19
1 Asun kona Pilat booi noh ah jah kpaai shak.
2 Romah ngtuk kpoh-e noh nghjuun nghling nu sun kkä ulü ah nih kbün u. Jih shen phi ah nih mshui u.
3 Booi Jeishüh-a ma-a lo-ulü “Jüdah-ea shang phuhlango, nah mya kti mä. Nah shak shaaü she” tituhan ulü ah hmaai üng ah nih kbeih u.
4 Pilat booi sun lut lobe tü lü “Bük ma ua. Nah nih ma-a kah lo püi be tü. Ah mkhye naak am hmulaang ngü atia kah ning jah hmat hlü shak kti ni” tilü ah pyen.
5 Asun üng Booi Jeishüh sun lut lok kti. Nghjuun nghling ngbün lü jih shen phi ngshui ei kti. Pilat booi noh “Kkhyaang nghngi siim hin bük ua” ah ti.
6 Khotu ngsiim kdäme noh ah nih hmuh u üng “Baan lam ktung üng thih shaka, thih shaka” tilü akthai kdäma ngpyaang ktie. Pilat booi noh “Asun kba ani khom ta nah nih päte noh khü ei u kti lü baan lam ktung üng mthih ei ua. Kei noh ta ah mkhye naak am hmu-ngü” tilü ah pyen.
7 Jüdah kkhyaange noh “Ah nih hin Pangsiima sa-a hana ngsom ktia thoon lü kah nih thuuma kba thih khaam ei yah kkhai” tilü ah nih mshak be u.
8 Pilat Booi noh asun kba ah nih pyen ngjalü Booi Jeishüh-a thih naak mkäih ah mkhyah vai sun kyüh ei lobok bok kti.
9 Pilat Booi noh “Nang hoa ka ni” tilü ah kthäh üng Booi Jeishüh noh i phi am ti be.
10 Pilat Booi noh “Am nah nah ngsi ngjaang püi ktio. Kei noh kbaan lam ktung üng ning mthih khoh ni, ning mhlät khoh-a hiit kei üng vek kti atia am nah hmat ktio” tilü ah kthäh.
11 “Pangsiim noh ahin kba ah mkhyah mtaang am ania ta nah hiit am ve. Asuna thoon lü nah kut k'uma kei nah ap kti noh ni ah mkhye bok kom” tilü Booi Jeishüh noh ah pyen.
12 Asuna thoon lü Pilat booi noh Booi Jeishüh-a läh naak vai mtun ei lok kti. Jüdah kkhyaange noh ta “Nang noh ah nih nah hläh ta Kesha shang phuhlanga püi am nik kti. Ah pät shang phuhlanga hana soom ei kti noh Kesha shang phuhlang sun kpet mjak kti ni” tilü ngpyaang ktie.
13 Pilat booi noh asun ah ngjaak üng Booi Jeishüh sun kho kpunga ah luh lo püi. Kona si jaang ngoh naak üng ngshut kti. Asun sun lung peeng ah nih phah naak pyeia kkhaana vek kti. Asuna lung peeng sun Hepye läka Kapata ah nih shui u.
14 Asun sun Phyong Pooia kkhin sun mhnüüp üng mhnüüp ngshunga thoon kti. Pilat booi noh Jüdah kkhyaange üng “Nah nih shang phuhlang u hin bük ua” tilü ah pyen.
15 Kkhyaange noh “Mkhyüh vai ni, mkhyüh vai ni! Baan lam ktung üng nah mthih vai!” tilü ngpyaang pyei ktie. Pilat booi noh ta “Nah nih shang phuhlang u baan lam ktunga kah jah hnim shak vai bä” tilü ah jah kthäh. Khotu ngsiim kdäme noh “Kesha shang phuhlanga thea kah nih shang phuhlang kse am ve” tilü ah nih hai u.
16 Asun üng ta Pilat booi noh Booi Jeishüh sun baan lam ktung üng ah nih hneen vai ua ah jah ap.
(Mate 27.32-44; Marküh 15.21-32; Lükah 23.26-43)
17 Romah ngtuk kpoh-e noh Booi Jeishüh ah nih seh püi u. Ah nih sun mlüh kpunga shot lü ah baan lam ktung phi kkot kti. Ah nih nih-e sun lu kooia ah nih shuia hnüna phalok ktie. Asun sun Hepye läka Kolah Kotah-a phi ngshui kti.
18 Asua Booi Jeishüh sun baan lam ktunga ah nih hneen u. Kkhyaang klääng xooi phi ah ksong kkheeta ah nih jah hneen hnga u. Booi Jeishüh anglunga vek kti.
19 Pilat Booi noh sa jah yuk shak lü baan lam ktung üng ah jah kdap shak. Asuna sa ta “Nasaret mlüh üng ka Jeishüh, Jüdah-ea shang phuhlang” tilü ni.
20 Booi Jeishüh ah nih hneen naak ua hnün sun mlüh üng säh ktia thoon lü Jüdah kkhyaang kho hah noh asuna sa sun ah nih büh u. Asuna sa sun Hepye läk, Romah läk, Kärih läkea ng'yuk ei kti.
21 Khotu ngsiim kdäme noh ta Pilat booi üng “Jüdah-ea shang phuhlanga käh yuka. ‘Ahina kkhyaang noh Jüdah shang phuhlanga kah thoon kti tilü ah pyen ni’ tilü yuka” ah nih ti u.
