1 Booi Jeishüh noh “Kei hin ngbom phung ksanga kah thoon kti. Kah Pa Pangsiim ta ngvoong mah pa ni. 2 Am ngthei ktia ngbaan naküt keia kkhyüh ah nih noh mooi bät kkhai. Ngthei ktia ngbaan naküt ta sha lü ah ngtheih bok vaia kbäät lü ah pyaan. 3 Nang nih-e hin kah pyen kshaka kkhyü üng asuna kbääta kba Pa Pangsiim noh ah ning jah pyaan pääng u ni. 4 Kei üng ngman ei kyet ua. Kei noh phi kah ning jah nglooi ei vaai püi shet kkhai. Ah ngbaan sun ah pät däk am ngthei paai khoh. Asuna ngbaan sun ngbom phung üng ngman ei lü ni ah ngtheih paai khoh kom. Asun kba va nang nih-e phi kei üng ngman ei u kti lüni nah nih ngtheih paai khoh kom u. 5 Kei hin ngbom phunga thoon ngüshe nang nih-e hin angbaana nah nih thoon ktie. Kei üng ngman ei naküt kti ta kei noh phi nglooi ei püi be ngüshe ah nih sun kho hah kuunga ngthei paai kkhai. I lüni ti ta kei üng ngkyalü nang nih-e noh i sa phi am khyaih khoh laang u kti. 6 Kei üng am ngman ei kti ta mooi bät-in lü ah nih kpyaai-in u angbaana kba ng'yong ei lok kti. Asuna ngbaane sun kkhyaange noh jah mkhääm ulü mei üng ah nih jah shi-in u. 7 Nang nih-e sun kei üng ngman ei u kti lü keia kkhyü phi shüüm lü nah nih ksang naak shet u ta nah nih tä ei naküt kah ning jah poh peet kkhaie ni. 8 Nang nih-e kho hah pa-a nah nih ngtheih paai u ta kah Pa Pangsiima jou taai nglou ngthang lok kkhai. Asun üng va keia akläka nah nih thoon u sun ngshing ngte lobok kkhai. 9 Pa Pangsiim noh kei ah nah kphya naaka kba kei noh phi nang nih-e kah ning jah mhlä kphya nak kti. Kah ning jah mhlä kphya naak vaai shet vaia kei üng ngman ei kyet ua. 10 Kei noh Pa Pangsiima thuume sun ksang nalü ah nih üng ngman ei kyet ngüshe ah nih noh phi anghläia nah kphya nak kti. Asun kba ni nang nih-e noh phi kah thuume sun ksang nalü kei üng nah nih ngman ei kyet u ta kah ning jah mhlä kphya na-vaai shet kkhai ni. 11 Keia kba nah nih je kyai vai u jah nah nih xe xok naak tong vai ua asun kba kah ning jah mtheh pääng u ni. 12 Kah thuum ta ‘Kei noh kah ning jah kphya naaka kba mat noh mat nah nih püi mhlä kphya na-ua.’ 13 Mat mat noh ah püiea phäh ah shak ah ton ta asuna kthaka däm duh kti mhlä kphya naak am ve ti. 14 Nang nih-e noh kah pyena kba kkinga nah nih poh mshah u ta keia püia nah nih thoon ktie ni. 15 Tuh-a kkhyüh lü kei noh xüh shoh-a am ning shui ti u-ngü. I lüni ti ta xüh shoh noh ah mah pa-a poh mshah sun am hmat. Kei noh ta kah Pa Pangsiima kkhyüh kah ngjaak naküt kah ning jah mtheh be ktia thoon lü ‘Kah looi püio’ tilü kah ning jah khü u ni. 16 Nang nih-e noh kei nah nih nah xü kse am ni. Kei noh va nang nih-e sun ning jah xü u-ngüshe ngthei paai kkhaia kah ning jah taak u. Nang nih-e hin käh sim pyak laang ktia aktheih-a nah nih ngthei kkhaie. Keia ngming pyen lü Pa Pangsiima veei nah nih tä ei naküt ning jah pek kkhaie ni.

17 “Mat jah mat nah nih püi mhlä kphya na-ua” tilü kah ning jah msuh mtheh ktie. 18 Kho mdek üng shääng ei kti kkhyaange noh ah ning jah mlung naak u ta asun hlaana kei nah sok ei ma ktie ni atia shüüm ei ua. 19 Nang nih-e hin hina kho mdek üng nah nih shääng ei u ta kho mdek kkhyaange noh ah nih nglooi püia kba ning kphya nak kkhaie. Lüphi kei noh nang nih-e sun hina kho mdeka kkhyüh ning xü u-ngüshe kho mdek üng am shääng ei ti u kti. Asuna thoon lü kho mdek üng shääng ei kti kkhyaange noh ning mlung nak ktie. 20 Kei noh ‘Xüh ei hin ah mah pa-a kthaka am däm duh’ kah ti khoi sän nah nih shüüm ham ktie am ni bä. Ah nih nih-e noh ah nih nah mkhuh mhlih u ta nang nih-e phi ning mkhuh mhlih hnga kkhaie. Ah nih nih-e noh kah kkhyü ah nih nah ksang naak u ta nah nih pyen u phi ning jah ksang nak kkhaie. 21 Nang nih-e hin keia akläka nah nih thoon ua phäh-a asun kba nah nih shoong yah kkhaie ni. I lüni ti ta kei nah tüih lok kti sun am hmat u. 22 Kei hin lo ngüshe am kah jah msuh mtheh lo ta Pangsiim noh kho mdek kkhyaange ah jah kbäü ei naak vai am ve. Tuh ta mkhye am ve atia am ngsiim khoh ti u. 23 Kei nah sok ei kti noh kah Pa Pangsiim phi mlung nak kti. 24 Kei noh u noh phi am ah poh khoi ham ngshing ngte naak am kah poh ta ah jah kbäü ei naak vai am ve laang. Lüphi kah poh mshah khuute sun kho mdek kkhyaange noh hmukyo ulüphi kah Pa Pangsiim jah kei ah nih jah sok ei u. 25 Lüphi nah nih Sangsiim üng ng'yuk kti malam pyen üng ‘Amdanga nah sok ei ktie ni’ tilü vek ktia kba kuunga tuh-a thoon yah ktie. 26 Pangsiima mong aksanga ngshing ngte shak lü Mkhyangsiima thoon kti kpüi kpak sun Pangsiima kkhyüh lok kkhai. Kei noh ah nih sun Pa Pangsiima kkhyüh nah nih veeia kah tüih lok kkhai. Ah nih noh kah mong shak shi kkhai ni. 27 Kei noh sut ei lü kkhyaange kah jah msuh mtheh-a kkhyüh lü kah hlonga ayüma nah nih ve ua phäh-a nang nih-e phi kah mong nah nih shak shi kkhaie ni.