1 Jüdah-ea khong mang üng ka Niko Teimüh ngming nak kti Pharishe mat vek kti. 2 Niko Teimüh sun Jeishüh-a veei mthan mat üng ta sit lü “Angvaaio, nang hin jah mthei kkhaia Pangsiima ning tüih lo ati sun kah nih kshing u ni. Nah jah mhnüh-a mün sam kshe-e hin Pangsiim am ngpüi ktia u noh phi am poh khoh” tilü ah pyen. 3 Jeishüh noh “Ngngaai ua, kei kah pyen ma kkhai ni. Hmi naak kthaai am yah kti noh ta Pangsiima pe am hmukhoh kuung” tilü ah mtheh. 4 Asun üng Niko Teimüh noh “Kkhyaang kdäm pääng ta i hok kba hmi be kthaai kkhai ni. Ah nua kkhon k'uma lut be lüta am hmi be khoh shoom” ah ti be. 5 Jeishüh noh “Ngngaai ua, kei kah pyen ma kkhai ni. Tui jah Mkhyangsiim üng hmi naak am yah kti ta Pangsiima upa pea am vaang khoh. 6 Nghngi siim noh nghngi siim sa nak kti. Mkhyangsiim noh ta kkhyaanga k'uma vaang lü ngmüi mkhya ngsiima hmi kti. 7 ‘Nang nih-e abäng akthaaia nah nih hmi be yah kkhaie ni’ kah tia phäh käh mün sama. 8 Kho khi hin ah khi naak hlü da khi kti ni. Kho ah khi kthai nih ngja-kyo lüphi hoa kkhyüh lolü ho da sit kkhai ati sun am nih kshing khoh. Mkhyangsiim üng hmi naak kthaai yah naküt kti phi ahin kba ni” ah ti. 9 Niko Teimüh noh ta “Asun ta i hok kba thoon khoh kkhai ni” tilü ah kthäh. 10 Jeishüh noh “Nang hin Isare-e üng Pangsiima thuum jah mthei ktia thoon kti lü ahin phi am nah kshing ktio. 11 Ngngaai ua, kei kah pyen ma kkhai ni. Kei nih-e noh kah nih kshing sun kah ning jah mtheh ni. Kah nih hmuh u sun kah nih shak shi ni. Asuna kyalüphi kah nih shak shi sun nang nih-e noh am jah jum u kti. 12 Kho mdek üng shääng kti sun ning jah mtheh u ngüshe am nah nih jum u ta kkhaan kho üng shääng kti kah ning jah mtheh ktoih-a ta i hok kba nah nih jum khoh vai u ni. 13 Kkhyaang Sa-a thea u phi kkhaan khoa am kaai. Ah nih va kkhaan khoa kkhyüh kyum lok kti. 14 Moshei noh moa nglei üng ah pyaan kphyua lup sun yo nglooi üng ah shäng. Asuna ng'yüia Kkhyaang Sa phi shäng khaam ei yah kkhai ni. 15 Asuna phäh-a ah nih sun jum naküt ktie ah nih üng shak ngshääi yah kkhaie ni” tilü Jeishüh noh ah jah msuh mtheh. 16 Pangsiim noh kho mdek kkhyaang sae i hok kba onga ah jah kphya naak ni ti ta ah sa sun jum ei naküt ktie käh sim pyak ulü shak ngshääi ah nih yah vai ua ah sa kpa mat däk sun ah khyah ni. 17 I a thoon lüni ti ta kho mdek kkhyaange sun mtaam jah pek kkhaia Pangsiim noh ah sa kpa sun kho mdeka ah tüih lo am ni. Jah thoong khyah kkhaia ah tüih lo ni. 18 Ah sa jum ei naküt ktie sun Pangsiim noh mkhyea phäh mtaam am jah pe. Am jum ei kti ta ah si jaang pääng kuung ni. I lüni ti ta Pangsiima sa mat däk sun am ah jum eia phäh ni. 19 Pangsiim noh mkhyea phäh mtaam ah jah peet vai i hok kba ah mkhyah ni ti ta Pangsiima akvaai sun kho mdeka vaang lolü kkhyaangea poh mshah-e she pi pi ktia thoon lü akvaaia kthaka anghmüp sun hlü ei ktie ni. 20 Mkhye poh naküt ktie hin akvaai sun am hmuhlü lü ah nih poh mshah kshe sun käh ah pou vaia akvaaia k'uma am vaang lo hlü u. 21 Pangsiima hlü eia vek kti ta akvaaia k'uma vaang lok kti. I lüni ti ta Pangsiim ksang nalü ah poh mshah sun apou lo naaka thoon kti.

22 Kona Booi Jeishüh jah akläke Jüdah hne da sit ktie. Asua ayüma ve ulü kkhyaange patiso ah jah peet. 23 Patiso Johaan noh phi Salim mlüh-a pei Enon ngnama patiso jah pek kti. Asua tui kho hah vek kti. Kkhyaange Johaana veei lo-ulü patiso khaam ei ktie ni. 24 Asun k'um üng Johaan khup üng am phep ham u. 25 Johaana akläke akhäk jah Jüdah kkhyaang mat noh ah nih ngthih ei thuuma mong ngthäh ngkhyah lü ngdäh ngkaih ktie. 26 Ah nih-e Johaana veei lo-ulü “Angvaaio, ngngaai ma-a. Jotan mlik tui sa yea nah ve k'um üng nah veeia lolü ah nih-a mong shak shi nah pyen sän nah shüüm be ham kti mä. Ah nih noh phi patiso jah pelü ah veeia kkhyaang naküt lok ktie ni” tilü ah nih mtheh lo u. 27 Johaan noh “Pangsiim noh am ah jah peet ta i phi am nih yah khoh. 28 Kei noh ‘Kei hin Khrito am ni. Pangsiim noh ah ma-a ah nah tüih lo ni’ tilü kah pyen khoi üng nah nih päte hin shak shia nah nih thoon ktie ni. 29 Sa kla noh sa ngla ah laak ei. Sa kla ei xe nalü ah shi hlo ei sun sa kla eia nglooi püi noh ngjalü ah püia kba je kyai hnga kti. Asun kba ni, kei phi kah je kyai pyei kti. 30 Ah nih ta soong taai lok kkhai ni. Kei ta nah läk ti ngseek lo hnüh kkhai” tilü Johaan noh ah pyen. 31 Kkhaan khoa kkhyüh lok kti hin kkhyaang abänga kthaka jou taai mah kti. Kho mdek kkhyaang ta kho mdek üng shääng kti. Kho mdek khoa mong ni ah pyen. Kkhaana kkhyüh kyum lok kti sun abäng nääng pääng kti. 32 Ah nih noh ah hmungjaak naküt sun shak shi be kyo lüphi ah pyen sun u noh phi am su ngngaai ngtu u. 33 Ah pyen kthai su ngngaai kti ta Pangsiim sun ksang kti ati sun shak shi kti ni. 34 Pangsiima tüih lo mat sun noh Pangsiima kkhyü be pyen kti. I lüni ti ta ah nih üng käh kkhe käh nüt khoh Mkhyangsiim sun Pangsiim noh ah peet ni. 35 Pa Pangsiim noh ah sa sun kphya nalü abäng naküt sun ah up shak ni. 36 Kei, Pangsiima Sa nah jum ei naküt kti noh shak ngshääi yah pääng kti ni. Ah Sa am jum ei kti ta shak ngshääi am hmukhoh. Pangsiima mlung kshe khaam ei shet kti ni.