12
(Mate 26.6-13; Marküh 14.3-9)
1 Phyong Pooia pha vai mhnüüp kkhyuk ahlü ham üng Booi Jeishüh sun Pet Tanih ngnam Lasarüh-a ima ngkhin vaai kti. Asuna Lasarüh sun thih naaka kkhyüh ah thoh shak bea kkhyaang ni.
2 Ah nih nih-e noh Booi Jeishüh sun akkyäpa ah nih mbei mbook u. Matah noh phi ei ook jah shook tik püi kti. Lasarüh sun phi Booi Jeishüh mah mah-a buh pooia ngshut kti kpa mie üng ngpüi kti.
3 Asun üng Marih noh aphu kküüi pi pi tui ng'uui bäng mat kuung lo püi lü Booi Jeishüh-a khoa kkhaana ah buih. Booi Pa-a kho sun ah lu sham üng ah xuh peet. Im abäng üng tui ng'uui sun ng'uui pyei kti.
4 Booi Jeishüh-a akläke üng ka hnua ta Booi Pa ktuun ei kti Shimona sa Jüdah Sakarot noh ta
5 “Ahina tui ng'uui joih ta she mse kdäm kthum nih yah kkhai. Asun kba jooi lü ampyeen kshe-e üng nih jah yet ta do bok kkhai shü kyo ni” tilü ah him.
6 Ah nih noh ampyeen kshe-e jah mpyeen ei lü asun kba ah pyen am ni. Ah nih sun ampyuk eia thoon kti. Ah nih shum ei yüm u ngui sun bilü ah päta hlü büa ampyua shum ei thak thak kti.
7 Booi Jeishüh noh ta “Poh ei she. Kah thih kona kah puum sha buui lü kah yook ah nih piit pyaang naak vaia ahina tui ng'uui tuh veia ah süm lo ni.
8 Ampyeen kshe-e ta nah nih hlonga anghläia vek kkhaie kyo. Kei ta aläa am ve-ngü.”
9 Booi Jeishüh sun Pet Tanih ngnama ah vea mong Jüdah kkhyaang pä noh ah nih ngjaak lo u üng asua sit ktie. I lüni ti ta Booi Jeishüh däk käh nik ktia, thipääng kti ah mphyün be Lasarüh phi ah nih hmuh hlü ua phäh ni.
10-11 Kkhyaang kho hah pa noh Lasarüh-a thoh bea phäh üng khotu ngsiim kdäme jah not ulü Booi Jeishüh ah nih jum ei u. Asuna thoon lü Lasarüh phi hnim vaia khotu ngsiim kdäme noh ah nih seng kyam lo u.
(Mate 21.1-11; Marküh 11.1-11; Lükah 19.28-40)
12 Akho ngooi üng Booi Jeishüh sun Jeirüh Shalem mlüh da ah lo sun Phyong Pooia lok ktia kkhyaang naküt noh ah nih ngjaak lo u.
13 Nghleeng hnah la-ulü jah ksüng ei khye khye lü Booi Jeishüh dou vaai kkhaia sit ktie. “Hoshana! Pangsiim nih mküüi mtou vai u. Pangsiim noh ah tüih lo hin üng do kya naak vek kti. Isare-ea shang phuhlang üng Pangsiim noh do kya naak pek kti” tilü ngpyaang ktie.
14 Booi Jeishüh noh she la sun hmulü ah ngsum. Sangsiim üng ahin kba kuunga malam pyen ng'yuk kti.
15 “Shion mlüh üng ka kkhyaangeo, käh kyüh ei ua. Bük ua! Nah nih shang phuhlang sun she la ngsum lü bääk lok kti ni” tilü shahma ngsiim mat noh ah pyen hüt.
16 Aksüka ta akläke noh asun am ngngaai kya u. Lüphi Booi Jeishüh thou be lü kkhaan khoa ah kaai be kona ta Sangsiim üng ah mong ahin kba ng'yuk lü thoon velok ksang kti ni atia ah nih shüüm lo be u.
