11
Pet Tanih ngnama Lasarüh ngming nak kti kkhyaang mat sun am khyaih ei lo. Pet Tanih su Marih jah ah si Matah vek kti xooi. Marih sun hnua ta Booi Pa Jeishüh-a kkhaana tui ng'uui üng buui lü ah nih-a kho sun ah lu sham üng xuh peet ktia nghnu mi ni. Am khyaih ei kti Lasarüh sun asuna Marih-a na na ni. Matah jah Marih noh Booi Jeishüh-a veei kkhyaang tüüi lü “Booi Pao, nah looi püi kshe hleen kti ni” tilü ah nih pyen vaai shak. Booi Jeishüh noh asun ah ngjaak üng “Ah nih-a am khyaih ei hin thih naak vai am ni. Pangsiima jou taai anglou ngthang vaia phäh ni. Asun üng Pangsiima Sa hlüng taai shak kkhai ni.” Booi Jeishüh noh Matah, Marih jah Lasarüh sun jah mhlä kphya nak kti. Lüphi Lasarüh am ah khyaih ah ngjaak kona asua mhnüüp nghngih om ham kti. Kona akläke üng “Jüdah hne da nih sit be vai u” ah ti. Akläke noh ta “Angvaaio, Jüdah-e noh asua va lung üng ah nih ning khoong hlü tong u sän i vei phi am loham. Tuh-a asu da nah sit hlü be tü ktio” tilü ah nih msääi u. Booi Jeishüh noh “Kho hin naji xalei nghngih vaai kti. Khoa vaai üng sit soon hü kti naküt kho mdek kkhyaangea phäh akvaai sun hmulü am ngshuk ngsheei ei u. 10 Lüphi mü mthana sit soon hü kti ta ah nih üng akvaai am velü ngshuk ei khoi kti ni.” 11 Booi Jeishüh noh asun kba ti ma lü mhläi lü ah pyen be tü ta “Nih nih-ea looi püi Lasarüh ip tong-in kti. Lüphi sit ngüshe kei noh kah mthou vaai be ma kkhai” tilü ah pyen. 12 Akläke noh ta “Booi Pao, ah ih ta do lo be kkhai shü ni” ah nih ti be u. 13 Booi Jeishüh noh ta Lasarüh-a thih-a mong sun pyen kyo kti. Akläke noh ta ih hmüüna ip kti ah pyena ah nih ngngaih u. 14 Asun üng ta Booi Jeishüh noh “Lasarüh thik kti. 15 Lüphi kei asua am kah ve nang nih-ea phäh-a do kti ni. Asun üng nah nih nah üm pa nah lok kkhaie. Ah veeia nih sit vai u” tilü angtea ah jah mtheh. 16 ‘Angphia’ ah nih shui Tomah noh ah püie üng “Ah nih-a dä thih yüm vaia nih nih-e phi nih sit vai u” tilü ah jah xüh.
17 Booi Jeishüh noh ah pha vaai üng Lasarüh ah nih mkhyüh u mhnüüp kphyü lohnüh ktia ah ngjaak lo. 18 Pet Tanih ngnam jah Jeirüh Shalem mlüh sun määng nghngih am suum tang. 19 Jüdah khong mange kho hah lo-ulü Matah jah Marih-a na na thih-a phäh jah huum sheei lopüi ktie. 20 Matah noh Booi Jeishüh-a lo vai ngja-lüta ima kkhyüh joong lü dou vaai kkhai sit kti. Marih ta ima vehüt kti. 21 Matah noh Booi Jeishüh üng “Booi Pao, ahia nang nah vea ta kah na hin am thi kyo. 22 Ahin kba thoon ve kyo lüphi nang Booi Pa noh Pangsiim nah nghui naak ta jah poh peet kkhai atia tuh phi kah kshing kti ni” tilü ah pyen. 23 Booi Jeishüh noh “Nah na thou lobe kkhai ni” ah ti. 24 Matah noh ta “Ah nih hin akpäih naaka mhnüüp üng xüng be kkhai atia kah jum kti ni” tilü ah mshak be. 25 Booi Jeishüh noh “Kah pät hin thoh naak be ni. Xün naaka phi kah thoon kti. Kei nah jum ei naküt kti ta thipääng lüphi xüng ei lä kkhai ni. 26 Kei nah jum ei lü xüng lü ve naküt ktie phi itüh-a phi am thi ti u. Nang noh asun nah jum kti mä” tilü Matah ah kthäh. 27 Matah noh “Ä, Booi Pao, nang hin Pangsiima Sa, hina kho mdeka lok kti Khritoa nah thoon sun kah jum kti ni” tilü ah pyen be. 28 Matah noh asun kba pyen ma lü ima sit be lü ah na Marih sun ampyua khü lü “Booi Jeishüh pha lohnüh kti. Ning hmu-hlük kti ni” tilü ah mtheh vaai. 29 Marih noh asun ah ngjaak üng ngdüüi lokshet lü Booi Jeishüh-a veei sit kti. 30 Booi Jeishüh ngnam k'uma am vaang loham. Matah-a dä ah nih ngthuh ei naaka ve-ei ham kti. 31 Im k'uma velü huum sheei püi kti Jüdah-e noh Marih ahunata ngdüüi lolü ah seh ah nih hmuh u. Msüm hnün lung khuuia sit lü kyap vaai hlük ktia shui u lüta ah hnua ah nih läk u. 32 Marih sun Booi Jeishüh-a veei phalü hmuvaai lü ah kho ma-a ngbok lü “Booi Pao, nang ahia nah vea ta kah na am thik kkhai shü” ah ti. 33 Booi Jeishüh noh Marih jah ah nih läk lok kti Jüdah-e ah nih kyah u sun