1 Nah nih jum ei naak käh nah nih hoih vai ua ahin kba kah pyen ni. 2 Ah nih nih-e noh nang nih-e sun Sangsiim ngthei naak kyonga kkhyüh ning jah mshot kkhaie ni. Aksanga ta ning jah hnim ktie noh Pangsiima hlü ei poh ktiea ah nih ngngaih ua ksüün phalo hnüh kkhai. 3 Ah nih nih-e noh Pa Pangsiim jah kei am jah hmat ulü nang nih-e sun asun kba ning jah poh kkhaie ni. 4 Lüphi asune sun kei noh nang nih-e üng kah ning jah namtheh ei kuung ni. I lüni ti ta asun kba ah nih ning poh vai ua ksüün ah pha lo üng ta kei noh asune sun kah ning jah mtheh ei pän atia nah nih shüüm ei vai ua phäh ni. Asüka nah nih hlonga kah veham ktia thoon lü asune am kah ning jah mtheh u.

5 Tuh ta kei nah tüih lok ktia veei kah sit be hnüh kkhai. Lüphi ‘Booi Pao, hoa nah sit kkhai ja’ tilü nang nih-e üng u noh phi am nah kthäh u kti. 6 Tuh-a ahin kba kah pyena phäh nah nih puk she pyei ktie. 7 Ngngaai ua, kei kah pyen ma kkhai ni. Kei kah seh be hin nang nih-ea phäh do bok kkhai. I lüni ti ta kei am kah seh ta ning jah kpüi kpak kkhai mat sun am lo. Kah seh-a athoon ta kei noh ah nih sun nah nih veeia kah tüüi lok kkhai. 8 Asuna kpüi kpak ah pha lo üng ta kho mdek kkhyaange üng mkhyea mong khye ktia ah nih su ngngaih sun jah kshing hmat shak kkhai. Pangsiima ngpyuun naak jah si jaang naaka mong phi aksanga jah kshing shak kkhai ni. 9 Kho mdek kkhyaange noh kei am nah jum ei ulü mkhyea mong ah nih ngngaih u khye shoh kti. 10 Ah nih nih-e noh Pangsiima ngpyuun naaka mong ah nih su ngngaih u khye kti. I lüni ti ta kei hin kah Pa Pangsiima veei sit ngüshe nang nih-e noh am nah hmuti u kti. 11 Ah nih nih-e noh mkhyea mong ah nih su ngngaih u phi khye shoh kti. I lüni ti ta hina kho mdek up kti sun Pangsiim noh ah si jaang pääng ni. 12 Kah ning jah mtheh hlü kho hah veham kyo kti. Nang nih-e noh tuh-a ta i am ngja-kya ham u kti. 13 Lüphi Pangsiima mong aksanga ngshing ngte shak kkhai Mkhyangsiim ah pha lo üng ah nih noh abäng sun aksanga kba ning jah hmat shak kkhai ni. Ah päta mkhüh ktüüma pyen kkhai am ni. Ah hmuh ngjaak ni ah pyen be kom. Asun kba ni malam vai phi ning jah mtheh kkhai. 14 Ah nih noh kah kkhyü lou ei lü ning jah mtheh mkhyah kkhaia thoon lü keia jou taai nglou ngthang shak kkhai. 15 Kah Pa Pangsiima ka naküt hin kei üng shääng ei kti ni. Asuna thoon lü ‘Mkhyangsiim noh keia kkhyü lou ei lü ning jah msuh mtheh kkhaie’ tilü kah pyen ni.