17 Booi Jeishüh noh Lasarüh sun msüm hnün lung khuuia kkhyüh khü lü thih naak üng ah thoh shak be k'um üng Booi Jeishüh-a hlonga vek kti kkhyaang pä noh asuna mong kpyaü hü ktie.
18 Kkhyaange noh asun kba Booi Jeishüh noh mün sam kshe ah poh sun ah nih ngjaak ua phäh-a Jeirüh Shalem mlüh-a ah vaan lo üng ah nih dou daan pyei u.
19 Pharishe-e noh ta “Bük ua, nih nih-e noh i phi am nih khyaih khoh ti u. Kkhyaang abäng ah nih da ngpüi päih ktie ni” tilü ngsi ngjaang ktie.
20 Asuna Phyong Pooi su hjok khah kkhaia Jeirüh Shalem mlüh da sit ktie kkhyaang pä üng Kärih kkhyaange akhäk phi ngpüi ktie.
21 Ah nih nih-e noh Pet Saai Tah mlüh-a ka Kalile hne pa Philipa veei sit ulü “Angvaaio, kei nih-e noh phi Booi Jeishüh kah nih hmu-hlük ktie ni” tilü ah nih nghui naak.
22 Philip noh sit lü asun Anterea veei ah pyen vaai. Ah nih nghngih-a sit nih lü Booi Jeishüh üng ah nih mtheh vaai.
23 Booi Jeishüh noh “Kkhyaang Sa-a jou taai angshing ngte naak vaia ksüün pha lo-hnüh kti” ah ti.
24 Booi Jeishüh noh “Ngngaai ua, kei kah pyen ma kkhai ni. Saang hum nglung mat hin mdeka kyalü am ah sim pyak ta ah saang huma ve-ei kkhai. Ah sim pyak ta nung mja lok kti.
25 Ah päta shak kpaam ei kti noh ah shak shum nak kkhai. Mat mat noh ahina kho mdeka ah shak am ah mseh naak ta angshääia xün naak üng ah hlai ei ni.
26 Kah xüh eia thoon ktia kkhyaang noh kah hnu nah läk yah kkhai. Kah ve naaka va kah xüh ei veyah kkhai. Kah xüh eia thoon kti naküt Pangsiim noh mküüi mtou kkhai ni” tilü ah pyen.
27 Booi Jeishüh noh “Tuh hi kah pyang ma pyei kti. Kei noh i hok kba kah pyen vai ja. ‘Kah Pa Pangsiimo, asuna khui kha kshea kkhyüh nah kuum kyana’ tilü kah tä sham kkhai mä. Am ni! Asuna khui kha kshe sun hmuh ei kkhaia hina kho mdek kkhaana kah lok kti ni.
28 Kah Pa Pangsiimo, nah ngming jou taai mah she” tilü tä sham kti. Asun üng kkhaan khoa kkhyüh “Kah ngming jou taai mah kuung kti. Kah jou taai shak be tü kkhai ni” tilü kthai lok kti.
29 Ah hlonga vek kti kkhyaang pä noh kthai ah nih ngjaak u üng “Kho nghmüüm kti ni” ah nih ti u. Akhäk noh ta “Kkhaan kho ngshä noh ah nih juk ngsi ngjaang lopüi kti ni” tilü ah nih pyen.
30 Booi Jeishüh noh ta “Asuna kthai ah pyen hin keia phäh am ni. Nang nih-ea phäh ni.
31 Tuh hi hina kho mdek kkhyaangea mkhyea phäh jah si jaang vaia ksüün phalo-hnüh kti. Tuh-a hina kho mdek up kti sun Pangsiim noh jah mshot kkhai.
32 Kei hin mdeka khyüh ah nah jäk üng ta kkhyaang naküt kah veeia kah khü kkhai” tilü ah jah mtheh.
33 Booi Jeishüh noh i hok kba ah thih vai sun jah mdan naaka asun kba ah pyen.
34 Kkhyaang päe noh ta “Kah nih Sangsiima thuum üng ta ‘Khrito sun angshääia xüng kkhai ni’ tilü ng'yuk kti. Asun kba athoon ta ‘Kkhyaang Sa jäk kkhaie’ tilü i lü nah pyen ja. Asuna Kkhyaang Sa sun u mjoh ni” tilü ah nih kthäh kkhyah.