22 Pilat booi noh ta “Kah yuka kba taak vai ni” tilü ah jah kpet.
23 Ngtuk kpoh-e noh Booi Jeishüh sun kbaan lam ktunga hneen ma ulü ah shui shak phi amte mte su kphyüa yet lü mat siim üng ah nih loh ei u. Ah jih ngvaih phi ah nih loh ei peet u. Asuna jih sun ngshü ei kuung ktia ngtak ei kti.
24 Ngtuk kpoh-e noh “Ahina jih ngvaih ta käh kteek vai. U noh ah yah vai sun sung keek nih ngjuuk kkhaie” tilü mat jah mat ngsi ngjaang ktie. Sangsiim üng ang'yuka kba ahin kba thoon velok kti. Sangsiim üng ng'yuk kti ta “Ah nih nih-e noh kah shui shak ng'yet ei ktie. Kah jih ngvaih ei yah vaia sung keek ngjuuk ktie” tilü vek kti.
25 Baan lam ktunga hlong su Booi Jeishüh-a nu ni, ah nua na ni, Klophah-a kkhyu Marih ni, Marih Maka Talen ni, nghnu mi kphyü ngdüüi ktie.
26 Booi Jeishüh noh ah nu jah ah mhlä kphya naak akläk sun ah jah hmuh üng ah nu üng “Nääio, sän nanga sa ni” tilü ah mtheh.
27 Kona akläk üng phi “Asän nah nu ni” ah ti. Asuna kkhyüh asuna akläk noh Booi Jeishüh-a nu sun ah ima ah khü.
(Mate 27.45-56; Marküh 15.33-41; Lükah 23.44-49)
28 Asun kona ah khuut naküt ngpääng kti atia ah hmat. Sangsiima kba kuunga athoon ve lo vaia “Tui noh nah kkhyoot ei ve” ah ti.
29 Ngbom tui k'am ah hlonga vek kti. Tui kpaan sun ngbom tui k'am üng msooi lü sung keek üng ah mpyong su ah nih shäng peet u.
30 Booi Jeishüh noh ngbom tui sun olü “Abäng ngpääng ve” tilü pyen ma lü ngmüm lü thik kti.
31 Asuna mhnüüp sun Phyong Pooia kkhin sun mhnüüpa thoon kti. Akho ngooi ta Pangsiim ngam püi mhnüüpa phi thoon lü Jüdah khong mange noh baan lam ktunga hneen ei ktia am jah ta-hlü ti u. Jüdah khong mange noh ah nih jah hnim ua kkhyaange sun ah nih jah mkhyüh hlü ua phäh ah nih thih lan vaia ah nih kho nglaan sun jah kkhäng bät vaia Pilat booia veei ah nih tong u.
32 Asun üng ngtuk kpoh-e sun sit ulü mata kho ah nih jah kkhäng bät u. Kona vaang da ka-a kho nglaan phi ah nih jah kkhäng bät be tü u.
33 Booi Jeishüh-a veei ah nih pha u üng ah nathi pääng she hmu-ulüta ah kho am kkhäng bät ti u.
34 Ngtuk kpoh mat noh ah ksei üng Booi Jeishüh-a kpem sun hei shun lü ahunata thi jah tui lut lok kti.
35 Asun hmuk kti akläk noh nang nih-e noh phi nah nih jum ei lo vai ua shak shi kti. Ah pyen kshak sun sang kti. Shü yü kti atia kshing ei kti.
36 Sangsiim üng “Ah yuh yo mat laang phi am bät hnget yah” tilü ng'yuk ktia kba thoon ve lok kti.
37 Sangsiim üng “Ah nih nih-e noh ksei üng ah nih tuk u sun hei bük kkhaie” tilü phi ng'yuk kti.
(Mate 27.57-61; Marküh 15.42-47; Lükah 23.50-56)
38 Asun kona Arih Mate mlüh-a ka Joshep noh Pilat booia veei sit lü Booi Jeishüh-a yook ah laak be vaia ah tong vaai. Joshep sun Booi Jeishüh-a akläka thoon kyo lüphi Jüdah khong mange jah kyüh lü ampyua Booi Jeishüh jum ei ktia thoon kti. Pilat booi noh ä lüta Joshep noh Booi Jeishüh-a yook ah seh püi.
39 Ahlaan üng mthana Booi Jeishüh-a veei lok kti Niko Teimüh noh Joshepa hlonga ngkhyüi vaai lü ah nih läka Mürah jah Alojah ah nih shuia thing kpyü üng ah nih poh ang'uui sun khin mku am tan kti ah seh püi.
40 Ah nih nih noh Booi Jeishüh-a yook sun la nih lü Jüdah thuuma kba mkhyüh vai ah nih piit pyaang. Yook sun ang'uui mah mah-a jih üng ah nih hloop tim tim-in.
41 Baan lam ktung üng Booi Jeishüh ah nih hneen naaka hlonga ngvoong vek kti. Asuna ngvoong k'um su u phi am ah nih mkhyüh naak ham laang u msüm hnün lung khuui mat vek kti.
42 Asuna mhnüüp sun Jüdah-ea Phyong Pooi kkhin sun mhnüüpa thoon lü lung khuui sun phi säh lüta Booi Jeishüh-a yook sun asuna k'uma ah nih xon vai.