16 Noong vei sa ni alo ti kom am nah hmuti u kti. I vei am lobe ham lü nah nih nah hmube tü kkhaie. I lüni ti ta kah Pa Pangsiima veei kah sit kkhai” tilü ah pyen. 17 Akläke akhäk noh “I ah ti hlü ni bä. Ah nih noh ‘Noong vei sa ni alo ti kom am nah hmuti u kti. I vei am lobe ham lü nah nih nah hmube tü kkhaie. I lüni ti ta kah Pa Pangsiima veei kah sit kkhai’ tilü jah mtheh kba. 18 ‘Noong vei’ ah ti ta i a joong ni. I a ngkho ah pyen laang phi am nih hmat u ta” tilü mat jah mat ngthäh ngkhyah ktie. 19 Booi Jeishüh noh ta akläke noh ah nih ngthäh ngkhyah hlü sun ah kshing ni. Asuna thoon lü ah nih noh ta “Kei noh ‘Noong vei sa ni alo ti kom am nah hmuti u kti. I vei am lobe ham lü nah nih nah hmube tü kkhaie’ tilü kah pyen. Asuna phäh-a mat jah mat nah nih ngthäh ngkhyah ktie am ni bä. 20 Ngngaai ua, kei kah pyen ma kkhai ni. Nang nih-e kyap yün ng'yeeng veei tong u kti lüphi kho mdek kkhyaange ta je kyai kkhüt kkhaie. Puk she lopyei kyo u kti lüphi nah nih ktha sheet naak sun je kyai naaka thoon lok kkhai ni. 21 Nghnu mi ah sa üng ah puum sha ah mshoh eia phäh puk shek kti. Lüphi ah sa kona ta ah mshoh mhleei ei sun ah mhnih-in be ni. I lüni ti ta ah sa sun hmulü je kyai ei kti. 22 Nang nih-e phi asun kba ni. Tuh hi puk she kyo u kti lüphi kah ning jah hmuh lo be üng ta nah nih je kyai tong kkhaie. Asuna je kyai naak sun u noh phi am ning ksim kpyak peet khoh u. 23 Asuna mhnüüp üng ta nang nih-e noh i phi am nah kthäh kkhyah ti u kti. Ngngaai ua, kei kah pyen ma kkhai ni. Kah ngming shum ei lü kah Pa Pangsiima veei nah nih tä sham naküt ning jah pek kkhai ni. 24 Tuh veia kah ngming shum ei lü Pa Pangsiima veei i phi am tä sham ei ham u kti. Tä ei ua. Pangsiim noh ning jah peet kkhaie ni.

25 Asune sun pum üng msäp ngüshe kah ning jah msuh mtheh kti. Lüphi pum üng käh msäp ti ngüshe Pa Pangsiima mong angtea kah ning jah mtheh vai ua ksüün phalo hnüh kkhai. 26 Asuna mhnüüp üng kah ngming shum ei lü nah nih tä sham kkhaie. Nah nih phäh-a Pangsiima veei kah ning jah nghui ngpha peet kkhai kah ti am ni. 27 I lüni ti ta nang nih-e noh kei nah kphya na-u kti lü Pa Pangsiima kkhyüh kah lok kti atia nah nih jum ua phäh-a ah pät Pa Pangsiim kuung noh ning jah mhlä kphya nak kti. 28 Kei hin Pa Pangsiima kkhyüh joong lolü hina kho mdeka kah lok kti. Tuh-a hina kho mdeka khyüh kah joong be kkhai. Pa Pangsiima veei kah sit be hnüh kkhai” tilü ah jah mtheh. 29 Ah nih läk ktie noh ta “Tuh-a pum üng käh msäp mshuui xa lü angtea nah jah mtheh ni. 30 Nang hin abäng naküt hmat kti lü u phi nah kthäh bä vai am hlü kti atia kah nih kshing lo hnüh u. Asuna thoon lü nang hin Pangsiima kkhyüh nah lok kti atia kah nih jum ei lo hnüh u ni” tilü ah nih mtheh u. 31 Booi Jeishüh noh “Tuh ta nah nih jum ei lo ksang hnüh mjoh ktie mä. 32 Ngngaai ma ua, nang nih-e hin ngpyeeng hü lü mat siim mat siim üng nah nih ima sit hü be u kti lü kah pät sa nah nih nah ta-hüt kkhaie ni. Asun vai sun phalo hnüh kkhai. Aksanga ta phalo pääng kti. Lüphi kah pät sa kah vek kti am ni. Pa Pangsiim sun kah hlonga aläa vekyet kti. 33 Nang nih-e hin kei üng ngman ei u kti lü nah nih diim ye naak vai ua asuna kkhyüe sun kah pyen ni. Hina kho mdek kkhyaange noh ning mkhuh mhlih kkhaie. Lüphi käh sääi ua. Kei noh hina kho mdek kah nääng pääng ni” tilü ah pyen.