1 Booi Jeishüh noh “Käh pyang ma ua. Pangsiim jum ei ua. Kei phi nah üm na-ua. 2 Kah Pa Pangsiima ve naaka im kho hah pa vek kti. Kei hin nah nih ve naak vai ah napiit pyaang kkhaia kah sit kkhai. Asun kba am athoon ve vai ta nang nih-e üng ahin kba i am ning jah mtheh laang ngü. 3 Kei noh nah nih ve naak vai pyaang vaai ma ngüshe kah lobe tü kkhai. Kah ve naaka nang nih-e phi nah nih ve lok kkhaiea kah ning jah seh püi vai ni. 4 Kei hoa kah seh nah nih hmat ktie. Seh naak lam phi nah nih kshing ktie” tilü ah jah mtheh mkhyah. 5 Tomah noh ta “Booi Pao, hoa nah seh atia am hmat u ngü. I hok kba lam ta kah nih kshing kom u nah ti ni” tilü ah pyen. 6 Booi Jeishüh noh “Kei hin lama kah thoon kti. Aksang kuunga phi kah thoon kti. Kei hin xün naak ni. Kei üng am ngman ei kti ta ua kkhyaang phi Pa Pangsiima veei am pha khoh. 7 Nang nih-e noh kei nah nih nah hmat u ta kah Pa Pangsiim phi nah nih kshing kkhaie ni. Tuh-a kkhyüh lü Pa Pangsiim nah nih hmuk ktie. Akshinga phi nah nih kshing hnüh ktie” tilü ah pyen. 8 Philip noh “Booi Pao, Pa Pangsiim sun jah mhnüh ma tua. Asun üng ni kah nih mlung hlü ah be bang lo kom” tilü ah nghui naak. 9 Booi Jeishüh noh ta “Philipo, kei nah nih hlonga kah ve hjou hnüh kba. Lüphi tuh veia am nah nih nah hmat ham u mä. Kei nah hmuk kti noh Pa Pangsiim phi hmupääng kti ni. Asun üng ‘Pa Pangsiim sun jah mhnüh ma tua’ tilü i hok kba thoon lü nah pyen ja. 10 Philipo, nang noh Pa Pangsiim jah kei hin amat ni atia am jum ham kti. Kei noh kah ning jah mtheh mkhyah-a kkhyü hin kah päta mkhüh ktüüm am ni. Kei üng amata vek kti Pa Pangsiim noh kei üng poh mshah kti ni. 11 Pa Pangsiim jah kei hin amat atia jum ua. Kah pyen am nah nih nah jum u üng phi kah poh mshah-ea phäh hngoh ta nah üm na-tu ua. 12 Ngngaai ua, kei kah pyen ma kkhai ni. Kei nah jum ei kti noh kah poh mshah-a kba ngshing ngte naak poh kkhai. Asun kba däk am ni. Asuna thaka däm duh ktia phi poh mshah kkhai ni. I lüni ti ta kei kah Pa Pangsiima veei kah sit be hnüh kkhai ni. 13 Nang nih-e noh kah ngming khü lü nah nih tä ei naküt kah ning jah poh peet kkhai ni. Asun üng va Pa Pangsiima jou taai sun sa kpa üng ngshing ngte lok kkhai. 14 Nang nih-e noh kah ngming khü lü i mä nah nih tä ei u ta kah ning jah poh peet kkhai ni.

