2
1 Amhnüüp kthuma mhnüüp üng Kalile hne Kaana mlüh-a salaak pooi vek kti. Jeishüh-a nu phi asua vek kti.
2 Jeishüh jah akläke phi asuna pooia ah nih jah khü ei u.
3 Ngbom tui päih lolüta Jeishüh-a nu noh “Ngbom tui am ve ti” tilü Jeishüh üng ah mtheh.
4 Jeishüh noh “Kah ktüüm am hmat kti. Keia ksüün am pha ham” ah ti.
5 Jeishüh-a nu noh xüh shoh-e üng “Ah ning jah xüh naküt poh ubä” tilü ah jah mtheh.
6 Jüdah-e sun ah nih ngthih ei u üng thuum seen amjü mjü vek kti. Asuna phäh asua nghnga k'e nglung kkhyuk vek kti. Nghnga k'e nglung mat sun taang nghngih bang vaang kti.
7 Jeishüh noh xüh shoh-e üng “Ahina nghnga k'e-e üng tui jah kbe ua” ah ti. Xüh shoh-e noh hleei ei lok ktia tui ah nih jah kbe u.
8 Asun kona Jeishüh noh “Tui phäih üng vät lü pooi khong üng pe-vaai ua” ah ti. Ah pyena kba xüh shoh-e noh ah nih poh u.
9 Asun üng tui sun ngbom tuia thoon lok kti. Asuna ngbom tui sun pooi khong noh ah mdeh. Ngbom tui hoa ka atia am hmat. Lüphi tui thaan kti xüh shoh-e noh ta i üng ka tia ah nih kshing kyo u. Asun üng sa kla sun ah khü.
10 Pooi khong noh “Kkhyaang naküt noh ta aksüka ngbom tui shü jah tu ma ktie. Asun kkhine noh o-ma ulü hnua alooi jah tu ktie ni. Nang noh ta akdo bok ashü sun pooi kphyooi säpa nah taak ham ni” ah ti.
11 Jeishüh noh ahina mün sam kshe sun Kalile hne Kaana mlüh-a aksüka ah poh ni. Ah jou taai sun ah ngshing ngte shak ni. Akläke noh phi ah nih jum ei u.
12 Asun kona Jeishüh, ah nu jah ah nae ni, akläke mah mah Kapanom mlüh-a sit ulü mhnüüp kkhyüh bang om ktie.
(Mate 21.12-13; Marküh 11.15-17; Lükah 19.45-46)
13 Jüdah-ea Phyong pooi mhnüüp säh lolüta Jeirüh Shalem mlüh-a Jeishüh sit kti.
14 Hjok khah ima to, she, müüm jooi ktie phi, ngui hlai ulü ngui mtaan naaka ma-a ngshut ktie phi ah jah hmuh.
15 Asun üng yüüi ngkhep pyaang lü to, she-e mah abäng hjok khah im nua kkhyüh ah jah kshät. Ngui hlai ktiea ngui mtaan naak phi jah buuk mhlat-in lü ah nih nguie phi joong pyaai ei hü kti.
16 Müüm jooi ktie üng phi “Ahine hin kho kpunga jah seh püi ua. Kah Pa-a im hin joih naaka tuh ta käh poh ti bing bing u bä” tilü Jeishüh noh ah jah mtheh.
17 Sangsiim üng ng'yuk kti ta “Booi Pa-a ima phäh kah mtun ei naak noh kah mlung nah uui kti ni” tilü vek kti. Asun akläke noh ah nih shüüm lo u.
18 Jüdah khonge ah veeia lo-ulü “Ahin kba nah poh naak khoh nah hiit ave ta angshing ngte naak üng jah mhnüh shüma” ah nih ti u.
19 Jeishüh noh phi “Ahina hjok khah im hin phye phyat-in ua. Kho mhnüüp kthum üng kah sha-be kkhai ni” tilü ah pyen.
20 Jüdah-e noh ta “Hjok khah im nu hin kho kum kphyü kip jah kkhyuk ah nih na-shak u ni. Nang noh ta mhnüüp kthum üng nah shakhoh to kkhai mä” ah nih kthäh u.
21 Asuna kyalüphi Jeishüh noh ah päta ah puum sha hjok khah im nu üng msäp lü ah pyen kyo ni.
22 Thih naak üng ah thoh be kona Jeishüh-a pyen sun akläke noh ah nih shüüm be u. Sangsiim jah Jeishüh-a kkhyü sun akläke noh ah nih jum u.
23 Jeishüh Phyong pooi k'um üng Jeirüh Shalem mlüh-a velü kkhyaang kho hah-e noh ah nih jum u. I lüni ti ta mün sam kshe ah poh sun hmu-ulü ah nih jum u.
24 Asuna kyalüphi Jeishüh noh kkhyaang abäng kshing ktia thoon lü asune sun am jah üm na.
25 Ah nih noh kkhyaangea mlung k'um sun kshing päih ktia thoon lü u noh phi kkhyaangea mong ah nih mtheh vai am hlü ngtu.