4
Booi Jeishüh noh patiso ah jah peet jah akläke sun Patiso Johaana püiea kthaka nung lo bok ktie atia Pharishe-e noh ah nih hmat lo u sun Booi Jeishüh noh ah kshing lo. Aksanga ta Booi Jeishüh ah pät noh patiso am jah pe-kyo lüphi ah nih läk ktie noh ah nih jah peet u ni. Asun kshing lolüta Booi Jeishüh Jüdah hnea kkhyüh lü Kalile hne da sit be kti. Ah seh lama Shama Rih hne sun leh pah lü sit yah kti. Shama Rih hne Shükha mlüh-a pha vaai kti. Asuna mlüh sun Jakop noh ah sa Joshep üng ah peeta mdek hmün üng säh kti. Asua Jakopa tui soh vek kti. Booi Jeishüh sun lam ah seh naak ngnoi lü jai lolüta asuna tui soh-a ngshut kti. Asun üng kho mhnüüp hnüh kti. Tui la-lok kti Shama Rih nghnu mi asua lok kti üng Booi Jeishüh noh “Tui nah tua” ah ti. Booi Jeishüh-a akläke sun ei ook vai mlüh k'uma kkhyäi vaai ktie. Nghnu mi noh ta “Nang hin Jüdah mjü ni. Kei Shama Rih mjü üng ta i lü tui nah nah tong ni” tilü ah pyen be. (Jüdah mjüe sun noh Shama Rih-ea ei ook naak kbe lung üng am ei o thuum u.) 10 Booi Jeishüh noh “Pangsiima do kya naak jah nang üng tui ning tong kti hin u ni atia am kshin kti. Asuna thoon lü ah nih-a veei xün naak tui am tong kti. Nah tong ei ta ning pek kkhai ni” ah ti. 11 Nghnu mi noh “Angvaaio, nah väh naak vai tui uum phi am ta-ei kti. Tui soh khuui phi thuuk pyei kti ta xün naak tui hoa yah vai ni. 12 Aana tui soh hin kah nih mah pook Jakop noh ah jah peet ni. Ah pät, ah sa nae jah ah kkhyüng ksheie abäng noh ahina tui soh üng ka tui ah nih shum ei hüt u ni. Nang hin noh ‘Jakopa kthaka kah däm duh kti ni’ tilü am pyen khoh kti am ni bä” ah ti. 13 Booi Jeishüh noh “Ahina tui ok kti ta tui o-hlü ham kkhai. 14 Keia peeta tui ok kti naküt ta tui noh am kkhyoot ei ti. Kah peet vai tui ta ah nih üng anghläia puut lok ktia tui ksaai ni. Asuna tui ksaai sun ah nih-a phäh-a anghläia xün naaka thoon kti” ah ti. 15 Nghnu mi noh ta “Angvaaio, asuna tui sun nah pea. Asun üng ta tui noh phi am nah kkhyoot ei ti. Ahin kba tui kah laak ei lo vai phi am hlü ti” tilü ah pyen. 16 Booi Jeishüh noh “Sita, nah khong pa khü vaai lü ahia lo nih bä” ah ti. 17 Nghnu mi noh “Kah khong pa am ve” tilü ah pyen be. Booi Jeishüh noh “‘Kah khong pa am ve’ nah ti hin aksang nah pyen ni. 18 Nang hin kpa mi mhma nah khong pa nah pääng kti. Tuh-a ayüma nah ve püi kpa mi hin aksanga nah khong pa am ni. Nah pyen sang beh kti ni” ah ti. 19 Asun üng ta nghnu mi noh “Nang hin shahma ngsiim ni tia kah ning kshing lo ni. 20 Kei nih Shama Rih-ea pu pae noh ta ahina msuunga ni Pangsiim ah nih hjok khah khoi u. Nang nih Jüdah kkhyaange noh ta Jeirüh Shalem mlüh-a ni hjok khah vai nah nih ti u” tilü ah pyen be. 21 Booi Jeishüh noh “Nghnu mio, kah pyen juma. Kkhyaange noh Pa Pangsiim sun ahina msuung jah Jeirüh Shalem mlüh-a käh ah nih hjok khah naaka ksüün phalok kkhai ni. 22 Nang nih Shama Rih-e noh nah nih hjok khah ua Pangsiim am hmat u kti. Kei nih Jüdah-e noh ta kah nih hjok khah ua Pangsiim kah nih hmat ktie ni. I lüni ti ta Jüdah-e üng ni kuum kyan naak alo. 23 Lüphi hjok khah ksang ktie noh Pa Pangsiim sun Mkhyangsiim üng mlung ksang talü ah nih hjok khah ua ksüün phalok kkhai. Aksanga ta phalo hnüh kti. Asun kba hjok khah ktie sun Pa Pangsiim noh jah hlü ei kti. 24 Pangsiim sun ngmüi mkhya ni. Ah nih hjok khah kti sun üng Mkhyangsiim ngpüi lü mlung ksang üng Pa Pangsiim sun hjok khah ei yah kti” Booi Jeishüh noh ah ti. 25 Nghnu mi noh “Khrito ah nih ti u Meishiah lok kkhai tia kah hmat ni. Ah lo üng nih nih-e üng abäng jah mtheh kkhai” tilü ah pyen. 26 Booi Jeishüh noh “Kei hin asun ni, nah nah shi hlo püi hin Khrito ni” ah ti. 27 Asun üng Booi Jeishüh-a akläke phalobe ktie. Booi Jeishüh noh nghnu mi ah shi hlo püia phäh-a mün pyei ktie. Lüphi “Nghnu mi sun i hlü ei kti” tilü am kthäh u. Booi Jeishüh sun noh phi “I a phäh-a ah shi hlo püi” tia am kthäh u. 28 Nghnu mi sun ah tui uum ta-hüt lü mlüh k'um da sit hüt kti. 29 Kkhyaange üng “Loma ua, keia thoon ve khoi naküt pyen be kti sun bük lo ua. Ah nih hin Khrito vai mä” tilü ah jah mtheh. 