35 Booi Jeishüh noh ta “Nah nih kshuunga noong vei kho akvaai veham kkhai. Akvaai ave k'um üng seh naak vai da sit ua. Asun kba am ah ni ta jiin noh ning mü shih khang kkhaie ni. Jiina mü shih-a kkhyaang noh ah seh naak am hmat ei.
36 Akvaaia ve k'um üng akvaai jum ei ua. Asun üng akvaai üng ve soh kyet kti kkhyaangea nah nih thoon kkhaie ni” tilü ah jah msuh mtheh. Kona joong lü käh ah nih hmuh-a ngsüm kti.
37 Booi Jeishüh noh mün sam kshe kho hah pa sun kkhyaang pä ma-a poh kyo lüphi ah nih am jum ei u.
38 Shahma ngsiim Hei Shajah-a pyena kba thoon velok kti. “Booi Pao, kah nih kpyaüa thang u noh jum laang kti ja. Pangsiima kut baana hiit sun ua ma-a ngshing ngte kti ni” tilü Hei Shajah noh ah pyen hüt.
39 Asuna thoon lü ah nih nih-e noh am jum ei khoh u. Hei Shajah noh ah pyen be tü.
40 “Pangsiim noh ah nih mik ah jah mü shak. Ah nih lu phi ah jah sing shak. Asuna thoon lü ah nih mik üng am hmu-u. Ah nih lu phi am nglang khoh. Asuna thoon lü kei noh kah jah mdo be vaia kah veei da am nglat lo u” tilü Pangsiim noh Hei Shajah üng ah pyen shak.
41 Hei Shajah noh Booi Pa-a hlüng taai sun ah nahmu-lü asun kba ah nih-a mong ah pyen.
42 Jüdah khong mange kho hah noh Booi Jeishüh ah nih jum ei lo kyo u. Lüphi Pharishe-e noh ah nih nih-e sun Sangsiim ngthei naak kyonga kkhyüh ah nih jah mshot vai kyüh ei ulü Booi Jeishüh ah nih jum ei sun kkhyaangea ma-a am pyen dat u.
43 Ah nih nih-e noh Pangsiima mküüi mkhyah eia kthaka kkhyaangea mküüi mkhyah ei vai hlü ei bok ktie.
44 Booi Jeishüh noh “Kei nah jum ei kti ta kei däk käh nik ktia, kei nah tüih lok kti phi jum ei kti ni.
45 Kei nah hmuk kti naküt noh nah tüih lok kti sun phi hmuk kti ni.
46 Kei hin kkhyaangea phäh-a akvaaia thoon kkhaia hina kho mdeka kah lok kti. Kei nah jum ei naküt kti anghmüp naaka käh ave ti vaia phi thoon kti ni.
47 Mat mat noh kah kkhyü sun ngja-kyo lüphi am ah nah ksang naak ta kei noh ah nih am si jaang ngü. Kei kah lo hin kho mdek kkhyaange jah si jaang vai am ni. Ah nih nih-e jah thoong khyah kkhaia kah kyum kyalok kti.
48 Kei nah not lü kah kkhyü am ngngaai ngjak ktia kkhyaanga phäh si jaang khong vek kti. Keia pyena kkhyü hin ah nih-a phäh akpäih naaka mhnüüp üng si jaang khonga mäia thoon kkhai ni.
49 I lüni ti ta kei noh kah päta mkhüh ktüüma kah ning jah msuh mtheh am ni. Kei nah tüih lok kti kah Pa Pangsiim ah pät kuung noh i hok kba kah pyen kshak vai sun ah mkhyah mtaang ni.
50 Pangsiima thuum üng angshääia xün naak sun yah ei atia kah hmat kti ni. Asuna thoon lü kah pyena kkhyü hin kah Pa Pangsiima nah xüh shoh-a kba kah ning jah msuh mtheh ni” tilü akthai kdäma ngpyaang kti.