jah hmulü ah mlunga ngja-ei lopyei lü ktha she tong kti. 34 Booi Jeishüh noh “Ah nih sun hoa nah nih mkhyüh u ni” tilü ah jah kthäh. Ah nih nih-e noh ta “Booi Pao, bük loa” ah nih ti u. 35 Booi Jeishüh ah kphyü tui kyalok kti. 36 Jüdah kkhyaange noh “Bük ua, ah nih noh Lasarüh sun i hlooka mhlä kphya nak kti ni” ah nih ti u. 37 Akhäke noh ta “Ah nih hin ah mik mü phi vaai shak be kti. Lasarüh phi käh thik kkhaia khyaih khoh kkhai kyo ni bäi” tilü ah nih pyen u. 38 Asun üng Booi Jeishüh sun ah ktha she lopyei be tü lü msüm hnüna sit kti. Asua ah nih mkhyüh naak lung khuui sun lung ngbaü nu üng ngkhaai ei kyet kti. 39 Booi Jeishüh noh “Lung hin mtheih lü nghmong ua” tilü ah mkhyah. Akthi päänga si Matah noh ta “Booi Pao, ngthung lü thu-pyei hnüh kkhai ni. Kah nih mkhyüh naak mhnüüp kphyü lohnüh kti” tilü ah mtheh. 40 Booi Jeishüh noh “Nah jum ei ta Pangsiima jou taai ngshing ngte naak nah hmuk kkhai ni tilü kah ning mtheh hüt kti am ni bä” tilü ah pyen be. 41 Asun üng lung sun ah nih mtheih u. Booi Jeishüh noh kkhaan kho da mang lü “Kah Pa Pangsiimo, kah tä sham nah nah ngngaih ngjaaka phäh kah ning je ei pi pi ni. 42 Nang Pa Pangsiim noh kei aläa nah nah ngngaai ngjak kti ati sun kah hmat kti. Lüphi nang Pangsiim noh kei nah nah tüih lo atia ahin üng vek ktie noh ah nih jum ei lo vai ua asun kba kah pyen ni” tilü ah tä sham. 43 Kona “Lasarüh-o, lut loa” tilü ngpyaang lü Booi Jeishüh noh ah khü. 44 Asun üng ta thi-pääng kti sun lut lolü ah kut khoe phi nghloop ei ham kti. Ah hmaai phi jih üng ngsüüp ei ham kti. Booi Jeishüh noh “Hloop naak jih-e jah shuut peet ua. Ima sit be she” ah ti.
(Mate 26.1-5; Marküh 14.1-2; Lükah 22.1-2)
45 Marih läk lok kti Jüdah kkhyaang kho hah pa noh Booi Jeishüh-a poh mshah hmu-ulü ah nih jum ei lo u. 46 Akhäke noh ta Pharishe-ea veei sit ulü Booi Jeishüh-a poh mshah sun ah nih jah mtheh vaai u. 47 Asun üng ta Pharishe-e jah khotu ngsiim kdäm boke sun noh kong si ngkhääm naak ah nih khü. Ah nih nih-e noh “I hok kba nih poh vai u ni. Ah nih noh ah poh mün sam kshe kho hah nah nih hmat ktie am ni bä. 48 Nih nih-e noh ah nih hin asun kba nih hläh-in u ta kkhyaang naküt noh jum lok kkhaie ni. Asun üng Romah Booie noh phi nih pe sun sha lü jah nääng ei na-ulü nih hjok khah im nu phi ksim kpyak lok kkhaie ni” ah nih ti u. 49 Ah nih nih-e üng ka asuna kuma phäh khotu ngsiim kdäm boka ah nih msoon u Kaai Phah ngming nak kti noh ta “Nang nih-e hin nah nih nghmoong ktie ni. 50 Nih pea bänga sim pyak naak vaia kthaka asuna kkhyaang mat sun Jüdah kkhyaang luuma phäh-a ah thih ta do hlü bok kti ni. Am nah nih hmat ei ktie mä” ah ti lo. 51 Aksanga ta asun kba ah pät noh ah pyen ei lo am ni. Ah nih sun tuh-a kuma phäh khotu ngsiim kdäm boka ah thoona phäh-a “Jeishüh sun Jüdah kkhyaangea nghnün üng thi yah kkhai ni” tilü malam vai pyen kti. 52 Booi Jeishüh Jüdah mjüe däka phäh thik kti am ni. Kho mdek üng vehü naküt kti Pangsiima saea ngkhääm naak be vaia phi thoon kti. 53 Asun mhnüüp üng sut ei lü Jüdah khong mange noh Booi Jeishüh hnim vaia seng kyam lok ktie. 54 Asuna thoon lü Booi Jeishüh sun Jüdah hnea käh pou dang pyei lü sit hü kti. Jüdah hnea kkhyüh shot lü mkyaanga pei da sit kti. Asua Ephyam mlüh-a akläkea dä vek kti. 55 Jüdah-ea Phyong Pooi vai säh lohnüh lüta Isare teng pe üng ka kkhyaange naküt Jeirüh Shalem mlüh-a ngkhääm lok ktie. Asua Phyong Pooi hlaana ngsiim ngsaih naak sun ah ning sho üng poh mshah ktie. 56 Kkhyaange noh Booi Jeishüh ah nih hjam hü u. Hjok khah im nua ah nih ngkhääm sun üng “I hok kba nah nih ngngaai ktie ja. Ah nih sun Pooia am lo shoom” tilü mat jah mat ngsi ngjaang ktie. 57 I lüni ti ta khotu ngsiim kdäm jah Pharishe-e noh Booi Jeishüh ah nih man hlü u. Asuna thoon lü Booi Jeishüh hoa ah ve hmat ktia kkhyaang noh ah nih nih-e üng jah mtheh vaai vaia mkhyah kuung kuung u.