30 Kkhyaange sun mlüh-a kkhyüh lo-ulü Booi Jeishüh bük lok ktie. 31 Ah nih pha lo hlaan ua akläke noh “Angvaaio, ei ook ei ma-a” ah nih ti u. 32 Booi Jeishüh noh ta “Nang nih-ea am nah nih hmat ua ei ook kei üng vek kti ni” ah ti be. 33 Akläke noh ta “Ah nih üng kkhyaang mat mat noh ei ook vai tha lo pääng kkhai mä” tilü ngthäh ktie. 34 Booi Jeishüh noh “Kei nah tüih lok ktia ah hlü eia läk lam jah kei üng ah nah poh shak angpääng vei kah poh hin kah ei ook üng täng kti ni. 35 Nang nih-e noh saang aah vai khya kphyü hlüham kti tia nah nih pyen ei ktie. Kei noh ta ‘Lai pooie hin jah bük ua. Saang hmin hnüh kti, aat phyak kti’ tilü kah ning mtheh u. 36 Saang aat kti noh ah aah kheen yah ei kti. Angshääia xün naak vaia ah nih noh saang kshe shän hü kti. Msi sho kti jah aat be kti sun ayüma je kyai kkhaie ni. 37 Asuna thoon lü ‘Kkhyaang mat noh msi sho lü mat noh aat be kti’ ati hin sang kti ni. 38 Kei noh am nah nih khüüi naak khoi u laia saang aat vaai kkhaia nang nih-e sun kah ning tüih u ni. Kkhyaang ksea khüüi naak üng nah nih vaang ei yah ktie ni” tilü Booi Jeishüh noh ah jah mtheh. 39 Asun k'um üng nghnu mi sun noh “Kah thoon ve khoi naküt pyen be kti” ah tia phäh üng asuna mlüh-a vek kti Shama Rih kkhyaang kho hah noh Booi Jeishüh ah nih jum ei lo u. 40 Asun üng ta Shama Rih-e Booi Jeishüh-a veei ah nih pha lo u üng ah nih veeia vek kkhaia ah nih nghui naak ua phäh-a Jeishüh sun mhnüüp nghngih om kti. 41 Ah pät Booi Jeishüh noh ah pyen kkhyüa phäh-a jum ei kti kkhyaang nung lobok bok ktie. 42 Asune noh nghnu mi üng “Nah pyena phäh-a kei nih-e noh tuh hi kah nih jum ei u am ni. Booi Jeishüh-a pyen kshak kah nih päte noh kah nih ngjaak ua phäh-a ah nih hin nih nih kho mdek kkhyaange jah thoong khyah kti Khrito ksang atia kah nih hmat u ni” tilü ah nih pyen u.
43 Mhnüüp nghngih ah om kona Kalile hne da sit kti. 44 Booi Jeishüh noh “Shahma ngsiime sun ah nih tui khyong üng kae noh am jah suh lih ei u” ah ti khoi. 45 Kalile hnea ah pha üng kkhyaange noh ah nih nadou u. I lüni ti ta Jeirüh Shalem mlüh Phyong pooia ah nih seh u üng Booi Jeishüh noh asuna pooia mün sam kshe-e ah jah poh hüte ah nih hmuh u ni. 46 Booi Jeishüh sun Kalile hne Kaana mlüh-a phavaai be kti. Asua tui sun ngbom tuia ah poh naak hüt ni. Asua lok kti aso-yah angvaai mata sa sun Kapanom mlüh-a am khyaih ei. 47 Booi Jeishüh Jüdah hnea kkhyüh lü Kalile hne da ah lo be sun aso-yah angvaai noh ngja-lüta Kapanom mlüh-a kshe hleen kti ah sa sun ah mdo vaai be vaia ah nghui naak. 48 Booi Jeishüh noh “Nang nih-e hin mün sam kshe jah angshing ngte naak am nah nih hmuh u ta i phi am nah nih jum ei hlük ktie” ah ti. 49 Aso-yah angvaai noh “Angvaaio, kah sa ah thih hlaana lo ma-a” tilü ah nghui naak be tü. 50 Booi Jeishüh noh “Sit bea, nah sa do be kkhai ni” ah ti. Asuna kkhyaang sun Booi Jeishüh-a pyen jum lü sit be kti. 51 Ah seh be lama ah xüh shoh eie sun noh dou lo-ulü “Nah sa do be pääng kti ni” tilü ah nih mtheh u. 52 Angvaai noh “Kah sa sun itüh üng do be kti ja” tilü ah jah kthäh üng “Mü ta üng mhnüüp naji mat üng ah mhnat ei kkhyük be kti ni” ah nih ti u. 53 Asuna ksüün sun Booi Jeishüh noh “Nah sa do be kkhai ni” ah tia ksüün ni. Mhnat ei ktia pa noh shüüm lobe lüta ah pät jah ah kkyoong abäng noh Booi Jeishüh ah nih jum ei lo u. 54 Booi Jeishüh Jüdah hnea kkhyüh Kalile hne da ah lo be üng mün sam kshe ah poh naak tuh hin anghngih naak ni.