15 Kei nah nah kphya naak ta kah mkhyah-a thuume phi nah ksang nak kkhai ni. 16 Kei noh kah Pa Pangsiima veei tä sham ngüshe ah nih noh nah nih veeia ning jah kpüi kpak kti mat tüüi lok kkhai. Ah nih sun nah nih hlonga aläa vek kkhai ni. 17 Ah nih sun Pangsiima mong aksanga ngshing ngte shak kti Mkhyangsiim ni. Kho mdek üng shääng ei kti kkhyaange noh ah nih sun am dou ei khoh u. I lüni ti ta ah nih nih-e noh ah nih sun am hmungtu u. Akshinga phi am kshing laang u. Nang nih-e noh ta ah nih nah nih hmat ktie. Ah nih sun nah nih hlonga velü nah nih k'uma phi vaang kkhai. 18 Kei noh nang nih-e hin nga kyah sa-a mäi am ning ta-hüt u ngü. Nah nih veeia kah lobe kkhai. 19 I vei sa am loti hina kho mdek üng shääng ei kti kkhyaange noh kei nah hmulovat kkhaie ni. Nang nih-e noh ta nah nih nah hmube kkhaie. I lüni ti ta kei kah xün kti. Nang nih-e phi nah nih xüng kkhaie ni. 20 Asuna mhnüüp üng ta kei jah kah Pa Pangsiim sun amata kah nih thoona kba nang nih-e jah kei phi nih mat ktie atia nah nih kshing lok kkhaie. 21 Kah thuume ngngaai ngjalü läk lam kti noh nah kphya nak kti. Kei nah kphya nak kti ta kah Pa Pangsiim noh kphya nak kkhai. Kei noh phi ah nih sun mhlä kphya na-ngüshe ah nih üng kah pät sun kah ngshing ngte shak kkhai ni” tilü ah pyen. 22 Jüdah (Jüdah Sakarot am ni) noh “Booi Pao, kho mdek üng shääng ei kti kkhyaange üng käh nghmuh lü kei nih-e däka ning hmuh vaia ta i hok kba thoon khoh kkhai ni” tilü ah kthäh. 23 Booi Jeishüh noh ta “Kei nah kphya nak kti noh kah kkhyü phi nah ksang nak kkhai. Kah Pa Pangsiim noh ah nih sun kphya nak kkhai. Kah Pa Pangsiim jah kei sun ah veeia sit nih ngüshe kah nih ve ei püi yüm shet kkhai. 24 Kei am nah kphya nak kti noh kah kkhyü phi am nah ksang na. Nah nih ngjaak ua msuh mtheh hin kah päta tia kah pyen am ni. Kei nah tüih lok kti Pa Pangsiima kkhyüh lok kti ni. 25 Nah nih hlonga kah ve ham üng ahine hin kah pyen hüt ni. 26 Pa Pangsiim noh keia hmaaia phäh-a ah tüih lo kpüi kpaka thoon kti Mkhyangsiim noh nang nih-e sun abäng ning msuh mtheh kkhaie. Kah pyena kkhyüe phi ning jah shüüm shak kkhai. 27 Diim deih naak nah nih phäh-a kah taak hüt ni. Kah diim deih naak nang nih-e üng kah ning jah peet ni. Kho mdeka ning üng kah ning peet u am ni. Käh sääi siing ua. Pyang ma vai am hlü. Käh kyüh ei ti ua. 28 ‘Kei kah sit kkhai ni. Lüphi nah nih veeia kah lobe kkhai ni’ tilü kah pyen nah nih ngjak ktie. Nang nih-e noh kei nah nih nah kphya naak ksang u ta kah Pa Pangsiima veei kah seh hlüa phäh nah nih je kkhaie. I lüni ti ta Pa Pangsiim sun keia kthaka däm duh bok kti. 29 Am thoon ve ham kyo lüphi tuh-a kah ning jah namtheh ei u. I lüni ti ta athoon ve lo üng nah nih jum vai ua phäh ni. 30 Kei hin nang nih-ea dä kho vei am ngsi ngjaang yah ti ngü. Hina kho mdek up kti sun phalohnüh kkhai. Lüphi kei ta am nah nääng ei. 31 Lüphi Pa Pangsiima nah xüh-a kba kah poh kti. I lüni ti ta kah Pa Pangsiim sun kah kphya naak atia kho mdeka kkhyaangea kshing vaia phäh ni. Kah püieo, nih sit vai u” tilü ah pyen.