai üng noong vei kho nah nih xe nak ktie ni. 36 Lüphi Johaan noh kah mong ah shak shia kthaka, keia phäh-a däm duh ktia shak shi naak vek kti. Kah Pa Pangsiim noh angpääng vei kah poh mshah vaia khuut hin keia shak shi ni. Asuna khuut sun noh kei hin Pa Pangsiima nah tüih lo atia ngshing ngte shak kti ni. 37 Kei nah tüih lok kti Pa Pangsiim noh phi kah phäh-a nah shak shi peet kti ni. Nang nih-e noh ah nih-a kthai am ngja-u kti, ah mik hmaai phi am hmukhoi u kti. 38 Pangsiima kkhyü am ngngaai ngja u kti. I lüni ti ta Pangsiima nah tüih lo kei hin am nah üm na-u kti. 39 Sangsiim üng angshääia xün naak yah vai tia ngngaai u kti lü Sangsiim mseei lü nah nih bük ktie. Asuna Sangsiim noh keia mong pyen kti ni. 40 Lüphi shak ngshääi yah ei kkhaia kah veeia am lo hlü u kti. 41 Kkhyaangea nah mküüi mkhyah ei vaia am mtun ei bä ngü. 42 Kyo lüphi nang nih-e hin i a mäie atia kah kshin ni. Aksanga ta nang nih-e noh Pangsiim sun am kphya nah u kti. 43 Kei hin kah Pa Pangsiima hiit üng lo kyo ngü she phi nang nih-e noh nah nih nah not u. Lüphi ah päta phun kam üng lok kti ta nah nih dou daang kkhaie ni. 44 Nang nih-e hin mat jah mat mküüi mkhyah ei vai nah nih hlü ei ktie. Nikyo lüphi ah pät däk Pangsiim ta nih mküüi ei vai am mtun ei bä u kti. Asuna thoon lü kei hin i hok kba nah nih nah jum ei khoh kkhaie ni. 45 Kei noh Pa Pangsiima ma-a kah nih ning kbäü ei kkhaiea käh ngngaai u bä. Nah nih üm naak u Moshei noh ni nang nih-e ah ning jah kbäü ei kom. 46 Nang nih-e noh Moshei am üm nak ksang u kti. Asuna thoon lü kei phi ihok kba nah nih nah jum ei kkhaie ni. I lüni ti ta ah nih noh keia mong ah yuk hüt ni. 47 Ah yuk hüt sa sun aksanga am nah nih jum ua phäh-a keia pyen phi am nah jum ei khoh u kti” tilü Jüdah kkhyaange üng ah jah mtheh.